Boletín Oficial del País Vasco

199. zk., 2026ko urriaren 19a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

4363

EBAZPENA, 2026ko irailaren 24koa, Bizkaiko Industria, Trantsizio Energetiko eta Jasangarritasuneko lurralde-ordezkariarena, zeinaren bidez aurretiko administrazio-baimena ematen da «PB Babor 6» izeneko proiekturako. Proiektu horretan 28,6 MW-ko potentziako baterien bidezko biltegiratze-instalazioa eta bere azpiegitura propioak eraikitzea proposatzen da, Ortuella eta Santurtziko udal-mugarteetan (Bizkaia), Arena Green Assets 5 S.L.U. enpresak aurkeztutakoa.

Espedientea: 48-GE-Y-2024-00010.

AURREKARIAK

1.– 2025eko maiatzaren 24an, Enigma Green Power 15 SMU enpresak aurretiko administrazio-baimena eta ingurumen-ebaluazio sinplifikatua eskatu zituen, «PB Babor 6» izeneko proiekturako. Proiektu horretan 28,6 MW-ko potentziako baterien bidezko biltegiratze-instalazioa eta bere konexio-azpiegiturak eraikitzea proposatzen da, Ortuella eta Santurtziko udal-mugarteetan (Bizkaia).

2.– 2025eko urriaren 17an, akatsak zuzentzeko errekerimendua egin zitzaion sustatzaileari, eta 2025eko urriaren 20an, enpresak espedientearen dokumentazioa osatu zuen, eta emandako epean aurretik adierazitako akatsak zuzendu zituen.

3.– Proiektuaren xede den instalazioak sarbide-baimena du, Red Eléctrica de España SAU enpresak 2023ko azaroaren 29an emandakoa.

4.– 2025eko irailaren 9an, ordezkaritza honek erreferentziako proiektuaren ingurumen-inpaktuaren ebaluazio sinplifikatua egiteko eskaera bidali zion Eusko Jaurlaritzako Ingurumen Administrazioaren Zuzendaritzari. Eskaerari EIAS–355 erreferentzia esleitu zitzaion.

5.– 2026ko urtarrilaren 21ean, Ingurumen Administrazioaren zuzendariak ebazpena eman zuen, zeinaren bidez formulatzen baita Enigma Green Power 15 SLU enpresak Ortuellan sustatutako 28,6 MW-ko potentziako Bess «PB Babor 6» proiektuaren ingurumen-inpaktuaren txostena. 2026ko otsailaren 23ko EHAAn argitaratu zen.

Ingurumen-inpaktuaren txostenak ondorioztatzen du betiere ezarritako babes- eta zuzenketa-neurriak eta kontrolak hartzen badira, bai eta sustatzaileak planteatutakoak ere –aurrekoen aurkakoak ez badira–, ez da aurreikusten proiektua egikaritzean ingurumen-inpaktuaren ebaluazio arrunta egitea.

6.– Ondoren, 2026ko urtarrilaren 27an, Bizkaiko Foru Aldundiko Berrikuntza eta Errepide Kudeaketako Zuzendaritzako Ustiapen Zerbitzuaren txostena jaso zen organo honetan. Horren bidez, biltegiratze-instalazioaren eta haren elementu osagarrien ezarpenaren aldeko txostena eman zuen, baina proiektatutako lurpeko kanalizazio jakin batzuk eta konexio-azpiegiturari lotutako aurreikusitako sarbide berria ez direla bideragarriak uste du, jabari publikoari eta foru errepide eta bidegorria babesteko eremuei eragiten dielako.

Txosten hori sustatzaileari helarazi zitzaion, eta hark adierazi zuen bat zetorrela egindako ohar teknikoekin, eta konpromisoa hartu zuen proiektuan beharrezko aldaketak egiteko, kanalizazioen trazadura, sarbideak eta gainerako jarduketak foru errepideen eta bidegorrien araudira egokitzeko. Halaber, adierazi zuen aldaketa horiek puntualak izango zirela, eta ez funtsezkoak, eta ez zutela eragin berririk izango ingurumenean edo arkeologian, ezta konexio-linearen luzera kilometro bat baino gehiago handituko ere.

7.– Eusko Jaurlaritzaren martxoaren 31ko 48/2020 Dekretuaren, zeinaren bidez arautzen baitira energia elektrikoa ekoizteko, garraiatzeko eta banatzeko instalazioen administrazio-baimenaren prozedurak, 10. Artikuluan ezartzen denaren ondorioetarako, argitara eman zen horren iragarkia, adierazitako eskabidea jendaurrean jartzeko, 2026ko martxoaren 3ko EHAAn eta BAOn.

8.– Jendaurreko informazioaren izapidearekin batera, kontsultak egin zitzaizkien administrazio, erakunde edo zerbitzu publikoko edo interes orokorreko zerbitzuetako enpresei, instalazioak beren ardurapeko ondasun eta eskubideei eragiten dien heinean, 48/2020 Dekretuaren 11. artikuluan araututakoaren arabera, haien baimena eman edo uka dezaten. Honako erakunde hauei egin zitzaien kontsulta: Ortuellako eta Santurtziko udalei; Eusko Jaurlaritzako (EJ) Larrialdiei Aurre Egiteko eta Meteorologiako Zuzendaritzari, Nekazaritza eta Abeltzaintza Zuzendaritzari, Lurralde Plangintzaren Zuzendaritzari eta Kultura Ondarearen, Jabetza Intelektualaren eta Lege Gordailuaren Zuzendaritzari; Bizkaiko Foru Aldundiko (BFA) Azpiegituretarako eta Lurralde Garapenerako Sailari; Espainiako Gobernuaren Trantsizio Ekologikorako eta Erronka Demografikorako Ministerioari; Uraren Euskal Agentziari (URA), Kantauriko Konfederazio Hidrografikoari (KKH) eta Bilbao Bizkaia Ur Partzuergoari; I-DE Redes Eléctricas Inteligentes SAUri eta Red Eléctrica de España SAri; eta Enagas SAri, Nortegás Energía Distribución SAUri eta Telefónica de España SAUri.

9.– Arauzko epean, honako txosten hauek jaso dira:

– 2026ko martxoaren 9an, Telefónica de España SAUk adierazi zuen ez zuela inolako eragozpenik aipatutako proiektua gauzatzeko, betiere telekomunikazio-lineen paralelismoei eta gurutzaketei buruz indarrean dagoen araudia eta, bereziki, goi-tentsioko eta behe-tentsioko erregelamendu elektroteknikoak betetzen badira.

– 2026ko martxoaren 16an, KKHk jakinarazi zuen ez zuela oharrik egiteko erreferentziako proiektuak ingurumenean dituen ondorioei buruz.

– 2026ko martxoaren 18an, URAk adierazi zuen konexio-lineak Capetillo eta El Molino errekak zeharkatzen dituela; hori dela eta, Ingurumen Dokumentuan aurreikusitako neurriak aplikatu beharko direla, erreka horien gurutzaketei buruzko dokumentazioa aurkeztu beharko dela eta erakunde horren nahitaezko baimenak lortu beharko direla jabari publiko hidraulikoan edo haren babes-eremuetan (zortasun- eta polizia-eremuetan) egingo diren jarduketetarako.

– 2026ko martxoaren 23an, EJko Larrialdiei Aurre Egiteko eta Meteorologiako Zuzendaritzak adierazi zuen proiektuak arrisku sismikoak, teknologikoak, baso-suteen arriskuak eta drainatzearekin lotutako arriskuak kontuan hartu beharko dituela, eta, hala badagokio, aplikagarriak diren autobabesaren arloko betebeharrak bete beharko dituela.

– 2026ko apirilaren 10ean, Red Eléctrica de España SA enpresak adierazi zuen ez zuela proiektuaren aurkako eragozpenik, haren titulartasuneko instalazioetan ukipenik ez dagoelako.

– 2026ko apirilaren 13an, EJko Lurralde Plangintzaren Zuzendaritzak adierazi zuen Stand Alone motako bateria bidezko energia biltegiratzeko instalazioen kasuan, justifikatu egin behar dela instalazio horiek lurzoru urbanizaezinean ezartzea, eta haien kokapena lehentasunez landa-eremukoak ez diren lurzoruetan planteatu beharko litzatekeela. Era berean, adierazi zuen baterien planta, haren erabilera osagarriak eta azpiestazio jasotzaile kolektiboa Nekazaritza eta Abeltzaintza nahiz Trantsizioko Landa Paisaia kategorian sailkatutako lurzoruan ezartzea erabilera onargarria dela, betiere txostenean ezarritako baldintzak betetzen badira; eta gogorarazi zuen hirigintza-plangintzari dagokiola lurzoru urbanizaezinaren mugaketa zehaztea eta lurzoruaren erabileren berariazko araubidea ezartzea.

– 2026ko apirilaren 15ean, EJko Kultura Ondarearen, Jabetza Intelektualaren eta Lege Gordailuaren Zuzendaritzak ingurumen-inpaktuaren txostenaren ondorioak berretsi zituen, eta adierazi zuen jarduketa-eremuak ez duela gainjartzerik kalifikatutako edo inbentariatutako kultura-ondareko elementuekin.

– 2026ko apirilaren 24an, BFAko Lurralde Garapeneko Zuzendaritzak jakinarazi zuen, lurralde-antolamenduaren ikuspegitik, proiektuak behar bezala justifikatu beharko lukeela lurzoru berriak okupatzea dakarren kokapen bat aukeratzea. Era berean, baterien plantaren azpitik igarotzen den gas-sarearen zortasunak errespetatu beharko direla, azpiestazioa ezartzeko beharrezkoak diren lurzorua egokitzeko lanak gutxienez zehaztu beharko direla eta inguruko elementuei ez diela eragingo egiaztatu beharko dela adierazi zuen; halaber, azpiestazioko kontrol-eraikinari buruzko dokumentazioan atzemandako akatsak zuzendu beharko direla. Azkenik, gogorarazten da hirigintza-arloan udalaz gaindiko plan berezi bat izapidetu behar dela, dagokion ingurumen-ebaluazio estrategikoarekin batera.

Agiri guztiak sustatzaileari bidali zitzaizkion, eta enpresak adierazi zuen onartu egiten zituela eta ados zegoela Telefónica de España SAUk, URAk, KKHk, Red Eléctrica de España SAk, eta EJko Larrialdiei Aurre Egiteko eta Meteorologiako Zuzendaritzak eta Kultura Ondarearen, Jabetza Intelektualaren eta Lege Gordailuaren Zuzendaritzak egindako txostenekin.

BFAko Lurralde Garapeneko Zuzendaritzak eta EJko Lurralde Plangintzako Zuzendaritzak egindako txostenei dagokienez, sustatzaileak bi idazki aurkeztu zituen, proiektuaren kokapenari eta ezarpenari buruz egokitzat jo zituen gogoetak eginez eta proiektuaren bideragarritasuna defendatu zuen.

10.– Halaber, arauzko epean ez da alegaziorik aurkeztu.

11.– 2026ko ekainaren 24an, Arena Green Assets 5 SMU enpresak Bizkaiko Lurralde Ordezkaritza honetan eskatu zuen ebazpen honen xede den proiektuaren titulartasun-aldaketa; proiektu hori hasiera batean Enigma Green Power 15 SMU enpresak sustatu zuen.

2026ko uztailaren 20ko idazkiaren bidez, «PB Babor 6» proiektuaren titulartasun-aldaketa onartu zen Arena Green Assets 5 SMU enpresaren alde.

12.– 2026ko irailaren 17an, sustatzaileak idazki bat aurkeztu zuen organo honetan, eta bertan adierazi zuen garraio-sarera konektatzeko azpiegitura komunei dagokienez aurretiazko administrazio-baimenaren eskaeran atzera egite partziala egiten zuela; zehazki, TAE kolektoreari eta konexio-punturainoko lotura-lineari dagokienez. Era berean, adierazi zuen azpiegitura horiek beste espediente batean izapidetzen ari direla, beste titular batek sustatutako Bess Oymyakon proiektuan zehazki, eta «PB Babor 6» proiektua osatzen duten gainerako instalazioei dagokien eskaerari eusten ziola.

2026ko irailaren 18ko idazkiaren bidez, Lurralde Ordezkaritza honek onartu egin zuen Arena Green Assets 5 SMU enpresak TAE kolektoreari eta konexio-punturainoko lotura-lineari dagokienez egindako atzera egite partziala, eta izapidearekin jarraitu zuen eskaeraren gainerako xedeari dagokionez; zehazki, 28,6 MW-ko potentziako baterien bidezko biltegiratze-instalazioa, sekzionamendu- eta neurketa-zentroa eta 30 kV-ko lurpeko linea, gutxi gorabehera 84,44 metroko luzerakoa, instalazioaren berezko azpiegitura gisa.

13.– Behin espedientea aztertuta, eskaeraren aldeko txostena ebatzi dute Industria, Trantsizio Energetiko eta Jasangarritasuneko Bizkaiko Lurralde Ordezkaritzako energia-arloko zerbitzu teknikoek.

Ebazpen hau honako hauetan oinarritzen da:

ZUZENBIDEKO OINARRIAK

1.– Industria, Trantsizio Energetiko eta Jasangarritasuneko Bizkaiko Lurralde Ordezkaritza da espediente hau izapidetzeko eta ebazteko organo eskuduna, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuan xedatutakoaren arabera (urtarrilaren 27ko 8/2026 Dekretuaren bidez aldatua).

2.– Espedientea izapidetzerakoan, honako arau hauetan ezarritako izapideak bete dira: Sektore Elektrikoari buruzko azaroaren 26ko 24/2013 Legea; Energia elektrikoko instalazioen garraioko, banaketako, merkaturatzeko eta hornidurako jarduerak eta baimentze-prozedurak arautzen dituen abenduaren 1eko 1955/2000 Errege Dekretua; Eusko Jaurlaritzaren martxoaren 31ko 48/2020 Dekretua; eta bat datorren gainerako legedia.

3.– Gainera arau hauek aplikatu behar dira: Euskadiko Ingurumen Administrazioari buruzko abenduaren 9ko 10/2021 Legea eta Ingurumen-ebaluazioari buruzko abenduaren 9ko 21/2013 Legea, ingurumen-inpaktuaren ebaluazio sinplifikatuaren prozedurari eta haren emaitzak baimen honetan sartzeari dagokienez. 10/2021 Legearen 79.1 artikuluaren arabera, ingurumen-inpaktuaren txostena loteslea da, eta, beraz, bertan ezarritako guztia nahitaez bete beharko da proiektua gauzatzean.

Era berean, sustatzaileak TAE Kolektoreari eta konexio-punturainoko lotura-lineari buruz egindako atzera egite partzialak, Lurralde Ordezkaritza honek 2026ko irailaren 18ko idazkiaren bidez onartua, hasieran ebaluatutako proiektuaren irismena murrizten du eta, beraz, ez du Ingurumen Inpaktuaren Txostenean aztertutakoez bestelako ingurumen-inpakturik sortzen.

Aipatutako lege-xedapenak ikusita, eta oro har zein zehazki aplikagarri diren gainerakoak oinarritzat hartuta, eta Lurralde Ordezkaritzako energia-arloko txostenarekin bat etorriz, Industria, Trantsizio Energetiko eta Jasangarritasuneko Bizkaiko lurralde-ordezkariak hau,

EBAZTEN DU:

Aurretiko administrazio-baimena ematea Arena Green Assets 5 SMU enpresari, «PB Babor 6» izeneko proiekturako, zeinean proposatzen baita Ortuellako eta Santurtziko (Bizkaia) udal-mugarteetan 28,6 MW-ko potentziako bateria bidezko biltegiratze-instalazio bat eta haren azpiegitura propioak eraikitzea; betiere instalazio hori garraio-sarera konektatzeko beharrezkoak diren gainerako azpiegituren aurretiko administrazio-baimena lortzen bada.

Ebazpen hau ematen da martxoaren 31ko 48/2020 Dekretuan xedatutakoaren arabera, eta baldintza orokor hauek kontuan hartuta:

1.– Eraikitzeko administrazio-baimena 9 hilabeteko epean eskatu beharko da, ebazpen hau jakinarazten denetik zenbatzen hasita. Epe hori igaro eta instalazioa eraikitzeko administrazio-baimenik eskatu ez bada, ebazpen hau iraungitzat jo ahal izango da.

2.– Proiektuak ingurumenean ondorio kaltegarri nabarmenik izan ez dezan, 2026ko urtarrilaren 21eko Ingurumen Inpaktuaren Txostenean (2026ko otsailaren 23ko EHAA) ezarritako baldintzak bete beharko ditu. Neurri horiek guztiak obrak kontratatzeko baldintza-agirietan sartu beharko dira, eta baldintza horiek betetzen direla bermatuko duen aurrekontua ere izan beharko dute. Zehazki, eta laburbilduta, txosten horretan ezarritako neurri hauek hartu beharko dira:

a) Natura-ondarea babesteko neurriak.

b) Eragindako lekuak leheneratzeko eta paisaia-integraziorako neurriak.

c) Urak babestera zuzendutako neurriak.

d) Lurzoruak babesteko neurriak.

e) Nekazaritza babesteko neurriak.

f) Kutsatuta egon daitezkeen lurzoruen kudeaketarekin lotutako neurriak.

g) Airearen kutsadura murrizteko neurriak.

h) Kultura-ondarea babesteko neurriak.

i) Hondakinak kudeatzeko neurriak.

j) Zaraten eta bibrazioen ondorioak minimizatzera zuzendutako neurriak.

k) Jardunbide egokien sistema bat ezartzea.

l) Jarduera uztea.

m) Garbiketa eta obra bukatzea.

n) Ingurumen-aholkularitza.

Era berean, kontsulta-fasean administrazioek, erakundeek edo zerbitzu publikoko edo interes orokorreko zerbitzuetako enpresek egindako txostenetan jasotako zehaztapenetara egokitu beharko da.

3.– Onartzeko aurkeztutako proiektuak araudi elektrikoaren araberakoa izan eta industriaren arloan aplikagarriak diren industriako segurtasun- eta kalitate-arauak bete beharko ditu.

4.– Ebazpen hau ematen da obrak egiteko behar diren udal- eta probintzia-eskumenetako eta bestelako baimenak edo lizentziak edozein direla ere, eta horiek aparte utzi gabe, eta bereziki lurraldearen antolamenduari eta ingurumenari dagozkienak. Eskatzaileak nahitaez eskuratu beharko ditu baimen horiek guztiak. Era berean, hirugarrenen eskubideak kaltetu gabe emango da, jabetza-eskubidea salbu utzita.

Kasuan kasuko baimenak, lizentziak edo baimenak izapidetzeak edo sustatzaileak onartutako baldintza teknikoak betetzeak instalazioa burutzeko proiektuan funtsezko aldaketak eragiten baditu, edo aldaketa horiei ingurumen-ebaluazioa egin behar zaiela erabakitzen bada, dagokion baimena eskatu beharko da.

Ebazpen honek ez du administrazio-bidea amaitzen, eta, beronen aurka, gora jotzeko errekurtsoa jar dakioke Industria, Trantsizio Energetiko eta Jasangarritasun Saileko Deskarbonizazioaren zuzendariari, hilabeteko epean, ebazpen hau jakinarazi eta hurrengo egunetik aurrera, eta hori guztia Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluaren eta hurrengoen arabera.

Jarritako errekurtsoaren ebazpena emateko eta jakinarazteko gehieneko epea hiru hilabetekoa izango da. Epe hori igaro eta ebazpenik eman ez bada, gora jotzeko errekurtsoa ezetsitzat joko da.

Bilbao, 2026ko irailaren 24a.

Industria, Trantsizio Energetiko eta Jasangarritasuneko Bizkaiko lurralde-ordezkaria,

MARÍA JESÚS MARKAIDA URIARTE.

Azterketa dokumentala