Eusko Jaurlaritzak eta Zientzia, Berrikuntza eta Unibertsitate Ministerioak akordio bat lortu dute. Erabaki hori atzerriko goi-mailako hezkuntza-sistemetan lortutako tituluak homologatzeko eta baliokidetzat jotzeko espedienteak Euskal Autonomia Erkidegotik Estatuko Administrazio Orokorrera eskualdatzeko prozesua antolatzeaz arduratzen den azpibatzordearen bilera teknikoan hartu da.  Adostasun hori lortu dute Auzitegi Gorenaren 2025eko martxoaren 19ko epaia betetzeko (1178/2025 AGE), zeinak baliogabetu egin baitzuen 366/2024 Errege Dekretua, apirilaren 9koa, Euskal Autonomia Erkidegoari arlo horretan eskualdatutako eginkizunak zabaltzeari buruzkoa, irailaren 26ko 2808/1980 Errege Dekretuaren arabera.  

Bi administrazioek adostu dute Ministeriora bidaliko direla Eusko Jaurlaritzan hasitako espediente guztiak. Une horretatik aurrera, ministerio hori arduratuko da eskabideak  kudeatzeaz eta ebazteaz.

Eragindako pertsonen kaltea ahalik eta gehien murrizteko, epaia betearaztearen ondoriozko bidalketa horrek ez du eraginik izango aurkeztutako eskaeren antzinatasunean, eta Eusko Jaurlaritzan edo Ministerioan egindako lehen eskaeraren data errespetatuko da beti. Horrek ez du tasa gehigarririk ekarriko, eta, gainera, Euskal Autonomia Erkidegoan  ordaindutako tasa itzuliko zaie aurretik  Ministerioan tasa bera ordaindu  duten pertsonei.

Prozeduran interesdun bakoitzaren egoera jakinarazten hasi da.

Espedienteak Zientzia, Berrikuntza eta Unibertsitate Ministeriora transferituko dira, eta ordaindutako tasak itzuli edo transferituko dira, hala badagokio.

Edozein kontsulta egiteko, helbide honetara idatz dezakezu: uni.homologazioak@euskadi.eus

Sentitzen dugu egoera horrek eragozpenak eragitea.

Eusko Jaurlaritza eta Zientzia, Berrikuntza eta Unibertsitate Ministerioa.

Kontaktua:

• Helbide honetan: uni.homologazioak@euskadi.eus
• ZUZENEAN telefonoa: 945 01 80 00 / 012