Turismoko enpresak kalitate ziurtagiriak lortzera bultzatzeko laguntzak 2010

(Inprimakiak aplikazioen sarbidean daude, Formularioa paperean estekan hain zuzen ere)

Dokumentazio orokorra:

1.- Agindu honetan bildutako eskabideak, errekerimenduak, jakinarazpenak eta gainerako kudeaketak bitarteko elektronikoen bidez egin ahal izango dira, administrazio-prozeduretan bitarteko elektronikoen, informatikoen eta telematikoen erabilera arautzen duen abenduaren 18ko 232/2007 Dekretuaren arabera (22. EHAA, 2008ko urtarrilaren 31koa).

2.- Izapidetze telematikoa hautatzen bada, eskabide-eredua eskuratzea, Administrazioan aurkeztea, espedientean sartzea, eta gainerako izapideak www.euskadi.net web-orrian egingo dira, betiere Merkataritza eta Turismoko sailburuordeak ebazpen bidez laguntzen deialdia egin ondoren.

Erakunde eskatzailea ordezkatzeko legezko gaitasuna duen pertsonaren baimendutako sinadura elektronikoaz gain, eskabidearekin batera aurkeztu beharreko dokumentazio guztia eta Administrazioak eska dezakeen dokumentazioa aurkeztuko da eskabidearekin batera, administrazio-prozeduretan bitarteko elektronikoen, informatikoen eta telematikoen erabilera arautzen duen abenduaren 18ko 232/2007 Dekretuan xedaturikoaren arabera.

3.- Aurreko aukeraren alternatiba gisa, Turismo Zuzendaritzara bidalitako eskabide baten bidez ere egin ahal izango da eskaera, eta Industria, Berrikuntza, Merkataritza eta Turismo Sailaren dagokion Lurralde Ordezkaritzan aurkeztuko da, zuzenean nahiz Herri Administrazioen Araubide Juridikoaren eta Administrazio Prozedura Erkidearen Legean aurreikusitako edozein bideren bitartez.

Eskabidearen eta inprimakien ereduak urteko deialdi publikoan izango dira eta interneteko helbide honetan jaso daitezke Merkataritza eta Turismo sailburuordeak dagokion ebazpena egin eta gero.

Erakunde eskatzailea ordezkatzeko legezko gaitasuna duenak sinatuko du eskabidea.

4. Erakunde eskatzaileak eskabidea eta inprimakiak bete beharko ditu, eta bertan honako hauek jaso beharko dira: proiektuaren datu orokorrak (gauzatzeko epeak, egin beharreko ekintzak, aurrekontuak, eta abar), eskabidean jasotako informazioaren egiazkotasuna frogatzeko zinpeko aitorpen bat, eta honako dokumentazio hau:

• a) Eskabidearen ekitaldiaren aurreko ekitaldiko abenduaren 31ko langile kopurua, hilabete horretako TC2 inprimakiaren arabera, sexuaren arabera bereizita.
• b) Eskabidea egin aurreko ekitaldiko abenduaren 31n izandako fakturazioaren zenbatekoa.
• c) Eskabidea egin aurreko ekitaldiko abenduaren 31n egindako urteko balantze orokorraren zenbatekoa.
• d) ETE ez den enpresa batek edo zenbait ETEk aldi berean, zuzenean edo zeharka, erakunde eskatzailearen kapitalaren % 25etik gorako partaidetza ez dutela egiaztatzen duen dokumentua.
• e) Proiektu bererako beste erakunde publiko edo pribatuen aldetik jasotako laguntzak.
• f) Azken hiru ekitaldietan enpresak jasotako laguntzak, laguntza eskatu den urtea azken urtearen erreferentziatzat hartuta.
• g) Aitorpen arduratsua, erakunde eskatzailea zigor- eta administrazio-arloan diru-laguntza edo laguntza publikoak lortzeko aukera galtzearekin zigortuta ez dagoela adierazten duena, ezta hartarako ezgaitzen duen legezko debekuaren eraginpean ere ez dagoela, sexu-diskriminazioaren ondoriozko debekuak barne, 4/2005 Legearen (otsailaren 18koa, Emakumeen eta Gizonen arteko Berdintasunerakoa) Azken Xedapenen arteko seigarrenean xedatutakoari jarraiki.

Eskatzaileak zinpeko aitorpenean gezurrezko daturen bat jartzen badu, administrazio-zigorrak eta zigor penalak ezarri ahal izango zaizkio, indarrean dagoen zigor-araubideari jarraiki.

5.- Eskabideekin batera, honako oinarrizko dokumentu hauek aurkeztu beharko dira:

1. a) Eskatzailearen NANaren fotokopia.
2. b) Erakunde eskatzailearen Identifikazio Fiskaleko Zenbakiaren fotokopia.
3. c) Hala badagokio, eskatzailearen ordezkaritza-ahalordearen fotokopia, salbu eta ahalorde hori Industria, Merkataritza eta Turismo Sailaren eskura badago eta ahalordedun-aldaketarik izan ez bada.
4. d) Memoria eta jardun-egutegia.
5. e) Aurrekontua, kontzeptuen arabera banakatua.
6. f) Familia eta lana bateragarri egiteko plana izanez gero, planaren kopia.
7. g) Euskadiko Autonomia Erkidegoko Aurrekontu Orokorren kargurako edo haren ordezko araudiko diru-laguntzen erakunde onuradunen zerga-betebeharrak egiaztatzeari buruzko Ogasun eta Finantzen sailburuaren 1991ko urriaren 7ko Aginduan ezarritako kasuetan, Euskal Autonomia Erkidegoaren Administrazioak, betiere eskatzailearen esanbidezko baimena badu, laguntzen eta diru-laguntzen eskatzaileen zerga-betebeharrak bete izanaren egiaztagiria eskatuko die zuzenean zerga-arloko organo eskudunei. Espedientean baimen hori jasota ez badago, laguntzen eskatzaileak dagokion egiaztagiria aurkeztu beharko du.
8. h) Gizarte Segurantzarekiko betebeharrak beteta dituela adierazten duen ziurtagiriaren kopia.
9. i) Erakunde eskatzailearen Hirugarrenaren Altari buruzko dokumentua, Ekonomia eta Ogasun Sailak zehaztutako ereduan arabera, soilik aurretik aurkeztu ez bada edo datuak aldatu badira.

6.- Oinarrizko dokumentazioa ez ezik, erakunde eskatzaileak, bere izaera juridikoaren arabera, honako hauek aurkeztu beharko ditu:

• a) Tokiko erakundeek eskumeneko gobernu-organoaren ziurtagiria aurkeztu behar dute, hain zuzen ere diru-laguntzaren xede den jarduera onartzen duen ziurtagiria.
• b) Tokiko erakundeek osatutako edo tokiko erakundeak parte diren erakunde edo sozietateek, Biltzar-jauregiek, Convention Bureau erakundeek eta nortasun juridiko propioa duten turismo-lankidetzaren arloko entitateek administrazio-kontseiluaren edo eskumeneko organoaren erabakiaren ziurtagiria aurkeztu beharko dute (horren arabera, diru-laguntzaren xede den jarduera onartzen da), baita erakundea egiaztatzeko dokumentazioa ere (eratzeko eskrituraren, estatutuen eta erregistroan erregistratu izanaren kopiak).
• c) Gainera, fundazioek estatutuen fotokopia aurkeztu beharko dute, baita dagokien erregistroan erregistratu izanaren egiaztagiria ere.
• d) ETEek Jarduera Ekonomikoen Zergan alta eta baja hartu izanaren ziurtagiriaren kopia aurkeztu behar dute. Foru Ogasunak ematen du ziurtagiri hori.

7.- Dagoeneko Industria, Berrikuntza, Merkataritza eta Turismo Sailaren eskura dauden indarreko dokumentuak ez dira nahitaez aurkeztu beharrik izango. Kasu horretan, eskabide-orrian adierazi beharko du eskatzaileak zein egunetan eta zein organo edo bulegotan aurkeztu zituen aipatutako dokumentuak, azaroaren 26ko 30/1992 Legearen 35. artikuluaren f) idatz-zatian ezarritako baldintzei jarraiki.

8.- Erakunde eskatzaileek laguntza jasotzeko eskaera aurkeztu ahal izango dute horrekin batera aurkezten den dokumentazioarekin, haiek aukeratu duten hizkuntza ofizialean. Gainera, laguntza-eskabidetik eratorritako jardueretan eta prozedura osoan, erakunde eskatzaileak aukeraturiko hizkuntza baliatuko da, Euskararen erabilera normalizatzeko azaroaren 24ko 10/1982 oinarrizko Legean ezarritakoaren arabera.