Gizarte Zerbitzuak

1. Dekretu honen xedea da erlezaintza antolatzea eta gutxieneko higiene- eta osasun-betekizunak ezartzea erlezaintzako ustiapeneko erauzte- eta ontziratze-lokaletarako.

2. Dekretu honetan jasotako xedapenak Euskal Autonomia Erkidegoko lurralde-esparruan dauden ustiategietan aplikatu beharko dira, baldin eta ekoizpen primarioa eta lotutako honako eragiketa hauek egiten badituzte:

   1. Erlezaintza bera. Erlauntzak maneiatzearekin lotutako jarduera guztiak barne hartzen ditu, baita erlauntzak ustiategiko instalazioetatik urrun egonda ere.

   2. Eztia eta erlezaintzako beste produktu batzuk zentrifugatzea, erauztea, ontziratzea eta enbalatzea ustiategiko instalazioetan bertan.

1. Dekretu honen ondoreetarako, honako definizio hauek aplikatuko dira:

   1. Erlekumea: eztia ekoizten duten erleen (Apis mellifera) kolonia da.

   2. Erlauntza: erlekumeak, hura hartzen duen ontziak eta hark bizirauteko berezko eta beharrezkoak diren elementuek osatzen dute.

   3. Erlezaintza-kokagunea: erlategia kokatzeko tokia, loreak aprobetxatzeko edo negua igarotzeko.

   4. Erlategia: erlauntz-multzoa, titular batena edo gehiagorena, kokagune berean kokatua.

   5. Erlategi abandonatua: erlauntzen % 50 baino gehiago hilik dituen erlategia.

   6. Erlauntz hila: elementu bizien (intsektu helduak eta kumeak) jarduera biologikorik ez daukan erlauntza.

   7. Erlezaintza-ustiategia: edozein instalazio, eraikuntza edo toki, baldin eta eztia ekoizten duten erleak (Apis mellifera) eta horien erlauntzak erlategi batean edo gehiagotan banatuta badauzkate, eta horiek hazten, maneiatzen eta jendaurrean jartzen badira.

   8. Erlezaintza-ustiategiaren titularra: erlezaintza-jarduera garatu eta jarduera kudeatzeari lotutako arrisku eta erantzukizunak bere gain hartzen dituen pertsona fisikoa edo juridikoa.

   9. Koordenatu geografikoak: X eta Yn adierazitako koordenatuak, EPSG:25830 proiekzio-sistema bidez (Ardatza UTM:30 N. Datum:ETRS89).

   10. Erleen arraza-ekotipo autoktonoa: Apis mellifera iberiensis, erle beltz iberiarra.

1. Erlezaintza-ustiategien sailkapen zooteknikoari erreparatuz, ustiategi horiek honela sailkatzen dira:

   1. Ekoizpenekoak: eztia eta beste erlezaintza-produktu (EP) batzuk ekoizten dituzte.

   2. Hautapen eta hazkuntzakoa: erleak hazi eta hautatzen dituzten (HH) erlezaintza-ustiategiak dira.

   3. Ingurune naturalaren polinizazioa: jarduera nagusia basa-landaredia polinizatzea da, ingurune osoaren balio ekologikoa indartuz (PN).

   4. Mistoak: aipatutako sailkapeneko jarduera bat baino gehiago pareko garrantziarekin tartekatzen dituzte (MS).

   5. Beste batzuk: aurreko ataletako sailkapenetara egokitzen ez direnak (BB).

2. Erlauntz-kopuruari erreparatuz, erlezaintza-ustiategiak honela sailkatzen dira:

   1. Profesionalak: 150 erlauntz edo gehiagoko ustiategiak.

   2. Ez profesionala: 150 erlauntza baino gutxiago dituzten ustiategiak.

   3. Etxekoak: gehienez ere 15 erlauntz dituztenak, otsailaren 25eko 50/2025 Dekretuan xedatutakoarekin bat.

   4. Autokontsumokoa: ustiategi horietan lortutako erlauntzetako produktuak soilik familia-mailan kontsumitzen dira. Horrelako ustiategietako gehieneko erlauntz-kopurua ezingo da 15 baino gehiagokoa izan.

3. Erlauntzen kokapenari erreparatuz, erlezaintza-ustiategiak honela sailkatzen dira:

   1. Erlezaintza-ustiategi transhumantea: erlezaintza-ustiategi horiek urtean zehar kokagune batera edo bestera lekualdatzen dituzte erlauntzak.

   2. Erlezaintza-ustiategi egonkorra: erlezaintza-ustiategi horietan erlauntzak leku berean daude urte osoan zehar.

1. Erlezaintza-ustiategien erregistroak Arabako, Bizkaiko eta Gipuzkoako lurralde historikoetako foru-organoen abeltzaintzako erregistroen barruan egongo dira.

2. Erlezaintza-ustiategiek ezingo dute euren jarduera martxan jarri erregistratuta egon barik eta dagokion identifikazio-kodea jaso barik, martxoaren 26ko 479/2004 Errege Dekretuaren 3.9 artikuluan xedatutakoarekin bat.

3. Dagokion erlezaintza-ustiategien erregistroan inskribatzen den unean, erlezaintza-ustiategi bakoitzari identifikazio-kode bat esleituko zaio, Abeltzaintzako Ustiategien Erregistro Orokorra ezarri eta arautzen duen martxoaren 26ko 479/2004 Errege Dekretuaren 5. artikuluan xedatutakoa betez.

4. Dagokion lurralde historikoko foru-organoko erlezaintza-ustiategietan datuak inskribatzeko eta aldatzeko eskabideen izapidetzea lurralde historiko bakoitzak ezarritako moduan egingo dira, Administrazio Publikoen Administrazio Prozedura Erkidearen urriaren 1eko 39/2015 Legearen 14. artikuluan xedatutakoaren arabera.

1. Erlezaintza-ustiategi egonkorren titularrek erlauntzak Euskal Autonomia Erkidegoko lurralde bakarrean edo anitzetan badute, erlauntzak dituzten lurralde historikoan nahitaez izena emateko eskaera egin beharko diote agintari eskudunei, jarduera hasi aurretik.

   Erlezaintza-ustiategi transhumanteen titularrek Euskal Autonomia Erkidegoko lurralderen batean helbide fiskala izanez gero, helbide fiskala duten lurralde historikoaren dagokion agintari eskudunen aurrean nahitaez eman beharko dute izena erlezaintza-ustiategien erregistroan, jarduera hasi aurretik.

2. Izen emateko eskaera horrek 209/2002 Errege Dekretuaren 5.2 artikuluan adierazten den gutxieneko informazioa jasoko du, hau da:

   1. Ustiategiaren titularren datuak: izen-abizenak, NANa eta sexua, pertsona fisikoak badira; eta sozietatearen izena edo izendapen soziala, pertsona juridikoen kasuan; bazkideen identifikazioa, sexua, helbidea, nazionalitatea, identifikazio fiskaleko zenbakia, posta-kodea, udalerria, lurralde historikoa eta telefonoa zehaztu beharko dira, bi kasuetan.

   2. Ustiategiarekin lotutako beste titular batzuen datuak: izen-abizenak edo izendapen soziala, IFZa edo IFKa eta ustiategiarekin daukan harremana. Pertsona fisikoak badira, sexua.

   3. Kokagune nagusiari buruzko datuak: helbidea, posta-kodea, udalerria eta lurralde historikoa.

   4. Autokontsumorako ustiategia den edo ez azaltzeko argibideak.

   5. Ekoizpen-sistemaren araberako sailkapena: transhumantea edo egonkorra.

   6. Iraunkortasun- edo autokontrol-irizpideen araberako sailkapena: ustiategi ekologikoak, integratuak edo arruntak.

   7. Errolda eta eguneratze-data.

   8. Hala badagokio, defentsa sanitarioko taldearen identifikazio-kodea, izen soziala, helbidea, posta-kodea, udalerria eta lurralde historikoa.

3. Aurreko paragrafoan jasotako informazioaz gain, eskaerak honako informazio hau izan beharko du:

   1. Ustiategiaren sailkapen zooteknikoa, dekretu honen 3. artikuluaren arabera.

   2. Ustiategiaren kokaguneen eta instalazioen kokapen nominala eta kartografikoa.

   3. Ustiategiko azpiespezieen identifikazioa:

      Apis mellifera iberiensis, erle beltz iberiarra.

      Apis mellifera mellifera, erle beltz europarra.

      Apis mellifera lingustica, erle italiarra.

      Apis mellifera carnica, erle karnikoa.

      Apis mellifera caucasica, erle kaukasiarra.

      Buckfast erlea.

      Beste arraza garbi batzuk (aipatu).

      Beste arraza hibrido batzuk (aipatu).

      3. Erauzketarako eta ontziratzeko lokalaren kokapen nominala eta kartografikoa, soilik erlezaintzako produktuen erauzketa eta ontziratzea erlezainaren instalazioetan egiten badira edo erlezainak berak egiten baditu.

         4. Erlezaintzatik datozen eztia eta beste produktu batzuk erauzteko, zentrifugatzeko, ontziratzeko eta enbalatzeko lokalak dituzten erlezaintza-ustiategiek, ustiategiaren bulegoetan badaude, honako agiri hauek aurkeztu beharko dituzte eskabidearekin batera:

            1. Deskribapen-memoria, bertan, erauzteko eta ontziratzeko lokalaren plano bat jasoko da.

            2. Instalaziorako eta jarduerarako beharrezkoa izatekotan, jarduera sailkatuaren lizentzia, otsailaren 25eko 50/2025 Dekretuan xedatutakoaren arabera.

      6. artikulua Datuak aldatzea.

      1. Erlezaintza-ustiategien titularrek, iskribatutako lurralde historikoko foru-organoko erlezaintza-ustiategien erregistroaren aurrean, bertan jasotako datuen edozein aldaketa jakinarazi beharko dute, eta, zehazki, honako hauei lotutakoak:

         1. Titulartasun-aldaketa.

         2. Erlauntzen mugimendua ustiategien artean.

         3. Ustiategiko erlauntz- eta erlategi-moten eta -kopuruaren aldaketa.

         4. Jarduera etetea.

         5. Jarduera azkentzea.

         6. Erauzketarako lokalaren kokapen-aldaketa, soilik erlezaintzako produktuen erauzketa eta ontziratzea erlezainaren instalazioetan egiten badira.

         7. Transhumantzia-eragiketak, 14. artikuluan zehaztutako baldintzetan.

      2. Aldaketak 15 eguneko gehieneko epean jakinarazi beharko dira, aldaketa eragin duen gertakaria gertatzen denetik zenbatzen hasita, eta betiere erlauntzen transhumantzia-mugimenduak egin aurretik. Hala ere, inskribatutako lurralde historikoko foru-organoko agintari eskudunek egiaztatuko dute bertan jasotako datuak eguneratuta daudela.

      3. Erlezaintzako ustiategien erregistroko inskripzioa aldatzen, eteten edo azkentzen bada, horren berri emango zaio titularrari, hori gertatu eta gehienez ere 15 eguneko epean.

      7. artikulua Erlauntzen identifikazioa.

      1. Gatibu dauden lehorreko zenbait animalia-espezieren trazabilitate-, identifikazio- eta erregistro-sistema arautzeko xedapenak ematen dituen urriaren 17ko 787/2023 Errege Dekretuaren 13. artikuluan xedatutakoa betez, ustiategien titularrek erlauntza bakoitza ustiategiaren kodearekin identifikatu beharko dute, modu ikusgarrian eta irakurtzeko moduko leku batean, marka ezabaezin baten bidez.

         Ustiategian gehitutako erlauntza jatorrizko ustiategiaren kodearen bidez markatuta badago, kode hori mantendu egingo da eta erlauntza kode berriarekin agertuko da, eta horrela hurrenez hurren, aldaketa berriak badaude.

      2. Identifikazio-marka ugalketa-ganberaren aurrealdean edo atzealdean jarri beharko da, agerian beti; markak ez du estalkia ixtea eragotziko.

      8. artikulua Erlategien seinaleztapena.

      1. Erleak daudela ohartarazi beharko da, ondo ikusteko leku batean eta erlategitik gertu.

      2. Erlategia seinaleztatzeko kartelaren materialak aldaezina izan beharko du eta agente atmosferikoekiko iraunkorra. Kartelaren behealdea lurretik 1,5 eta 2 metroren artean jarri beharko da, erraz ikusteko moduan. Kartelaren testuak hau esango du, euskaraz eta gazteleraz: Atención Abejas / Kontuz erleak edo Abejas trabajando / Erleak lanean; hondoa horia izango da, eta karaktereak beltzak.

      9. artikulua Erlezaintza-ustiategiek bete behar dituzten gutxieneko baldintzak.

      1. Otsailaren 22ko 209/2002 Errege Dekretuaren 8. artikuluan eta Euskal Autonomia Erkidegoko abeltzaintzako ustiategietako arau teknikoak, higieniko-sanitarioak eta ingurumenekoak ezartzen dituen otsailaren 25eko 50/2025 Dekretuan xedatutakoa betez:

         1. Eraikuntza, instalazio, tresna eta ekipoen antolamendu eta izaerak uneoro ahalbidetuko dute garbiketa, desinfekzio eta, beharrezkoa balitz, parasitoak hiltzeko modua eraginkorra izatea.

         2. Erlezaintza-kokaguneek honako gutxieneko distantzia hauek errespetatu beharko dituzte:

            1. Establezimendu kolektibo publikoak eta hiriguneak: 400 metro.

            2. Biztanleguneak eta jendea bizi den landa-izaerarik gabeko etxebizitzak (norberaren etxebizitza alde batera utzita): 400 metro. Autokontsumoko erlategietako ustiategien kasuan distantzia hori 100 metrokoa izango da.

            3. Jendea bizi den landa-etxebizitzak (norberaren etxebizitza alde batera utzita) eta abere-instalazioak: 100 metro.

            4. Errepide nazionalak: 200 metro.

            5. Eskualdeko errepideak: 50 metro.

            6. Auzobideak: 25 metro.

            7. Mendiko pistak: erlauntzak ertzetan jarriko dira, bidea oztopatu gabe.

      2. Artikulu honetako 1. apartatuan, b atalean, 4. paragrafotik 7.era bitartean, errepide eta bideetarako jarritako distantzia % 50ean murriztu daiteke, baldin eta erlauntza aldapan badago eta 2 metroko altuera edo desnibela badute errepide eta bide horien horizontalarekiko.

      3. Artikulu honetako 1. apartatuko b) paragrafoan ezarritako distantziak gehienez ere % 75ean murriztu daitezke, bidera edo establezimendura jotzen duen aldean 2 metroko altuerako hesia badute erlategiek. Hesi horren materiala edozein eratakoa izan daiteke, betiere erleak behartzen baditu euren hegaldia 2 metroko altueratik gora egitera. Salbuespen hori ez zaio aplikatuko erlezaintza-kokalekuen arteko distantzietarako xedatutakoari.

      4. Dekretu hau indarrean sartu ondoren abian jartzen diren erlategiek, baldin eta gutxienez 26 erlauntz bizi badituzte, gutxienez 1.000 metroko distantzia gorde beharko dute, inguruko jabeek erabaki adierazirik hartu ezean. Salbuetsita geratzen dira interes orokorreko programak garatzeko edo aztertzeko diren ustiategiak.

      10. artikulua Ustiategiko egoitzetan dauden erauzketa- eta ontziratze-lokalen gutxieneko baldintza higieniko-sanitarioak.

      1. Ustiategiko egoitzetan dauden erauzketa- eta ontziratze-lokalek jarraian zehaztu diren gutxieneko baldintza higieniko-sanitarioak bete beharko dituzte:

         1. Erauzketa- eta ontziratze-lan guztiak elikagaien higienea eta segurtasuna bermatzeko moduan egin beharko dira.

         2. Lokalaren gainazalek (zorua, hormak eta sabaia) garbitzea eta desinfektatzea errazten duten materialetakoak izan behar dute.

         3. Lan-gainazalek eta tresnek material ez-porotsuetakoak izan behar dute, errazago garbitu eta desinfektatu ahal izateko.

         4. Ahal den neurrian, intsektuak edo karraskariak sartzea saihestuko da.

         5. Edateko ura eta harraska egongo dira.

         6. Erle-produktuak, zoosanitarioak edo fitosanitarioak, produktu biozidak edo substantzia arriskutsuak erauzteko aldietan, lan-eremuetatik urrun biltegiratuko dira, lortutako erle-produktuak inola ere kutsa ez daitezen.

         7. Erauzketaz arduratzen diren pertsonek osasun-egoera onean egon beharko dute, eta egiaztatu beharko dute diharduten lanpostu espezifikoaren beharrizanetarako eta ondoriozko arriskuetarako egokitutako prestakuntza dutela.

         8. Erauzketa-lokala eta garraio-ibilgailuak gutxienez erauzketa-aldi bakoitzaren aurretik eta ondoren garbitu eta desinfektatu behar dira. Horixe bera egingo da altzak garraiatzeko ibilgailuekin, baina garbiketa egokia soilik eskatuko da.

         9. Debekatuta dago lokalean etxeko animaliak egotea erauzketa-aldietan.

            1. apartatuko gutxieneko baldintza higieniko-sanitarioak betetzen direla bermatzeko, erlezaintza-ustiategiaren titularrek Higieneko Jardunbide Egokien Gidak aplikatu ahalko dituzte.

      11. artikulua Ustiategiko instalazioetan erauzitako edo ontziratutako erle-produktuak etiketatzeko baldintzak.

      1. Erle-produktuen etiketatzea aplikatzekoa den etiketatzerako araudi orokorraren arabera egingo da.

      2. Ustiategian erauzi eta ontziratutako erle-produktuek Abeltzaintza Ustiategien Erregistro Orokorreko (REGA) zenbakia izan beharko dute, honako derrigorrezko aipu honen bidez, etiketaren hizkuntzaren arabera:

         Producido, extraído y envasado en la explotación ES**********.

      «ES********** ustiategian ekoitzi, erauzi eta ontziratutako produktua».

      3. Gainera, honako derrigorrezko aipamen hau gehituko da gaztelaniaz:

         La miel no es recomendable para niños/as menores de 1 año.

         Aukeran, aipamena euskarazko itzulpenarekin osatu ahalko da:

         Eztia ez da urtebete baino gutxiagoko haurrentzat gomendagarria.

1. Erlezaintza-ustiategien osasun-kontrolari otsailaren 22ko 209/2002 Errege Dekretuaren 10. artikuluan xedatutakoa aplikatu behar zaie.

2. Edozein alterazio patologiko gertatuz gero eta horren ondorioz ustiategia arriskuan egonez gero, titularrak horren berri eman beharko dio, berehala, erle-ustiategia inskribatuta duen lurralde historikoko abeltzaintza-arloko zerbitzu tekniko eskudunari.

1. Otsailaren 22ko 209/2002 Errege Dekretuaren 11. artikuluan xedatutakoaren arabera, erlezaintzan diharduten pertsonek transhumantzia egin ahal izango dute, 2. apartatutik 4. apartatura xedatutako baldintzetan, baldin eta ustiategia transhumante gisa inskribatuta badago eta dekretu honetan aurreikusitako osasun- eta dokumentazio-baldintzak betetzen badituzte.

2. Erlezaintzan diharduten eta lurralde historikoaren esparrutik kanpo transhumantzia egiten duten pertsonek, erlezaintza-ustiategia dagoen foru-aldundiko abeltzaintza zerbitzuari honako hauek jakinarazi beharko dizkiote, betiere erlauntzen lehenengo mugimendua baino zazpi egun lehenago, gutxienez: hurrengo hiru hilabeteetarako aurreikusita dagoen lekualdatze-programa, eta hori zein lurralde historikotan, zein koordenatu kartografikotan (bai jatorrizkoak, bai helburuzkoak) eta zein egunetan egingo den.

3. Lekualdatzeari buruzko komunikatutako informazioa egiaztatu ostean, dagokion foru-aldundiko abeltzaintza-arloko zerbitzu tekniko eskudunak erlezaintzan aritzen den pertsonarentzako egiaztagiri bat egin beharko du. Egiaztagiri hori ustiategiko erregistro-liburuari erantsi beharko zaio, eta erlauntzekin batera eramango da joan-etorrietan. Gutxienez, datu honako hauek jasoko ditu:

   1. Lekualdatzea noiz hasiko eta amaituko den.

   2. Lekuz aldatutako erlauntz-kopurua.

   3. Erlauntzak nondik eta nora aldatuko diren, koordenatu kartografikoak adieraziz.

   4. Adostasuna, albaitari ofizial lanbidean dagoen pertsonaren sinadurarekin eta albaitaritza-unitatearen zigiluarekin.

4. Aurreikusitako lekualdatze-programan zerbait aldatuz gero eta aldaketa horrek helmugako autonomia-erkidegoan edo lurralde historikoan aldaketaren bat eragiten badu, erlezainak erle-ustiategiko jatorrizko foru-aldundiko abeltzaintzako teknikari eskudunari jakinarazi beharko dio, berehala, edo gehienez ere 48 orduko epean, hori gertatu ostean. Lekualdatze-programa hiru hilabete baino gehiagoz luzatzen bada, berriro egin beharko da eskabidea.

5. Jatorrizko erlezaintza-ustiategia inskribatuta dagoen foru-aldundiko abeltzaintza-arloko zerbitzu tekniko eskudunak ahal bezain laster jakinaraziko dizkio helmugako agintari eskudunei haiei eragiten dieten lekualdatze-programak, eta programan gertatutako gorabeherak edo aldaketak.

   1. apartatutik 5.era bitarteko apartatuetan xedatutakoa gorabehera, erlezaintzan diharduen eta erlezaintza-ustiategi egonkor baten titularra den pertsona batek erlauntzak edo erlategiak inskribatuta dauden lurralde historikotik kanpo edo beste autonomia-erkidego batera lekualdatu behar baditu, erlauntzen edo erlategien lekualdaketa babesten duen osasun-ziurtagiria eskatu beharko dio, aldez aurretik, helmugako agintari eskudunari, Animalien Osasunari buruzko apirilaren 24ko 8/2003 Legearen 50. artikuluan ezarritakoaren arabera.

7. Erlauntzak apirilaren 24ko 8/2003 Legearen 47. artikuluan ezarritakoaren arabera garraiatuko dira. Gainera, garraiatzean, erlauntzek ataka itxita eraman beharko dute, eta ataka irekita badoaz, sare batekin estalita edo erleak irtetea eragozten duen beste edozein sistemarekin.

1. Otsailaren 22ko 209/2002 Errege Dekretuaren 7. artikuluan xedatutakoaren arabera, erlezaintza-ustiategi baten titular den pertsona orok erle-ustiategiaren erregistro-liburu bat izan beharko du, eta bertan, gutxienez, dekretu honen eranskinean adierazitako datuak jasoko dira.

2. Erlezaintza-ustiategiaren erregistro-liburua ustiategia inskribatuta dagoen lurralde historikoko erle-ustiategien erregistroaren ardura duen organo eskudunak emango du. Hala ere, erlezaintza-ustiategi bateko pertsona titularrak beste eredu batzuk erabili ahalko ditu, baldin eta horiek eranskinean jasotako gutxieneko informazioa badute.

3. Erlezaintza-ustiategi transhumanteetan, erlezaintza-ustiategiaren erregistro-liburua erlauntzen lekualdaketa bakoitzari buruzko informazioa jasotzen duten orriekin osatuko da. Informazio horrek ez du zerikusirik 14.2 artikuluan ezarritako hiru hilean behingo lekualdatze-programarekin.

4. Erlezaintza-ustiategiaren erregistro-liburuak ustiategia inskribatuta dagoen lurralde historikoko foru-organoko erlezaintza-ustiategien erregistroko organo eskudunaren eskura egon beharko du, baita erlauntzak transhumantzia-arrazoiengatik edo beste arrazoi batzuengatik zirkulatzen duten edo finkatzen diren lurralde historikoetako edo beste autonomia-erkidego batzuetako erlezaintza-ustiategien erregistroaren ardura duten agintari eskudunen eskura ere, eta, bereziki, osasun-alertako egoera baten aurrean, erlauntzen mugimenduari dagokionez batez ere neurriak sartu behar direnean.

   Era berean, erlezaintza-ustiategiaren erregistro-liburua urtero baliozkotu beharko du ustiategia inskribatuta dagoen lurralde historikoko erlezaintza-ustiategien erregistroaren ardura duen organo eskudunak, kontrol-ondorioetarako eta, besteak beste, artikulu honen 7. apartatuan ezarritako urteko zentsu-aitorpena egiteko.

5. Erlezaintza-ustiategien titularrek erregistro-liburu horretan jasotako datuak eguneratu beharko dituzte une oro.

6. Artikulu honetan araututako erregistro-liburua ezinbesteko baldintza da erlauntzak transhumantzia-arrazoiengatik edo beste arrazoi batzuengatik lekualdatzeko.

7. Martxoaren 26ko 479/2004 Errege Dekretuaren 4.3 artikuluan ezarritakoaren arabera, erlezaintza-ustiategien titularrek, urte bakoitzeko martxoaren 1a baino lehen, beren erlauntzen errolda jakinarazi beharko diote ustiategia inskribatuta dagoen lurralde historikoko foru-organoko erlezaintza-ustiategien erregistroaren ardura duen organo eskudunari, eta neguterako prestatutako erlauntzen kopurua adierazi beharko dute; hau da, aurreko urteko abenduaren 31n izandako erlauntz-kopurua.

1. Otsailaren 22ko 209/2002 Errege Dekretuaren 9. artikuluan xedatutakoa betez, erlezaintza-ustiategiaren titularrak erleen beharrizan fisiologikoak eta portaera-beharrak asetzen direla zaindu beharko du, haien osasun- eta ongizate-egoera ona errazteko.

   Erlezaintzan diharduen pertsonak betebehar horiek betetzen ez dituela ulertuko da erlategia abandonatutzat jo badaiteke, dekretu honen 2.1.e) artikuluan.

2. Arabako, Bizkaiko eta Gipuzkoako lurralde historikoetako organo eskudunek gune babestuak ezar ditzakete, erleen arraza-ekotipoak babestu, kontserbatu eta biderkatzeko. Halaber, erlauntzak sartzeko debekuak eta mugak ezar ditzakete, plan horiek garatu ahal izateko.

Foru-aldundietako abeltzaintza-zerbitzuek ikuskaritza zooteknikoak eta osasun arlokoak egingo dituzte, erlezaintza-ustiategiak antolatu eta arautzeko araudian eskatzen diren baldintzak eta betekizunak errespetatzen diren egiaztatzeko.

1. Dekretu honetan agindutakoa betetzen ez bada, zehatu egingo da honako hauetan agindutakoari jarraikiz: Animalia Osasunari buruzko 8/2003 Legea, Nekazaritza eta Elikagaigintza Politikari buruzko abenduaren 23ko 17/2008 Legea, Euskadiko Antolamendu Sanitarioari buruzko ekainaren 26ko 8/1997 Legea, Euskadiko Osasun Publikoari buruzko azaroaren 30eko 13/2023 Legea, eta Kontsumitzailearen defentsaren eta nekazaritzako elikadura-produkzioaren arloetako arau-hausteak eta zehapenak arautzen dituen ekainaren 22ko 1945/1983 Errege Dekretua.

2. Zehapen-prozedura bat etorriko da Euskal Administrazio Publikoen zehatzeko ahalari buruzko martxoaren 16ko 1/2023 Legean eta Administrazio Publikoen Administrazio Prozedura Erkidearen urriaren 1eko 39/2015 Legean xedatutakoarekin.