Boletín Oficial del País Vasco

63. zk., 2024ko martxoaren 27a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LAN ETA ENPLEGU SAILA

1525

EBAZPENA, 2024ko martxoaren 20koa, Lanbide-Euskal Enplegu Zerbitzuko zuzendari nagusiarena, zeinaren bidez argitaratzen baita Euskal Autonomia Erkidegoko landa- eta hiri-inguruneetako emakumeei laguntzeko programa garatzeko laguntzen bigarren deialdia, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren esparruan.

Lanbide-Euskal Enplegu Zerbitzuko Administrazio Kontseiluak, 2024ko martxoaren19ko bileran hartutako erabakiaren bidez, Euskal Autonomia Erkidegoko landa- eta hiri-inguruneetako emakumeei laguntzeko programa garatzeko dirulaguntzen bigarren deialdia onartu du, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren esparruan. Eta, Lanbideren Estatutuen 10.2 artikuluaren n) letran xedatutakoaren arabera –maiatzaren 22ko 82/2012 Dekretuaren bidez onartu ziren estatutuak–, organismo autonomo horren zuzendari nagusiari dagokio deialdi hori argitaratzea.

Horrenbestez, hau

EBAZTEN DUT:

Lehenengoa.– Argitara ematea Euskal Autonomia Erkidegoko landa- eta hiri-inguruneetako emakumeei laguntzeko programa garatzeko laguntzen bigarren deialdia, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren esparruan; Lanbide-Euskal Enplegu Zerbitzuko Administrazio Kontseiluak 2024ko martxoaren 19an egindako bileran onartu zuen deialdia, eta ebazpen honen eranskin gisa agertzen da.

Bigarrena.– Lanbide-Euskal Enplegu Zerbitzuko Administrazio Kontseiluak laguntza-deialdia onartzeko hartu duen erabakiak Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

Hirugarrena.– Deialdia onartzen duen Lanbide-Euskal Enplegu Zerbitzuko Administrazio Kontseiluaren Erabakiaren aurka, berraztertze-errekurtsoa aurkeztu ahal izango zaio organo horri berari, hilabeteko epean, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera; edo administrazioarekiko auzi-errekurtsoa aurkeztu ahal izango da zuzenean Vitoria-Gasteizko Administrazioarekiko Auzien Epaitegian, bi hilabeteko epean, ebazpena aldizkari horretan argitaratu eta hurrengo egunetik aurrera.

Vitoria-Gasteiz, 2024ko martxoaren 20a.

Lanbide-Euskal Enplegu Zerbitzuko zuzendari nagusia,

FRANCISCO PEDRAZA MORENO.

ERANSKINA

EUSKAL AUTONOMIA ERKIDEGOKO LANDA- ETA HIRI-INGURUNEETAKO EMAKUMEEI LAGUNTZEKO PROGRAMA GARATZEKO LAGUNTZEN BIGARREN DEIALDIA, EUROPAR BATASUNAREN NEXTGENERATIONEU FUNTSAK FINANTZATUTAKO SUSPERTZE, ERALDATZE ETA ERRESILIENTZIA PLANAREN ESPARRUKOA

Lanbide-Euskal Enplegu Zerbitzuaren Administrazio Kontseiluak, 2021eko abenduaren 21eko bileran hartutako erabakiaren bidez, Euskal Autonomia Erkidegoko landa- eta hiri-inguruneetako emakumeei laguntzeko programa garatzeko laguntzen deialdia onartu zuen, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren esparruan. Deialdia 2021eko abenduaren 31ko Euskal Herriko Agintaritzaren Aldizkarian argitaratu zen, 262. zenbakian, Lanbide-Euskal Enplegu Zerbitzuko zuzendari nagusiaren 2021eko abenduaren 21eko Ebazpenaren bidez.

Deialdi horretan araututako laguntzak finantzatzeko baliabide ekonomikoak 773.662 euro izan ziren, eta zenbateko hori Estatuak transferitu zuen, deialdia gauzatzeko helburuarekin. 2022. eta 2023. urteetan, diru gehiago transferitu zitzaion Euskal Autonomia Erkidegoari programa hori gauzatzeko –429.812 euro eta 85.962 euro, hurrenez hurren–, eta Lanbide-Euskal Enplegu Zerbitzuko zuzendari nagusiaren 2022ko urriaren 17ko (urriaren 25eko EHAA) eta 2023ko ekainaren 7ko (ekainaren 19ko EHAA) ebazpenen bidez esleitu zitzaizkion programari.

Eskabideak aurkezteko epea 2023ko irailaren 29an amaitu zen, eta eskaera bakarra onartu zen programa honen esparruan. Programan, 1.167.611 euro geratzen dira.

Next Generation EU finantza-tresna 2020ko uztailaren 21ean onetsi zuen Europako Kontseiluak, eta tresna horren ardatza «Suspertze eta Erresilientzia Mekanismo» bat da: mekanismo haren helburua Batasuneko estatuetan inbertsioa eta erreformak bultzatzea da, hartara susperraldi jasangarri eta erresilientea lortzeko, eta, aldi berean, justizia sozialean oinarritutako hainbat erreforma ahalbidetzea, bai maila nazionalean, bai eskumenak transferituak dituzten autonomia-erkidegoekiko gobernantza partekatuan.

Europako Suspertze Funtseko finantza-baliabideak Ministroen Kontseiluak 2021eko apirilaren 27an onartutako Suspertze, Eraldatze eta Erresilientzia Planaren bidez gauzatzen dira.

Suspertze, Eraldatze eta Erresilientzia Planaren barruko VIII. politika eragilean («Zaintza-lanen eta enplegu-politiken ekonomia berria») 23. osagaia dago: «Lan-merkatu dinamiko, erresiliente eta inklusibo baterako politika publiko berriak»; Laneko eta Gizarte Ekonomiako Ministerioak gidatzen du osagai hori, eta egiturazko erreformak egiteko hark lehenesten dituen ekimen eragileetan Estatuko Enplegu Zerbitzu Publikoak hartzen du parte.

Osagai horrek erronka eta helburutzat hartu du Espainiako lan-merkatuaren erreforma bultzatzea, gizarte-elkarrizketaren esparruan, gaur egungo errealitatera eta beharretara egokitzeko eta egitura-ahultasunak zuzentzeko, azken batean egiturazko langabezia eta gazteen langabezia murriztu, bitasuna zuzendu, giza kapitala hobetu, negoziazio kolektiboa modernizatu eta enplegu-politika publikoen efizientzia areagotzeko asmoz, gure ekonomiak eskatzen dituen eraldaketei lotutako arloetako langileak gaitzera bideratuko diren enplegu-politika aktiboak bultzatzen diren bitartean.

Osagai horretan proposatutako erreforma eta inbertsioen artean, 2. inbertsioa dago, «Emakumeen enplegua eta genero-zeharkakotasuna enplegurako aktibatzeko laguntza-politika publikoetan»; horren barruan dago «Landa- eta hiri-inguruneetako emakumeei laguntzeko programa».

Landa- eta hiri-inguruneetako emakumeen prestakuntza hobetzeko berariazko programa hori abian jartzen da. Hobekuntza hori, hasteko, tokiko jarduera ekonomikoan haien parte-hartzea areagotzeko haien kontzientzia zabalduz lortu nahi da. Horretarako prestakuntza-aukerak eskaini behar dira, eta laguntza ere bai, arlo digitalean, teknologikoan, ekintzailetzan eta gizarte-ekonomian, honako hauei lotuta: produktu endogenoak (dimentsio berdea eta tokikoa), baso-, arrantza- eta nekazaritza-ustiapena, online merkataritza-jarduerak eta mendetasunerako laguntza.

Gainera, hiriko bizitza leheneratu beharra dago, biztanleriaren eskariei erantzuteko, bizitza hori kalitatezkoa izatea eskatzen baitu hark; batez ere, eta besteak beste, ekonomia berde, urdin eta zirkularra eta hiri barruko mugikortasuna kontuan hartzeko leheneratu beharra dago. Era berean, landa-ingurunea biziberritzeko, erronka demografikoari heltzeko eta pertsonen bizi- eta lan-kalitatea hobetzeko, neurriak hartzen dira landa-ingurunean emakumeen enplegagarritasuna sustatzeko. Horrela lortzen da haien lanbide-aukerak hobetzea eta landa-inguruneari lotutako genero-arrakala murriztea, udalerri txikiak eta baserrialdeak biziberritzeko lanean funtsezko zeregina betetzea, emakumeen prestakuntza hobetuz eta aukerak sortuz haien talentua finkatzen laguntzea, beste aukera batzuk ikustea eta eskualde horietako garapen ekonomikoa eta soziala sustatzea.

Baserrialdeetako emakumeak lan-mundura sartzeari buruzko datuak oraindik ere Europako batezbestekoaren atzetik daude, egiturazko arrazoi soziodemografikoengatik. Arrazoi horiek urruntzen dituzte emakumeak produkzio-saretik; izan ere, emakumeak familia zaintzeaz, ordaintzen ez diren jardueretan parte hartzeaz edo familia inguruko zereginez arduratzen dira batez ere, eta ez dute berariazko prestakuntzarik, besteak veste.

Programa horretan, orientabideak, aholkuak eta prestakuntza-jarduerak eskaintzen dituen ibilbide pertsonal eta integratu bat egiten da, parte hartzen duten emakumeen enplegagarritasun-profilera egokitua. Emango den prestakuntza lurraldean aukera onak dituzten lanpostuekin lotuta egongo da, programa gauzatzen den landako eta hiriko lan-merkatuaren beharrak kontuan hartuta, eta prestakuntzaren helburua parte-hartzaileen enplegagarritasuna areagotzeko eta lan duina lortzeko aukerak gehiagotzeko ezagutza lortzea da, eta, aldi berean, baserrialdeen garapen produktiboa indartzea, genero-arrakalaren aurka borrokatzea eta lurralde horretan emakumeen egoera hobetzea. Programaren % 35, gutxienez, klimarekin zerikusia duten konpetentziekin lotuta dago, eta beste % 35 konpetentzia digitalei buruzkoa da.

Urriaren 11ko TES/1121/2021 Aginduak, Suspertze, Eraldatze eta Erresilientzia Planaren esparruko «Landa- eta hiri-inguruneetako emakumeei laguntzeko programa» finantzatzeko dirulaguntza publikoak emateko oinarriak ezartzen dituenak, aipatu programa arautzen du eta dirulaguntza publikoen emakida arautzeko oinarriak ezartzen ditu.

«Landa- eta hiri-inguruneetako emakumeei laguntzeko programa» baserrialdeetan eta hiriguneetan bizi diren emakumezkoen prestakuntza hobetzeko da, eta, hala, 2. inbertsioaren helburu estrategikoa lortzen laguntzen du; 2. Inbertsio hori («Emakumeen enplegua eta genero-zeharkakotasuna enplegurako aktibatzeko laguntza-politika publikoetan») 23. osagaiaren barruan dago («Lan-merkatu dinamiko, erresiliente eta inklusibo baterako politika publiko berriak»), eta hura, berriz, Suspertze, Eraldatze eta Erresilientzia Planaren barruko VIII. politika eragilearen esparruan («Zaintza-lanen eta enplegu-politiken ekonomia berria»).

Deialdiko aurrekontuaren % 35 eraldaketa ekologikoak laguntzeko jarduerak finantzatzera bideratzen da, «01-Konpetentzia eta enplegu berdeak» etiketarekin (% 100), eta beste % 35 eraldaketa digitala sustatzeko jarduerak finantzatzera, «108-Gaitasun digitalak garatzeko laguntza (% 100)» etiketarekin.

36/2020 Errege Lege Dekretuak (36/2020 Errege Lege Dekretua, abenduaren 30ekoa, Administrazio publikoa modernizatzeko eta Suspertze, Eraldatze eta Erresilientzia Plana egikaritzeko presako neurriak onartzen dituena) Europako funtsen bidez finantza daitezkeen dirulaguntzak izapidetzea arindu eta malgutzeko arauak ezartzen ditu. Errege lege-dekretu horren arabera, eta haren 62. artikulua aplikaturik, artikulu horretan ezarritako lehiarik gabeko prozeduraren arabera izapidetuko dira agindu honetako dirulaguntzak, Europako funtsen bidez finantza daitezkeen dirulaguntzak dira eta, azaroaren 17ko 38/2003 Legeak arautzen dituenak, eta, haien helburua beste proposamen batzuekin konparaziorik behar ez duten jarduera konkretuak finantzatzea denez, emakida-ebazpenak eskaerak aurkezteko hurrenkeran emango dira, jarduera diruz laguntzeko modukoa ote den eta gainerako baldintzak betetzen direla egiaztatu ondoren, deialdian esleitutako aurrekontu-kreditua amaitu arte. 20/2023 Legean aurreikusitako ondoz ondoko konkurrentzia-prozedura da (20/2023 Legea, abenduaren 21ekoa, Dirulaguntzen Araubidea arautzen duena).

18/2020 Dekretuak (18/2020 Dekretua, irailaren 6koa, lehendakariarena, zeinaren bitartez Euskal Autonomia Erkidegoko Administrazioko sailak sortu, ezabatu eta aldatzen baitira eta horien egitekoak eta jardun-arloak finkatzen) Lan eta Enplegu Sailari esleitzen dizkio enplegu-politika eta enplegurako lanbide-heziketa, Lanbide-Euskal Enplegu Zerbitzuaren lankidetzarekin –betiere hark dauzkan erantzukizunen barruan–, hargatik eragotzi gabe oro har Lanbide Heziketaren eremuan zuzendaritza, antolamendu eta plangintzan Hezkuntza Sailak dituen eginkizunak.

Bestalde, Lanbide-Euskal Enplegu Zerbitzua organismo autonomoa Lan eta Enplegu Sailari atxikita dago, eta organismo hari dagokio, besteak beste, enplegu-programen, enplegurako prestakuntza-programen eta autoenplegua eta enpresen sorkuntza sustatzeko programen kudeaketa. Egiteko horren barruan dago dirulaguntzetarako deialdiak onestea eta izapidetzea, hala ezarrita baitago organismo autonomoaren estatutuen 3.b) artikuluan (maiatzaren 22ko 82/2012 Dekretuaren bidez onetsi ziren estatutu horiek).

Horregatik guztiagatik, Lanbide-Euskal Enplegu Zerbitzuko zuzendari nagusiak proposatuta, organismo autonomo horretako Administrazio Kontseiluak, 2024ko martxoaren 19ko bileran, Euskal Autonomia Erkidegoko landa- eta hiri-inguruneetako emakumeei laguntzeko programa garatzeko dirulaguntzen bigarren deialdia onesten du, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren barruan, honela:

1. artikulua.– Xedea.

1.– Deialdi honek «Landa- eta hiri-inguruneetako emakumeei laguntzeko programako» dirulaguntzak emateko oinarri arautzaileak ezartzen ditu. Ekintza hori Suspertze, Transformazio eta Erresilientzia Planaren 23. osagaiaren barruan dago («Lan-merkatu dinamiko, erresiliente eta inklusibo baterako politika publiko berriak»); zehazki, 02 inbertsioaren barruan («Emakumeen enplegua»); eta CID 343 mugarri eta helburuari laguntzen dio. Horrek ekintzari lotutako helburuak betetzen lagunduko du, Europako eta Estatuko suspertze- eta erresilientzia-mekanismoa eta Suspertze Plana erregulatzen dituen araudiarekin bat etorriz.

2.– Deialdi honen helburua «Landa- eta hiri-inguruneetako emakumeei laguntzeko programako» dirulaguntzak ematea da; programa urriaren 11ko TES/1121/2021 Aginduaren bidez arautu da, Europar Batasunaren NextGenerationEU funtsak finantzatutako Suspertze, Eraldatze eta Erresilientzia Planaren markoan.

Deialdi honetan arautzen diren dirulaguntzen xedea da landa- eta hiri-inguruneetako emakumeei laguntza pertsonalizatua ematea; zehazki, bana-banako honako ibilbide hauetan parte hartzen dutenei ematea: era bateko eta besteko ekintzak konbinatzen dituzten –hala nola lanerako orientatzea, aholku ematea, informatzea, prestatzea, zeharkako konpetentzia eta trebetasunak lortzea, laneratzen laguntzea eta enpleguan laguntzea– eta 3. eta 4. artikuluetako arloetan gaitzea eta laneratzea helburu duten ibilbideak, enplegua lortzean benetako berdintasuna eta bereizkeriarik eza bultzatzen dutenak aldi berean.

3.– Oinarri hauen arabera emandako dirulaguntzak Suspertze eta Erresilientzia Mekanismoaren bidez finantzatuko dira; mekanismo hori (EB) 2021/241 Erregelamenduak ezarria da ([EB] 2021/241 Erregelamendua, Europako Parlamentuarena eta Kontseiluarena, 2021eko otsailaren 12koa, Suspertze eta Erresilientzia Mekanismoa ezartzen duena). Europako funtsekin finantza daitezkeen dirulaguntza horiek izapidetzeko eta emateko, 36/2020 Errege Lege Dekretuan aurreikusitakoa aplikatuko da (36/2020 Errege Lege Dekretua, abenduaren 30ekoa, Administrazio Publikoa modernizatzeko eta Suspertze, Eraldatze eta Erresilientzia Plana egikaritzeko presako neurriak onartzen dituena), alde batera utzi gabe aplikatzekoa den gainerako araudia.

2. artikulua.– Finantzaketa

Deialdi honetan araututako laguntzak emateko, baliabide ekonomikoen zenbatekoa 1.167.611 euro da, Euskal Autonomia Erkidegoko Aurrekontu Orokorren 2024 ordainketa-kredituaren kontura, eta lotura dute Europar Batasunaren NextGenerationEU funtsak Suspertze eta Erresilientzia Mekanismoaren bidez finantzatutako Suspertze, Transformazio eta Erresilientzia Planarekin. Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduak ezarri zuen mekanismo hori.

Laguntza hauek ez dira estatu-laguntza bat EBFT Europar Batasunaren Funtzionamenduari buruzko Tratatuaren 107. eta 108. artikuluetan ezarritakoaren arabera, laguntzak emateak ez baitu lehia faltsutzen, ez eta lehia faltsutzeko mehatxurik ekartzen ere, zenbait enpresa edo ekoizpenen alde eginez, dirulaguntzen entitate onuradunak erkidegoko eta tokiko sektore publiko instituzionaleko administrazio publikoak eta organismoak eta entitateak baitira.

Eman beharreko laguntzen guztizko zenbatekoak ez du gaindituko adierazitako zenbatekoa.

3. artikulua.– Beste dirulaguntza edo laguntza batzuekin bateragarri izatea.

Deialdi honetan araututako dirulaguntzak bateragarriak dira helburu bererako beste administrazio edo entitate publiko edo pribatu batzuek emandako dirulaguntza, laguntza, sarrera edo baliabideekin. Edonola ere, argi identifikatuta geratu beharko da gastuen trazabilitatea, eta laguntzen eta dirulaguntzen batura ezin izango da izan diruz lagundutako gastuen kostua baino handiagoa.

(EB) 2021/241 Erregelamenduaren 9. artikuluaren arabera ([EB] 2021/241 Erregelamendua, Europako Parlamentuarena eta Kontseiluarena, 2021eko otsailaren 12koa), Suspertze eta Erresilientzia Mekanismoak finantzatutako inbertsio-proiektuek Batasunaren beste programa eta tresna batzuetatik jaso dezakete laguntza, baldin eta laguntza horrek ez badu estaltzen programa honen dirulaguntzak dagoeneko finantzatzen duen kostu bera.

4. artikulua.– Diruz lagundu daitezkeen gastuak.

1.– Arau orokor gisa, SEMak gastu hauek baino ez ditu finantzatuko: egiturazko aldaketa dakarten, erresilientzia ekonomiko eta sozialean, epe luzeko lehiakortasunean, jasangarritasunean eta digitalizazioan eta enpleguan eragin iraunkorra duten eta behin eta berriro egiten ez diren gastuak.

2.– Deialdi honetan araututako laguntzek abenduaren 30eko 36/2020 Errege Lege Dekretuaren 37. artikuluaren arabera finantzatuko dituzte jarduketak, SEEPen arau-esparruaren arabera hautatzeko modukoak diren jarduketak finantzatzeko.

3.– Ez dira diruz lagunduko Europar Batasunak klimaren eta ingurumenaren arloan dituen arauak eta lehentasunak eta «kalte nabarmenik ez eragiteko» printzipioa («do no significant harm – DNSH» printzipioa) erabat betetzen ez dituzten proiektuak, Europako Parlamentuaren eta Kontseiluaren 2020ko ekainaren 18ko (EB) 2020/852 Erregelamenduaren 17. artikuluari jarraituz. Entitate onuradunek bermatu behar dute betetzen direla.

5. artikulua.– Dirulaguntzaren zenbatekoa.

1.– Ibilbide pertsonalizatuak garatzeko dirulaguntzaren finantzaketa osoa dagokion emakida-ebazpenean zehaztuko da, arreta jaso behar duten emakumeen kopuruaren, aurreikusitako laneratze helburuen eta dagokion moduluaren arabera; horrenbestez:

a) Artatutako emakumeko jasotako zenbatekoa 1.715 euro izango da, barnean direla, besteak beste, materialen, publizitatearen, baliabide teknikoen eta emakume parte-hartzaileei arreta ematen dieten langileei eman beharreko prestakuntzaren gastuak.

b) Aurreko apartatuan aipatutako zenbatekoari 2.500 euro gehituko zaio; diru kopuru hori arreta jaso ondoren lan-merkatuan sartu den emakume bakoitzeko jasoko da; arreta jaso ondoren bere konturako ekintzailetza-jarduera bati ekiten dion emakume bakoitzeko 6.000 euro jasoko da. Zenbateko osagarri horiek lan-merkatuan sartzea lortu duten parte-hartzaileen % 20k bakarrik jasoko dituzte, dirulaguntza moduan.

2.– Artikulu honetan aipatutako zenbatekoak modulutzat jotzen dira, dirulaguntzaren zenbatekoa zehazteko eta justifikatzeko; modulu bidezko araubidearen bidez zehaztuko dira, Dirulaguntzei buruzko Lege Orokorraren Erregelamendua onartzen duen uztailaren 21eko 887/2006 Errege Dekretuaren 76. artikulutik 79. artikulura bitartean ezarritakoari jarraikiz.

6.– Entitate onuradunak.

1.– Entitate hauek izan daitezke deialdi honetako laguntzen onuradun:

– Foru-aldundiak eta foru-sektore publikoa.

– EAEko udalak eta tokiko sektore publikoko entitateak.

– EAEko sektore publikoko entitateak.

– EAEko tokiko edo eskualdeko garapenerako agentziak eta horiekin lotutako elkarteak.

– Hezkuntza Sailaren edo Ekonomiaren Garapen, Jasangarritasun eta Ingurumen Sailaren mendeko prestakuntza-entitateak.

– Irabazteko asmorik gabeko entitate juridikoak, EAEn diruz lagundutako jarduera aurrera eramateko baliabide egokiak dituztenak eta langabeei beren enplegagarritasun-profilaren araberako laguntza emateko ekintzetan –besteren edo norberaren konturako laneratze prozesuetan– esperientzia dutela egiaztatzen dutenak.

Entitateek baldintza hauek betetzen badituzte iritziko zaio langabeei laguntzeko ekintzak garatzen esperientzia dutela:

• Proiektu bereziak gauzatzea, % 40 baino handiagoko itzulketarik eragin ez dutenak.

• Lanbideren orientazio-zentro laguntzailea izatea.

• Lanbideren zentro laguntzailea izatea, bitartekotza-zerbitzua ematen duena.

• Helburu sozialen artean kolektibo kalteberen enplegagarritasuna hobetzea daukaten entitateak.

2.– Entitate onuradunek zuzenean gauzatuko dituzte ekintzak, eta ezingo dute azpikontrataziorik egin horretarako.

3.– Entitateek irakatsi nahi dituzten prestakuntza-espezialitateetan egiaztatuta edo inskribatuta egon behar dute, eskaera egin aurretik, Lanbide-Euskal Enplegu Zerbitzuak kudeatzen duen prestakuntza-entitateen erregistroan, enplegurako prestakuntza-entitateen beste erregistro autonomiko batean edo Prestakuntza Entitateen Estatuko Erregistroan.

Entitateek ibilbide bakoitza behar den bezala garatzeko beharrezkoak diren baliabide tekniko eta giza baliabideak dauzkatela egiaztatu beharko dute, eta, ibilbidean aurreikusitako prestakuntza-jarduerak garatzeko, behar diren giza baliabideak eta baliabide materialak izan beharko dituzte, edo dirulaguntza adjudikatu ondoren eskuratzeko konpromisoa hartu, prestakuntza-jarduera hasteko unean. Ez dago baimenduta prestakuntza-jarduera azpikontratatzea. Horren harira, ez da azpikontrataziotzat joko prestakuntza emateko irakasleak (pertsona fisikoak) kontratatzea. Instalazio eta baliabide horiek norberarenak edo beste entitate pribatu edo publiko batzuenak izan daitezke; gainera, Euskal Autonomia Erkidegoaren lurraldean eduki beharko dira.

Informazio hori egiaztatzeko, entitatearen legezko ordezkariak erantzukizunpeko adierazpen bat egingo du (erantzukizunpeko adierazpena eskabide-orrian jasota dago). Nolanahi ere, entitate eskatzaileak Lanbide-Euskal Enplegu Zerbitzuari eskuratzeko moduan eduki beharko ditu adierazpen horretan jasotako datuak egiazkoak direla frogatzen duten dokumentuak.

4.– Entitate onuradunek, orientazio-jarduerak egitean, honako hauek izan behar dituzte:

a) Interneterako banda zabaleko sarbide eraginkorra, Lanbide-Euskal Enplegu Zerbitzuaren informazio-sistemarekin konektatzeko.

b) Tableta grafikoko periferiko bat, sinadura digitala jasotzeko euskarri modura. Lanbide-Euskal Enplegu Zerbitzuko informazio-sistemara konektaturik egon behar du, eta, horrez gain, bateragarria izan beharko du STU 430 modeloari edo baliokideari dagokion WACOM gailuarekin, eta haren zehaztapen teknikoak bete behar ditu.

c) Telefono-linea finkoa, kokaleku espezifiko bakoitzarekin harremanetan jartzeko.

Orientazio-ekintzak egiten dituzten langileak teknikari gisa kontratatuko dira, eta unibertsitate-ikasketak amaituta izango dituzte.

5.– Ezingo dira onuradun izan egoera hauetako batean diren entitateak:

a) Zerga-betebeharrak eta Gizarte Segurantzarekikoak egunean ez izatea Dirulaguntzei buruzko azaroaren 17ko 38/2003 Lege Orokorraren Erregelamenduaren 22.4 artikuluan xedatutakoarekin bat etorriz (uztailaren 21eko 887/2006 Errege Dekretuaren bidez onartu zen erregelamendu hori).

Organo kudeatzaileak automatikoki egiaztatuko du zerga-betebeharrak eta Gizarte Segurantzarekikoak betetzen direla, dirulaguntza eman eta ordainketa bakoitza egin baino lehen. Hala ere, eskatzaileak berariaz aurka egin diezaioke egiaztatze horri, eta, halakorik egiten badu, baldintza hori betetzen duela frogatzen duten ziurtagiri eguneratuak aurkeztu beharko ditu.

b) Dirulaguntzen arloko itzulketa-betebeharrak egunean ez izatea Ekonomia eta Ogasuneko sailburuaren 2023ko otsailaren 13ko Aginduaren 4. artikuluan aurreikusitakoaren arabera (2023ko otsailaren 17ko EHAA).

c) Zigor-zehapena edo administrazio-zehapena ezarrita edukitzea, dirulaguntzak edo laguntza publikoak eskuratzeko aukera kentzen diona, barnean direla arrazoi hauengatik ezarritako zehapenak:

– Sexuan oinarritutako diskriminazioa eragiteagatik, edo Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 3.1 artikuluan jasotako askotariko diskriminazioa eragiteagatik.

– Ebazpen irmo baten bidez zehapen osagarri bat jasotzeagatik Lan Arloko Arau Hausteei eta Zehapenei buruzko Legearen testu bategina onartzen duen abuztuaren 4ko 5/2000 Legegintzako Errege Dekretuaren 46.1.b) eta 46 bis 1.b) artikuluetan xedatutakoaren arabera.

d) Laguntzak edo dirulaguntzak jasotzea eragozten dien eta legez ezarri zaien kausaren bat izatea, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuan xedatutakoak barne:

– Ez izatea berdintasun-planik indarrean, baldin eta Estatuaren araudiaren arabera horretara behartuta dagoen enpresa bada.

– 50 langile baino gehiago dituzten enpresen kasuan, ez edukitzea ezarrita sexu-jazarpena edo sexuan oinarritutako jazarpena prebenitu eta eragozteko neurririk emakumeen eta gizonen berdintasunaren arloan Estatuak ezarrita dauzkan legeen arabera.

e) 30.000 eurotik gorako dirulaguntzetan, eta eskatzailea irabazi-asmoa duen pertsona fisikoa edo juridikoa bada, zuzenbide publikoko entitatea ez dena, ez betetzea Merkataritza Eragiketetan Berankortasunaren Aurkako Neurriak ezartzen dituen abenduaren 29ko 3/2004 Legean ezarritako ordainketa-epeak Dirulaguntzei buruzko azaroaren 17ko 38/2003 Lege Orokorraren 13. artikuluaren 3 bis apartatuan aurreikusitako eran.

Eskakizun hori betetzat joko da abenduaren 29ko 3/2004 Legean aurreikusitako ordainketa-epeen betetze-maila Enpresak Sortu eta Handitzeko irailaren 28ko 18/2022 Legearen azken xedapenetako seigarrenaren d) letraren bigarren apartatuan aurreikusitako ehunekoaren parekoa edo handiagoa denean (aurreko ekitaldian hornitzaileei egindako ordainketa guztietatik ordaindutako fakturen % 90, abenduaren 29ko 3/2004 Legean ezarritako gehieneko epean).

f) Aurretiazko erabaki batean Europako Batzordeak laguntza bat legez kanpokoa eta merkatu erkidearekin bateraezina dela deklaratu ondoren, berreskuratze-agindu baten zain egotea.

g) Enpresa-deslokalizazioan aritzea Dirulaguntzen Araubidea Erregulatzeko abenduaren 21eko 20/2023 Legearen 49. artikuluan ezarritako eran.

h) Ekonomia Zirkularra Bultzatzeko Hondakinen eta Lurzoru Kutsatuen apirilaren 8ko 7/2022 Legean edo Euskadiko Ingurumen Administrazioaren abenduaren 9ko 10/2021 Legean aurreikusitako arau-hauste astun edo oso astun batengatik eta administrazio-bidean irmoa den ebazpen baten bidez zehatuta egotea, harik eta behar diren neurri zuzentzaileak hartu eta zehapena ordaindu arte.

i) Desgaitasuna duten pertsonentzat lanpostuak gordetzeko legez ezarritako kuota ez betetzea, ez eta hori betetzeko neurri alternatiboak hartzea ere.

j) Dirulaguntzen Araubidea Erregulatzeko abenduaren 21eko 20/2023 Lege Orokorraren 13. artikuluan aipatzen diren gainerako egoeretako batean egotea.

Lanbide-Euskal Enplegu Zerbitzuak ez badu egiaztatzen 5. apartatu honetan xedatutako betekizunen bat, eskabide-orrian dagoen erantzukizunpeko adierazpenaren bidez egiaztatu beharko da betekizun hori. e) apartatuko betekizuna dokumentazio hau aurkeztuta egiaztatuko da:

– Pertsona fisiko edo juridiko eskatzaileak kontabilitate-araudiaren arabera galdu-irabazien kontu laburtua aurkez badezake, 38/2003 Legearen 13.3 bis artikuluko a) letran aurreikusitako ziurtagiria, Lanbidek emandako ereduaren arabera.

Ziurtagiri hori dirulaguntza-eskabidearekin batera aurkeztu beharko da.

– Eskatzaile horrek ezin badu aurkeztu kontabilitate-araudiaren arabera galdu-irabazien kontu laburtua, berriz, 38/2003 Legearen 13.3 bis artikuluko b) letran aipatzen den dokumentazioa, hau da, Kontu Auditoreen Erregistro Ofizialean inskribatuta dagoen auditore batek emandako ziurtagiria, letra horren 1. apartatuan eskatutako edukia duena; edo, ziurtagiri hori ematea ezinezkoa bada, Prozedura Adostuen Txostena, aipatutako letraren 2. apartatuan eta Dirulaguntzei buruzko azaroaren 17ko 38/2003 Lege Orokorraren Erregelamenduaren 22 bis artikuluan aurreikusitako eran (erregelamendu hori uztailaren 21eko 887/2006 Errege Dekretuaren bidez onartu zen).

Lanbidek, hala badagokio, dirulaguntzak emateko ebazpenak eman aurretik eskatuko die entitate eskatzaileei aurreko paragrafoan aipatzen diren dokumentuak aurkezteko.

6. artikulua.– Entitate onuradunek proiektuak diseinatzeko eta aurrera eramateko fase guztietan eta jarduketa bakoitzean bermatu behar dute erabat betetzen dituztela «ingurumenari kalte nabarmenik ez eragiteko» printzipioa («do no significant harm–DNSH» printzipioa) eta etiketatze klimatiko eta digitala, Suspertze, Eraldatze eta Erresilientzia Planean, Espainiako suspertze eta erresilientzia planaren ebaluazioa onartzeari buruzko Kontseiluaren 2021eko uztailaren 13ko exekuzio-erabakian (Council Implementing Decision-CID) eta Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduan ezarritakoarekin bat, baita hura garatzeko araudian ezarritakoarekin bat ere; batez ere, irailaren 29ko HFP/1030/2021 Aginduaren 5. artikuluan ezarritakoarekin bat: artikulu horren arabera, Suspertze, Eraldatze eta Erresilientzia Planean sartutako erreforma eta inbertsioen exekuzio-neurri batek berak ere ez die kalte nabarmenik eragingo (DNSH) sei ingurumen-helburuei.

7.– Halaber, entitate onuradunek konpromisoa hartu beharko dute behar diren eskubideak eta sarbideak emateko hemen aipatzen diren erakundeek beren kontrol-eskumenak baliatzen dituztela bermatzeko, bat etorrita Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22.2.e) artikuluan eta Europako Parlamentuaren eta Kontseiluaren 2018ko uztailaren 18ko (EB, Euratom) 2018/1046 Erregelamenduaren («Finantza Erregelamendua») 129.1 artikuluan ezarritakoarekin; hauek dira erakunde horiek: Batzordea, Iruzurraren aurkako Europako Bulegoa, Europako Kontuen Auzitegia, Europako Fiskaltza eta Estatuko agintari eskudunak.

7. artikulua.– Diruz laguntzeko moduko jarduerak, arreta- eta gizarteratze-helburuak eta lanean hasteko lehentasunezko esparruak.

1.– Deialdi honetan araututako dirulaguntzen xedea 1. artikuluan aipatutako bana-banako ibilbideak finantzatzea da; ibilbide horiek «Landa- eta hiri-inguruneetako emakumeei laguntzeko programan» parte hartzen duten emakumeentzat dira, eta 2024. eta 2025. urteetan egitekoak, eta jarduketa hauek sar daitezke hor:

a) Enplegagarritasunaren diagnostikoa eta laneratzeko ibilbide pertsonalizatua. Jarduteko akordio pertsonal baten barruan sartuta egon behar du horrek, eta parte-hartzaileek programan zehar egingo dituzten jarduerak identifikatuko ditu eta erabakitzen den eta emango zaien arreta mota, jarraipen-sistema eta lortutako emaitza egituratuko, enplegagarritasunaren bilakaera kontuan hartuta.

b) Lan-orientazioko ekintzak eta parte-hartzaileei enplegua bilatzen laguntzeko ekintzak, barnean direla sentsibilizatzeko eta okupaziorako alderdi pertsonalak garatzeko jarduerak, eta enplegua modu aktiboan bilatzeko prozesuari, teknikei, baliabideei eta tresnei buruzkoak, curriculuma egitea, lan-elkarrizketarako tailerra, eta abar, baita informazio orokorra ere, lan-merkatuari buruzkoa, autoenpleguari buruzkoa, aukeran artikulu honen 7. apartatuan adierazitako eremuetan lurraldeari lotutako joerei, aukera profesionalei eta lan-aukerei buruzkoa, eta eremu horiei lotutako motibazio-saioak eta ekintzailetzari eta gizarte-ekonomiari buruzko aholkularitza-saioak.

c) Lanbide-kualifikazioa eta -birkualifikazioa lortzeko prestakuntza-jarduerak, artikulu honen 7. apartatuan aipatutako arlo eta lanbide-jarduerei lotutako edukiei buruzkoak batez ere, lan batean aritzeko egokiak eta nahikoak diren ezagutza teknikoak eta trebetasunak lortzea ahalbidetzen dutenak, ahal dela aipatutako lan-arloetan, edo, bestela, ezagutza, prozedurak, teknologiak edo joerak eguneratzea edo berriz lortzea ahalbidetzen dutenak, ahal dela lan-arlo horietan. Parte-hartzaile guztiek prestakuntza-espezialitate hauetako bat gutxienez ikasi beharko dute:

– FCOI08: ekintzailetzarako oinarrizko konpetentzia digitalen hastapenak.

– FCOI06: oinarrizko konpetentzia digitalen hastapenak.

– FCOI07: enplegurako oinarrizko konpetentzia digitalak.

d) Zeharkako konpetentzien tailer-saioak (alfabetatze digitala, talde-lana, denboraren kudeaketa eraginkorra, emaitzak lortzeko orientazioa, besteak beste) eta ahalduntzekoak, parte-hartzaileak laneratzeko eta gizarteratzeko eta lana eskuratzeko berdintasuna bultzatzeko, programaren hartzailea den kolektiboaren berezitasunak kontuan hartuta.

e) Parte-hartzaileek ibilbide pertsonalizatua garatzen duten bitartean laguntzea, enplegagarritasuna bultzatzeko eta hobekuntzaren jarraipena egiteko, baita lanean hasten direnean laguntzea ere.

f) Programa egiten den lurraldeko lan-merkatuaren azterketa, hauek ahalbidetzen dituena: inguruko ekonomia- eta lan-egoerari buruzko informazio eguneratua lortzea, enpresa-sareko langileriaren beharrak identifikatzea, eskatzen diren lan-profilak ezagutzea, lan-aukerak aurkitzea, «Landa- eta hiri-inguruneetako emakumeei laguntzeko programaren» berri zabaltzea eta enpresetan aurkitutako lanpostu hutsak betetzeko hautagai gisa parte-hartzaileak proposatzea; hori guztia, aurreikusitako helburua –laneratzea– betetze aldera.

Dirulaguntza jasotzeko, ibilbideek a), c) eta e) apartatuetako jarduerak gutxienez hartu beharko dituzte barnean.

2.– 1. artikuluan aipatutako ibilbide pertsonalizatuak osatzen dituzten ekintzak –banakakoak zein taldekoak–, ahal bada, apirilaren 10eko ESS/381/2018 Aginduaren eranskinean aurreikusitako protokoloak betez aurrera eramango dira; agindu horren bidez, Enplegu Sistema Nazionalaren Zerbitzu Zorro Komuneko protokoloak garatzeko erreferentzia den gida teknikoa onartu zen.

3.– 1. artikuluan aipatutako bana-banako ibilbideak gehienez ere sei hilabetekoak izango dira, eta proiektua onartu eta hurrengo bi hilabeteetan hasi beharko dira. Nolanahi ere, egikaritzeko gehieneko epea 2025eko irailaren 30ean amaituko da.

4.– Gainera, proiektuek baldintza hauek bete beharko dituzte:

a) Udalerri bakar batean egin nahi diren proiektuen kasuan, udalerriko biztanleen kopurua ezingo da izan 5.000 baino handiagoa; udalerri batean baino gehiagotan garatu nahi diren proiektuen kasuan, berriz, haien lurralde-eremuko udalerrien % 35ek, gutxienez, 5.000 biztanletik beherakoak izan behar dute.

b) Parte-hartzaileen % 35ek konpetentzia eta enplegu berdeak lortzeko bana-banako ibilbidea egingo dute.

c) Parte-hartzaileen % 35ek konpetentzia eta enplegu digitalak lortzeko bana-banako ibilbidea egingo dute.

d) Programa gauzatzeko sortutako bana-banako ibilbidean parte hartzen duten emakumeen % 20k, gutxienez, lanbideratzea lortu behar dute, norberaren edo besteren konturako.

5.– Deialdi honen ondorioetarako, arreta jaso duen parte-hartzailetzat joko da bere enplegagarritasuna eta laneratzeko aukerak hobetzeko ibilbide pertsonalizatua egin duen emakumea. Ibilbide hori aldez aurretik egindako diagnostikoa –enplegagarritasunarena– oinarri hartuta definitzen da, 3.1 artikuluaren a) puntuan aurreikusitakoaren arabera, eta emakumearen profilarekin, beharrekin eta itxaropenekin bat datozen eta ekoizpen-mundura sartzea ahalbidetuko dioten jarduerek osatu behar dute. Gainera, ibilbidea egiteko egutegia eta haren jarraipena ere jaso behar ditu. Dena den, lanbide-kualifikazioa eta -birkualifikazioa lortzeko prestakuntza-jarduerek osatu beharko dute ibilbidea.

Arreta jaso duen pertsonatzat jotzeko, apartatu honen lehenengo paragrafoan esandakoaz gain, egiaztatu beharko da parte-hartzaileak laguntza izan duela 3.1 artikulu honen e) letran aipatutako modalitateetako batean gutxienez, eta alfabetatze digitaleko ezagutza duela, probetxuz ikasi duela-eta artikulu honen 1.c) apartatuan aipatutako oinarrizko konpetentzia digitalei buruzko prestakuntza-espezialitateetako bat. 1.1 artikuluan adierazitako ondorioetarako, programa honen xedea den bana-banako ibilbidea osatu edo amaitu duten parte-hartzailetzat joko dira arreta jasotako parte-hartzaileak.

6.– Deialdi honen ondorioetarako, parte-hartzaile laneratutzat joko da aurreko apartatuan deskribatutako mailara iristeaz gain enplegagarritasunaren diagnostikoa eta enplegua lortzeko ibilbidea eskuratzen direnetik lan-merkatuan sartzea (norberaren edo besteren kontura) eta Gizarte Segurantzaren dagokion erregimenean kotizatzea ere lortzen duen pertsona.

Parte-hartzaile laneratutzat jotzeko, kotizatutako egunen gutxieneko epea 90 egunekoa izango da; egun horiek jarraian ez badaude, gehienez bost hilabeteko epekoak izan behar dute, lehenengo kontratazio-aldia hasten denetik edo norberaren kontura jarduten hasten denetik aurrera. Kotizatutako egunen gutxieneko kopuru hori egiaztatzeko, kontratatutako pertsonaren lan-bizitzaren txostenaren atalera sartu behar da. Lanaldi partzialeko kontratuei dagokienez, gutxienez lanegun erdikoak direnak onartuko dira bakarrik, eta lanaldi partzial bakoitza kotizatutako lanaldi osoko egunaren % 75 balitz bezala zenbatuko da.

7.– Diruz lagundu daitezkeen ibilbideak, bai eta haiek egitearen ondoriozko lanpostuak betetzeko zeregina eta laneratze profesionala ere, artikulu honen lehen apartatuan adierazitakoarekin bat etorriz, konpetentzia eta enplegu berde eta digitaletara bideratu beharko dira, eta iraupen luzeko zainketen, ekintzailetzaren eta gizarte-ekonomiaren esparruak hartu behar dituzte, bai eta hauekin lotutakoak ere, besteak beste: energia berriztagarriak, uren eta hondakinen tratamendua, ingurunea errespetatzen duten baso- eta nekazaritza-aprobetxamenduak, ekonomia zirkularra, zerbitzuen digitalizazioa, online merkataritza-jarduerak, teknologia, eta tokiko landa-garapen jasangarria, lurralde-kohesioa indartzen duena (ondarearen kudeaketa, turismo-jarduera, tokiko dimentsioko eta dimentsio berdeko ekintzailetza eta gizarte-ekonomia, produktu endogenoei lotuak) eta gizarte-kohesioa indartzen duena (mendetasunarekiko arreta eta kolektibo kalteberekiko esku-hartzea).

8.– Eskaeretako parte-hartzaileak gutxienez zortzi izango dira.

8. artikulua.– Programa norentzat den.

Deialdi honetan diruz lagunduko diren bana-banako ibilbideetan, Lanbide-Euskal Enplegu Zerbitzuan inskribatuta dauden emakume langabeek parte hartu ahal izango dute; batez ere, 5.000 biztanletik beherako udalerrietan bizi direnek, prestakuntza- edo lanbide-kualifikazioa edo -birkualifikazioa lortzeko beharra dutenek.

Deialdi honen ondorioetarako, emakumeek kualifikazioa behar dute, ez badute lan-sektore konkretu batean lanbide batean jardutea ahalbidetzen dien profesionaltasun-ziurtagiririk, Derrigorrezko Bigarren Hezkuntzako graduatu-titulurik, erdi-mailako edo goi-mailako Lanbide Heziketako titulurik edo unibertsitateko titulaziorik.

Deialdi honen ondorioetarako, emakumeek lanbide-birkualifikazioa behar dute, baldin eta, profesionaltasun-ziurtagiri bat, Derrigorrezko Bigarren Hezkuntzako graduatu-titulu bat, erdi-mailako edo goi-mailako Lanbide Heziketako titulu bat edo unibertsitateko titulazio bat izan arren, titulu horiek hautaketa-data baino bost urte lehenago lortu badira eta programan sartu aurreko urtean beren lan-bizitzaren agirian ez badago ikasketa-arloarekin zuzenean lotuta dagoen kontraturik; ondorioz, jarduera egiteko ikasketa horiek behar dituztela iritziko zaio.

Inskribatuta dauden eta 5.000 biztanletik beherako udalerrietan bizi diren emakume langabeak proiektu bakoitzean parte hartzen duten pertsonen % 35 izango dira, gutxienez.

9. artikulua.– Eskabideak aurkeztea.

1.– Deialdi honetan aipatzen diren dirulaguntzak jasotzeko eskabideak Lanbide-Euskal Enplegu Zerbitzuko zuzendari nagusiari igorriko zaizkio; bide elektronikoz izapidetuko dira, Lanbide-Euskal Enplegu Zerbitzuaren prestakuntzarako aplikazio informatikoaren bidez (LanF), eta entitatearen legezko ordezkariak sinadura elektronikoa jarri beharko du eskabidean.

Aplikaziora sartzeko aukerarik ez duten entitateek Lanbide-Euskal Enplegu Zerbitzuaren webgunearen bidez eskatu ahal izango dute: https://www.lanbide.euskadi.eus/prestakuntza/-/informazioa/erakundeen-erregistroa/

Administrazio-prozeduraren informazio-fitxa (izapidetze elektronikorako jarraibideak ematen dituena) helbide honetan eskuratu ahal izango da: https://www.euskadi.eus/servicios/1209501

2.– Entitate bakoitzak proiektu bakar bat aurkeztu ahal izango du eskabidean. Proiektu bakoitza gauzatzeko ezarritako bana-banako ibilbideak, baita proiektua osatzen duten diruz laguntzeko moduko jarduerak ere, honela antolatuko dira: parte-hartzaileen % 35ek (gutxienez) konpetentzia eta enplegu berdeak garatuko dituzte, eta parte-hartzaileen beste % 35 batek (gutxienez), konpetentzia eta enplegu digitalak. Gainera, proiektu bakoitzak barnean hartu behar du, laneratze-helburu gisa, parte hartzen duten eta arreta jasotzen duten emakume guztien % 20k gutxienez norberaren edo besteren konturako enplegua lortzea, kontuan hartuta, 5.1 artikuluarekin bat, lan-merkatuan sartzea lortzen duten parte-hartzaileen % 20 bakarrik lagunduko direla diruz.

Udalerri bakar batean egin nahi diren proiektuen kasuan, udalerriko biztanleen kopurua ezingo da izan 5.000 baino handiagoa. Udalerri batean baino gehiagotan garatu nahi diren proiektuen kasuan, haien lurralde-eremuko udalerrien % 35ek, gutxienez, 5.000 biztanletik beherakoak izan behar dute.

Entitate onuradun bakoitzak eskatzen duen zenbatekoa ezingo da izan deialdiko zuzkidura osoaren % 20 baino handiagoa.

3.– Dirulaguntzaren eskabidean, diruz laguntzea nahi den ibilbide pertsonalizatuaren proiektua adieraziko da. Horretarako, LanF aplikazio informatikoan, hemen zerrendatzen diren eta proiektuaren deskribapen-txostena osatzen duten eremu hauek bete behar dira:

1) Proiektuaren izena.

2) Proiektua koordinatzeko harremanetarako pertsona/pertsonak eta haren/haien datuak.

3) Zerbitzua emango zaien parte-hartzaileen kopurua eta laneratzeari dagokionez aurreikusitako helburuak.

4) 5.000 biztanletik beherako udalerria, edo, hala badagokio, jarduteko eremuak, non udalerrien % 35ek 5.000 biztanle baino gutxiago izan behar dituzten; udalerrien multzo biak argi eta garbi identifikatu behar dira.

5) Kostu osoa, gaitasun eta enplegu berdeetara batetik eta konpetentzia eta enplegu digitaletara bestetik zer aurrekontu bideratuko den adierazita, eta eskatutako dirulaguntza eta, hala badagokio, entitate onuradunaren ekarpena bereizita.

6) Laneratzeko ibilbide pertsonalizatuak garatzeko eskatzen diren ekintzak:

6.1.– Prestakuntza jarduerak –gaitasun «berdeak» edo digitalak ikastekoak batez ere, baita zeharkako konpetentzia eta trebetasunak eskuratzekoak ere–, aurreikusitako hasiera-datak adierazita.

6.2.– Banakako lan-orientazioa jasotzeko ekintzak, aholkularitza, informazioa: ordu kopurua eta egiteko epea.

6.3.– Zeharkako konpetentziak ikasteko eta ahalduntzeko tailer-saioak: ordu kopuruak eta gauzatzeko epea.

6.4.– Ibilbide pertsonalizatua egin bitartean laguntzea.

7) Helburu operatiboak eta emaitzakoak. Adierazleak.

4.– Izapidetze elektronikoa ordezkari baten bidez egin ahal izango da, eta, horretarako, ordezkaritza hori Euskal Autonomia Erkidegoko Administrazio Publikoaren ahalordeen erregistro elektronikoan inskribatu beharko da, helbide honetan: https://www.euskadi.eus/ordezkariak

5.– Eskabideak ez baditu betetzen baldintza guztiak, entitate interesdunari jakinaraziko zaio hamar egun balioduneko epea duela, jakinarazpena jaso eta hurrengo egunean zenbatzen hasita, hutsune edo akatsa konpontzeko, edo nahitaezko dokumentuak aurkezteko. Hori egin ezean, eskabideari uko egin diola ulertuko da, horretarako beharrezkoa den ebazpena eman eta gero.

6.– Eskabideak aurkezteko epea ebazpen hau Euskal Herriko Agintaritzaren Aldizkarian argitaratu eta hurrengo egunean hasi, eta 2025eko maiatzaren 30ean amaituko da.

10. artikulua.– Eskabidean zer dokumentazio aurkeztu behar den dirulaguntza Europar Batasuneko Suspertze eta Erresilientzia Mekanismoak finantzatzen duenean.

Eskabidearekin batera, dokumentazio hau aurkeztu beharko da, eta dokumentazio orokorrari gehituko zaio:

Onuradunaren eta, hala badagokio, azpikontratisten benetako titulartasunaren identifikazioa. Identifikatzeko, Europako Parlamentuaren eta Kontseiluaren 2015eko maiatzaren 20ko (EB) 2015/849 Zuzentarauaren 3. artikuluaren 6. puntuan xedatutakoa beteko da, irailaren 29ko HFP/1031/2021 Aginduaren 10. artikuluan ezartzen denari jarraikiz, Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22. artikuluari lotuta.

Benetako titulartasunari buruzko erantzukizunpeko adierazpena, Europako Parlamentuaren eta Kontseiluaren 2015eko maiatzaren 20ko (EB) 2015/849 Zuzentarauaren 3. artikuluko 6. puntuaren arabera (I. eranskina).

Jarduera ekonomikoak dituzten entitate onuradunek, irailaren 29ko HFP/1030/2021 Aginduaren 8. artikuluaren arabera, egiaztatu behar dute Zerga Administrazioko Estatu Agentziaren enpresaburu, profesional eta atxikitzaileen erroldan edo Zergen Foru Administrazioaren errolda baliokidean inskribatuta daudela, eta inskripzio horrek laguntza eskatzen den egunean benetan duten jarduera ekonomikoa azaldu behar du.

«Kalte nabarmenik ez eragiteko» printzipioa («do no significant harm – DNSH» printzipioa) betetzeari buruzko erantzukizunpeko adierazpena, (EB) 2021/241 Erregelamenduaren 2. artikuluko 6. apartatuan ezarritako moduan (Europako Parlamentuak eta Batzordeak 2021eko otsailaren 12an onetsi zuen erregelamendu hori). (II. eranskina).

Interes Gatazkarik Ezaren Adierazpena (IGEA) (III. eranskina).

Iruzurraren aurkako politikara atxikitzeko eta hura ezagutzeko erantzukizunpeko adierazpena. (IV. eranskina).

Finantzaketa bikoitzik ez duela dioen erantzukizunpeko adierazpena. (V. eranskina).

Tartean dauden administrazio publikoen artean datuak lagatzeko eta tratatzeko adierazpena, SEEPeko jarduketak aurrera eramatearekin lotua, aplikatu behar den Europako araudian xedatutakoa betetzeko, bat etorrita Datu Pertsonalak Babesteko eta Eskubide Digitalak Bermatzeko Lege Organikoarekin (3/2018 Lege Organikoa, abenduaren 5ekoa) (VI. eranskina).

SEEP-NextGenerationEU planean ezarrita dauden eta kudeatu beharreko esparruari eragin diezaioketen zeharkako printzipioak betetzeko konpromisoari buruzko erantzukizunpeko adierazpena (VII. eranskina).

Batzordearen, Iruzurraren aurkako Europako Bulegoaren (OLAF), Europako Kontuen Auzitegiaren, Europako Fiskaltzaren eta Estatuko agintaritza eskudunen sarbiderako berariaz emandako baimena, Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22.2.e) artikuluan eta Europako Parlamentuaren 2018ko uztailaren 18ko (EB, Euratom) 2018/1046 Finantza Erregelamenduaren 129. artikuluan xedatutako eskumenak balia ditzaten (VIII. eranskina).

Irabazi-asmorik gabeko entitate juridikoek estatutuak aurkeztu beharko dituzte.

SEEPeko jarduketak egiteko konpromisoa hartzeko adierazpena (IX. eranskina).

Aipatzen diren ereduak LanF aplikazioan egongo dira eskuragarri.

11. artikulua.– Prozedura eta ebazpena.

1.– Lanbide-Euskal Enplegu Zerbitzuko Enplegurako Lanbide Heziketako Zuzendaritza izango da prozedura izapidetu eta ebazteko organo eskuduna.

2.– Dirulaguntzak emateko prozedura lehiarik gabekoa izango da, eta emakida-ebazpenak eskabideak aurkezteko hurrenkeran emango dira, jarduera diruz laguntzeko modukoa dela eta eskatzen diren gainerako baldintzak betetzen direla egiaztatu ondoren, deialdian esleitutako aurrekontuko kreditua ahitu arte.

1.2 artikuluan hasieran aurreikusitako aurrekontu-zuzkidura ahitzen bada, ez da beste laguntzarik emango; funts berriak jasota dirulaguntzak finantzatzeko aurrekontu-kreditua handitzen denean ekingo zaio berriz prozesuari. Baliabide ekonomikoak behin betiko ahitzen badira, geratzen diren eskaerei ez zaie dirulaguntzarik emango.

Prozesua gelditzen denean eta, hala badagokio, dirulaguntzak berriz ematen hasten denean, EHAAn emango da horren berri, Lanbide-Euskal Enplegu Zerbitzuko Lanbide Heziketaren zuzendariaren ebazpen baten bidez, aurrekontuko kredituaren zenbatekoa adierazita; era berean jakinaraziko da dirulaguntza horiek finantzatzeko baliabide ekonomikoak behin betiko ahitu direla.

Lanbide-Euskal Enplegu Zerbitzuko Enplegurako Lanbide Heziketaren zuzendari nagusiak laguntzak emateko edo ukatzeko ebazpena emango du, eta banan-banan jakinaraziko du, bitarteko telematikoen bidez.

3.– Eskaerak baloratu aurretik, interes-gatazkak izateko arriskua aztertuko da, Minerva aplikazioaren bidez. Azterketa hori urtarrilaren 24ko HFP/55/2023 Aginduan jasota dago, Suspertze, Eraldatze eta Erresilientzia Plana betearazten duten prozeduretako interes-gatazkaren arriskuaren analisi sistematikoari buruzkoan.

Pertsona juridiko eskatzaileren baten benetako titulartasunari buruzko daturik ez badago Zerga Administrazioko Estatu Agentziaren datu-baseetan, Lanbide-Euskal Enplegu Zerbitzuak bere benetako titulartasunari buruzko informazioa eskatuko dio, eta pertsona horrek informazio-eskaera egiten denetik bost egun baliodun igaro baino lehen aurkeztu beharko du. Informazio hori esandako epearen barruan ez aurkezteak eskatzailea prozeduratik baztertzea dakar.

4.– Eskabideak ebazteko eta ebazpenak jakinarazteko gehieneko epea bi hilabetekoa da, eskabidea Lanbide-Euskal Enplegu Zerbitzuaren erregistroan sartzen den egunetik aurrera; epe hori igarotakoan entitate interesdunari ebazpena jakinarazi ez bazaio, dirulaguntzaren eskaera ezetsi dela ondorioztatuko da.

Dirulaguntza emateko ebazpenak zehaztuko du finantzaketa Europar Batasunaren Suspertze eta Erresilientzia Mekanismoaren barrukoa dela, eta oinarrizko alderdi hauek adieraziko ditu:

a) Aurreikusitako helburuak, zerbitzua emango zaien eta laneratu behar diren parte-hartzaileei eta konpetentzia eta enplegu berde eta digitalei dagokienez.

b) Programa garatzeko toki geografikoa, probintziakoa.

c) Eman nahi den dirulaguntzaren zenbatekoa, bi hauek bereizita: parte hartzen duten emakumeentzako zerbitzua finantzatzeko zatia, helburu horrekin aplika daitekeen modulu ekonomikoarekin batera, eta modulu osagarria, zerbitzatutako parte-hartzaile bakoitzeko, baldin eta laneratzea lortu badu.

5.– Lanbide-Euskal Enplegu Zerbitzuko Enplegurako Lanbide Heziketaren zuzendariaren ebazpenek ez diote amaiera ematen administrazio-bideari, eta, haien aurka, gora jotzeko errekurtsoa jarri ahal izango zaio Lanbide-Euskal Enplegu Zerbitzuko zuzendari nagusiari, hilabeteko epean, ebazpena jakinarazi eta hurrengo egunetik aurrera.

6.– Entitate onuradunei dirulaguntzak emateko eta ordaintzeko, ezinbestekoa izango da Euskal Autonomia Erkidegoko Administrazioak edo haren organismo autonomoek emandako antzeko dirulaguntzen edo laguntzen karietara bideratzen hasi diren eta oraindik izapidetzen ari diren itzulera- edo zehapen-prozedurak amaituta egotea.

7.– Publikotasunaren printzipioa betetzeko, Lanbide-Euskal Enplegu Zerbitzuaren Enplegurako Lanbide Heziketaren zuzendariaren ebazpen baten bidez, Euskal Herriko Agintaritzaren Aldizkarian emango da jakitera zer entitatek jaso duten dirulaguntza deialdi honen babesean eta zenbateko laguntza jaso duten.

12. artikulua.– Parte-hartzaileak hautatzea.

1.– Entitateek proiektuaren berri emango dute Lanbide-Euskal Enplegu Zerbitzuaren webgunearen bidez, dagokion zerbitzu-eskaintzaren bidez.

Parte-hartzaileen azken hautaketa entitate onuradunak egingo du, aurrez izena eman duten hautagaien artean. Hortaz, entitatea Lanbide-Euskal Enplegu Zerbitzuaren Prestakuntzaren Kudeaketaren aplikazioan sartu ahalko da (LanF) izena eman duten hautagai guztien informazioa eskuratzeko, eta hautaketa-prozesua jarduketak hasi baino nahikoa denbora lehenago eta behar besteko bermearekin egin behar du.

2.– Profesionaltasun-ziurtagiriak edo ziurtagiri profesionalak lortzeko prestakuntza-ekintzetan parte hartu ahal izateko, sartzeko eskakizunak bete beharko dira, Lanbide Heziketako Sistemaren Antolamendua garatzen duen uztailaren 18ko 659/2023 Errege Dekretuaren 75. artikuluan eta bosgarren xedapen gehigarrian ezarriak.

Prestakuntza-espezialitateen katalogoan jasotako prestakuntza-espezialitateren bateko prestakuntza-ekintzetan parte hartu nahi dutenek, era berean, katalogoan espezialitate bakoitzerako ezarritako sarbide-baldintzak bete behar dituzte.

13. artikulua.– Jarduketak egitea.

1.– Dirulaguntzen entitate onuradunek zuzenean gauzatuko dituzte ekintzak, eta ezingo dute hirugarrenik azpikontratatu horretarako.

Prestakuntza-jarduerei dagokienez, diruz lagundutako prestakuntza emateko irakasleak kontratatzea ez da joko azpikontrataziotzat. Irakasleak kontratatzea pertsona fisikoak kontratatzea baino ez da.

2.– Gainera, prestakuntza-jardueretan, hauek kontuan izan beharko dira:

a) Parte-hartzaileek ezingo dituzte eman egunean 7,5 ordu baino gehiago prestakuntza-ekintzetan. Nolanahi ere, astean ez dira izango 37,5 ordu baino gehiago. Muga horien barruan errenditu behar da, profesionaltasun-ziurtagiri bakoitzean lantokietan egiten den prestakuntza praktikoaren moduluko orduak edo profesionaltasun-ziurtagiriei ez dagozkien ekintzen praktiken orduak gehituz gero ere.

b) Prestakuntza-ekintza hasi ondoren, saioak erregularki emango dira, eta prestakuntza-zentroak ezingo ditu eten aldi baterako, ezinbestean ez bada; etenaldia behar bezala justifikatu beharko da eta Lanbide-Euskal Enplegu Zerbitzuak onartu.

Lanbide-Euskal Enplegu Zerbitzuak prestakuntza-ekintza kautelaz eten ahal izango du, baldin eta prestakuntza normal emateko orduan eragin nabarmena duten anomaliak hautematen badira.

c) Ikasleren batek prestakuntza-ekintza uzten badu, haren lekuan beste parte-hartzaile bat sartu ahal izango da. Prestakuntza-jardueraren iraupenaren ehuneko 25era iritsi baino lehen onartuko da ordezte hori, salbu eta profesionaltasun-ziurtagiriei loturiko prestakuntza-jarduerak badira; kasu horretan, ordeztea prestakuntza-jarduera hasi eta lehen bost eskola-egunetan gertatzen bada onartuko da soilik. Parte-hartzaileek proiektuko ibilbidearekin bat egin beharko dute, prestakuntza-ikastaroko ikasle gisa onartuak izateko.

d) Prestakuntzaren helburua profesionaltasun-ziurtagiriak lortzea ez bada, lanekoak ez diren lanbide-praktikek ezingo dute iraun, oro har, 200 ordu baino gehiago, eta prestakuntza-ekintza amaitu osteko lehen bi hilabeteetan hasi beharko dira.

Prestakuntza profesionaltasun-ziurtagiriak lortzera bideratuta dagoenean, praktikaren iraupena eta edukiak lan-zentroko prestakuntza praktikoko moduluaren araberakoak izango dira (Profesionaltasun Ziurtagiria arautzen duen Errege Dekretuaren II. eranskinean ezarritakoa).

e) Lanbide-Euskal Enplegu Zerbitzua ikastarora gutxienez bi bisita egiten saiatuko da, bat hasieran eta bestea amaieran.

f) Ikastaroaren hasieran, prestakuntza-zentroek gutxienez material hau emango diote prestakuntza-ekintzetan parte hartzen duen bakoitzari:

– eskuliburu bat, editatua edo euskarri informatikoan, espezialitatearen eduki guztiak biltzen dituena.

– ikastaroa behar bezala egiteko behar den idazmahaiko materiala, eta

– behar diren babes-elementuak.

Era berean, ikasleei zer eskubide eta betebehar dituzten azalduko diete, eta zein diren kanporatzeko arrazoiak eta prozedurak.

g) Prestakuntza amaitutakoan, parte-hartzaile bakoitzari asistentzia-ziurtagiria edo diploma emango zaio, Lanbide-Euskal Enplegu Zerbitzuak ezarritako ereduaren arabera, ebaluazioa positiboa izan bada eta prestakuntza gainditu badu. Dokumentu horretan, gutxienez datu hauek adieraziko dira: prestakuntza-ekintzaren izena, prestakuntza-edukiak, prestakuntza emateko modalitatea, hasteko eta amaitzeko egunak, eta ikasleak guztira jaso dituen prestakuntza-orduak.

3.– Orientazio-ekintzak egikaritzeari dagokionez, muga hauek kontuan izan behar dira:

Bana-banako ekintzak: gehieneko arreta-denbora pertsonako eta eguneko: 1,5 ordu.

Talde-ekintzak: gehieneko iraupena eguneko: 4 ordu.

Pertsona bati ematen zaion arreta osoaren gehieneko denbora (banakako ekintza eta talde-ekintza): 20 ordu.

4.– Zeharkako konpetentziei eta ahalduntzeari buruzko tailer-saioak onetsi den eskaeran aurreikusitakoarekin bat egingo dira, baita parte-hartzaileei beren enplegagarritasuna bultzatzen eta hobekuntzaren jarraipena egiten laguntzeko ekintzak ere, ibilbide pertsonalizatua egin bitartekoak, eta lanean hasten direnean laguntzeko ekintzak ere bai. Horretarako, parte-hartzaile bakoitzak helburua lortzeko behar duen egokitzapena egingo da.

5.– Parte-hartzaile laneratuei dagokienez, programaren onuradun izango diren entitateek enpresei jakinaraziko diete programaren ondorioz egindako kontratuen jakinarazpenean «Landa- eta hiri-inguruneetako emakumeen enplegu programa. Suspertze eta Erresilientzia Mekanismoa» jarri behar dutela horretarako sortu den ereduan, Contrat@ aplikazioaren bidez.

14. artikulua.– Entitate onuradunen betebeharrak.

Onuradunaren betebehar izango dira, deialdi honetako artikuluetan ezarritakoez gain, lege-xedapen hauetan oro har ezarritakoak ere: Dirulaguntzei buruzko azaroaren 17ko 38/2003 Lege Orokorraren 14. eta 46. artikuluak, Dirulaguntzen Araubidea Erregulatzeko abenduaren 21eko 20/2023 Legearen 14. artikulua, enplegurako lanbide-heziketaren sistema arautzen duen araudia eta urriaren 11ko 1121/2021 Agindua. Bereziki, betebehar hauek ditu onuradunak:

– Lanbide-Euskal Enplegu Zerbitzuak esandako moduan eta maiztasunez, dagozkion urratsak eta helburuak betetzea ahalbidetzen duten datuen aldizkako bilakaera jakinaraztea eta egiaztatzea.

– Estatuko Enplegu Zerbitzu Publikoaren edo Laneko eta Gizarte Segurantzako Ikuskatzailetzaren egiaztapen-jarduketak, Estatuko Administrazio Orokorraren Esku Hartzailetza Nagusiaren kontrol finantzarioak –hala badagokio– eta Kontuen Auzitegiaren legedian aurreikusitakoak egiten uztea, baita honako hauen jarduketak egiten uztea ere: batetik, Lanbide-Euskal Enplegu Zerbitzuak, Ekonomia eta Ogasun Sailaren Kontrol Ekonomikoko Bulegoak, Lan eta Enplegu Sailak eta Herri Kontuen Euskal Epaitegiak.

– Estatuko edo nazioarteko beste administrazio batek edo entitate publiko batek helburu bererako emandako dirulaguntzak, laguntzak, diru-sarrerak edo baliabideak jaso izanaren berri ematea Lanbide-Euskal Enplegu Zerbitzuari, eta baliabide horiek kostuak bi aldiz ez finantzatzea.

– Diruz lagundutako jardueraren xedea edo nondik norakoa nabarmen aldatzen duen edozein gertaera jakinaraztea, bai eta dirulaguntza emateko orduan kontuan hartutako edozein inguruabarren aldaketa ere.

– Laguntzarekin lotutako transakzioak kontabilitate-identifikazio bereizi baten bidez edo kontabilitate-kode egoki baten bidez identifikatzea.

– Prestakuntza-entitate onuradunaren ordezkariak edo ahaldunak, dirulaguntza onartzeko unean, izaera pertsonaleko datuei dagokien konpromisoa sinatu beharko du, nahitaez, datu horien tratamenduaren arduradun den aldetik, arlo hori arautzen duen indarreko legedian ezarritako eran.

– Konpromisoa adieraztea enpresa-deslokalizaziorik ez egiteko, Dirulaguntzen Araubidea Erregulatzeko abenduaren 21eko 20/2023 Legearen 49. artikuluan ezarritakoaren arabera.

15. artikulua.– Komunikazio eta publizitatearen arloko betebeharrak.

Deialdi honetan diruz lagundutako jarduketek eta jarduketa horiei buruz eta landa- eta hiri-inguruneetako emakumeei laguntzeko programari buruz egiten den publizitate guztiak behar bezala identifikatuta egon beharko dute, informazio, komunikazio eta publikotasunaren arloan Estatuko araudiak eta Europar Batasunak Suspertze eta Erresilientzia Mekanismorako ezartzen dituzten betebeharrekin bat etorrita.

Hala, dirulaguntza hauek jasotzen dituzten entitateek finantzaketa horren jatorriaren berri eman beharko dute jarduketen publizitatean, eta ikusteko moduan jarri beharko dute informazio hori. Hala dagokionean, Lanbide-Euskal Enplegu Zerbitzuaren identifikazio grafikoaz eta Suspertze, Eraldatze eta Erresilientzia Planaren logoaz gainera, Europar Batasunaren ikurra txertatuko dute, eta finantzaketari buruzko adierazpen egoki bat, honela dioena: «Europar Batasunak – NextGenerationEUk finantzatua». Helbide honetan eskuratu ahal dira elementu horiek: https://planderecuperacion.gob.es/identidad-visual Ikusgarritasun hori, bereziki, jarduera egiten den lokaletan, material didaktiko guztietan eta bestelako materialetan bermatu behar da, eta prestakuntza-jarduerak eta emaitzak sustatzen direnean, askotariko hartzaileei (komunikabideak eta herritarrak barne) zuzendutako informazio koherentea, eraginkorra eta neurrizkoa emanez.

16. artikulua.– Entitate onuradunentzako betebehar bereziak, Europar Batasuneko Suspertze eta Erresilientzia Mekanismoaren finantzaketari buruzkoak.

Entitate onuradunek, gainera, Europar Batasunaren Suspertze eta Erresilientzia Mekanismoaren finantzaketari buruzko Europako eta Estatuko betebehar hauek bete beharko dituzte:

«DNSH – Do Not Significant Harm» printzipioa (ingurumenari kalte nabarmenik ez eragiteko printzipioa), klimaren arloko etiketatzearen baldintzak (01 etiketa – Konpetentzia eta enplegu berdeetarako ekarpena [100 %]) eta etiketatze digitalaren baldintzak (108 etiketa – Gaitasun digitalak garatzeko laguntza [100 %]) erabat betetzen direla bermatzea, honako hauek ezarritakoarekin bat: Suspertze, Eraldatze eta Erresilientzia Plana; Kontseiluaren Exekuzio Erabakia, Espainiako Suspertze eta Erresilientzia Planaren ebaluazioa onartzeari buruzkoa (Council Implementing Decisión – CID); Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamendua, eta irailaren 29ko HFP/1030/2021 Aginduaren 5. artikulua (aginduak Suspertze, Eraldatze eta Erresilientzia Planaren kudeaketa-sistema eta hura garatzeko araudia eratzen ditu, proiektuen diseinuaren eta exekuzioaren fase guztietan eta jarduera bakoitzerako banaka). Entitate onuradunek, nolanahi ere, printzipio hori betetzen dela egiaztatzeko mekanismoak eta aplikatzen dela ziurtatzeko neurri zuzentzaileak aurreikusiko dituzte, eta horren berri emango dute dirulaguntza justifikatzeko memorian.

Interes-gatazkarik, iruzurrik eta ustelkeriarik ez dagoela bermatzea, eta baldintzarik eta erreparorik gabe onartzea dirulaguntza eman duen administrazioak onartutako Iruzurraren Aurkako Neurrien Plana. Plan horren xedapenak erabat bete beharko dituzte, autonomia-erkidegoko, estatuko eta Europako araudia zeharo errespetatuz, iruzurra, ustelkeria eta interes-gatazkak prebenitzeari, atzemateari eta zuzentzeari dagokienez, eta Europar Batasuneko erakundeek beren finantza-interesak babesteari buruz hartzen dituzten erabakiekin bat etorriz. Urtarrilaren 24ko HFP/55/2023 Agindua indarrean jarri zenetik (HFP/55/2023 Agindua, urtarrilaren 24koa, Suspertze, Eraldatze eta Erresilientzia Plana betearazten duten prozeduretako interes-gatazken arriskuaren analisi sistematikoari buruzkoa), Eusko Jaurlaritzaren neurrien plana aplikatu behar zaien entitateek haren prozedura espezifiko bat bete behar dute: SEEPek finantzatutako kontratazio- eta dirulaguntza-prozesuetan interes-gatazkarik ez izateko hark ezartzen duena.

Estatuko edo nazioarteko beste edozein administrazio edo entitate publikok beste dirulaguntza edo bestelako laguntza batzuk ematen badizkio helburu bererako, onuradunak dirulaguntzak ematen dituen administrazioari jakinarazi beharko dio hori, eta kostu bera ezin izango da bi aldiz finantzatu.

Europako Batzordeak, Iruzurraren Aurkako Europako Bulegoak, Europako Kontuen Auzitegiak eta Europako Fiskaltzak ezarritako kontrolak onartzea. Horretarako, dirulaguntzari buruz eskatutako informazio guztia emango zaie organo horiei, Europako Parlamentuaren eta Kontseiluaren otsailaren 12ko (EB) 2021/241 Erregelamenduaren 22.2.e) artikuluan ezarritakoaren arabera.

Entitateak bermatu behar du badakiela laguntza horren finantzaketa Europar Batasuneko SEMetik datorrela, eta, beraz, bere gain hartzen dituela Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamendutik (hau da, SEMa ezartzen duen erregelamendutik) eta finantzaketa horri aplikatu beharreko gainerako Europar Batasuneko arauetatik edo estatu-arauetatik eratorritako betebehar guztiak. Hori erantzukizunpeko adierazpen baten bidez egiaztatu behar da.

Batzordeari, Iruzurraren Aurkako Europako Bulegoari, Kontuen Auzitegiari eta, hala dagokionean, Europako Fiskaltzari Finantza Erregelamenduaren 129. artikuluaren 1. apartatuak aitortzen dizkien eskubideak egikaritzeko baimena ematea, eta Suspertze, Eraldatze eta Erresilientzia Planean sartutako erreformak eta inbertsio-proiektuak aplikatzeko neurrietarako ordaindutako funtsen azken hartzaile guztiak behartzea, edo aplikazioan esku hartzen duten gainerako pertsona edo entitate guztiak, eta berariaz baimena ematea Batzordeari, Iruzurraren Aurkako Europako Bulegoari, Kontuen Auzitegiari eta, hala dagokionean, Europako Fiskaltzari, Finantza Erregelamenduaren 129. artikuluaren 1. apartatuak aitortzen dizkien eskubideak egikaritzeko eta antzeko betebeharrak ezartzeko funtsen azken hartzaile guztiei.

Jasotako funtsen aplikazioaren egiaztagiriak eta dokumentu elektronikoak bost urtez zaintzea eta gordetzea, edo hiru urtez, baldin eta finantzaketaren zenbatekoa 60.000 eurokoa edo txikiagoa bada, egiaztapen- eta kontrol-jarduerak egin ahal izan daitezen, Europako Parlamentuaren eta Kontseiluaren 2018ko uztailaren 18ko (EB, Euratom) 2018/1046 Erregelamenduaren 132. artikuluan eta Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22.2.f) artikuluan ezarritakoarekin bat etorriz.

Suspertze, Eraldatze eta Erresilientzia Planaren kudeaketa-sistema zehazten duen irailaren 29ko HFP/1030/2021 Aginduaren 9. artikuluak ezarritako komunikazio-betebeharrak betetzea. Bereziki, inbertsioen jarduerei buruzko informazio- eta komunikazio-neurrietan (informazio-kartelak, plakak, argitalpen inprimatuak zein elektronikoak, ikus-entzunezko materiala, webguneak, prentsako iragarkiak eta txertaketak, ziurtagiriak, eta abar), logotipo hauek sartu beharko dira: a) Europar Batasunaren ikurra; b) Batasunaren ikurrarekin batera, «Europar Batasunaren Next Generation EUk finantzatua» testua; c) 821/2014 Exekuzio Erregelamenduaren II. eranskinean ezarritako arau grafiko eta kolore normalizatuak hartuko dira kontuan.

Beren identifikazio-datuak datu-base batean sartzea, Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22.2.d) artikuluan eta Suspertze, Eraldatze eta Erresilientzia Planaren kudeaketa-sistema eratzen duen irailaren 29ko HFP/1030/2021 Aginduaren 8. artikuluan adierazitakoaren arabera.

Diruz lagunduta egiten diren jarduketen fidagarritasunaren eta jarraipenaren erantzule izatea, une oro jakin ahal izateko jarduketa bakoitza zenbateraino bete den. Hirugarrenek egin beharreko jarduketen kasuan, mekanismoak ezartzea hirugarren horiek aurreikusi diren jarduketak aurrera eramaten laguntzen dutela ziurtatzeko eta –hala badagokio– behar diren suspertze-planaren adierazle, mugarri eta helburuen balioa zehazteko beharrezkoa den informazioa ematen dutela ziurtatzeko.

Tartean diren administrazio publikoen artean datuak lagatzea onartzea, aplikatzekoa den Europako araudia betetzeko, bat etorriz Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoarekin eta irailaren 29ko HFP/1030/2021 Aginduaren 8. artikulu osoarekin, zeinak funtsen azken hartzailearen identifikazioa arautzen baitu. Informazio horrek eskuragarri egon behar du, irailaren 29ko HFP/1031/2021 Aginduaren 10. artikuluaren arabera, eta hori guztia Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamenduaren 22.2.d) artikulua garatzeko.

Nolanahi ere, deialdi honetan araututako dirulaguntzei Suspertze, Eraldatze eta Erresilientzia Planerako ezartzen diren jarraipena, kontrola eta ebaluazioa egin beharko zaie, eta informazioaren eta publikotasunaren arloan, kontrol-, egiaztapen-, jarraipen- eta ebaluazio-arloan eta bestela ere barne-araudiak eta Europar Batasunekoak Europar Batasuneko Suspertze eta Erresilientzia Mekanismorako ezartzen dituzten betebeharrak bete behar dituzte, nahitaez aplikatzekoak direnean.

17. artikulua.– Prestakuntza-ekintzetan parte hartuko duten pertsonen eskubideak eta betebeharrak.

1.– Prestakuntza-ekintzak doakoak dira ikasleentzat.

2.– Ikasleek aseguru-estaldura izango dute ikastaroetan eta, behar denean, enpresako prestakuntza praktikoan, bai eta haietarako egiten dituzten joan-etorrietarako; izan ere, Eusko Jaurlaritzak poliza bat sinatuko du istripuak eta erantzukizun zibila estaltzeko.

3.– Parte-hartzaileek ikastaroaren egutegia, prestakuntza-ekintzaren programa eta ikasleen eskubide eta betebeharrei buruzko dokumentua jasoko dituzte lehen eskola-egunean, eta jaso izanaren agiria sinatuko dute.

4.– Ikasleek prestakuntza-ekintzetara joan beharko dute, eta haiei etekina atera. Hori bermatzeko, entitate onuradunak eguneroko bertaratze-partea egin beharko du, eta irakasleak zein parte-hartzaileek sinatu beharko dute. Profesionaltasun-ziurtagirien kasuan, eguneroko parte hori bereiz egingo da prestakuntza-modulu bakoitzeko.

5.– Ikasleek ezingo dute ikastaro batean baja eman beste prestakuntza-ekintza bat hasteko. Ezin izango dute jarduera utzi harik eta bukatzen den arte, non eta ez duten enplegua aurkitzen eta horrek prestakuntza-ekintzara joatea eta probetxua ateratzea galarazten, edo ez zaien bat-bateko familia-egoera larriren bat sortzen (hori behar bezala justifikatu beharko da). Jarduera justifikaziorik gabeko beste arrazoiren batengatik utziz gero, gerta liteke pertsona horrek lehentasunik ez izatea etorkizuneko deialdietako prestakuntza-ekintzetan.

18. artikulua.– Ikasleak baztertzeko arrazoiak eta prozedura.

1.– Honako hauek izango dira ikasleak baztertzeko arrazoiak:

a) Justifikatu gabe hilabetean hirutan baino gehiagotan ez agertzea.

b) Prestakuntza-ekintza iraupen osoaren % 25etik gora huts egitea, arrazoia edozein dela ere, justifikatuta egon zein ez.

c) Probetxurik ez ateratzea prestakuntza-ekintzari, edo jokabide desegokia izatea, eragozten duena ekintza behar bezala egitea, barnean harturik osasun- eta higiene-arauak ere.

2.– Hau izango da ikasleak baztertzeko prozedura:

Prestakuntza-zentroak prestakuntzako teknikariari jakinaraziko dio baztertzeko arrazoietako bat gertatu dela, horretarako ezarri den eredua erabiliz. Lanbide-Euskal Enplegu Zerbitzuak arrazoi hori ikusten badu, Enplegurako Lanbide Heziketaren zuzendariak baztertze-prozedura hasteko erabakia emango du. Ikaslea baztertzeko proposamena egiteko gertaerak azalduko dira erabaki horretan, eta ikasleak bost egun baliodun izango ditu alegazioak aurkezteko. Enplegurako Lanbide Heziketaren zuzendariak gehienez hamabost eguneko epean ebatziko du prozedura. Egoerak hala eskatzen badu, baztertze-prozedurari ekiteko erabakian behin-behineko neurriak har daitezke prestakuntza-jardueraren jarraipen egokia bermatzeko. Neurri horietako bat ikaslea ikastarotik behin-behinekoz baztertzea izan daiteke, prozedura abiatzeko erabakia jakinarazten zaionetik prozedura ebazten den bitartean. Ebazpenean adieraziko da zer errekurtso aurkeztu daitekeen.

Asteren batean ikasleren baten asistentzia-faltak prestakuntza-ekintzaren ordu kopuruaren % 25 baino gehiago badira, edo justifikatu gabeko hiru asistentzia-falta baino gehiago egiten baditu hilabetean, prestakuntza-zentroak horren berri emango dio Lanbide-Euskal Enplegu Zerbitzuko Enplegurako Lanbide Heziketaren Zuzendaritzari, ikaslea baztertzeko prozedura has dezan. Modulu oso bat geratzen bada egiteko, eta % 25etik gora huts egitea arrazoi justifikatu batengatik gertatu bada (adibidez, gaixotzea edo lanean hastea), pertsona horrek geratzen den modulua egiteko aukera izatea aztertu ahal izango da.

Ikasleren batek prestakuntza-ekintzara joateari uzten badio eta asistentzia-falten % 25 hori gainditzen baldin badu, zentroak horren berri emango dio Lanbide-Euskal Enplegu Zerbitzuari, eta ofizioz emango zaio baja, baztertze-prozedura erabili beharrik gabe.

Prestakuntza-jarduera batetik kanporatzeak edo bajak ibilbideko parte-hartzaileen taldetik baztertzea ekarriko du ondorioz.

19. artikulua.– Prestakuntza-ekintzen ebaluazioa.

Lanbide-Euskal Enplegu Zerbitzuak deialdi honen kalitatea ebaluatuko du, kontuan hartuta ikasleek berek betetako galdetegietatik lortutako batez besteko emaitzak, hala xedatzen baita Estatuko Enplegu Zerbitzu Publikoaren 2009ko apirilaren 27ko Ebazpenean (2009ko ekainaren 11ko BOE), enplegurako prestakuntza-ekintzen kalitatea ebaluatzeko galdetegiak argitaratzen dituen ebazpenean.

Galdetegi horiek telematikoki beteko dituzte ikasleek. Ikastaroa ematen duen entitatearen ardura da ziurtatzea ekintza amaitu duten ikasleek kalitateari buruzko galdetegia betetzen dutela; horretarako, behar diren baliabideak jarriko ditu parte-hartzaileen eskura, diruz lagundutako ikastaroa amaitzen duten ikasleei galdetegi telematikoa betetzen laguntzeko.

20. artikulua.– Dirulaguntza ordaintzea.

1.– Emandako dirulaguntza bi partetan ordainduko da, haiek eskatu eta gero, honela:

a) Lehen ordainketa (proiektuari dagokion dirulaguntza osoaren % 60), lehen jarduera hasi dela jakinarazi ostean. Ez da bermerik eratu beharko Lanbide-Euskal Enplegu Zerbitzuaren alde.

b) Bigarren ordainketa, emandako dirulaguntzaren gainerakoari dagokiona, diruz lagundutako jarduerak amaitu eta justifikatu ondoren.

2.– Administrazioak laguntzak ordaindu ahal izan ditzan, entitate onuradunak Eusko Jaurlaritzako Ekonomia eta Ogasun Sailaren Kontrol Ekonomikoko Bulegoaren Hirugarrenen Erregistroan inskribatuta behar du.

Entitatea erregistratuta ez badago edo Ekonomia eta Ogasun Sailaren Hirugarrenen Erregistroan dauden banku-datuak aldatu nahi baditu, helbide honetan adierazitako urratsak egin beharko ditu: https://www.euskadi.eus/hirugarrenak

21. artikulua.– Dirulaguntza justifikatzea.

Agindu honetan araututako laguntzak emateko egintzan ezarritako baldintzak bete direla eta aurreikusitako helburuak lortu direla justifikatzeko, Dirulaguntzen Araubidea Erregulatzeko 20/2023 Lege Orokorrean eta hura garatzen duen araudian ezarritako prozedurak erabiliko dira, eta abenduaren 30eko 36/2020 Errege Lege Dekretuaren 63. artikuluan aurreikusitako neurri bereziak aplikatuko dira, eta, hala badagokio, Europar Batasuneko araudi aplikagarria.

1.– Entitate onuradunak, bi hilabeteko epean, «Landa- eta hiri-inguruneetako emakumeei laguntzeko programaren» esparruko jarduerak amaitzen direnetik, diruz lagundutako jarduerak egin izanaren justifikazioa aurkeztu behar du, eta izandako gastuena, modulu bidezko erregimenaren bidez, Dirulaguntzei buruzko Lege Orokorraren Erregelamenduaren 69. artikuluan eta 76. artikulutik 79.era ezarritakoarekin bat.

Justifikazio horretan, jasotako dirulaguntzaren bidez betetako mugarriak eta helburuak justifikatzeko dokumentazio hau aurkeztu behar du entitate onuradunak, horretarako ezarri diren egiaztatze-mekanismoekin bat:

a) Dirulaguntza ematean ezarri ziren baldintzak bete ote diren justifikatzen duen memoria, egindako jarduerak eta lortutako emaitzak adierazten dituena. Memoriak honako hauek jasoko ditu:

1) Zerbitzatuaren izaera lortu duten parte-hartzaileen banakako ibilbidearen ziurtapena, hauek adierazten dituena: ibilbidea osatzen duten jarduerak; noiz egin diren; konpetentzia eta enplegu berdeak lortzea helburu izan ote duten; konpetentzia eta enplegu digitalak lortzea helburu izan ote duten; zer udalerritan egin diren; zerbitzatutzat zenbat parte-hartzaile jo diren; konpetentzia eta enplegu berdeak lortzeko prestakuntzako parte-hartzaileen kopurua eta ehunekoa; eta konpetentzia eta enplegu digitalak lortzeko prestakuntzako parte-hartzaileen kopurua eta ehunekoa.

2) Formalizatutako kontratuak egiaztatzeko eta langile autonomo gisa edo norberaren kontura jarduten hasi diren eta laneratuen izaera lortu duten parte-hartzaileen kopurua egiaztatzeko ziurtagiria, honako hauek zehaztuta: laneratutako parte-hartzaileen kopurua eta ehunekoa, eta, lortutako enplegu guztien artean, enplegu berdeen kopurua eta ehunekoa eta enplegu digitalen kopuru eta ehunekoa.

b) Memoria ekonomikoa, egindako jardueren kostua justifikatzeko, lortutako emaitzen arabera. Alderdi hauek jasoko ditu, gutxienez:

1) Onuradunaren egiaztapena edo adierazpena, modulutzat jotzen diren unitate fisikoen kopuruari buruzkoa, 5. artikuluan aurreikusitakoarekin bat, horretarako datu hauek adierazita:

Zerbitzua hartutakotzat jotzen diren parte-hartzaileen kopurua, 3.5 artikuluan zehaztutakoaren arabera.

Zerbitzua hartu eta besteren konturako laneratuen izaera lortu duten parte-hartzaileen kopurua eta ehunekoa, 3.6 artikuluan ezarritakoaren arabera.

Zerbitzua hartu eta norberaren konturako laneratuen izaera lortu duten parte-hartzaileen kopurua eta ehunekoa, 3.6 artikuluan ezarritakoaren arabera.

Era berean, honako hauek adieraziko dira:

Konpetentzia eta enplegu berdeak lortzea helburu duen banakako ibilbideko parte-hartzaileen kopurua eta ehunekoa.

Konpetentzia eta enplegu digitalak lortzea helburu duen banakako ibilbideko parte-hartzaileen kopurua eta ehunekoa.

2) Jarduketa-memorian kuantifikatutako jarduerak eta 5. artikuluan ezarritako moduluak oinarritzat hartuta kalkulatutako dirulaguntza justifikatuaren zenbateko osoa, artikulu horretan ezarritako modulu bidezko kalkulatzeko eta kuantifikatzeko sistemaren arabera. Dirulaguntzaren likidazioa zerbitzua hartutakotzat jotzen diren parte-hartzaileen arabera egingo da, baita laneratutzat jotzen direnen arabera ere. Likidazioak ez du inola ere gaindituko hasieran emandako dirulaguntzaren zenbatekoa. Kalkuluak egiteko, aintzat hartuko da, batetik, zerbitzatutzat jotako parte-hartzaileen kopurua, dagokion modulu ekonomikoarekin biderkatuta, eta, bestetik, norberaren edo besteren kontura laneratutzat jotakoen kopurua, kasuan-kasuan dagokion modulu ekonomikoarekin biderkatuta.

3) Beste sarrera edo dirulaguntza batzuen xehetasunak, diruz lagundutako jarduera finantzatzeko erabili badira, zenbatekoa eta jatorria adierazita, eta, hala badagokio, justifikatutako zenbatekoaren eta aurrerakin gisa jasotakoaren arteko aldeari dagokion zenbatekoa sartu izanaren egiaztagiria.

Entitate onuradunek frogagiriak eta finantzaketari dagokion gainerako dokumentazioa bost urtez gorde beharko dituzte, eragiketa egiten denetik aurrera, edo, bestela, dirulaguntzaren zenbatekoa 60.000 eurotik beherakoa bada, hiru urtez. Formatu elektronikoan gorde beharko dira, eta Europako Parlamentuaren eta Kontseiluaren uztailaren 18ko (EB, Euratom) 2018/1046 Erregelamendu edo «Finantza Erregelamenduaren» 132. artikuluan ezarritakoa bete beharko dute gordetzeko.

2.– Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuko 23.3.d) artikuluan xedatutakoa betez, entitate onuradunen titularrei eta haien plantillari buruzko informazioa emango da dirulaguntzak ematean ezarritako betebeharrak betetzen direla egiaztatzen duten memorietan, sexuaren arabera banakatuta.

22. artikulua.– Dirulaguntza emateko ebazpena aldatzea.

Inola ere ezin izango da aldatu dirulaguntzaren erabilera edo xedea, ez eta emandako laguntzarekin lortu nahi diren helburuak ere, eta ezin izango da aldatu dirulaguntzaren xede den jarduera, jarduketa edo jokabidea, ezta emakida-ebazpenean agertzen den eta lortu den dirulaguntzaren zenbatekoa handitu ere. Onuradunak proposatu edo eskaini dituen eta dirulaguntza emateko balio izan duten alderdiak ere ezin izango dira aldatu.

Luza daiteke proiektua gauzatzeko epea, horretarako arrazoiak egonez gero, eta horrek ez badio eragiten suspertze-planean proiektu honi jarritako helburuak betetzeari, ez eta hirugarrenen eskubideei ere.

23. artikulua.– Dirulaguntzak itzultzea.

1.– Ezin izango da eskatu dirulaguntza ordaintzeko, eta, kasu batzuetan, jasotako kopuru osoak edo horien zati bat itzuli beharko dira eta dirulaguntza ordaindu den unetik aurrera aplikatzekoak diren berandutze-interesak eskatuko dira, Dirulaguntzei buruzko azaroaren 17ko 38/2003 Lege Orokorraren 37. artikuluan eta Dirulaguntzen Araubidea Erregulatzeko abenduaren 21eko 20/2023 Legearen 36. artikuluan aurreikusten diren kasuetan eta deialdi honetan berariaz aurreikusten diren kasuetan.

Eta, bereziki, kasu hauetan:

a) Jarduera egin izana eta laguntza emateko edo baliatzeko baldintzak eta betekizunak bete izana justifikatzeko betebeharra ez betetzea.

b) Dirulaguntza lortzea horretarako eskatutako baldintzak bete gabe.

c) Jarraipen- eta kontrol-jarduketak ukatzea edo oztopatzea.

d) Diruz lagundutako ekintzak gauzatzeko baldintzei buruz datu faltsuak ematea, errealitatearekin bat ez datozenak.

e) Deialdi honen 16. artikuluan jasotako komunikazio- eta hedapen-betebeharrak ez betetzea.

f) Deialdi honetan ezarritako beste edozein betebehar, baldintza eta betekizun ez betetzea eta, bereziki, egin beharreko jarduketak eta haien ondoriozko kostu justifikatuak neurri batean ez egitea. Hartutako laneratze-konpromisoaren ehuneko 25 baino txikiagoa bada laneratzea, dena itzuli beharko da, eta laguntza emateko ebazpenean eskatutako laneratze-ehunekoaren eta ehuneko 25aren artean badago, ez-betetzearen ehunekoaren proportzioan itzuli beharko da laguntza.

g) DNSH printzipioa betetzen ez bada, onuradunak ordura arte jasotako zenbatekoak itzuli beharko ditu, abenduaren 17ko 698/1991 Dekretuan ezarritako moduan. Dekretu horren bidez, Euskal Autonomia Erkidegoko Aurrekontu Orokorren kargura ematen diren laguntzen bermeen eta itzulketen araubide orokorra arautzen da, eta kudeaketan parte hartzen duten entitate laguntzaileen baldintzak, araubidea eta obligazioak ezartzen dira.

Jasotako zenbatekoak itzuli behar dira, halaber, mugarriak, helburuak edo egutegia betetzen ez direnean, interes-gatazken adierazpenak izaten direnean edo SEEP-NextGenerationEU arautegiarekin lotutako beste edozein alderdi betetzen ez denean, 2024ko Euskal Autonomia Erkidegoko Aurrekontu Orokorren abenduaren 22ko 21/2023 Legean eta Administrazio Publikoa modernizatzeko eta Suspertze, Eraldatze eta Erresilientzia Plana gauzatzeko premiazko neurriak onartzen dituen abenduaren 30eko 36/2020 Errege Lege Dekretuaren 37.4 artikuluan aurreikusitakoaren arabera. Europako Parlamentuaren eta Kontseiluaren 2021eko otsailaren 12ko (EB) 2021/241 Erregelamendua ere kontuan hartu behar da, Suspertze eta Erresilientzia Mekanismoa ezartzen duena.

2.– Dirulaguntzak itzultzeko prozedurak bat etorri beharko du Dirulaguntzen Araubidea Erregulatzeko abenduaren 21eko 20/2023 Legearekin eta hura garatzeko araudiarekin.

3.– Lanbide-Euskal Enplegu Zerbitzuko Enplegurako Lanbide Heziketaren zuzendariak abiaraziko du laguntza itzultzeko prozedura, eta laguntzaren entitate onuradunari jakinaraziko dio eta ez-betetzea eragin duen gertaeraren edo gertaeren berri emango. Hori ez ezik, egokitzat jotako alegazioak edo egiaztagiriak aurkezteko hamabost eguneko epea duela ere jakinaraziko dio.

4.– Alegazioak aurkeztu ondoren edo alegazio horiek aurkezteko epea igaro ondoren, Lanbide-Euskal Enplegu Zerbitzuko Enplegurako Lanbide Heziketaren zuzendariak ebazpena emango du.

Laguntzak itzultzeko prozedura gehienez hamabi hilabeteko epean ebatzi beharko da.

5.– Ebazpenean, ez-betetzeren bat izan dela iritziz gero, dirulaguntza jasotzeko eskubidea galdutzat emango da, eta, hala badagokio, dagozkion diru kopuruak itzuli beharko dizkio onuradunak Euskal Autonomia Erkidegoko Diruzaintza Nagusiari, ebazpena jakinarazten denetik bi hilabete igaro baino lehen. Epe hori borondatezko epea izango da.

Itzuli beharrekoa borondatezko epean itzultzen ez bada, premiamendu bidez berreskuratzeko izapideak hasiko dira.

24. artikulua.– Datuak babesteari buruzko informazioa.

Datu pertsonalen babesaren arloan, Lanbide-Euskal Enplegu Zerbitzuak bi araudi hauen arabera jokatuko du: Datuak Babesteko Erregelamendu Orokorra (EB 2016/679 Erregelamendua) eta Datu Pertsonalak Babesteko eta Eskubide Digitalak Bermatzeko 3/2018 Lege Organikoa. Lortzen diren datu pertsonalak «Enplegurako eta enpleguko prestakuntzarako dirulaguntzak» izeneko tratamendu-jardueraren barruan egongo dira. Jarduera horren arduraduna Lanbide-Euskal Enplegu Zerbitzua da, eta jardueraren helburua da Lanbideren eskumeneko enplegu-politika aktiboekin zerikusia duten dirulaguntzak kudeatu eta kontrolatzea, bai eta iruzurrari jazartzea eta datuak estatistiketan erabiltzea ere. Biltzen diren datuak beharrezkoak dira Lanbide-Euskal Enplegu Zerbitzuari emandako botere publikoak gauzatzeko eta lege-betebeharrak betetzeko, eta arlo horretan eskumena duten administrazio publikoei komunikatu ahal izango zaizkie.

Datuen titularrek datuak irispidean izateko, zuzentzeko eta ezerezteko eta informazioaren tratamendua mugatzeko eta tratamenduaren aurka egiteko eskubideak erabili ahal izango dituzte tratamenduaren arduradunaren aurrean, datuen babesaren arloko eskubideak baliatzeko prozeduraren bidez. Prozedura hori www.euskadi.eus/servicios/10842/ helbidean argitaratu da.

Datuen babesari buruzko informazio osagarri eta zehatza kontsultatzeko: https://www.euskadi.eus/informazio-klausulak/web01-sedepd/eu/gardentasuna/074300-capa2-eu.shtml

25. artikulua.– Aplikatu beharreko araudia.

1.– Deialdi honetan aurreikusitako dirulaguntzei hauek aplikatuko zaizkie: batetik, urriaren 11ko TES/1121/2021 Aginduan xedatutakoa (agindu horren bidez, oinarriak ezartzen dira «Landa- eta hiri-inguruneetako emakumeei laguntzeko Programa» finantzatzeko dirulaguntza publikoak emateko, Suspertze, Eraldatze eta Erresilientzia Planaren markoan), eta, bestetik, dirulaguntzen legedi orokorra, hau da, Dirulaguntzei buruzko 38/2003 Lege Orokorra, eta hori garatzen duen erregelamendua, uztailaren 21eko 887/2006 Errege Dekretuaren bidez onetsitakoa, non oinarrizko legegintza osatzen duten Dirulaguntzen Araubidea Erregulatzeko abenduaren 21eko 20/2023 Legeak eta 698/1991 Dekretuak (698/1991 Dekretua, abenduaren 17koa, Euskal Autonomia Erkidegoaren Aurrekontu Orokorren pentzudan ematen diren dirulaguntzen bermeei eta horiek itzultzeari buruzko erregimen orokorra arautzen duena eta horien kudeaketan parte hartzen duten entitate laguntzaileek bete beharreko baldintzak, erregimena eta eginbeharrak ezartzen dituena).

2.– Laguntza hauek, Suspertze eta Erresilientzia Mekanismoak finantzatzen dituenez, arau hauetan xedatutakoa ere bete behar dute:

EB 2021/241 Erregelamendua, Europako Parlamentuarena eta Kontseiluarena, 2021eko otsailaren 12koa, Suspertze eta Erresilientzia Mekanismoa ezartzen duena.

36/2020 Errege Lege Dekretua, abenduaren 30ekoa, zeinaren bidez presako neurriak onesten baitira Administrazio Publikoa modernizatzeko eta Suspertze, Eraldatze eta Erresilientzia Plana gauzatzeko.

HFP/1030/2021 Agindua, irailaren 29koa, Suspertze, Eraldatze eta Erresilientzia Plana kudeatzeko sistema eratzen duena.

TES/897/2021 Agindua, abuztuaren 19koa, zeinaren bidez Suspertze eta Erresilientzia Mekanismoarekin finantzatutako kredituak lurraldeka banatzen baitira, 2021eko ekitaldi ekonomikorako, lan-arloan eskumenak dauzkaten autonomia-erkidegoek kudea ditzaten; kreditu horiek Suspertze, Eraldatze eta Erresilientzia Planeko «Konpetentzia Digitalen Plan Nazionala» eta «Lan-merkatua dinamikoa, erresilientea eta inklusiboa izateko politika publiko berriak» inbertsio-proiektuak gauzatzeko dira.

HFP/1031/2021 Agindua, irailaren 29koa, Estatuko, autonomia-erkidegoetako eta tokiko sektore publikoko entitateek informazioa emateko prozedura eta formatua ezartzen dituena Suspertze, Transformazio eta Erresilientzia Planaren ataletako neurrien mugarri eta helburuak zenbateraino betetzen diren jakiteko jarraipena egiteko eta neurrion aurrekontu- eta kontabilitatea-betearazpenaren jarraipena egiteko.

21/2023 Legearen II. tituluaren V. kapitulua (21/2023 Legea, abenduaren 22koa, Euskal Autonomia Erkidegoko 2024. urteko Aurrekontu Orokorrak onartzen dituena).

698/1991 Dekretua, abenduaren 17koa, Euskal Autonomia Erkidegoko Aurrekontu Orokorren pentzudan ematen diren dirulaguntzen bermeei eta horiek itzultzeari buruzko erregimen orokorra arautzen duena eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak ezartzen dituena.

HFP/55/2023 Agindua, urtarrilaren 24koa, Suspertze, Eraldatze eta Erresilientzia Plana betearazten duten prozeduretako interes-gatazken arriskuaren analisi sistematikoari buruzkoa.

3.– Era berean, hauek aplikatuko zaizkie enplegurako lanbide-heziketako prestakuntza-ekintzak diren jarduketa diruz lagunduei: 30/2015 Legea, irailaren 9koa, Lan-arloko enplegurako lanbide-heziketaren sistema arautzen duena; 3/2022 Lege Organikoa, martxoaren 31koa, Lanbide Heziketa Antolatu eta Integratzekoa; 659/2023 Errege Dekretua, uztailaren 18koa, Lanbide Heziketako Sistemaren Antolamendua garatzen duena; 694/2017 Errege Dekretua, uztailaren 3koa, zeinaren bitartez 30/2015 Legea garatzen baita, irailaren 9koa, Lan-arloko enplegurako lanbide-heziketaren sistema arautzen duena Lanbide Heziketa Antolatu eta Integratzeko martxoaren 31ko 3/2022 Lege Organikoaren kontra ez doan guztian; eta TMS/368/2019 Agindua, martxoaren 28koa, zeinaren bidez uztailaren 3ko 694/2017 Errege Dekretua garatzen baita, irailaren 9ko 30/2015 Legea garatzen duena. Profesionaltasun-ziurtagiriak lortzeko prestakuntza-ekintzei 659/2023 Errege Dekretuan xedatutakoa aplikatuko zaie (659/2023 Errege Dekretua, uztailaren 18koa, Lanbide Heziketako Sistemaren Antolamendua garatzen duena).

4.– Hauek ere aplikatuko dira:

Gobernu Kontseiluaren Erabakia, 2022ko otsailaren 8koa, Suspertze, Eraldatze eta Erresilientzia Planari lotutako jardueren eta proiektuen aurrekontu- eta kontabilitate-betearazpenari, kudeaketari eta jarraipenari buruzkoa, zeina argitara eman baitzen Jaurlaritzaren Idazkaritzako eta Legebiltzarrarekiko Harremanetarako zuzendariaren martxoaren 1eko 30/2022 Ebazpenaren bidez (2022ko martxoaren 4ko EHAA, 46. zk.).

Gobernu Kontseiluaren Erabakia, 2022ko martxoaren 29koa, Suspertze, Eraldatze eta Erresilientzia Plana egikaritzeko eskatzen diren iruzurraren aurkako borrokari, interes-gatazkei, finantzaketa bikoitzari eta estatu-laguntzei buruzko betekizunak eta ingurumenari kalte nabarmenik ez egitekoak betetzeko neurrien plana onartzen duena; Jaurlaritzaren Idazkaritzako eta Legebiltzarrarekiko Harremanetarako zuzendariak erabaki hori argitaratzeko emandako apirilaren 6ko 40/2022 Ebazpenaren bidez argitaratu zen plan hori (2022ko apirilaren 13ko EHAA, 74. zk.).

5.– Era berean, entitate onuradunek nahitaez bete beharko dituzte laguntza ematen duen administrazioak eta Estatuko eta Europako gainerako agintari eskudunek xede horretarako ezarritako arauak, bai eta aipatutako finantzaketa-iturrien arabera laguntza hauen onuradun izateagatik ezarritako betebehar guztiak ere.

26. artikulua.– Iruzurra, ustelkeria eta interes-gatazkak izateko arriskua prebenitzea.

Balizko onuradunak hautatzeko prozesuan edo baldintzak betetzen direla egiaztatzeko prozesuetan parte hartzen duten pertsonek adierazi behar dute osorik eta inolako erreserbarik gabe ezagutzen eta onartzen dituztela 2022ko martxoaren 29ko Gobernu Kontseiluaren Erabakiaren bidez onetsitako planaren baldintzak; alegia, Suspertze, Eraldatze eta Erresilientzia Plana egikaritzeko eskatzen diren iruzurraren aurkako borrokari, interes-gatazkei, finantzaketa bikoitzari eta estatu-laguntzei buruzko eskakizunak eta ingurumenari kalte nabarmenik ez egitekoak betetzeko neurrien planaren baldintzak. Aurreko apartatuan xedatutakoaren ondorioetarako, dirulaguntza emateko eskumena duen organoaren arduradunak, dirulaguntzaren oinarriak edo deialdia idazten dituzten langileek, eskaerak ebaluatzen dituzten aditu eta batzordekideek, baita jarduera horietan Administrazioari laguntza eta aholkularitza ematen dioten entitate pribatuetako pertsona fisiko guztiek ere, iruzurraren aurkako neurrien plana ezagutu eta onartu behar dute.

Urtarrilaren 24ko HFP/55/2023 Aginduan adierazitako ondorioetarako, agindu horretan ezarritako prozedurak aplikatuko dira. Gainera, agindu hori betetzeko, dirulaguntzak emateko organo eskudunak eta eskaerak aztertzeko kide anitzeko organoetako kideek interes-gatazkarik ezaren adierazpena sinatu behar dute, agindu horretan bereziki arautua eta III. eranskinari atxikia, eskabideak aztertzeko eta erabakia hartzeko fasean. Eragiketaren arduradunak, gainera, HFP/55/2023 Aginduaren 4. artikuluan xedatutakoaren arabera bete behar du interes-gatazka izan daitekeena egiaztatzeko prozesua. Prozesu horretan bandera beltz bat edo batzuk detektatzen badira, HFP/55/2023 Aginduaren 7. artikuluan xedatutako prozedurari jarraitu behar diote. Horretarako, eskatzaileei benetako titulartasunari buruzko informazioa bost egun baliodun igaro baino lehen aurkezteko eskatu behar diete, eta, epe horretan aurkeztu ezean, prozeduratik kanpo utziko dituzte.

Aurreko apartatuetan aipatutako pertsonek Interes Gatazkarik Ezaren Adierazpena (IGEA) beteko dute (oinarri hauekin batera jaso da, III. eranskin gisa), hala egin behar dela ezartzen baita Europako Parlamentuaren eta Kontseiluaren 2018ko uztailaren 18ko (EB, Euratom) 2018/1046 Erregelamenduaren (Finantza Erregelamendua) 61.3 artikuluan eta Sektore Publikoaren Araubide Juridikoaren urriaren 1eko 40/2015 Legearen 23. artikuluan.

Prozeduraren batean interes-gatazkak eragiteko arriskua dakarren kasuren batean dauden agintari eta langileek ez dute esku hartuko dena delako prozedura horretan. Norbaitek uste badu interes-gatazkaren bat egon daitekeela, hierarkian gorago dagoenari jakinaraziko dio, idatziz; zerbitzu juridikoek txostena egingo dute, eta hartu beharreko erabakia hartuko da. Horrek ez du eragozten HFP/55/2023 Aginduan ezarritako kasu zehatzetarako ezartzen den prozedura berezia betetzea.

Kontrol Ekonomikoko Bulegoak, bere kabuz edo Estatuko Administrazioaren Kontu Hartzailetza Nagusiarekin lankidetzan arituz (III. maila), auditoria espezifikoak egin ditzake interes-gatazkak prebenitzeko, atzemateko eta zuzentzeko neurri egokirik ote dagoen ikusteko.

Interes-gatazka bat hautematen denean, kasu bakoitzean aplikatzekoak diren legezko arauen eta barne-erregelamenduen araberako neurriak hartuko dira. Era berean, interes-gatazkaren egoeraren berri eman beharko da betiere, gardentasun-printzipioa betetzeko.

(Ikus .PDF)

Azterketa dokumentala