Abuztuan, azalera handietako eta elikadura kateetako salmentak %1,7 gehitu ziren aurreko urtearen aldean. Elikagaien salmenta bere horretan geratu zen (-%0,1), baina gainerako produktuen bilakaera onak konpentsatu zuen (%5,0) jaitsiera txiki hori. Halaber, enplegua %1,9 hazi zen 2021eko datuekin alderatuta.

Aurtengo uztailean, etxebizitza bat erosteko izenpetu ziren hipoteken kopurua 2021eko hilabete berekoa baino %5,3 txikiagoa izan zen. Beherakada nabarmen handiagoa da 2020ko datuarekin alderatzen bada. Interes tasen igoera egon daiteke hipoteka eskaeraren murrizte horren atzean.

Eraikuntzaren kostuek berriro moteldu zuten beren hazkunde tasa abuztuan, %10,4an kokatu arte. Lehengaiek %11,8ko garestitzea izan zuten eta eskulanak %5,8koa. Kostuen igoera handiagoa da obra zibilean (%13,7) eraikinen atalean baino (%9,6).

Irailean, Estatuko KPIa %9,0ra jaitsi zen, INEk argitaratutako aurrerapenaren arabera. Beraz, aurreko hilabetearekin alderatuta, puntu eta erdi murriztu da. Elektrizitatearen jaitsiera funtsezkoa izan da beherakada horretan, baina baita erregaien eta garraioaren merkatzea ere.