Kontziliazio Plana kudeaketa-tresna bat da, eta aukera ematen dio erakunde bati bere helburuak, neurriak eta jarduerak modu ordenatuan zehazteko, bere langileen bizitza pertsonala, familiakoa eta lanekoa uztartzea errazteko.

Planak erakundearen errealitatea eta langileen beharrak ezagutzea izan behar du abiapuntu. Azterketa horretatik abiatuta, aukera ematen du dauden neurriak eta hobetzeko beharrak identifikatzeko, jarduketa berriak zehazteko, epeak eta erantzukizunak ezartzeko eta ezarritako neurriak nola komunikatu, jarraitu eta ebaluatuko diren zehazteko.

Aldizkako jarraipenak aukera ematen du haren erabilera eta emaitzak ezagutzeko, behar berriak hautemateko eta Plana erakundearen errealitatera egokituta mantentzeko beharrezko egokitzapenak egiteko

Edozein enpresak edo erakundek egin dezake kontziliazio-plan bat, haren tamaina, forma juridikoa edo jarduera-sektorea edozein dela ere. Neurriak plantillaren beharretara eta antolakuntzaren eta lanpostuen ezaugarrietara egokitu beharko dira.

Plana berdintasunaren eta erantzukidetasunaren ikuspegitik egin behar da, neurriak beharrezkoak dituzten pertsonentzat irisgarriak izan daitezen ahaleginduz, eta neurriok diseinatzeak edo erabiltzeak genero-desberdintasunak sortzea edo errepikatzea saihestuz.

Kontziliazio Plana egiteko tresnak

Kontziliak bi baliabide jartzen ditu erakundeen eskura prozesu hori errazteko:

• Autodiagnostikoa: erakundeak kontziliazioaren arloan duen egoera ezagutzeko aukera ematen du, hainbat galdera-multzoren bidez. Erantzunetatik abiatuta, ebaluazio bat lortzen da, hobetzeko aholku eta orientabideekin batera.
• Nire Kontziliazio Plana: erakundea gidatzen du bere Kontziliazio Plana diseinatzeko beharrezkoak diren faseen bidez, eta plan hori egiteko laguntza-materialak ematen ditu.