Oro har, Lanbideko zuzendaritza exekutiboek (horien barruan dago Enpresa eta Ekintzailetza Zuzendaritza) honako funtzio hauek beteko dituzte:

• Atxikita dituzten zerbitzuak zuzentzea, planifikatzea, koordinatzea eta bultzatzea.
• Beren jardun-eremuko gaiak ebaztea; horrek ez du eragotziko administrazio-ahalmenak egikaritzeari buruz xedatutakoa, zeina estatutu hauen arabera ahalmen hori esleituta duen administrazio-organoari baitagokio.
• Bere jardun-eremuan hizkuntza ofizialak erabiltzeko irizpideak eta administrazio-kontseiluak onartzen dituen planak betetzen direla zaintzea, bai eta haien jarraipen eta ebaluazio egokia egiteko laguntzea ere.
• Bere jardun-eremuan zuzendaritza nagusiari proposamenak egitea, eta organo horri eskatzen dizkion gai guztien berri ematea.
• Bere jardun-eremuan ordainketak agintzea.

Bereziki, Enpresa eta Ekintzailetza Zuzendaritzari honako funtzio hauek dagozkio:

• Enplegu-eskariaren eta enplegu-zerbitzuen erregistroa diseinatzea eta kudeatzea, bai eta Euskal Enplegu Sareak enpresa eta erakunde enplegatzaileei zuzendutako zerbitzuak ematea ere, haien eskubideak bermatuz eta betebeharrak betetzen direla ziurtatuz; hori guztia, foru-aldundiei eta toki-erakundeei dagokien kudeaketari kalterik egin gabe.
• Enpresen eta erakunde enplegatzaileen artean Lanbide-Euskal Enplegu Zerbitzu Publikoaren zerbitzuen erabilera sustatzea; horretarako, Euskal Autonomia Erkidegoko jarduera ekonomikoan eta sozialean eragina duten eragileekin harreman sistematikoa izan beharko du.
• Europar Batasuneko Eures (Europako Enplegu Zerbitzuak) sareari dagozkion funtzioak egikaritzea.
• Autoenplegurako, ekintzailetzarako eta gizarte-ekonomia sustatzeko aholkularitza ematea, bai eta kontratazioa bultzatzeko eskura dauden pizgarriei eta neurriei buruzkoa ere.
• Izaera orokorreko zein sektorialeko prestakuntza-beharrak antzemateko orduan, enpresekin eta erakunde enplegatzaileekin lankidetza sustatzea.
• Arreta-, informazio- eta prospekzio-tresna erkideak diseinatzen eta mantentzen laguntzea.
• Enpresen eta ekoizpen-ehunaren egungo eta etorkizuneko beharren jarraipena egiteko metodologiak diseinatzea, planifikatzea eta kudeatzea.
• Oro har, enpresei eta erakunde enplegatzaileei arreta ematea, enplegu duina sortzen duten ekimenak babestu eta sustatzeko, enpresak sortzen laguntzeko eta kontratazioa bultzatzeko programen kudeaketa barne. Aurreko idatz-zatian xedatutakoak ez die kalterik egingo Lanbide-Euskal Enplegu Zerbitzu Publikoaren zuzendaritza-organoei eta Administrazio eta Zerbitzu Orokorren Zuzendaritzari kontratazio-organo gisa dagozkien funtzioei, ezta deialdiak onartzeko, dirulaguntzak emateko eta, hala badagokio, lankidetza-tresnak izenpetzeko organo eskudun gisa dituzten funtzioei ere.