RSS
11. zk., 2023ko urtarrilaren 17a, asteartea
- Bestelako formatuak:
- PDF (209 KB - 12 orri.)
- EPUB (115 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
AGINTARIAK ETA LANGILERIA
Oposaketak eta lehiaketak
EUSKO LEGEBILTZARRA
256
ERABAKIA, 2022ko abenduaren 20koa, Eusko Legebiltzarreko Mahaiarena, zeinaren bidez onesten baitira Eusko Legebiltzarreko Administrari Laguntzaileen Kidegoko karrerako funtzionario gisa sartuz enplegua finkatzeko hautaketa-prozesu bereziaren deialdia eta prozesu hori arautuko duten oinarri espezifikoak, Administrari Laguntzaile Elebidunen bi plaza betetzeko, oposizio-lehiaketa sistemaren bidez, bata txanda irekian eta bestea barne-promozioko txandan, biak ere sarbide orokorraren bidez.
Eusko Legebiltzarreko Mahaiaren 2022ko abenduaren 20ko erabakia betez, honako hau
AGINTZEN DUT:
Lehenengoa.– Konbokatzea Eusko Legebiltzarreko Administrari Laguntzaileen Kidegoan karrerako funtzionario gisa sartuz oposizio-lehiaketa sistemaren bidez enplegua finkatzeko hautaketa-prozesu berezia, administrari laguntzaile elebidunen bi plaza betetzeko, bata txanda irekian eta bestea barne-promozioko txandan, biak ere sarbide orokorraren bidez. Hautaketa-prozesu hau Eusko Legebiltzarreko Mahaiak 2022ko maiatzaren 31n hartutako erabakiaren ondoriozkoa da, zeinaren bidez onesten baita Eusko Legebiltzarreko lanpostuak aldi baterako betetzen ari diren langileak egonkortzeko 2022ko enplegu publikoaren eskaintza, Langileen estatutuaren eta Legebiltzarreko Administrazioaren araubide juridikoaren seigarren xedapen gehigarrian aurreikusita dauden enplegua finkatzeko prozesu berezien eta salbuespenezkoen baitan.
Bigarrena.– Onestea eta argitaratzea erabaki honen eranskinean agertzen diren oinarri espezifikoak.
Oinarriak Eusko Legebiltzarraren webgunean daude eskuragarri.
Eskabideak aurkezteko epea Eusko Legebiltzarreko Mahaiaren erabaki bidez zehaztuko da, eta Euskal Herriko Agintaritzaren Aldizkarian eta Eusko Legebiltzarraren Aldizkari Ofizialean argitaratuko da.
Eusko Legebiltzarreko Mahaiaren 2022ko abenduaren 20ko erabaki honen aurka aukerako berraztertzeko errekurtsoa jarri ahal izango da, organo horretan bertan, hilabeteko epean, erabakia Eusko Legebiltzarraren Aldizkari Ofizialean argitaratu eta hurrengo egunetik kontatzen hasita, edo zuzenean administrazioarekiko auzi-errekurtsoa jarri ahal izango da Euskal Autonomia Erkidegoko Justizia Auzitegi Nagusian, bi hilabeteko epean, erabakia Eusko Legebiltzarraren Aldizkari Ofizialean argitaratu eta hurrengo egunetik kontatzen hasita.
Vitoria-Gasteiz, 2022ko abenduaren 20a.
Eusko Legebiltzarreko lehendakaria,
BAKARTXO TEJERIA OTERMIN.
ERANSKINA
OINARRI ESPEZIFIKOAK, EUSKO LEGEBILTZARREKO ADMINISTRARI LAGUNTZAILEEN KIDEGOKO KARRERAKO FUNTZIONARIO GISA SARTZEKO OPOSIZIO-LEHIAKETA SISTEMAREN BIDEZKO HAUTAKETA-PROZESUARENAK, ADMINISTRARI LAGUNTZAILE ELEBIDUNEN BI PLAZA BETETZEKO, BATA TXANDA IREKIAN ETA BESTEA BARNE-PROMOZIOKO TXANDAN, BIAK ERE SARBIDE OROKORRAREN BIDEZ
1.– Xedea.
Oinarri hauen xedea da arauak ezartzea oposizio-lehiaketa sistemaren bidez Eusko Legebiltzarreko Administrari Laguntzaileen Kidegoko administrari laguntzaile elebidunen bi plaza betetzeko, bata txanda irekian eta bestea barne-promozioko txandan, biak ere sarbide orokorraren bidez. Honako hauek dira arauak:
1.1.– Deialdiko plazak: administrari laguntzaile elebidunen bi plaza, bata txanda irekian eta bestea barne-promozioko txandan, biak ere sarbide orokorraren bidez.
1.2.– Administrazio parlamentarioko kidegoa: Administrari Laguntzaileak.
1.3.– Betetzeko sistema: oposizio-lehiaketa.
1.4.– Eskatutako titulazioa: Derrigorrezko Bigarren Hezkuntza (DBH); Lanbide Heziketa I, eta horien baliokideak.
1.5.– Euskararen hizkuntza-eskakizuna: 3.a, nahitaezkoa.
1.6.– Lanpostuaren eginkizun nagusiak: II. eranskinean ezarritakoak.
2.– Eskabideak aurkezteko epea.
Eskabideak aurkezteko epea Eusko Legebiltzarreko Mahaiaren erabaki bidez zehaztuko da, eta Euskal Herriko Agintaritzaren Aldizkarian eta Eusko Legebiltzarraren Aldizkari Ofizialean argitaratuko da.
3.– Hautaketa-prozesuaren oinarriak.
Hautaketa-prozesuan jarraitu beharrekoak izango dira Langileen estatutuaren eta Legebiltzarreko Administrazioaren araubide juridikoaren seigarren xedapen gehigarria; Eusko Legebiltzarrean karrerako funtzionario gisa sartuz enplegua finkatzeko hautaketa-prozesuen oinarri orokorrak, Mahaiak 2022ko abenduaren 20an onetsiak eta Eusko Legebiltzarreko Aldizkari Ofizialaren 2022ko abenduaren 30eko 119. zenbakian argitaratuak, eta oinarri espezifiko hauek.
4.– Parte hartzeko eskakizunak, hautaketa-prozesuaren bilakaera eta plazaren esleipena.
4.1.– Plazarako lehiatzaileek finkatze-prozesuen oinarri orokorretako 5.1 apartatuan orokorki ezartzen diren eskakizunak bete behar dituzte.
4.2.– Eskabidea finkatze-prozesuen oinarri orokorretako 7. apartatuan xedatutakoaren arabera bete beharko da, Eusko Legebiltzarraren helbide elektronikoaren bidez (www.legebiltzarra.eus edo Herri Arduralaritzaren Euskal Erakundearen helbide elektronikoaren bidez (www.ivap.euskadi.eus), bai eta azterketa-eskubideak ordaindu ere.
Internet bidezko eskaera egin ahal izango da KZgune publikoen bidez. KZguneen zerrenda eta kokapena helbide elektroniko honetan eskura daiteke: www.kzgunea.net.
Halaber, eskaera bete ahal izango da Eusko Legebiltzarreko Antolaketa eta Giza Baliabideen Zuzendaritzaren bulegoetan, Becerro de Bengoa z.g. kalean, Vitoria-Gasteizen (eraikin administratiboan), astelehenetik ostiralera, 09:00ak eta 13:00ak bitartean.
4.3.– Administrari Laguntzaileen Kidegorako azterketa-eskubideen zenbatekoa 10 euro da.
Ordainketa egin ahal izango da oinarri orokorretako 7. apartatuan aurreikusitako moduan.
4.4.– Hautaketa-prozesua eta plazaren esleipena arestian aipatutako oinarri orokorretako aginduen arabera egingo dira, eta, orobat, lehiaketa- eta oposizio-aldien ebaluazioari buruz oinarri espezifiko hauetan aurreikusitako arauen arabera.
4.5.– Antolaketa eta Giza Baliabideen Zuzendaritzak lan-poltsa bat sortuko du, norekin eta, hautaketa-prozesuan plazarik lortu ez, baina hautaketa-prozesua gainditu dutenekin.
5.– Epaimahaia.
Eusko Legebiltzarreko Mahaiak izendatuko ditu kalifikazio-epaimahaiko kideak, oinarri orokorretako 9. apartatuan xedatutakoaren arabera.
Nolanahi ere, hauek izango dira epaimahaiko kideak:
– Epaimahaiburua, Mahaiak bere kideen artean aukeratua.
– Legelari nagusia edo hark eskuordetzen duen pertsona.
– Konbokatutako plazari dagokion kidegoko pertsona bat. Pertsona hori langileen ordezkaritza-organoak proposatuko du, kidego horretako langileen artetik.
6.– Euskararen hizkuntza-eskakizuna egiaztatzea.
Euskararen hizkuntza-eskakizuna egiaztatzeko, Euskara Tituluen eta Ziurtagirien Erregistro Bateratua (ETZEB) kontsultatuko da. Egiaztatutzat joko dira aipatutako erregistroan inskribatuta dauden eta deialdi bakoitzeko oinarri espezifikoetan ondorio horietarako ezartzen dena baino lehenagoko egiaztatze-data duten hizkuntza-eskakizunak.
Aipatutako erregistroan jasota ez dauden euskararen jakite-mailari buruzko ziurtagiriak edo tituluak dituztenek horiek egiaztatzen dituzten agiriak aurkeztu beharko dituzte, deialdi bakoitzaren oinarri espezifikoetan hizkuntza-eskakizunak egiaztatzeko ezartzen den eguna baino lehen.
Administrazio parlamentarioaren hizkuntza-eskakizunen ziurtagiri eta titulu baliokideak bi dekretu hauen arabera zehaztuko dira: 297/2010 Dekretua, azaroaren 9koa, euskararen jakite-maila egiaztatzen duten tituluak eta ziurtagiriak baliokidetu, eta Hizkuntzen Europako Erreferentzia Marko Bateratuko mailekin parekatzeko dena, eta 47/2012 Dekretua, apirilaren 3koa, euskaraz egindako ikasketa ofizialak aintzat hartzeko eta euskara-maila hizkuntza-tituluen eta ziurtagirien bidez egiaztatzetik salbuesteko dena.
7.– Oposizio-aldiko ariketei buruzko arauak.
Oposizio-aldia.
Probak saio berean egingo dira, eta deialdi bakarrean.
Bi proba izango dira, biak ere lau erantzun-aukera dituzten galdetegiak. Erantzun okerrek penalizazioa izango dute: erantzun zuzen baten balioaren herena kenduko zaie. Galderak I. eranskinean erantsitako gai-zerrendari buruzkoak izango dira.
Lehenengo proba A gai-zerrendari buruzkoa izango da (zati orokorra). Bigarren proba, berriz, B gai-zerrendan oinarrituko da (zati espezifikoa), eta konbokatzen diren lanpostuen eginkizunekin izango du zerikusia. Eginkizunok II. eranskinean daude jasota.
Galdetegiek 60 puntu izango dituzte gehienez (30 puntu lehenengo probak, eta 30 puntu bigarren probak).
Barne-promozioko txandan aurkezten direnak salbuetsita egongo dira lehenengo proba egitetik, eta, hala badagokio, bigarren probak balio bikoitza izango du, hots, gehienez ere 60 puntu.
Izangaiek lortutako puntuazioa erantzun zuzenen kopurua izango da, behin erantzun okerren kenketa eginda, goian azaldutako proportzioan.
Epaimahaiak, dagokion erabakia hartuta, zuzentzat jotako erantzunak argitaratuko ditu Eusko Legebiltzarraren helbide elektronikoan (www.legebiltzarra.eus eta Herri Arduralaritzaren Euskal Erakundearenean (www.ivap.euskadi.eus).
Epaimahaiak, kontuan hartuta eska daitekeen gutxieneko maila eta aurkeztu direnen ezagutza-maila, erabakiko du, betiere izangaien nortasuna jakin aurretik, zein den oposizio-aldia gainditzeko gutxieneko puntuazioa, eta jakitera emango du hartutako erabakia.
8.– Lehiaketa-aldiaren ebaluazioari buruzko arauak.
Lehiaketa-aldia: 40 puntu.
Merezimenduak justifikatzeko agiriak aurkezteko 10 egun balioduneko epea ireki ondoren egingo da. Merezimenduak alegatu eta egiaztatuko dira finkatze-prozesuen oinarri orokorretako 11. apartatuan xedatutakoaren arabera.
Alegatutako merezimenduak eskabideak aurkezteko epea amaitzen den egunerako eduki beharko dira, informatika, ofimatika eta hizkuntzak izan ezik, zeinak merezimenduak aurkezteko azken egunean eduki beharko baitira.
Hauek izango dira epaimahaiak baloratu beharreko merezimenduak:
8.1.– Lortu nahi den postuaren eginkizunak egin diren lanpostuetan benetan aritzeagatik lortutako esperientzia.
Esperientziatzat hartzen dira Administrazio publikoan, erakunde autonomoetan edo zuzenbide pribatuko erakunde publikoetan administrari laguntzaileen kidegoko edo kidego edo lanbide-talde baliokideetako lanpostuetan emandako zerbitzuak.
Esperientzia horregatik gehienez ere 31 puntu emango dira.
Zenbaketa egiteko, batu egingo dira azken 100 hilabeteetan lan egindako aldiak, eskatutako baldintzak betetzen dituztenak, eta, behin batuketa hori eginda, ez dira aintzat hartuko hilabetetik beherako zatiak. Ondorio horietarako, 30 eguneko multzoa joko da hilabetetzat.
Erabat ezinbestekoa izango da aurkeztea erakundearen ziurtagiri bat, non azalduko den postuaren izena eta egindako lan zehatzak, eta, orobat, lan horien iraupena. Era horretan, epaimahaiak egiaztatu ahal izango du baloratu beharreko funtzioetan benetan aritu izana.
Zerbitzuak Eusko Legebiltzarrean eman dituzten lehiatzaileek ez dute ziurtagiri hori aurkeztu beharko.
Balorazioa baremo honen arabera egingo da:
a) Esperientzia orokorra.
Esperientzia orokortzat jotzen dira edozein Administrazio publikotan emandako zerbitzuak, baita Eusko Legebiltzarreko Administrazioan emandakoak ere.
Esperientzia horregatik gehienez ere 5 puntu emango dira, 0,05 puntu lan egindako hilabete bakoitzeko.
b) Esperientzia espezifikoa.
Esperientzia orokorraren baloraziotik bereiz baloratuko da, modu espezifiko eta osagarrian, esperientzia espezifikoa, hau da, Eusko Legebiltzarrean emandako zerbitzuak. Esperientzia horregatik gehienez ere 26 puntu emango dira, 0,26 puntu lan egindako hilabete bakoitzeko.
8.2.– Titulazioak; probak gainditzea karrerako funtzionario izateko prozeduretan, eta lan-poltsetan egotea.
Gehienez ere 6 puntu emango dira honako merezimendu hauengatik:
8.2.1.– Titulazioak, gehienez ere 5 puntu.
– 5 puntu titulu bakoitzeko, gehienez ere 5 puntu, titulu hauengatik edo haien baliokideengatik:
• Merkataritza-jardueretako teknikaria.
• Administrazio-kudeaketako teknikaria.
• Mikroinformatika-sistemetako eta sareetako teknikaria.
– 2,5 puntu titulu bakoitzeko, gehienez ere 5 puntu, titulu hauengatik edo haien baliokideengatik:
• Lanbide-heziketako bestelako teknikari-tituluak edo haien baliokideak.
• Batxiler-titulua.
8.2.2.– Eusko Legebiltzarreko administrari laguntzaile elebidunen lanpostuetan Administrari Laguntzaileen Kidegoko karrerako funtzionario izateko prozeduretan probak gainditzeagatik, gehienez ere 5 puntu emango dira:
– Oposizio-aldia gainditzea: 5 puntu.
– Oposizio-aldiko lehen ariketa gainditzea: 2,5 puntu, eta hori da azpiatal honetan lor daitekeen gehieneko puntuazioa.
8.2.3.– Eusko Legebiltzarreko Administrari Laguntzaileen Kidegoko administrari laguntzaile elebidunen lanpostuetarako lan-poltsetan egoteagatik, 2,5 puntu emango dira, eta hori da azpiatal honetan lor daitekeen gehieneko puntuazioa.
8.3.– Informatikako ezagutzak.
Informatikako ezagutzengatik gehienez ere 2 puntu emango dira, 0,29 puntu ziurtagiri hauetako bakoitzeko:
– Microsoft Outlook 2010, maila bakarra.
– Microsoft PowerPoint 2010, maila bakarra.
– Microsoft Word 2010, maila aurreratua.
– Microsoft Excel 2010, maila aurreratua.
– Microsoft Access 2010, maila bakarra.
– Internet aurreratua.
– Windows 7.
IT Txartela egiaztatze-sistema erabiliko da moduluak gainditu direla egiaztatzeko, oinarri orokorretan adierazi denaren arabera.
Lehiatzaileek ez dute frogagiririk aurkeztu beharko; izan ere, Eusko Legebiltzarrak zuzenean egiaztatuko du, Tecnalia Research & Innovation Fundazioaren bitartez, txartel horiek dituztela eta zein egunetan lortu dituzten.
Txartel horiek lortzeko, horretarako egindako proba bat gainditu behar da Tecnalia Research & Innovation Fundazioak egiaztatu eta ebaluatutako zentroetan.
8.4.– Hizkuntzak.
Gehienez ere 1 puntu, honako baremo honen arabera:
Ingelesa, frantsesa eta alemana jakiteagatik, honako puntu hauek:
C1 edo baliokidea edo goragokoa: 0,5 puntu.
B2 edo baliokidea: 0,375 puntu.
B1 edo baliokidea: 0,25 puntu.
Horretarako, titulu eta ziurtagiri hauek bakarrik hartuko dira aintzat: Euskal Autonomia Erkidegoko Administrazio Orokorreko eta haren erakunde autonomoetako lanpostuen hautatze- eta hornitze-prozesuetarako hizkuntza-titulu eta -ziurtagirien baliokidetasuna ezartzeko ekainaren 30eko 117/2015 Dekretuaren «Hizkuntzetarako Europako Erreferentzia Esparru Bateratuaren mailen baliokide diren titulu eta ziurtagiriak» eranskinean agertzen direnak.
Hizkuntza beraren maila bat baino gehiagoren ziurtagiria izanez gero, maila altuenekoa bakarrik baloratuko da.
9.– Azken kalifikazioa, eta berdinketa hausteko irizpideak.
9.1.– Azken kalifikazioa.
9.1.1.– Oinarri orokorretan xedatutakoaren arabera, lehiatzaile bakoitzaren azken kalifikazioa oposizio-aldian eta merituen balorazioan lortutako puntuazioen batura izango da.
9.1.2.– Emaitza eta kalifikazio guztiak Eusko Legebiltzarraren helbide elektronikoan (www.legebiltzarra.eus eta Herri Arduralaritzaren Euskal Erakundearen helbide elektronikoan (www.ivap.euskadi.eus) argitaratuko dira. Webgune horien bitartez kontsultak egiteko, NANaren zenbakia eta eskabidearen erreferentzia-zenbakia sartu beharko dira.
9.2.– Berdinketa hausteko irizpideak.
9.2.1.– Emakumeen eta Gizonen Berdintasunerako otsailaren 18ko 4/2005 Legearen 20.1.a artikulua aplikatuz, 1/2022 Legeak emandako idazkeraren arabera, joko da lehiatzaileek gaitasun bera dutela berdinketa ateratzen bada hautaketa-prozesuaren azken puntuazioan, hau da, oposizio-aldian lortutako puntuazioa eta dagozkion merezimenduak batu ondoren.
9.2.2.– Berdinketa gertatuz gero, lehentasun-ordena ezarriko da honako irizpideei jarraikiz, bata bestearen ondotik:
1.a Nork lortu duen puntuaziorik handiena esperientzia espezifikoagatik.
2.a Nork lortu duen puntuaziorik handiena esperientziagatik.
3.a Nork lortu duen puntuaziorik handiena titulazioengatik, probak gainditzeagatik karrerako funtzionario edo langile lan-kontratudun finko izateko prozeduretan, eta lan-poltsetan egoteagatik.
4.a Nork lortu duen puntuaziorik handiena titulazioengatik.
5.a Nork lortu duen puntuaziorik handiena informatikako ezagutzengatik.
I. ERANSKINA
ADMINISTRARI LAGUNTZAILE ELEBIDUNEN GAI-ZERRENDA
A gai-zerrenda (zati orokorra).
1.– Espainiako 1978ko Konstituzioa. Egitura sistematikoa. Oinarrizko printzipioak. Oinarrizko eskubide eta betebeharrak. Estatuaren botereak. Botere legegilea, botere betearazlea eta botere judiziala. Botereen arteko harremanak.
2.– Euskal Herriko Autonomia Estatutua. Printzipio orokorrak. Estatuaren eta EAEren arteko eskumen-banaketaren alderdi orokorrak. EAEko erakunde erkideen eta lurralde historikoetako foru-erakundeen arteko eskumen-banaketaren alderdi orokorrak. Autonomia Estatutuaren erreforma.
3.– Lurralde historikoak. Kontzeptua. Organoak. Eskumenak.
4.– Lehendakaria. Hautatzea eta izendatzea. Eskumenak eta ahalmenak. Euskal Autonomia Erkidegoko Gobernua. Osaera. Eskumenak (7/1981 Legea, ekainaren 30ekoa, Jaurlaritzari buruzkoa).
5.– Eusko Legebiltzarra. Osaera. Legebiltzarkidearen estatutua: sarbidea; eskubideak eta abantailak; betebeharrak; izaera kentzea eta galtzea. Eusko Legebiltzarraren egoitza.
6.– Eusko Legebiltzarraren Erregelamendua. Egitura sistematikoa. Eusko Legebiltzarraren eraketa. Lehendakaria eta Mahaia hautatzea. Legebiltzarreko lanak argitaratzea eta horien publikotasuna.
7.– Osoko Bilkura. Legebiltzarreko batzordeak: osaera, motak eta eginkizunak. Bilkurak eta gai-zerrenda. Eztabaidak. Bozketak eta quoruma.
8.– Eusko Legebiltzarreko legegintza-prozeduraren ideia orokorra. Legegintza-ekimena. Lege-proiektuak eta lege-proposamenak. Zuzenketak. Legegintzako prozedura bereziak.
9.– Jaurlaritza sustatzeko eta kontrolatzeko eginkizuna Eusko Legebiltzarrean. Galderak, interpelazioak, mozioak eta legez besteko proposamenak. Lehendakariaren inbestidura. Zentsura-mozioa eta konfiantza-arazoa. Ikerketa-batzordeak.
10.– Eusko Legebiltzarreko organoak. Lehendakaria. Mahaia. Bozeramaileen Batzarra. Talde parlamentarioak. Legelari nagusia. Eusko Legebiltzarraren harremanak beste organo batzuekin.
11.– Arartekoa (3/1985 Legea, otsailaren 27koa). Legearen egitura sistematikoa. Arartekoa: eginkizunak, hautaketa eta kargu-uztea. Jarduera-eremua. Legebiltzarrarekiko harremanak.
12.– Langileen estatutua eta Legebiltzarreko Administrazioaren araubide juridikoa, 1990eko ekainaren 22koa. Egitura sistematikoa. Funtzionario motak eta kidegoak. Lanpostu-zerrenda eta aurrekontu-plantillak. Langileen hautaketa eta lanpostuak betetzea.
13.– Emakumeen eta gizonen berdintasuna. Emakumeen eta gizonen berdintasuna lortzeko eta emakumeen kontrako indarkeria matxistarik gabe bizitzeko Legea (4/2005 Legea, otsailaren 18koa, martxoaren 3ko 1/2022 Legeak aldatua). Egitura sistematikoa. Xedea. Aplikazio-eremua. Euskal botere publikoen jarduna arautu eta gidatu behar duten printzipio orokorrak emakumeen eta gizonen berdintasunaren arloan. Araudian eta administrazio-jardueran berdintasuna sustatzeko neurriak. Genero-indarkeriaren aurkako politikak. Abenduaren 28ko 1/2004 Lege Organikoa, genero-indarkeriaren aurkako oso-osoko babesa emateko neurriei buruzkoa.
14.– Hizkuntza-normalizazioa Administrazioan. Printzipio orokorrak. Hizkuntza-eskakizuna. Hizkuntza-eskakizunen derrigortasuna. Eusko Legebiltzarreko Administrazioan Euskararen Erabilera Normalizatzeko Plana.
15.– 39/2015 Legea, Administrazio Publikoen Administrazio Prozedura Erkidearena, eta 40/2015 Legea, Sektore Publikoaren Araubide Juridikoarena. Administrazio-prozedura: Interesdunak: jarduteko gaitasuna eta interesdunaren kontzeptua. Administrazio-prozeduraren hasiera, antolamendua, instrukzioa eta amaitzea. Administrazio-jarduera aurkaratzeko baliabideak. Administrazioak ofizioz berrikustea. Administrazio-errekurtsoak: kontzeptua eta motak.
16.– Administrazio elektronikoa. Sektore publikoaren funtzionamendu elektronikoa (40/2015 Legea, Sektore Publikoaren Araubide Juridikoarena): printzipio orokorrak, egoitza elektronikoa, Interneteko ataria, administrazio publikoen identifikazio-sistemak, administrazio-jarduera automatizatua, sinadura-sistemak eta sinadura elektronikoa, dokumentuen artxibo elektronikoa. 6/2020 Legea, azaroaren 11koa, konfiantzazko zerbitzu elektronikoen zenbait alderdi arautzen dituena. Eusko Legebiltzarreko Administrazio elektronikoari buruzko araua (Eusko Legebiltzarraren Aldizkari Ofiziala, 2018ko ekainaren 1ekoa).
17.– Gardentasuna eta gobernu ona (19/2013 Legea, abenduaren 9koa). Printzipio orokorrak, aplikazio-eremua, informazio publikoa eskuratzea. Eusko Legebiltzarreko Lehendakaritzaren Ebazpen Orokorra, 2016ko otsailaren 9koa, gardentasunaren eta informazio publikoa eskuratzeko bidearen printzipioa Eusko Legebiltzarrean aplikatzeari buruzkoa.
18.– Datu pertsonalen babesa (Europako Parlamentuaren eta Kontseiluaren 2016/679 Erregelamendua (EB), 2016ko apirilaren 27koa, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa. 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa). Aplikazio-eremua. Kontzeptuak eta printzipioak. Datu pertsonalak tratatzeko zilegitasuna eta tratamenduaren arduradunaren betebeharrak. Tratamendu-jardueren erregistroa edo inbentarioa. Datuak Babesteko Euskal Bulegoaren funtzioak. Eusko Legebiltzarreko datuak babesteko ordezkaria.
19.– Erabateko kalitatea. Kudeaketako printzipio eta ereduak (Euskaliten kudeaketa aurreratuaren eredua). Bezeroaren gogobetetzea. Zerbitzu-karta.
20.– Laneko arriskuen prebentzioa (31/1995 Legea, azaroaren 8koa). Xedea, aplikazio-eremua, eskubideak eta betebeharrak.
21.– Europar Batasunaren erakunde-sistema. Parlamentua, Kontseilua eta Batzordea: organo horien osaera, antolaketa eta funtzionamendua.
B gai-zerrenda (zati espezifikoa).
1.– Administrazio Zuzenbidearen iturriak. Legea: kontzeptua eta motak. Erregelamendua: erregelamenduak egiteko ahalaren titulartasuna eta mugak. Arauen arteko hierarkia. Legezkotasunaren printzipioa Administrazio publikoan.
2.– Administrazio-egintza: administrazio-egintzen legezkotasunaren presuntzioa. Administrazio-egintzen erabateko deuseztasuna, deuseztagarritasuna eta ezeztapena. Administrazio-isiltasuna.
3.– Administrazio-prozedura. Printzipio orokorrak. Administrazio-prozeduraren faseak. Prozeduraren hasiera, antolamendua, instrukzioa eta amaiera.
4.– Administrazio-egintzak administrazio-bidetik berrikustea: printzipio orokorrak. Errakuntza materialak zuzentzea. Egintzak ezeztatzea. Administrazio-errekurtsoak.
5.– Herritarrentzako arreta eta informazioa. Lehendakaritzaren ebazpena, gardentasunaren eta informazio publikoa eskuratzeko bidearen printzipioa Eusko Legebiltzarrean aplikatzeari buruzkoa. Ganberaren informazio publikoa eskuratzeko eskubidea: organo eskudunak, irispidearen mugak, izapidetzeko ez onartzeko arrazoiak, prozedurak eta errekurtsoak.
6.– Publikotasun aktiboa: zenbait eduki web-orrietan argitaratzeko betebeharra.
7.– Lan parlamentarioen publikotasuna (Legebiltzarraren Erregelamenduaren 104.-110. artikuluak). Lan parlamentarioen publikotasunaren salbuespenak, Erregelamenduan aurreikusitakoak.
8.– Datu pertsonalen babesaren oinarrizko alderdiak (2016/679 Erregelamendua (EB), 2016ko apirilaren 27koa, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa, eta 3/2018 Lege Organikoa, Datu Pertsonalak Babestekoa eta Eskubide Digitalak Bermatzekoa). Aplikazio-eremua. Kontzeptuak eta printzipioak. Datu pertsonalak tratatzeko zilegitasuna. Datuak babesteari buruzko eskubideak. Tratamendu-jardueren erregistroa edo inbentarioa. Eusko Legebiltzarreko datuak babesteko ordezkaria.
9.– Eusko Legebiltzarreko Berdintasun Plana.
10.– Komunikazioa Administrazioan: hizkera administratiboaren erabilera zuzena. Hizkera administratiboa sinplifikatzea. Hizkera administratibo ez-sexista. Eusko Legebiltzarreko hizkera inklusiboaren gida.
11.– Era guztietako dokumentazioa kudeatu eta artxibatzea, irudiak eta bideoak barne.
12.– Eusko Legebiltzarreko Mahaiaren 2022ko apirilaren 26ko instrukzioa, Eusko Legebiltzarreko areto eta instalazioetarako sarrera, presentzia eta erabilera arautzen dituena (Eusko Legebiltzarraren Aldizkari Ofiziala, maiatzaren 2koa).
13.– Parlamentuek sare sozialak erabiltzea: Twitter, Facebook, Instagram, YouTube. Beste tresna batzuk: foroak, posta-zerrendak, weblog-ak, podcast-ak. Edukiak eta formatuak gailu berrietara egokitzea. Eusko Legebiltzarraren sare sozialak.
II. ERANSKINA
LANPOSTUAREN EGINKIZUN NAGUSIAK
– Eusko Legebiltzarreko artxibo orokorrean sartzen den dokumentu oro erregistratzea: informatikoki erregistratu, esleitutako zenbakiarekin zigilatu, eskaneatu eta doakion pertsonari edo departamentuari bidali.
– Idazkaritza Ataletik ateratzen den dokumentu oro erregistratzea.
– Mahaiaren erabakien arabera, espedienteak zabaltzearekin eta izapidetzearekin lotutako tratamendu informatikoa egitea.
– Osoko Bilkuren eta Batzordeen Atalean kudeatzen ez diren ekimen parlamentarioen espedienteak informatikoki kudeatu, kontrolatu eta artxibatzea.
– Bozeramaileen Batzarraren bileretarako dokumentazioa prestatzea: karpetak prestatu (deialdia, aurreko bilerako akta, osoko bilkuran eztabaidatu daitezkeen gaiak).
– Bozeramaileen Batzarraren bileraren deialdia egin eta bidaltzea.
– Bozeramaileen Batzarreko kideei dokumentazioa bidaltzea.
– Asteko jarduera Bozeramaileen Batzarraren bileraren arabera eguneratzea.
– Osoko bilkurako gai-zerrenda egin eta sinadurak biltzea, eta astean osoko bilkurarekin lotuta dagoen jardunean sartzea.
– Osoko bilkuran eztabaidatu daitezkeen gaien zerrenda aldatzea.
– Bozeramaileen Batzarraren bileraren akta egin eta sinadurak biltzea.
– Bozeramaileen Batzarraren datu-basea eguneratzea eta akta eranstea.
– Legebiltzarreko lehendakariari osoko bilkurarako gidoia prestatzea.
– Mahaiaren akten datu-basea eguneratzea.
– Unitateko jardunari lotutako euskarri administratiboa ematea: telefono-deiak hartu, testuen tratamendua egin, eta abar.
– Datu-baseak eta aplikazio informatikoak eguneratzea, eta kontsultak erantzutea.
– Datuak, zerrendak, dokumentuak eta abar egiaztatu, txekeatu eta erkatzea.
– Txostenak, espedienteak eta era guztietako dokumentazioa prestatu, editatu eta osatzea.
– Era guztietako testuak, taulak, grafikoak eta abar prozesatzea.
– Era guztietako dokumentazioa eta barne- eta kanpo-komunikazioak erregistratu, artxibatu eta banatzea.
– Ataleko espedienteak kudeatu, izapidetu eta haien jarraipena egitea, eta artxiboak eta agiriak mantentzea.
– Osoko bilkura eta batzordeetako grabazioak transkribatzea.
– Batzordeen Bilkura Egunkaria prestatu eta argitaratzea, bai paperean, bai web-orrian eta euskarri informatikoan.
– Teknikari eta administrariekin lan egitea.
– Eguneroko ordutegi-fitxaketak eta gorabeherak kontrolatzea: baimenak, oporrak, atzerapenak, aparteko orduak eta abar.
– Aparteko orduak eta konpentsazio-baimenak kalkulatzea, eta lizentziak eta baimenak izapidetzea.
– Pertsonen kudeaketan laguntzea: talde parlamentarioei ematen zaizkien dirulaguntzak eta lokomozio-gastuak izapidetu, ziurtagiriak eta bestelako frogagiriak igorri, eta abar.
– Espedienteei lotutako dokumentazioa eta zuzendaritzako beste zenbait idazki artxibatzen laguntzea.
– Zuzendaritzaren jarduerari lotutako euskarri administratiboa ematea: telefono-deiak hartu, testuen tratamendua egin, eta abar.
– Hautaketa-prozesuei lotutako administrazio-lanak egitea. Oinarriak, izangaien hautaketa, Mahaiaren izendapena eta abar prestatzea.
– Legealdia hastean, legebiltzarkideen akreditazioekin laguntzea.
– Bere arloarekin eta bere eskumeneko gaiekin zerikusia duen beste edozein eginkizun.