Boletín Oficial del País Vasco

90. zk., 2026ko maiatzaren 15a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

2038

EBAZPENA, 2026ko maiatzaren 6koa, Industria, Trantsizio Energetiko eta Jasangarritasuneko Arabako lurralde-ordezkariarena. Horren bidez, aurretiazko administrazio-baimena ematen da Aiarako udal-mugarteko (Araba) «FV Krabelin Solar» eguzki-instalazio fotovoltaikoaren (6,040 MWp) proiekturako eta hari lotutako azpiegituretarako.

Espediente-zenbakia: 01 GE Y 202400051.

AURREKARIAK

2024ko uztailaren 19an, Ventaja Solar 13, SLk aurretiazko administrazio-baimena eskatu zuen, Aiarako udal-mugarteko (Araba) «FV Krabelin Solar» eguzki-instalazio fotovoltaikoaren (6,040 MWp) proiekturako eta hari lotutako azpiegituretarako.

Proiektuaren xede den instalazioak sarbide- eta konexio-baimena du, I-DE Redes Eléctricas Inteligentes, SAU enpresa banatzaileak emana, 2024ko otsailaren 7an (erreferentzia-zk.: 9042940948).

2024ko azaroaren 22an, proiektuaren ingurumen-inpaktuaren ebaluazio sinplifikatua hasteko eskaera egin zen orduko Ingurumen Kalitatearen eta Ekonomia Zirkularraren Zuzendaritzan.

2025eko abuztuaren 7an, EHAAn argitaratu zen Ingurumen Administrazioaren zuzendariaren Ebazpena, 2025eko ekainaren 25ekoa; ebazpen horren bidez egiten zen Aiara udal-mugarteko (Araba) «FV Krabelin Solar» eguzki-instalazio fotovoltaikoaren (6,040 MWp) proiektuaren ingurumen-inpaktuaren txostena, non aipatzen baitzen ez zela aurreikusten proiektua gauzatzeak ondorio kaltegarri adierazgarririk izango zuenik ingurumenean, baldin txosten horretan bertan proposatutako neurriak gehitzen baziren. Hori dela eta, ez zen beharrezkotzat jo ingurumen-inpaktuaren ebaluazio arrunta aplikatzea.

Ingurumen-inpaktuaren txostenaren ebazpenean ezarritako neurrien artean, ebakuazio-linea osoa lurperatzeko beharra azaltzen zen. Ordezkaritza honi iruditu zitzaion hori proiektuaren aldaketa garrantzitsua zela, eta, beraz, proiektuari eranskin bat gehitzeko edo proiektua bera aldatzeko eskatu zitzaion sustatzaileari, behin proiektua aldatuta, jendaurrean jartzeko izapidea eta eragindako administrazioei kontsultak egiteko izapidea egiteko. 2025eko urriaren 21ean, aldatutako proiektua bidali zuen sustatzaileak ordezkaritza honetara, eta, 2025eko azaroaren 18an, ebakuazio berrira egokitutako ingurumen-dokumentua bidali zuen.

Ingurumen-ebaluazio sinplifikatuaren prozedura izapidetu eta aldatutako proiektua jaso ostean, jendaurreko informazio sektorialaren izapidea hasi zen, hala xedatzen baita Energia elektrikoa ekoizteko, garraiatzeko eta banatzeko instalazioen administrazio-baimenaren prozedurak arautzen dituen martxoaren 31ko 48/2020 Dekretuaren 10. artikuluan. Horretarako, dagozkion iragarkiak argitaratu ziren, Euskal Herriko Agintaritzaren Aldizkariaren 2026ko urtarrilaren 23ko 15. zenbakian eta Arabako Lurralde Historikoaren Aldizkari Ofizialaren 2026ko otsailaren 25eko 24. zenbakian.

Era berean, 48/2020 Dekretuaren 11. artikuluan aurreikusitako kontsultak egin ziren, eta aurreproiektuaren edo proiektuaren separata bat eman zitzaien administrazio, organismo edo, hala bazegokion, zerbitzu publikoko edo interes orokorreko zerbitzuetako enpresei, instalazioak haien ardurapeko ondasun eta eskubideei eragiten zien heinean, eskatutako baimena hilabeteko epean eman edo uka zezaten.

Hauek izan ziren eragindako administrazio publikoak eta kontsultatuko interesdunak:

– Aiarako Udala.

– URA – Uraren Euskal Agentzia / Kantauriko Konfederazio Hidrografikoa.

– REE Red Eléctrica de España, SAU.

– I-DE Redes Eléctricas Inteligentes, SAU.

Horrez gain, kontsulta egin zitzaion Eusko Jaurlaritzako Ingurumen Administrazioaren Zuzendaritzari, proiektua proposatutako neurrietara egokitzeko egindako aldaketei buruz. Zuzendaritza horrek ados zegoela erantzun zuen.

Administrazio eta interesdun hauen txostenak edo alegazioak jaso ziren, eta, laburbilduz, honako hau adierazten zuten:

Aiarako Udala.

Txostenak adierazten du instalazio fotovoltaikoa proiektatzen den partzela baso-kategoriako lurzoru urbanizaezinean dagoela, Aiaran indarrean dauden arau subsidiarioen arabera. Lurzoru mota horretan onura publikoko edo interes sozialeko instalazioak baimentzeko, baldintza jakin batzuk bete behar dira; besteak beste, ezinbestekoa izatea baso-ingurunean kokatu behar izatea eta Hirigintza Plangintzaren Erregelamenduaren 76.3.a) artikuluko kasuetako bat ez izatea. Udal-txostenak ondorioztatzen du proiektuak ez dituela baldintza horiek betetzen; izan ere, ez du basoan kokatuta egon behar nahitaez, eta lurralde-eredua aldez aurretik definitzea eskatzen duen jarduketa bat da, are gehiago kontuan izanda oraindik ez dela behin betiko onartu Euskal Autonomia Erkidegoko Energia Berriztagarrien Lurralde Plan Sektoriala.

Bestalde, Nekazaritza eta Basozaintzako Lurralde Plan Sektorialaren arabera, baso-lurzoruan energia berriztagarriak instalatzea (B motako instalazio tekniko ez-linealtzat hartzen dira) erabilera onargarritzat hartzen da, baldin nekazaritza eta basozaintzako jardueraren gaineko eraginen azterketa egiten bada eta neurri zuzentzaileak txertatzen badira. Alabaina, Aiarako Udalaren hirigintza-plangintza ez da egokitu plan sektorial horretan xedatutakora. Ondorioz, eta indarrean dauden arau subsidiarioak soilik kontuan hartuta, udalak uste du proposatutako erabilera ez dela bateragarria udal-plangintzarekin, eta formalki adierazten du proiektuaren aurka dagoela, 48/2020 Dekretuaren 11. artikuluaren arabera.

Ura.

Jakinarazi du proiektua polizia-eremutik kanpo dagoela, eta, beraz, ez duela Uraren Euskal Agentziaren baimen sektorialik behar.

Txostenak sustatzaileari bidali zitzaizkion, kontuan hartu zitzan. Hark hau erantzun zuen, laburbilduz:

Aiarako Udala.

Aiarako Udalaren kontrako txostenaren aurka egiten du, argudiatzen baitu «FV Krabelin Solar» proiektua energiari eta lurraldeari buruz indarrean dagoen eta izapidetzen ari den araudiaren arabera diseinatu dela. Adierazten du proiektuak baduela jada aldeko ingurumen-txostena (2025eko ekainaren 25eko Ebazpena) eta aukeratutako kokapena bat datorrela bai Euskadiko Energia Berriztagarrien Lurralde Plan Sektorialarekin –behin-behineko onarpen-fasean egon arren– bai Lurralde Antolamenduaren Gidalerroekin, eskala handiko instalazio fotovoltaikoetarako berariaz aurreikusitako eremu batean baitago; alegia, aukeratutako kokapen-eremua batean.

Halaber, sustatzaileak dio Nekazaritza eta Basozaintzako LPSak (177/2014 Dekretua) erabilera onargarritzat jotzen duela instalazio fotovoltaikoak baso-lurzoruan jartzea, eta energia elektrikoa ekoizteko A motako instalazio tekniko ez-lineal gisa sailkatzen dituela instalazio horiek. Horrez gain, aipatzen du LPS hori udal-plangintzarako loteslea dela eta Aiarako Udalak legezko epean egokitu behar zituela bere arau subsidiarioak esparru horretara; beraz, ondorioztatzen du alegatutako hirigintza-bateraezintasuna ez litzatekeela aplikagarria izango.

Ura.

Ados dagoela adierazi du.

Jendaurrean jartzeko izapidean ez zen jaso partikularren alegaziorik.

ZUZENBIDEKO OINARRIAK

1.– Industria, Trantsizio Energetiko eta Jasangarritasuneko Arabako Lurralde Ordezkaritza da espediente hau izapidetzeko eta ebazteko organo eskuduna, hala xedatzen baita 410/2024 Dekretuaren 20. artikuluan (410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena).

2.– Espediente hau izapidetzeko, Energia elektrikoa ekoizteko, garraiatzeko eta banatzeko instalazioen administrazio-baimenaren prozedurak arautzen dituen martxoaren 31ko 48/2020 Dekretuan ezarritako xedapenak bete dira, halaxe ezartzen baita Sektore Elektrikoari buruzko abenduaren 26ko 24/2013 Legean eta Ingurumen Ebaluazioari buruzko abenduaren 9ko 21/2013 Legean, bat etorrita Euskadiko Ingurumen Administrazioaren abenduaren 9ko 10/2021 Legearekin.

3.– Ordezkaritza honetan aurkeztutako alegazioen harira, honako hau adierazi behar da:

– 48/2020 Dekretuaren 11. artikuluaren arabera, administrazioei egiten zaizkien kontsultak proiektatutako instalazioak administrazioen ardurapeko ondasun eta eskubideei eragin diezaiekeen heinean egiten dira.

– Halaber, 24/2013 Legearen 53. artikuluak adierazten du artikulu horretan aipatutako administrazio-baimenak administrazio eskudunak emango dituela, alde batera utzi gabe aplikatu beharreko bestelako xedapenen arabera eta, bereziki, lurraldearen antolamenduari eta ingurumenari buruzko xedapenen arabera beharrezkoak diren emakida eta baimenak.

– Hori dela eta, ezin dira baimen honetan kontuan hartu ingurumenari, lurraldearen antolaketari edo hirigintzari lotutako alegazioak, ordezkaritza honek ez baitu eskumenik gai horietan. Edonola ere, lurraldearen antolaketari lotutako gaiak dagokion plan berezian ebatzi beharko dira, Lurzoruaren Legea aplikatuz.

4.– Sektore Elektrikoari buruzko Legearen 53.7 artikuluaren arabera, administrazio publiko eskudunak baimena ukatu ahalko du, baina kasu hauetan soilik: aplikatu beharreko araudian ezarritako eskakizunak betetzen ez direnean edo baimena ematea sistemaren funtzionamenduaren kalterako denean.

Aipatutako lege-xedapenak ikusita, eta oro har zein zehazki aplikagarri diren gainerakoak oinarri hartuta, Industria, Trantsizio Energetiko eta Jasangarritasuneko Arabako lurralde-ordezkariak hau

EBAZTEN DU:

1.– Ventaja Solar 13, SL enpresari aurretiazko administrazio-baimena ematea Aiarako udal-mugarteko (Araba) «FV Krabelin Solar» eguzki-instalazio fotovoltaikoaren (6,040 MWp) proiekturako eta hari lotutako azpiegituretarako. Ezaugarri hauek ditu proiektuak:

4,6 MW-eko potentzia nominala duen planta fotovoltaikoa, Aiarako udal-mugarteko 3. poligonoko 343-1 eta 343-2 partzeletan kokatua. Osagai hauek daude plantan:

– 10.504 modulu fotovoltaiko, 575 Wp-ekoak.

– 23 inbertitzaile, 200 kW-ekoak.

– 0,8/30 kV-eko transformazio-zentro bat (TZ), 2000 kVA-koa, eta 0,8/30 kV-eko transformazio-zentro bat (TZ), 3000 kVA-koa; gainazaleko eraikin prefabrikatuetan daude, eta transformadore batez eta erdi-tentsioko (ET) gelaxkez osatuta.

– Maniobra- eta neurketa-zentro bat (MNZ); bertan biltzen dira transformazio-zentroetatik datozen zirkuituak.

30 kV-eko lurpeko linea, 2.353 m inguruko luzera duena; linea hori MNZtik abiatzen da eta ST Aiala 30000 azpiestazioaren posizio berri batean konektatzen denean amaitzen da; hain zuzen, posizio berri horretan egingo da sarearekiko konexioa.

Ebazpen hau baldintza orokor hauek kontuan hartuz ematen da:

Eraikitzeko administrazio-baimena 15 hilabeteko epean eskatu beharko da, eta epe hori ebazpen hau jakinarazten denean hasiko da. Eskaera adierazitako epean aurkezten ez bada, aurretiazko administrazio-baimena iraungitzat jo ahal izango da. Epe hori luzatzeko, ezinbestekoa izango da onuradunak eskaera arrazoitua aurkeztea eta organo eskudunak luzapena espresuki ebaztea. Onartutako proiektuari jarraikiz egin beharko da eraikitzeko administrazio-baimena eskatzeko proiektua, kasu bakoitzean eskatu eta baimenduko diren aldaketekin.

2.– Proiektuan ezarritako neurriez gain, 2025eko abuztuaren 7an Euskal Herriko Agintaritzaren Aldizkarian argitaratutako proiektuaren ingurumen-txostenean adierazitako neurri babesle eta zuzentzaileak ere hartu beharko dira. Neurri horiek obra kontratatzeko baldintzen agirietan sartu beharko dira, eta beteko direla bermatzeko moduko aurrekontua izan beharko dute.

3.– Sistemaren operadoreak ezartzen dituen arau teknikoak eta jarduteko prozedurak bete beharko dira.

4.– Ebazpen hau emateak ez du eragozten obrak egiteko beharrezkoak diren udal- eta probintzia-eskumeneko eta bestelako baimenak edo lizentziak eskuratu behar izatea, eta eskatzailea ez dute libratzen baimen horiek guztiak lortzeko betebeharretik. Era berean, hirugarrenen eskubideak kaltetu gabe emango da, jabetza-eskubidea salbu utzita.

Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa jar dakioke Deskarbonizazioko zuzendariari, hilabeteko epean, ebazpen hau jakinarazi eta hurrengo egunetik aurrera, bat etorriz Administrazio Publikoen Administrazio Prozedura Erkidearen 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2026ko maiatzaren 6a.

Industria, Trantsizio Energetiko eta Jasangarritasuneko Arabako lurralde-ordezkaria,

JAVIER AIZPURU OCHOA DE ERIBE.

Azterketa dokumentala