Boletín Oficial del País Vasco

98. zk., 2026ko maiatzaren 27a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

2270

EBAZPENA, 2026ko maiatzaren 7koa, Ingurumen Administrazioaren zuzendariarena, zeinaren bidez formulatzen baita Erandio udalerriko (Bizkaia) plangintzako arau subsidiarioen aldaketa puntualaren –Caesa industrialdeari dagokiona– ingurumen-adierazpen estrategikoa.

AURREKARIAK

2024ko apirilaren 24ko Ebazpenaren bidez, Eusko Jaurlaritzako orduko Ingurumen Kalitatearen eta Ekonomia Zirkularraren Zuzendaritzak, EAED-228INET espedientearen esparruan, Erandio udalerriko (Bizkaia) plangintzako arau subsidiarioen aldaketa puntualaren –Caesa industrialdeari dagokiona– ingurumen-azterketa estrategikoaren irismen-dokumentua argitaratu zuen, kontuan hartuta hala Euskadiko Ingurumen Administrazioaren ingurumen-ebaluazioari buruzko abenduaren 9ko 10/2021 Legean ezarritakoa nola Ingurumen-ebaluazioari buruzko abenduaren 9ko 21/2013 Legearen eta Planen eta programen ingurumenaren gaineko eraginaren ebaluazio estrategikoa egiteko prozedura arautzen duen urriaren 16ko 211/2012 Dekretuan xedatutakoa.

Erandioko Udalak jendaurrean ipini zuen Planaren eta haren ingurumen-azterketa estrategikoaren informazioa, 45 egun baliodunetan, 2025eko maiatzaren 23ko Bizkaiko Aldizkari Ofizialean iragarkia argitaratuta (97. zk.), xedapen hauek betez: abenduaren 9ko 21/2013 Legearen 21. artikulua eta Euskadiko Ingurumen Administrazioaren abenduaren 9ko 10/2021 Legearen 73. artikulua. Era berean, indarrean dagoen araudiaren arabera, eragindako administrazio publikoei eta pertsona interesdunei kontsulta egiteko izapidea bete zuen.

Erandioko Udalak azaldu du jendaurreko informazioaren aldian lau alegazio aurkeztu direla, eta eragindako administrazio publikoekin eta pertsona interesdunekin egindako kontsulta-izapidean jasotako txostenetako batzuk ere igorri ditu, administrazio-espedientean jasotako emaitzarekin eta edukiarekin.

2026ko martxoaren 4an, Erandioko Udalak eskaera egin zion Ingurumen Administrazioaren Zuzendaritzari, Erandio udalerriko plangintzako arau subsidiarioen aldaketa puntualaren –«Caesa» industrialdeari dagokiona– ingurumen-adierazpen estrategikoa egiteko (aurrerantzean, Plana).

Eskaerarekin batera, honako hauek aurkeztu zituen: Planaren behin betiko proposamena, 2026ko urtarrilekoa; ingurumen-azterketa estrategikoa, 2024ko azarokoa; eta jendaurreko informazioaren izapidea eta eragindako administrazio publikoei eta interesdunei entzunaldia egiteko izapidearen inguruko azalpenak emateko zenbait dokumentu.

ZUZENBIDEKO OINARRIAK

Ingurumen-ebaluazioari buruzko abenduaren 9ko 21/2013 Legearen 1. artikuluan xedatutakoaren arabera, lege horren helburua da ezartzea zer oinarrik arautu behar duten ingurumenean ondorio adierazgarriak eragin ditzaketen planen ingurumen-ebaluazioa, eta ingurumenaren babes-maila handia bermatzea, garapen jasangarria sustatzeko.

Halaber, Euskadiko Ingurumen Administrazioaren abenduaren 9ko 10/2021 Legearen 60. artikuluaren arabera, ingurumen-ebaluazioak ingurumena babesteko maila handia bermatu eta garapen jasangarria sustatuko du. Horretarako, planak, programak eta proiektuak egiteko, hartzeko, onesteko edo baimentzeko ingurumen-alderdiak bateratuko ditu; ingurumen-alternatiba bideragarriak aztertu eta hautatuko ditu; ingurumenarekiko ondorio kaltegarriak prebenitzeko, zuzentzeko eta, hala badagokio, konpentsatzeko neurriak ezarriko ditu; eta ingurumen-ebaluazioaren helburua betetzeko beharrezkoak diren zaintza-, jarraipen-, eta zehapen-neurriak ezarriko ditu.

Abenduaren 9ko 21/2013 Legearen 6.1.a) artikuluan xedatutakoa aplikatuz, administrazio publiko batek abian jarritako edo onetsitako planei eta programei ohiko ingurumen-ebaluazio estrategikoa egin behar zaie, bai eta haien aldaketei ere, lege- edo arau-xedapen batek beharturik prestatu eta onartu direnean, baldin eta ingurumen-inpaktuaren ebaluazioa egitera legez behartutako proiektuak baimentzeko etorkizuneko eremua ezartzen badute eta arlo jakin batzuei erreferentzia egiten badiete, hala nola hiri- eta landa-lurraldearen antolamenduari eta lurzoruaren erabilerari.

Orobat, Euskadiko Ingurumen Administrazioaren abenduaren 9ko 10/2021 Legearen 61. artikuluan xedatutakoaren arabera, II.A. eranskinean zehazten denari jarraituz ingurumenean ondorio nabarmenak izan ditzaketen planei, programei eta horien aldaketei eta berrikuspenei ohiko ingurumen-ebaluazio estrategikoa egingo zaie. Eranskin horretan jasotako plan eta programen artean daude, besteak beste, etorkizunean ingurumen-inpaktuaren ebaluazioa egitera legez behartutako proiektuak baimentzeko esparrua ezartzen duten eta arlo jakin batzuei –hala nola hiri- eta landa-lurraldearen antolamenduari eta lurzoruaren erabilera– erreferentzia egiten dieten planak eta programak.

Era berean, abenduaren 9ko 21/2013 Legearen 17. artikuluan eta hurrengoetan eta Planen eta programen ingurumen-ebaluazio estrategikoa egiteko prozedura arautzeko urriaren 16ko 211/2012 Dekretuaren 8. artikuluan eta hurrengoetan adierazitakoaren arabera, bai Erandioko Udalak bai Ingurumen Administrazioaren Zuzendaritzak beharrezkoa den guztia xedatu dute aurrera eraman ahal izateko Planaren ingurumen-ebaluazio estrategikoaren prozedura: ingurumen-azterketa estrategiko bat egin behar da, eta haren irismena aurrez ezarri, kontsulta publikoen bidez eta eragindako administrazio publikoek eta interesdunek parte hartzeko prozeduraren bitartez.

Planaren ingurumen-ebaluazio estrategikoaren espedienteko dokumentazio teknikoa eta txostenak aztertu ostean, eta kontuan hartuta ingurumen-azterketa estrategikoa egokia dela eta indarrean dagoen araudiari egokitzen zaiola, Ingurumen Administrazioaren Zuzendaritzak ingurumen-adierazpen estrategiko hau ematen du, organo eskuduna baita abenduaren 3ko 410/2024 Dekretuaren arabera (Industria, Trantsizio Energetiko eta Jasangarritasun Sailaren egitura organikoa eta funtzionala ezartzen du dekretu horrek). Adierazpenean, baloratzen da ingurumenaren arloko alderdiak egoki txertatu direla Planaren proposamenean; era berean, adierazpenak aipatzen du zer inpaktu nabarmen eragingo duen plan horrek ingurumenean, azkenean onartuko den planean sartu beharreko azken zehaztapenak barne, ingurumen-ondorioetarako bakarrik.

Kontuan hartu dira honako hauek: 21/2013 Legea, abenduaren 9koa, Ingurumen-ebaluazioari buruzkoa; 10/2021 Legea, abenduaren 9koa, Euskadiko Ingurumen Administrazioari buruzkoa; 211/2012 Dekretua, urriaren 16koa, Planen eta programen ingurumenaren gaineko eraginaren ebaluazio estrategikoa egiteko prozedura arautzen duena; 410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; 40/2015 Legea, urriaren 1ekoa, Sektore Publikoaren Araubide Juridikoarena, eta aplikatzekoa den gainerako araudia. Horiek horrela, honako hau

EBAZTEN DUT:

Lehenengoa.– Erandio udalerriko Caesa industrialdearen plangintzako arau subsidiarioen aldaketa puntualaren ingurumen-adierazpen estrategikoa formulatzea. Hona edukia:

A) Erandioko plangintzako arau subsidiarioak 1992an onartu ziren behin betiko (1993ko ekainaren 4ko BAO, 126. zk.), eta gaur egun berrikuspen-prozesuan daude; zehazki, 2018ko martxoaren 8an onartutako Hiri Antolamenduko Plan Orokorraren (aurrerantzean, HAPO) aurrerapena argitaratuta dago. Arau subsidiarioek hiri-lurzoruaren erabilera misto gisa kalifikatzen dute (industriakoa eta hirugarren sektorekoa).

Eremua «ER-6 Berrikuntza Gunea: Altzaga gunea itsasadarrera irekitzea» eremuaren parte da; eremu hori 2023ko apirilean behin-behinean onartutako Bilbao Metropolitarraren Lurralde Plan Partzialean (aurrerantzean, Bilbao Metropolitarraren LPP) definitu zen, non gune horretarako antolamendu-irizpideak zehazten diren.

Planaren xedea Caesa enpresa zegoen partzela hirigintza aldetik berroneratzea da, Erandioko Altzaga auzoko hirigunean hobekuntzak eginez eta itsasadarrarekin lotura duten espazioak irekiz, eta, era berean, enpresa horretako langile ohien arazo soziolaboralak konponduz. Horretarako, egiturazko antolamenduari dagokionez, aurreko CAESAren lurzoruak erabilera mistoko hiri-lurzoru finkatu gabe gisa birkalifikatu dira (bizitegia/jarduera ekonomikoak), eta, antolamendu xehatuari dagokionez, hirigintza-parametroak ezarri dira (sestra gaineko eta azpiko hirigintza-eraikigarritasuna, etxebizitza kopurua, eraikuntza-profilak eta abar). Bestalde, operazioaren bideragarritasuna bermatzeko, lurzoruen ingurumena leheneratzeko beharra kontuan hartu da.

Aurkeztutako dokumentazioaren arabera, proposatutako soluzioa bat dator HAPOren aurrerapenarekin eta Bilbao Metropolitarraren LPPrekin.

Eremuaren azalera osoa 40.915,57 m²-koa da. Zonakatzeari eta erabilera xehatuei dagokienez, Planak honako banaketa hau proposatu du: % 32,53 espazio libreen, bide-komunikazioen eta ekipamendu komunitarioaren sistema orokorretarako (13.313 m²); % 31,94 tokiko sistemen sare publikoko zuzkiduretarako (13.084 m²); % 21,15 bide-komunikazioko tokiko sistemetarako (8.663 m²); % 12,35 bizitegi-erabileretarako (5.057 m²) eta % 2,06 jarduera ekonomikoetarako (843 m²).

Planak proposatutako eraikigarritasun osoa, zuzkidura publikoak barne, 110.177m²-koa da: 64.425 m² sestra gainean eta 45.751 m², sestra azpian. Bizitegi-erabilerako etxebizitzen eraikigarritasuna 51.093 m²-koa da, eta, gaur egungoarekin alderatuta, hazkundea 47.958 m²-koa da; bestalde, jarduera ekonomikoen eraikigarritasuna (industriakoa eta hirugarren sektorekoa) 25.033 m² murriztu da (32.233 m²-tik 7.200 m²-ra). Horrek esan nahi du eraikigarritasuna 25.383 m² handituko dela.

Zuzkidura publikoen artean, beste erabilera batzuetarako bizitegi-eraikinen beheko solairuetan kokatutako 1.500 m² kontuan hartu dira gutxienez, baita zuzkidura-bizitokietarako eraikigarritasuna ere (2.175 m²).

Eraikinen banaketari dagokionez, ekialdean hiru bizitegi-bloke daude (SZR-1.1, SZR-1.2 eta SZR-1.3), eta hirugarren sektoreko blokea (SZT-1) iparraldeko muturrean dago. Bloke linealak dira, itsasadarrarekiko zeharka kokatuak, eta Altzagako hiri-sarearekiko iragazkortasuna ahalbidetzen dute. Eremuaren ekialdeko zati horren hegoaldeko muturrean, ekipamendu komunitariorako lurzorua erreserbatu da, zuzkidura-bizitokietara bideratua. Era berean, mendebaldeko erdian hiru bizitegi-bloke daude (SZR-2.1, SZR-2.2 eta SZR-2.3), horiek ere itsasadarrarekiko zeharka jarrita. Erabileren banaketa horren helburua da Altzagako hirigunearen hegoaldeko bizitegi-erabileren eta iparraldeko industria-erabileren arteko trantsizioa lortzea, hirugarren sektoreko erabileren bitarteko antolaketaren bidez. Ekialdeko eta mendebaldeko eremuak Ibarra kaleari jarraipena ematen dion ardatzak banatzen ditu, itsasadarrarekiko modu paraleloan. Ekialdeko eremuan, blokeak baxuagoak dira (45 metro inguru), eta BS+10 altuera izango dute. Bestalde, mendebaldeko blokeak altuagoak dira, batez beste 65 metro ingurukoak, eta, kasu honetan, mailakatuta eraikitzea aurreikusi da; BS+8 profila izango dute itsasadarraren aurreko aldean daudenek, BS+10 erdian daudenek eta BS+12 etxadiaren barrualdean daudenek (BS+8+2+2).

Alternatibak.

Alternatibei dagokienez, ez da kokapen-alternatibarik planteatu, Planaren helburua Caesa enpresa zegoen lurzoruak berroneratzea baita.

0 alternatiba bat dator indarrean dagoen plangintzak definitzen duen egoerarekin; hots, jarduera ekonomikoen erabilera mantentzea. Gainera, egoera erregularizatzeko, inguruko kaleak irekitzea eta handitzea planteatzen du, baldin eremuaren ertzetan dauden eraikinak antolamenduz kanpo geratzen badira eta eraisten badira. Industria-erabilera mantentzea ez da oso bideragarria, eta bateraezina da inguruko bizitegi-erabilerarekin.

Bestalde, 1. alternatibak zertxobait aldatzen du eremuaren mugaketa, 40.915,57 m²-ra iritsi arte. Egiturazko antolamenduan erabilera misto orokorra ezarri da (bizitegietakoa eta hirugarren sektorekoa), eta itsasadarrarekiko perpendikularrean kokatutako sei bloke lineal planteatu dira, 450 etxebizitza hartuko lituzketenak. Bizitegi-blokeek etxadiaren zabalerarik handieneko eremua hartzen dute; hirugarren sektoreko erabilerarako, berriz, altuerako azken bloke bat proposatu da, ipar-ekialdeko ertzean, lehendik dagoen hirugarren sektoreko eraikinaren aurrean, zeina finkatu egingo baita. Halaber, eremuaren hegoaldeko muturrean 725,01 m²-ko partzela bat gorde da zuzkidura-bizitokietarako. Espazio libreak blokeen arteko guneetan banatu dira, eta haien azaleraren zati bat sistema lokalen sarerako gorde da. Garaje-erabilera sestra azpiko solairuan ahalbidetu da, eta aparkaleku-zuzkidura araudiak ezarritakoa baino handiagoa da.

2. alternatibak 1. alternatibaren eremuaren mugaketa eta erabilera orokorra mantentzen ditu (bizitegietako eta hirugarren sektoreko erabilera mistoa). Era berean, 1. alternatibaren bizitegi-blokeen eta hirugarren sektoreko eraikinaren antolaketa bera mantentzen da. Hala ere, zuzkidura-bizitokien eraikina eremuaren hego-ekialdeko ertzean dago.

Alternatiben balorazioari dagokionez, 0 alternatiba baztertu egin da, ez duelako ahalbidetzen Caesaren lurzoruak berroneratu eta hiri-sarean integratzea, ezta, beraz, nukleo koherenteago bat eta kalitate handiagoko hiri-paisaia bat sortzea ere. 1. eta 2. alternatibak oso antzekotzat jo dira ingurumen-ikuspegitik, eta biek ala biek lurzorua berreskuratzea eta eremuaren paisaia-izaera hobetzea dakarte, industria-lurzoru bat birmoldatu eta hirigunean integratzen baitute. Hala ere, 1. alternatibak Altzagako hirigunearekiko komunikazio hobea, espazio irekiago bat eta integrazio egokiagoa ahalbidetzen dituela ondorioztatu da.

Inguruaren ezaugarriak.

Planaren eremua Caesa enpresa zegoen partzela da. Erabat artifizializatutako eremua da, eta haren gainean daude aipatutako enpresaren pabiloiak eta eremuaren hego-ekialdean dauden etxebizitza-bloke batzuk.

Eremua Ibaizabalgo Unitate Hidrologikoan dago, Kantauri Ekialdeko Demarkazio Hidrografikoan. Zehazki, «Nerbioi barrualdea drainatzea trantsizioa» (ES111O000030) ur-masaren isuri-arroan dago. Ibai-ibilgu bat ere ez da eremutik igarotzen, baina eremua Ibaizabalen eskuineko ertzetik 40 metro eskasera dago. Eremuaren hego-mendebaldeko muturra itsaso eta lehorraren arteko jabari publikotik 25 metro ingurura dago.

Indarrean dagoen EAEko Itsasertza Babestu eta Antolatzeko Lurralde Plan Sektorialaren (aurrerantzean, LPS) kartografiaren arabera, Planak ez du haren eremua ukitzen; hala ere, aipatutako LPSaren berrikuspenaren aurrerapen-dokumentuaren arabera (2021), Planak ukitzen du haren eremua, eta, zehazki, eremu garatuetan lokalizatu da.

Eremuko material litologikoak gainazaleko jalkinak dira, eta porositatearengatiko iragazkortasun txikia dute.

Aztertutako esparrua Hegoaldeko Antiklinorioa lurpeko ur-masaren gainean dago (ES017MSBT017-006), eta ez du interes hidrogeologikoko inongo eremurik ukitzen.

Eremua erabat artifizializatuta dagoenez, bertako landaredi urria erruderala edo nitrofiloa da.

Eremuan ez da identifikatu Batasunaren intereseko habitatik (BIH) edo mehatxatutako flora-espezierik. Itsasadarra honela identifikatu da: 1130 «Estuarioak» Batasunaren intereseko itsas habitat ez-lehentasunezkoa.

Eremuko fauna hiri-eremuekin lotutakoa da. Eremuaren mendebaldetik igarotzen den Ibaizabal ibaiaren beheko zatia sartuta dago hobetu beharreko tarte gisa Bisoi Europarraren –Mustela lutreola– Kudeaketa Planean (118/2006 Foru Dekretua, ekainaren 19koa, Bisoi Europarraren –Mustela lutreola. Linnaeus, 1761– Kudeaketa Plana onartzen duena, Bizkaiko Lurralde Historikoan, galtzeko arriskuan dagoen espeziea den eta babesteko neurri bereziak behar diren aldetik).

Eremuak ez du ukitzen interes geologikoko lekurik, naturagune babesturik, natura-intereseko beste ezein gunerik, ezta Kantauri Ekialdeko Demarkazio Hidrografikoko Plan Hidrologikoan Babestutako Guneen erregistroko elementurik eta kudeaketa-plan bat duen fauna-espezie mehatxatuen interes bereziko eremurik ere. EAEko Korridore Ekologikoen Sareko elementurik ere ez du ukitzen. Ibaizabal ibaia bilbe urdin gisa sartu da lurralde-antolamenduaren gidalerroen azpiegitura berdean.

Bilbao Metropolitarraren Eremu Funtzionaleko Paisaiaren Katalogoaren eta Zehaztapenen arabera, eremua itsasadarraren eskuinaldeko paisaia-intereseko esparruan dago. Esku hartzeko eremu bat da; hain zuzen ere, eskuinaldean eta ezkerraldean ibaian gora eta behera dauden eremuetakoekin parekatzeko moduko hiri-kalitateko eta itsasadarrarekiko kontaktuko mailak lortzeko.

Geoeuskadiren arabera, sektorean ez da kultura-ondasun izendatutako elementurik identifikatu, baina eraikitako ondarearen «Beste batzuk» kategoriako bi elementu daude: «Franco española de cables» (26. fitxa) eta «Casa Martiartu 4» (103. fitxa). Bi elementuetako batek ere ez du babesik gaur egun. Bestalde, Urdaneta kaleko 3 eta 5 zenbakietako eraikinak Erandioko arau subsidiarioen udal-katalogoan jasota daude, eta oinarrizko babesa dute.

Egoera akustikoari dagokionez, Erandio udalerriak zarata-mapa bat du, 2014. urtean eguneratua. Hasierako dokumentu estrategikoari erantsitako azterlan akustikoaren arabera, Planaren eremuan, gauez (aldi okerrena), maila akustiko handienak partzelaren mendebaldeko perimetroaren ondoan identifikatu dira, eta José Luis Goyoaga etorbideko zirkulazioak eragindako zarataren ondorio dira. Eremu horretan, mailak 60 dB (A) ingurukoak dira; hau da, ez dira betetzen bizitegi-eremu akustikoei aplikatu beharreko kalitate akustikoko helburuak (aurrerantzean, KAH) –50 dB (A)–. Gainerako partzelan, soinu-mailak txikiagoak dira, nahiz eta hegoaldean eta iparraldean ere KAHak ez diren betetzen partzela mugatzen duten bideen ondorioz.

Bestalde, Bizkaiko errepideen foru-sareko zarata-mapen arabera (2023), eremua inguruko errepideen zortasun akustikoko eremutik kanpo dago.

Balizko ingurumen-arriskuei erreparatuta, eremua Bilbao-Erandio (ES017-BIZ-IBA-01) uholde-arrisku handiko eremuan dago, eta, 10, 100 eta 500 urteko errepikatze-denborako uholde-arriskuaren orbana ukitzen du. Itsasertzeko Lurralde Plan Sektorialaren arabera (2022ko aurrerapena), eremua klima-aldaketarekin lotutako arriskuen pean dago mareei dagokienez, baina ez olatuei dagokienez.

Sektorea lurzorua kutsa dezaketen jarduerak edo instalazioak izan dituzten edo dituzten lurzoruen inbentarioko partzelekin bat dator. Zehazki, 48902-00295 eta 48902-00080 zenbakiko partzelak dira, biak industrialak, lehenengoaren kasuan Caesaren jarduera jasan duelako, eta bigarrenean, galdaragintza fabrikatu eta muntatu direlako bertan. Horregatik, lurzoruaren kalitate-adierazpena izapidetu beharko da, bat etorriz Lurzorua ez kutsatzeko eta kutsatutakoa garbitzeko ekainaren 25eko 4/2015 Legean xedatutakoarekin.

Bestalde, eremua akuiferoen kutsadurarekiko kalteberatasun nabarmenik gabeko esparruen gainean dago; ez du baso-suteen arriskurik, eta, arrisku sismikoari dagokionez, azterketa-eremua V. intentsitate-gunean dago.

Gainera, geoEuskadin eskuragarri dagoen kartografiaren arabera, Planaren eremua higadura-maila txikiko guneetan dago. Ez dago Seveso enpresen istripu-hipotesien afekzio-banden eraginpean. Merkantzia arriskutsuak garraiatzeko arriskuari dagokionez, eremua BI-711 errepideko (Goioaga etorbidea) 100 eta 200 metroko afekzio-banden gainean dago; errepide horrek oso arrisku txikia du.

Inpaktu nagusiak honako hauek eragingo dituzte: industria-eraikinak eta -instalazioak eraistea eta bizitegi-garapen berria egitea; eta eraikinak, bideak eta aparkalekuak eraikitzea. Izan ere, ekintza horiek, hondakinak, emisio atmosferikoak, makinen joan-etorriak, isurketak, zaratak eta abar sortuko dituzte, eta horrek eragina izango du lurrazaleko eta lurpeko uretan eta lurzoruetan, kultura-ondarean, kutsatuta egon daitezkeen lurzoruetan eta ingurunean bizi diren biztanleengan, emisio atmosferikoengatik eta akustikoengatik, besteak beste.

Erandioko Plangintzako Arau Subsidiarioen Katalogoan sartutako eremu mugatuko Urdaneta kaleko 3. eta 5. zenbakietako bi eraikinen kasuan, alderdi esanguratsurik ez dagoela kontuan hartuta, Planean ezarri da eraikin horiek babestea ez dagoela justifikatuta, are gehiago eremuaren eraldaketa sakona programatzen ari direlako. Horregatik, Planean bi eraikin horien katalogazioa ezeztatzea agindu da, eta, horretarako, Hirigintza Araudiaren Katalogoa aldatu behar da. Horrela, Urdaneta kaleko 3. eta 5. zenbakietako bi eraikinak kenduko dira onartutako hirigintza-araudiko «8.2. Eraikuntzaren katalogazioa» apartatuan jasotako zerrendatik, bai eta zerrenda horrekin batera doazen fitxetatik ere. Aldaketa hori xehetasunez eta arrazoituta dago jasota Planaren Memoriako A.5 apartatuan.

Kutsatuta egon daitezkeen lurzoruak egoteari dagokionez, lurzoruaren kalitate-adierazpena izapidetu beharko da, baldin eta Lurzorua ez kutsatzeko eta kutsatutakoa garbitzeko 4/2015 Legearen 23. artikuluan aurreikusitako kasuren bat gertatzen bada. Ildo horretan, 2024ko azaroaren 21ean, lurzoruaren kalitatearen adierazpenaren prozedura hasteko eskatu zitzaion Eusko Jaurlaritzako Ingurumen Kalitatearen eta Ekonomia Zirkularraren Zuzendaritzari (DCS-0137/24), Planean aurreikusitako antolamendua ezartzeko beharrezkoak diren jarduketak definitzeko. Horretarako, eragindako eremuak arriskuen analisi kuantitatibo baten bidez karakterizatu behar dira. Horri esker, eremu horretan aurreikusitako erabilerekin bateragarriak diren baloratuko da eta ingurumen-helburuak deskribatzen dituen leheneratze-plana egingo da, egon daitezkeen arriskuak behar bezala murriztea eta material arriskutsuak desagerraraztea lortzeko. AFESAk egin zuen lan hori, eta, 2025eko martxoaren 11n, AFESAk berak Cables y Alambres Especiales S.A. enpresak historikoki okupatu duen lurzoruaren kalitateari buruzko ikerketa-txostena eta kokalekuaren leheneratze-plana egin zituen, eta 2025eko martxoaren 15ean aurkeztu zen ingurumen-organoan.

Ustiapen-fasean, inpaktu posibleak eraikin berrietarako lanetan baliabideak kontsumitzea eta hondakinak sortzea izango dira, baita eremuko inpaktu akustikoa eta uholde-arriskua ere.

Egoera akustikoari dagokionez, inpaktu akustikoaren azterketan (Proinac) ondorioztatu da eremuan kalitate akustikoaren helburuak ez direla betetzen, ez gaur egun, ez 20 urtera begira. Bibrazioen kasuan, jakinarazi da ez dutela etorkizuneko garapena baldintzatzen; hala ere, bidetik gertuen egiten diren bizitegi-eraikinen zimendu-kotan bibrazio-saiakuntza berriak egitea gomendatzen da, zimenduak bibrazioak sortzen dituen fokutik gertu egongo baita.

Kalitate akustikoko helburuak betetzen ez dituenez, eremua Babes Akustiko Bereziko Eremu izendatu beharko da, eta, horretarako, eremuko plana jasotzen da, 213/2012 Dekretuaren 46. artikuluan aurreikusitako baldintzetan. Artikulu horretan, honako neurri hauek zehazten dira:

– José Luis Goyoaga etorbideko abiadura-muga murriztea, 50 km/h-tik 30 km/h-ra.

– Pantaila akustiko bat jartzea trenbidea ateratzen den eremuan.

– Fatxadetan isolamendu akustikoa jartzea, eraikinen barnealdean kalitate akustikoko helburuak betetzeko.

– Erabilera sentikorragoak (logelak) saihestea zarata-foku nagusietara ematen duten fatxadetan.

Dair ingeniaritzak uholde-arriskuari buruzko azterlan bat egin du, etorkizunean aztergai den eremuaren uholde-arriskuaren baldintzak aztertzeko eta ibilguaren funtzionamendu hidrauliko egokia bermatzeko. Azterlan horretan, etorkizuneko egoeraren eredua diseinatu ondoren, ur-laminaren kotak konparatuta, zehaztu da proposatutako obrek ez dutela aldatzen ingurunearen uholde-arriskua. Bestalde, erreferentzia-kota 3,33 m da, eta T500 errepikatze-denborari dagokio. Hori kontuan hartuta, Planean sestra batzuk aplikatu dira antolamenduaren esparruan, laminaren mailak kontuan hartuta. Planean jasota dagoen bidegintzarako, sestra jakin batzuk zehaztu dira, eta, ahal den neurrian, urpean gera daitezkeen kotekiko igoko dira, aurretik daudenek baldintzatzen baitituzte. Eremuaren erdialdeko eremua urbanizatzeko, bizitegi-blokeak dauden eremuan, 5,80 metroko kota orokorra zehaztu da. Bestalde, lurpeko garajeetarako sarbideen kotak, bai eta horien haizebideak eta ebakuazio-bideak ere, 3,35 metroko gutxieneko kotan jarriko dira. Izan ere, horri esker erabili ahalko dira, iragazgaiztasuna bermatuko baita.

Paisaiaren eraginari dagokionez, ustiapen-fasean industrialdea bizitegi-eremu gisa berroneratzeak paisaia-kalitatea hobetuko du, egungo egoerarekin alderatuta.

B) Txosten hau bat dator ingurumen-azterketa estrategikoaren ondorio nagusiekin, eta ondorioztatzen da nahikoa justifikatu dela aintzat hartu direla Eusko Jaurlaritzako orduko Ingurumen Kalitatearen eta Ekonomia Zirkularraren Zuzendaritzaren 2024ko apirilaren 24ko Ebazpenaren bidez emandako irismen-dokumentuan aurkeztu ziren ingurumen-irizpideak.

Planak ingurumen-azterketa estrategikotik eratorritako ingurumen-alderdiak txertatu ditu, ingurumen-organoak emandako irismen-dokumentuan eskatutako sakontasun-, xehetasun- eta zehaztasun-maila bermatuta. Ondorioztatzen da ingurumen-arloko izapidetze-prozesuan adierazitako alderdi guztiak behar besteko zorroztasunez jorratu direla, plangintza-prozesuan gerta litezkeen ingurumen-eraginak kontuan hartu direla bermatzeko moduan.

C) Plana izapidetzeko prozesuan, ez da gehitu jarduketa berririk, ingurumen-ebaluazio estrategikoa zabaltzea eskatzen duenik, eta ez da hauteman Planean birdefinitu edo kendu beharreko jarduketarik dagoenik.

D) Neurri babesleak, zuzentzaileak, konpentsatzaileak eta jarraipenekoak hartzeko orduan, kontuan hartuko dira indarrean dagoen araudia eta hurrengo apartatu hauetan xedatutakoa, bai eta ingurumen-azterketa estrategikoan aurreikusitakoa ere, aurrekoa galarazten ez duen heinean. Era berean, zehaztapen hauek jaso beharko ditu Planak:

D.1.– Ekologia eta paisaia leheneratzeari buruzko neurriak.

Planaren arautegian, eremua garatzeko baldintzatzaile gisa, neurri hauek sartu beharko dira: landaredia babestea, espezie inbaditzaileak desagerraraztea eta kontrolatzea, ingurumena leheneratzea eta paisaia integratzea. Berariaz jaso beharko da Plana garatzeko proiektuak «Leheneratze-proiektu» bat izango duela eta bertan garatuko direla leheneratze ekologiko eta paisajistikoko jarduketak, gauzatzeko behar adinako xehetasunez, aurrekontua barne. Egin beharreko jarduketak ezarriko ditu proiektu honek. Besteak beste, honako hauek:

– Zehaztu egin beharko dira aurreikusitako landareztatzeak, espezieak, landaketa-esparrua, mantentze-lanak, etab.

– Planaren garapenak eragindako eremu guztiak eta espazio libreak sartuko dira, jasangarritasun-irizpideak lehenetsiz, espezie inbaditzaileak sartzeko arriskua murrizteko eta eremuko landaredi potentzialaren berezko espezieak erabiltzeko, eta harizti azidofiloaren eta harizti/baso misto atlantikoaren berezko espezieak proposatuz.

– Berdeguneak «Lorategi eta berdegune jasangarriak diseinatzeko eskuliburua» argitalpenari jarraikiz loreztatuko dira. Eusko Jaurlaritzako Ingurumen, Lurralde Plangintza eta Etxebizitza Sailak egin zuen eskuliburu hori. Espezie autoktonoak erabiliko dira eta jasangarritasun-irizpideak lehenetsiko dira, espezie inbaditzaileak agertzeko arriskua txikiagoa izan dadin. Landareztatze- eta lorategi-lanetan ez dira inola ere erabiliko inbaditzaileak izan daitezkeen espezie aloktonoak; esaterako, Fallopia japonica, Robinia pseudoacacia, Cortaderia selloana edo beste batzuk. Leheneratze-lanetan erabiliko den landare-lurrak flora inbaditzailearen propagulurik ez duela bermatuko da.

Leheneratze-proiektuak bermatuko du espazio libreetako landareztatze-lanak ahalik eta lasterren egingo direla; horrela, higadura-prozesuak ekidingo dira, bai eta solidoak drainatze-sarera arrastatzea eta espezie aloktono inbaditzaileen kolonizazioa ere.

D.2.– ILJP eta uholde-arriskua duten eremuak babesteko neurriak:

– Planaren hirigintza-araudiak jaso beharko ditu Trantsizio Ekologikorako eta Erronka Demografikorako Ministerioaren Euskal Herriko Itsasertz Mugartearen 2025eko ekainaren 9ko txostenean azaldutako arau-xedapen sektorialak.

– Edonola ere, eremua ILJParen eragin-eremuaren barruan dagoenez, arau subsidiarioen aldaketak bat etorri beharko du Kostaldeei buruzko Erregelamendu Orokorraren 59. artikuluarekin, eta arkitektura-pantailak sortzea saihestu beharko da.

– Haizebide, ebakuazio-bide eta garajeetarako ezarritako kota gaur egun 500 urteko errepikatze-denborako uholdeen kotaren gainetik dago. Nolanahi ere, klima-aldaketaren ondoriozko arriskuak kontuan hartuta etorkizuneko uholde-gertakarien aurrean segurtasun-marjina handitzeko, haizebideen, ebakuazio-bideen eta garajeetarako sarbidearen kota igotzea gomendatzen da (azken hori posible den neurrian).

– Kantauri Ekialdeko Plan Hidrologikoaren 37.6 artikuluan xedatutakoa betez, ez da onartuko uholde-arriskuko eremuan hondakinak metatzea.

– Araudi orokorrean jaso beharko da hirigintza-garapen berriek zoladura iragazgaitza minimizatu eta hiri-drainatze jasangarriko sistemak sartu behar dituztela, Kantauri Ekialdeko Plan Hidrologikoaren 48.1 artikulua eta Jabari Publiko Hidraulikoaren Erregelamenduaren 126 ter artikuluaren arabera. Betebehar hori egiten diren antolamendu-proiektuetan egingo da, eta, nolanahi ere, obrak hasi aurreko derrigorrezko baimenean jasoko da. Horretarako, gida hau kontuan hartzeko gomendatzen da: «Uholde-arriskura egokitzeko gida: Drainatze jasangarriko hiri-sistemak. 2019. MITECO».

– Egiten diren jarduketek Uraren Euskal Agentziaren obra-baimena beharko dute aldez aurretik.

D.3.– Uren kalitatea babesteko neurriak.

Urbanizazio- eta eraikuntza-proiektuek neurriak aurreikusi beharko dituzte lurrazaleko uretara ahalik eta solido gutxien iristeko (adibidez, jalkitze-tangak, sedimentuentzako tranpak edo iragazkiak).

Urbanizazio-proiektuak hondakin- eta euri-urak bereiz biltzeko sare bat diseinatu beharko du.

Euri-urei dagokienez, hiriko drainatze-sistemek jatorrian minimizatu beharko dute hirigintza-garapenaren inpaktua, euri-jariatzeek eragindako karga kutsatzaileari dagokionez, eta jariatze-uren bolumena murriztera bideratutako neurriak hartu beharko dituzte, hala nola gainazal eta akabera iragazkorrak, edo zoladura edo okupazio iragazgaitzaren kopurua behar-beharrezkoa den azaleretara minimizatzea.

D.4.– Saneamenduari eta hornidurari buruzko neurriak.

Bilbao Bizkaia Ur Partzuergoaren (BBUP) saneamendu- eta hornidura-txostenean, 2025eko urriaren 22koan, xedatutakoa alde batera utzi gabe, egikaritze-proiektuek baldintza hauek hartu beharko dituzte kontuan:

– Caesaren jarduketa-eremuan, sare bereizleak jarri beharko dira, eta sortzen diren euri-sareak nahitaez baliabide hartzailera isuri beharko dira, eta saneamendu-sistema orokorrera ur beltzak soilik isuri beharko dira. Sareak egitean, klima-aldaketa dela eta, kontuan hartu beharko da eragile klimatiko eta atmosferikoen eragina.

Proiektatzen den saneamendu-sare bereizleen (ur beltzenak eta euri-urenak) garapenari buruzko dokumentazioa aurkeztu beharko zaio Bilbao Bizkaia Ur Partzuergoari (BBUP).

– Hirigintza-garapen berriaren saneamendu-sarea definitu eta lehen mailako saneamendu-sarera konektatzeko proposatu diren puntuak zehaztu ondoren, udalak (BBUPrekin lankidetzan) hainbat jarduketa proposatu eta gauzatu beharko ditu, biztanleen kopurua areagotzeak ur-masen presioa ez handitzeko. Presioa handitzen da biztanleen kopurua handitzeak dakarren hondakin-uren presentzia handiagoak ondorio hauek izango lituzkeelako: alde batetik, euri-aldietan saneamendu-sisteman gerta daitezkeen gainezkatzeek hondakin-uren kutsadura handiagoa izatea, eta, bestetik, gainezkatzeak lehenago gertatu ahal izatea, kolektoreak hondakin-uretara bideratuko bailirateke nagusiki. Hortaz, gaur egun beharrezkoa da saneamendu-sarera konektatuta dauden euri-urak desagerraraztea.

Hala, garapen berriaren azterlan espezifiko bat egin beharko da, euri-urak gehitzeko puntuak detektatu eta jarduketa berriak zehazteko. Izan ere, horri esker, gainezkatze-uneetan egoerak ez du okerrera egingo.

– Saneamendu- eta hornidura-instalazioen sareak horiek kudeatzen dituzten organismoen eta kasu bakoitzean aplikatu beharreko arauen arabera egingo dira. Diseinua organismo horiek egiaztatu eta onetsi beharko dute.

D.5.– Kutsatuta egon daitezkeen lurzoruei buruzko neurriak.

– Planak antolatzen duen eremuan lurzorua kutsa dezaketen jarduerak edo instalazioak jasan dituzten lurzoruen inbentarioan jasotako kokalekuak daudenez, bete egin beharko da Lurzorua kutsatzea saihestu eta kutsatutakoa garbitzeko ekainaren 25eko 4/2015 Legeak eta berau garatzen duen 209/2019 Dekretuak xedatutakoa.

– Edonola ere, Erandioko Udalari eta Eusko Jaurlaritzako Ingurumen Sailburuordetzari jakinarazi beharko zaizkie lur susmagarriak detektatzearen ondoriozko kutsadura-arrasto guztiak, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legearen 22.2 artikulua betetzeko.

D.6.– Kultura-ondareari dagozkion neurriak.

Euskal Kultura Ondarearen maiatzaren 9ko 6/2019 Legean ezarritakoa alde batera utzi gabe, lur-mugimenduak egin bitartean aztarna arkeologikoren bat egon daitekeen zantzuren bat aurkitzen bada, lanak eten egingo dira, eta berehala jakinaraziko zaio Bizkaiko Foru Aldundiko Euskara, Kultura eta Kirol Sailari, hark erabakiko baitu zer neurri hartu.

D.7.– Eremuko kalitate akustikoa babesteko neurriak.

Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren 36. artikuluak ezartzen duenari jarraikiz, ezin izango da gauzatu garapen berririk, baldin eta ez badira betetzen kanpoaldeko kalitate akustikoaren helburuak, hargatik eragotzi gabe dekretu horren 43. eta 45. artikuluetan xedatutakoa.

Ildo horretatik, azterketa akustikoaren arabera, kalitate akustikoko helburuak betetzen ez direla identifikatu da; hortaz, beharrezkoa da babes akustiko bereziko eremutzat (aurrerantzean BABE) deklaratzea, bat etorriz dekretu horren 43. eta 45. artikuluetan ezarritakoarekin. Deklarazio horrek bermatu beharko du gutxieneko edukia bat datorrela Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren 45. artikuluko b) letran eta ondorengoetan adierazitakoarekin. BABE adierazpen horretan jasotako eremuko plana, kanpoaldea babesteko teknikoki zein ekonomikoki egokiak diren neurriak ezartzen dituena, urriaren 16ko 213/2012 Dekretuaren 46. artikulutik 48. artikulura bitartean ezarritakoari egokituko zaio.

Eremuko planean jasotako neurriak ezarri arren kalitate-helburuak betetzen ez badira –eta soilik kasu horretan–, toki-administrazioak eremu hori Egoera Akustiko Bereziko Eremu gisa deklaratuko du, eta helburu horiek betetzeko neurri osagarri berriak definituko dira.

Nolanahi ere, eraikin sentikorren –etxebizitzak edo ospitale-, hezkuntza-, kultura-, erlijio- eta administrazio-erabilera dutenak badira– barnealdeko kalitate akustikoko helburuak bete beharko dira beti; horretarako, udalak hori justifikatzen duen txosten bat egin beharko du, kasuan kasuko eraikuntza-baimena eman aurretik, eta kanpoaldea babesteko zuzenketa-neurriak ezarri beharko ditu.

Azkenik, Planak ziurtatu beharko du, dagokion hirigintza-tresnari hasierako onarpena eman aurretik, azpiegituren zortasun akustikoen pertsona edo entitate titularrek kutsadura akustikoaren erregulazioari dagokion nahitaezko txostena egiten dutela, urriaren 16ko 213/2012 Dekretuaren 30. artikuluan adierazitakoa betez.

Beste alde batetik, Plana garatzetik eratortzen diren proiektuen ondoriozko obrek sortutako soinu-mailak bete egin beharko ditu, obra horien eragin-eremuan, Euskal Autonomia Erkidegoko hots-kutsadurari buruzko urriaren 16ko 213/2012 Dekretuan ezarrita dauden kalitate akustikoaren helburuak.

D.8.– Ingurumena babesteko neurri orokorrak aurreikusitako jarduketak gauzatzen diren bitartean.

Aurrekoei kalterik egin gabe, Planaren araudiak barnean hartuko du Plana garatzeko proiektuen hirigintza-lizentziak ematean sustatzaileek nahitaez bete beharreko baldintzak sartzeko betebeharra, honako hauei dagokienez:

– Obrako langileek erabili behar duten jardunbide egokien gidaliburua. Gai hauekin zerikusia duten alderdiak bilduko ditu, gutxienez: lanaldiak; makineria; aldi baterako desbideratzeak; isurketak saihesteko prebentzio-neurriak; ahalik eta hauts eta zarata gutxien sortzea; herritarren lasaitasunerako kaltegarriak izan daitezkeen jardunak minimizatzea; hondakinak kudeatzea, eta abar.

– Obrak, bai eta lurzorua erabiltzea eragiten duten eragiketa osagarriak ere, proiektua gauzatzeko behar-beharrezkoa den gutxieneko eremuan gauzatuko dira. Kontratistaren instalazio-eremuak (barne hartuta makinak gordetzeko guneak, obra-txabolak, landare-lurra eta obrako materialak eta hondakinak aldi batean pilatzeko guneak) ingurumenari ahalik eta gutxien eragiteko irizpideei jarraikiz proiektatuko dira.

– Hondakinak sortu eta kudeatzea: Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legeak ezarritakoaren arabera eta aplikatzekoak diren berariazko araudiek agindutakoaren arabera kudeatuko dira obretan sortutako hondakinak, hondeaketetatik eratorritakoak barne.

Hondakinak kudeatzeko hierarkia-printzipioei jarraituz, sustatu behar da hondakinik ez sortzea, edo, hala badagokio, kudeatu daitezela apirilaren 8ko 7/2022 Legearen 8. artikuluan ezarritako lehentasun-hurrenkeran; hau da: prebentzioa, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne.

Hondakinak deuseztatzeko, ezinbestekoa izango da aldez aurretik behar bezala justifikatzea ez dela bideragarria haiek balorizatzea teknikoki, ekonomikoki edo ingurumenaren aldetik.

Olio erabiliak kudeatzeko, Industria-olio erabilien kudeaketa arautzen duen ekainaren 2ko 679/2006 Errege Dekretuan xedatutakoa beteko da.

Hondakin arriskutsuak biltzeko sistemak bereiziak izango dira, duten tipologia dela eta, isurketaren bat gertatuz gero, nahasita, arriskutsuago bihurtu edo kudeaketa zaildu dezaketen kasuetan. Hondakin arriskutsuak dituzten edukiontziek edo ontziek bete egin beharko dituzte Hondakinak eta lurzoru kutsatuak arautzeko eta ekonomia zirkularra bultzatzeko apirilaren 8ko 7/2022 Legearen 21. artikuluan ezarritako segurtasun-arauak, eta itxita egongo dira kudeatzaileari eman arte, isurita edo lurrunduta edukirik gal ez dezaten. Edukiontzi edo ontzi horiek argi etiketatu beharko dira, irakurtzeko eta ezin ezabatuzko moduan, eta indarrean dagoen araudiaren arabera.

Gune espezifiko bat egokituko da, hondakin arriskutsuak behin-behinean biltegiratzeko, hala nola olio-potoak, iragazkiak, olioak, pinturak eta abar. Gainera, hondakin geldoak biltzeko edukiontzi espezifikoak gaituko dira, hondakin arriskutsuen guneetatik bereizita. Halaber, obran zehar, eta lanek irauten duten bitartean, elementu estankoak jarriko dira (bidoiak eta abar) sortutako hondakinak biltzeko. Hondakin horiek motaren arabera bereizi beharko dira, aipatutako garbigunean aldi baterako biltegiratu baino lehen.

Espresuki debekatuta dago sortutako hondakin-tipologia desberdinak elkarren artean edo beste hondakin edo efluente batzuekin nahastea. Halako hondakinak jatorritik bereiziko dira, eta bilketa- eta biltegiratze-bitarteko egokiak prestatuko dira nahasketa horiek ekiditeko.

Olio erabiliak estalpean biltegiratuko dira kudeatzaile baimendu bati entregatu arte, behar bezala etiketatutako andel estankoetan, zolata iragazgaitz baten gainean, eta kubo txikietan edo isurketei eta ihesei eusteko sistemen barruan.

Aplikatzekoa den araudia betetzen laguntzeko, lanetan sortutako hondakinak kudeatzeko sistemak prestatu beharko dira. Lan horien arduradunek kudeatuko dituzte sistema horiek, eta haien ardura izango da langileek sistema horiek behar bezala erabiltzea. Bereziki, ez da inolaz ere kontrolatu gabeko efluenterik sortuko erregai eta produktuak biltegiratzeagatik, makinen mantentze-lanak egiteagatik edo hondakinak erretzeagatik.

Eraikuntza- eta eraispen-hondakinak Eraikuntza- eta eraispen-hondakinen kudeaketa arautzeko duen ekainaren 26ko 112/2012 Dekretuan xedatutakoaren arabera kudeatuko dira.

Aurreikusitako eraispenak egitean, arreta handiz jokatu beharko da, eta amiantoa duen hondakinik antzematen bada, otsailaren 1eko 108/1991 Errege Dekretuak, amiantoak ingurumena ez kutsatzeko eta amiantoaren ondoriozko kutsadura txikitzekoak, ezartzen dituen eskakizunak bete beharko dira. Era berean, amiantoa duten hondakinak kudeatzeko egingo diren manipulazioak amiantoarekin lan egitean segurtasun- eta osasun-arloan bete behar diren gutxieneko baldintzak ezartzen dituen martxoaren 31ko 396/2006 Errege Dekretuan ezarritako aginduen arabera egingo dira.

Obretan sortutako hondeaketa-soberakinak soberakinen biltegi baimendura eramango dira, eta haien kudeaketa hauen arabera egingo da: 646/2020 Errege Dekretua, uztailaren 7koa, Hondakinak zabortegietan utziz ezabatzeko jarduera arautzen duena, eta 49/2009 Dekretua, otsailaren 24koa, Hondakinak hondakindegietan biltegiratuta eta betelanak eginda ezabatzea arautzen duena.

– Lurzoruak eta urak babestea: neurri prebentibo eta zuzentzaileak ezarriko dira obra-faserako, istripuzko isurketen eragina saihesteko, batez ere makineria mantentzeko lanetan (material xurgatzaileak erabiltzean, isurketak ukitutako lurrak kendu eta kudeatzean, etab.). Pilaketa-eremuak, instalazio osagarriak edo makineria-parkea gainazal iragazgaitzetan kokatuko dira. Makinen mantentze-lanik ez da egingo iragazgaiztu gabeko eremuetan.

– Airearen kalitatea babestea: garbi mantendu beharko dira kamioiek obrara sartzeko edo obratik irteteko erabiltzen dituzten bideak; horretarako, presioko ura edo erratz-makina mekanikoak erabiliko dira.

Hezetasun-baldintza egokietan garraiatuko da hondeaketa-materiala, hain zuzen, zama-estalkiak dituzten ibilgailuetan, lohi eta partikularik ez barreiatzeko.

– Kalitate akustikoaren babesa obretan: Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan aurreikusitakoaren arabera, zonakatze akustiko, kalitate-helburu eta emisio akustikoei dagokienez, obrak egitean erabiliko diren makinak egokitu egin beharko dira kanpoan erabiltzeko makinen emisio akustikoei buruz indarrean dagoen araudian ezarritako aginduetara, eta, bereziki, egokitu beharko dira, hala badagokie, Kanpoan erabiltzeko makinek ingurumenean sortzen dituzten emisio akustikoak arautzen dituen otsailaren 22ko 212/2002 Errege Dekretuan (apirilaren 28ko 524/2006 Errege Dekretuak aldatua) eta arau osagarrietan ezarrita dagoenera.

Obrek iraun bitartean, jardunbide operatibo egokiak aplikatu beharko dira sorburuan zaratak murrizteko, bereziki indusketetan, eraispenetan, zamalanetan eta garraio-lanetan, bai eta erabilitako makinen mantentze-lan orokorretan eta zaraten eta bibrazioen sorburuko murrizketan ere.

Eguneko lan-ordutegian egingo dira obrak.

Sei hilabeterako baino gehiagorako lanak badira, Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren 35 bis artikuluaren arabera inpaktu akustikoari buruzko azterketa bat egin beharko da behar diren zuzenketa-neurriak zehazteko. Inpaktu akustikoaren azterketan zuzenketa-neurriak zehaztuko dira, eta hor aztertuko da zer onura akustiko lortu nahi den zuzenketa-neurri horien bitartez, eremu akustikoetako eta eraikin sentikorretako zarata-maila murrizteari dagokionez, eta ukitutako udalerriari jakinarazi beharko zaio haren edukia.

D.9.– Eraikingintza eta eraikuntza jasangarriaren aldeko neurriak.

Planaren eremuan eraikingintza eta eraikuntza jasangarrienerako behar diren ezaugarriei dagokienez, EAEko etxebizitzen eraikingintza jasangarriaren giden gomendioak hartu beharko dira kontuan, eraikinen energia-aurrezpena eta -efizientzia bultzatzeko eta energia berriztagarriak sustatzeko.

Era berean, eta aipatutako eremuaren urbanizazioari dagokionez, kontuan hartu beharko dira «Urbanizazio-proiektuen garapen jasangarrirako gida»ren gomendioak. Gida horren helburua da proiektu horien diseinuaren, egikaritzearen, mantentzearen eta bizitza-amaieraren jasangarritasun-maila balioestea.

Neurri horiek alderdi hauetan behintzat eragin beharko dute:

• Materialak. Lehengai berriztaezin gutxiago kontsumitzea.

• Energia. Energia gutxiago kontsumitzea edo energia gutxiago sortzea iturri berriztaezinen bidez.

• Edateko ura. Edateko ur gutxiago kontsumitzea.

• Ur grisak. Ur gris gutxiago sortzea.

• Uraren zikloa. Uraren kudeaketa eta kalitatea hobetzea.

• Atmosfera. Gas-, hauts-, zarata-, bero- eta argi-emisioak murriztea.

• Eraikinen barne-kalitatea. Barnealdeko airearen kalitatea, erosotasuna eta osasuna hobetzea.

• Hondakinak. Hondakin solido gutxiago sortzea.

• Lurzoruaren erabilera. Lurzoruaren okupazioa murriztea.

• Mugikortasuna eta garraioa. Garraio-prozesuak gutxitzea eta pertsonen mugikortasuna hobetzea.

• Ekosistemak eta biodibertsitatea. Naturaguneen funtzioak hobetzea eta biodibertsitatea handitzea eta kontserbatzea.

• Paisaia. Sektorea eta haren instalazioak paisaian integratzea.

• Arriskuak eta segurtasuna. Arrisku naturalak edo antropikoak minimizatzea.

• Klima-aldaketa. Klima-aldaketaren ondorioetara egokitzea.

D.10.– Klima-aldaketa apaltzeari eta klima-aldaketara egokitzeari buruzko neurriak.

Klima Aldaketaren eta Trantsizio Energetikoaren maiatzaren 20ko 7/2021 Legean ezarritakoarekin bat etorriz, Plana gauzatzeko proiektuak diseinatuko dira kontuan hartuta klima-aldaketaren aurrean pixkanaka eta erresilientziaz egokitzeko beharrezkoak diren neurriak.

E) Ingurumen-jarraipeneko plana.

Planaren ingurumen-jarraipenak ingurumen-azterketa estrategikoan ezarrita dagoenari jarraituko dio, zeinak ingurumen-zaintzako programa bat jasotzen baitu. Programa horren xedea da behar diren zaintza- eta kontrol-sistemak ezartzea, egiaztatu ahal izateko Planeko aurreikuspenak betetzen direla, eta, horien barruan, planteatutako jarduketen ingurumen-exijentziak mantentzen direla.

Aurreikusitako urbanizazio-proiektuak zehaztu egin beharko ditu obrak egin bitartean egin beharreko kontrolak, batez ere ibai-uren kalitatearekin, inpaktu akustikoarekin eta lur-mugimenduekin lotutakoak –bereziki, bat etortzeagatik lurzorua kutsa dezaketen jarduerak edo instalazioak izan dituzten edo dituzten lurzoruen inbentarioko partzelekin–.

F) Planetik eratorritako proiektuen ingurumen-ebaluazioa egiteko gidalerro orokorrak.

Planetik eratorritako proiektuen ingurumen-ebaluazioan, aintzat hartuko dira lurraldearen baldintzatzaileak eta 2024ko apirilaren 24an Eusko Jaurlaritzako orduko Ingurumenaren Kalitatearen eta Ekonomia Zirkularraren zuzendariak emandako ebazpenaren bidez eginiko irismen-dokumentuan adierazten diren ingurumen-irizpideak.

Arreta berezia jarriko da hauetan, besteak beste: lurzoru-kontsumoa minimizatzea; hondakinak egoki kudeatzea; jabari publiko hidraulikoa babestea; eremuaren kalitate akustikoa; ingurumen-baliabideen erabilera jasangarria; habitatak eta espezieak zaintzea eta hobetzea; lurraldean egiten diren esku-hartzeetan paisaia modu egokian integratzea; arrisku naturalak minimizatzea, eta lehentasuna ematea kalteen prebentzioari, ez konpentsazioari.

Bigarrena.– Gehienez ere bi urteko epea ezartzea Caesa industrialdean Erandio udalerriko plangintzako arau subsidiarioen aldaketa puntuala onartzeko. Epe hori ingurumen-adierazpen estrategiko hau Euskal Herriko Agintaritzaren Aldizkarian argitaratzen denetik zenbatzen hasiko da. Epe hori igarotzen bada Plana onetsi gabe, ingurumen-adierazpen estrategiko honen indarraldia amaitu egingo da, eta hortik aurrera ez du ondoriorik izango. Kasu horretan, sustatzaileak berriro hasi beharko du Planaren ingurumen-ebaluazio estrategikoaren izapidea, non eta ez den erabakitzen ingurumen-adierazpen estrategikoaren indarraldia luzatzea. Hori guztia, Ingurumen Ebaluazioari buruzko 2013ko abenduaren 9ko 21/2013 Legearen 27. artikuluarekin bat.

Hirugarrena.– Ebazpen honen edukia jakinaraztea Erandioko Udalari.

Laugarrena.– Ebazpen hau Euskal Herriko Agintaritzaren Aldizkarian argitaratzeko agintzea.

Vitoria-Gasteiz, 2026ko maiatzaren 7a.

Ingurumen Administrazioaren zuzendaria,

NICOLAS GARCIA-BORREGUERO URIBE.

Azterketa dokumentala