Arautegia

Inprimatu

AGINDUA, 2000ko azaroaren 16koa, Hezkuntza, Unibertsitate eta Ikerketa sailburuarena, Derrigorrezko Bigarren Hezkuntzaren ikasketa-planean hautaketa egiteko aukerak arautzen dituen 1996ko uztailaren 16ko Agindua aldatzen duena.

Identifikazioa

Lurralde-eremua: Autonomiko
Arau-maila: Agindua
Organo arau-emailea: Hezkuntza, Unibertsitate eta Ikerketa Saila
Jadanekotasuna-egoera: Indarrean

Aldizkari ofiziala

Deskargatu (PDF)

Aldizkari ofiziala: EHAA (Euskal Herria)
Aldizkari-zk.: 14
Hurrenkera-zk.: 238
Xedapen-zk.: ---
Xedapen-data: 2000/11/16
Argitaratze-data: 2001/01/19

Gaikako eremua

Gaia: Hezkuntza; Administrazioaren antolamendua
Azpigaia: Herri Administrazioa

Deskribapenak

Testu legala

Aurkibidea erakutsiAurkibidea ezkutatu

- XEDATU DUT :
- AZKEN XEDAPENA

Irailaren 26ko 191/2000 Dekretuak aldatu egin du urtarrilaren 23ko 25/1996 Dekretua; izan ere 191/2000 Dekretuaren eranskinean xedatu da Derrigorrezko Bigarren Hezkuntzaren Bigarren Zikloan irakasten diren hainbat arlo eta gaien ordutegia aldatzea. Aldaketa horren ondorioz, beste hainbat aldaketa egin behar dira Derrigorrezko Bigarren Hezkuntzaren ikasketa-planean hautaketa egiteko aukerak arautzen dituen 1996ko uztailaren 16ko Aginduan (abuztuaren 9ko EHAA). Beraz, alde batetik, Derrigorrezko Bigarren Hezkuntzako ikastetxeek derrigorrean eskaini behar dituzten gaiak zehazten dira, eta bestetik, institutu bakoitzaren eskaintza onartzeko prozedura onartzen da.

Derrigorrezko Bigarren Hezkuntzan, eta bereziki, Bigarren Hezkuntzako Bigarren Zikloan aurreikusitako helburuak zenbateraino lortzen diren aztertzeko orain arte egin diren ebaluazio guztiek honakoa adierazten dute: batetik, ikasleek hutsune handiak dituztela enborreko arloetan, eta, beraz, beharrezkoa dela oinarrizko jakintzagaiak indartzea, eta horretarako, errefortzurako orduak erabiltzea proposatzen dute, ikasleek zikloko gutxienezko helburuak lor ditzaten. Bestetik, ebaluazioen emaitzen arabera, aukerazko ikasgaiak gehiegi dira, horietako batzuk ez dirudite benetan baliagarriak, eta, gainera, ez dute zerikusi handirik ikasleei benetan interesatzen zaienarekin. Guzti horregatik, aukerako jakintzagaien arloa berrantolatu beharra ikusten da, ikasleei oinarrizko prestakuntza ziurtatuko dien eta ikasleek lanbide-asmoak garatzeko lagungarri izango diren ikasgaien arabera antolatuz arlo hori.

Era berean, kontuan hartzen bada Giza-Zientzien eta Etikako hausnarketen gaineko diziplinak jasaten ari diren bazterketa, derrigorrezkoa ikusten da jakintza arlo horiek berreskuratzea; izan ere, jakintza arlo horiek ezinbesteko tresnak dira adimen trebetasunak garatzeko eta bizitzarako hainbat balore eta jarrera eskuratzeko, batez ere gizarte zientziekin, kultura klasikoarekin eta etikarekin zerikusia duten balore eta jarrerak, horien bitartez lortuko baitugu geureganatzea geure ondare kulturalaren oinarriak, bai ikuspuntu faktikotik bai ikuspuntu idealetik.

Guzti hori kontuan izanda, honakoa

XEDATU DUT :

1. artikulua – 1996ko uztailaren 16ko Aginduko 1.2 artikulua honela idatzita geratuko da: "Hala ere, bigarren zikloko bigarren kurtsoan ikasleek bi gai aukeratu beharko dituzte Natur Zientzien, Plastika eta Ikus-hezkuntzaren, Musikaren, Teknologiaren eta Kultura Klasikoaren arloetan, agindu honetako 2.4. paragrafoan xedatutakoa kaltetu gabe".

2. artikulua – 1996ko uztailaren 16ko Aginduko 1.3 artikulua ezabatu egiten da.

3. artikulua – 1996ko uztailaren 16ko Aginduko 1.2 artikulua honela idatzita geratuko da: "Bigarren Hezkuntzako ikastetxeek "Bizitza morala eta gogoeta etikoa" idazpurupean sartzen diren edukiak antolatu ahal izango dituzte, Gizarte-zientzien arloaren barruan, etapako bigarren zikloko bigarren kurtsoko gai espezifiko gisa, "Etika" izenarekin. Jakintzagai hau Filosofiako irakasleek irakatsiko dute eta jakintzagai honek berariazko ebaluazioa izango du, beste jakintzagaiengatik bereizia.

4. artikulua – 1996ko uztailaren 16ko Aginduko 7.1 artikulua honela idatzita geratuko da: "Ikasleek aukerakotasunaren tokian sartzen diren gaiei eskainiko dien denbora 140 ordukoa izango da, gutxienez, lehen zikloan eta 210 ordukoa bigarren zikloan.

5. artikulua – 1996ko uztailaren 16ko Aginduko 12. artikulua ezabatu egiten da.

6. artikulua – 1996ko uztailaren 16ko Aginduko 19.1 artikulua honela idatzita gertatuko da: "Ikastetxeek eskainiko duten hautazko gaien multzoaren iraupena ziklo bakoitzeko izango da. 280 ordu gutxienez lehenengo zikloan eta 420 ordu gutxienez bigarrenean. Eskabideetatik abiatuta antolatu ahal izango dira taldeak, gutxienez 15 ikasle eskatuz gero. Talde arruntak %50ean gehituz gero ateratzen den emaitza izango da taldeen kopurua, gehienez ere. Zenbakiak goiko zenbaki osorantz borobilduko dira".

7. artikulua – DBHko bigarren zikloko Gaztelania eta Literatura, Euskal Hizkuntza eta Literatura, Atzerriko Hizkuntza eta Matematikentzako errefortzu-orduak egongo dira. Errefortzu-orduak jartzeko baldintzak aurrerago zehaztuko dira, eta 2000ko urtarrilaren 12ko Aginduan (urtarrilaren 20ko EHAA) xedatutako aurreikuspenak kontuan hartuta jarriko dira.

8. artikulua – Ikasleak aukera izango du ikastetxeak eskaintzen dituen aukerako jakintzagaien artetik hiru aukeratzeko bigarren zikloan zehar, baina hiru horietako bat Gizarte-Zientzien arlokoa izan beharko da, eta gainontzeko biak ikasleak berak aukeratutakoak.

AZKEN XEDAPENA

Agindu hau Euskal Herriko Agintaritzaren Aldizkarian argitaratu eta hurrengo egunean sartuko da indarrean.