Zer da ABSa eta zein dira haren sintomak?

• Arnas birus sinzitiala (ABS) oso birus arrunta da, eta infekzioak eragiten ditu arnasbideetan, maizago urritik apirilera bitartean. Adingabeetan bronkiolitisarekin eta pneumoniarekin lotu ohi den arren, helduei ere eragin diezaieke, batez ere adinez nagusi direnei edo aldez aurreko osasun-arazoak dituztenei.
• Heldu gehienetan, katarro arin bat bezala agertzen da infekzioa, eta sintoma hauek ditu: kongestioa edo muki jarioa, eztarriko mina, eztula, nekea eta sukar arina.
• Hala ere, adineko pertsonen kasuan (batez ere 75 urtetik aurrera) edo bihotzeko, nahiz biriketako gaixotasun kronikoak, edo immunosupresioa dituzten pertsonen kasuan, ABSak arnas infekzio larriagoak eragin ditzake, hala nola bronkitisa edo pneumonia.
• Gainera, aurretiko gaixotasunak okerragotu ditzake, asma, BGBK edo bihotzgutxiegitasuna modukoak.

Zein da inkubazio- eta kutsatze-aldia?

• Inkubazio-aldia (kutsatzearen eta sintomak agertzearen arteko denbora) 2-8 egunekoa izaten da, normalean 4-6 egunekoa.
• Kutsatze-aldiak 3-8 egun iraun ohi du, baina haurtxoen eta immunitate-sistema ahulduta duten pertsonen kasuan 4 astera arte luza daiteke, baita sintomak desagertu ondoren ere.

Nola hedatzen edo transmititzen da ABSa?

• Kutsatutako pertsona batek eztul egiten duenean, doministiku egiten duenean edo hitz egiten duenean zabaltzen da batez ere ABSa airearen bidez, birusa duten tanta txikiak askatuz.
• Кutsatutako gainazalak ukitu eta eskuak ahora, sudurrera edo begietara eramatean ere transmititzen da.

Nor txertatu daiteke?

• Osakidetzak finantzatutako txertaketa jasotzeko, baldintza hauek bete behar dira:
• Biriketatik transplantatutako pertsonak, transplantea egin zenetik igarotako denbora edozein dela ere.
• Azken bi urteetan zelula ama hematopoietikoen transplantea (ZAHT) edo antigeno-hartzaile kimerikodun T zelulen bidezko terapia jaso duten pertsonak, tratamendua egin denetik edo ZAHT egin denetik 6 hilabete igaro ondoren.

Zein albo-ondorio gerta daitezke ABSren aurkako txertoa jaso ondoren?

• Txertoak segurtasun-profil ona du. Kontrako erreakzio ohikoenak arinak edo ertainak izaten dira, eta egun gutxitan desagertzen dira.
• Beste txerto batzuekin bezala, txertaketaren ondoren erreakzio lokalak sor daitezke, eta gutxiagotan nekea, mialgia, zefalea, artralgia edo sukarra eragin dezakete.