Kultura eta Hizkuntza Politika Saila

Beck, Conrad

Suitzar musikagilea (Lohn, 1901 - Basilea, 1989). Musika ikasketak (pianoa eta teoria) Zurich-eko Kontserbatorioan hasi zituen Paul Müller, Reinhold Laquai eta Volkmar Andreae-rekin. Ondoren Parisa joan zen eta han Ernst Lévy eta Nadia Boulanger-ekin lan egin zuen. Aldi berean, Albert Roussel, Arthur Honegger eta Jacques Ibert aholkulari izan zituen. Parisen bizi ziren beste hainbat musikagile atzerritarrekin Parisko Eskolan lan egin zuen. Harizko laukotea 3. (1926) lanarekin orkestra zuzendari nagusien arreta sortu zuen. 1932an Suitzara itzuli zen Radio-Bâleko orkestrako zuzendari izendatu zutenean. Aldi berean, Basileako Kontserbatorioko irakasle izan zen, eta Monakoko Petri Printzea lehiaketako epaimahaikide izan zen behin baino gehiagotan. Beck-ek lan asko egin zituen; hauek ditu nagusiak: zazpi sinfonia (lehenengo bostak 1925-1930 bitartean idatzi zituen, seigarrena 1950ean eta zazpigarrena 1957an); poema sinfoniko bat, Innominata; kontzertuak harizko laukoterako (1929), pianorako (1933), biolinerako (1940); ballet bat, Hartz Handia (1936); oratorioak, Oratorium nach Sprüchen des Angelus Silesius (1934); Requiem (1930); kantatak.