Becker, Gary
Estatubatuar ekonomista (Pottsville, Pennsylvania, 1930). Chicagoko Eskolaren jarraitzailea eta, hortaz, gobernuek arautu gabeko merkatu librearen aldekoa da. Lau arlo nagusi ikertu ditu: giza kapitala, familiaren jokabidea, kriminalitatea eta ondasunen merkatuko bereizkeria. Giza kapitalaren teoria da Beckerren ekarpen nagusia. Hezkuntzan, lanbide heziketan, migrazioan eta osasunean inbertsioak egiteko giza erabakien oinarri teorikoak garatu zituen Giza kapitala liburuan (1964). 1992an Ekonomiako Nobel saria eman zioten, giza jokabidea eta harremanak ikerketa mikroekonomikoaren arlora zabaltzeagatik.
