Kultura eta Hizkuntza Politika Saila

Álvarez Bravo, Manuel

Mexikar argazkilaria (Mexiko, 1902 - 2002). Rivera eta Orozco pintore iraultzaileekin lotura estua izan zuen, eta argazkiak egin zituen haiekin. Sergei Eisensteinen Que viva México film amaitu gabean lan egin zuen. Herrietako festen, eguzkiak kiskalitako kale bakartien, izadi hilen argazkiak egin izan zituen besteak beste. Ostera, 1970eko hamarraldian, emakumezko biluzienak ere egin zituen. Argazkilari surrealista zen, André Breton idazleak zioenez. New Yorkeko Arte Modernoaren Museoan (MOMAn) bere obren erakusketa egin zuten 1971n. Sari ugari jasoa da: Master of Photography (1987), Leicaren Bikaintasun Domina (1995)… George Eastman House, Pasadena Art Museum eta MOMA museoetan, besteak beste, daude ikusgai haren obrak.