Boletín Oficial del País Vasco

77. zk., 2015eko apirilaren 27a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

1862

4/2015 FORU ARAUA, apirilaren 7koa, kreditu gehigarriak eta konpromiso kredituak onartu eta 2015eko ekitaldiko aurrekontu luzatua aldatzen duena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «4/2015 Foru Araua, apirilaren 7koa, kreditu gehigarriak eta konpromiso kredituak onartu eta 2015eko ekitaldiko aurrekontu luzatua aldatzen duena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2015eko apirilaren 7a.

Diputatu nagusia,

MARTIN GARITANO LARRAÑAGA.

HITZAURREA

Foru arau honen xedea da beharrezko kreditu gehigarria eta konpromiso kreditua onartzea, baliabide erabilgarrietatik ondorioztatzen den finantzaketa-marjinaraino. 2015erako aurrekontu luzatua osatuko da horrela. Kreditu horien helburua da hainbat gastu eta inbertsio jarduketa egin ahal izatea pertsonei bizi kalitate handiagoa emateko eta gure ingurune produktibo eta berritzailea hobetzeko.

Jarduketa horien bidez, lurraldean antzeman diren behar esparru nagusi hauek indartuko dira:

a) Adineko pertsonei, desgaituei, gizarte bazterkeria jasaten dutenei eta babesik gabeko adingabeei ematen zaien arreta hobetzea eta areagotzea.

b) Ekonomia sustatzeko eta enplegua sortu eta mantentzeko politikak finantzatzea, bi foru arau hauek betetzearren: 9/2014 Foru Araua, urriaren 27koa, Gipuzkoako ekonomiari bultzada berria eman eta krisitik errazago ateratzeko laguntzei buruzkoa; eta 10/2014 oinarrien Foru Araua, urriaren 27koa, Gipuzkoako Foru Aldundia eskuordetzekoa aparteko plan bat egiteko, urte anitzekoa, 2015-2016, krisi ekonomikoari aurre egiteko, langabeziaren aurkako borrokarako eta Gipuzkoako ekonomia-ehunaren lehiakortasuna handitzeko.

c) Kultura jarduerak.

d) Aurrekontuan txertatzea Urola Erdia, Tolosaldea, Bidasoaldea eta Oarsoaldea eskualdeetan garatutako partaidetza prozesuetatik ondorioztatzen diren jarduketak.

1. artikulua.– Xedea.

1.– Foru arau honen xedea da 31.846.242,09 euroko kreditu gehigarriak eta 14.422.323 euroko konpromiso kredituak onartzea 2015erako aurrekontu luzatuan.

2.– Aipatutako kredituak –gehigarriak zein konpromisokoak– lurraldean antzeman diren behar esparru nagusi hauek indartzeko erabiliko dira:

a) Adineko pertsonei, desgaituei, gizarte bazterkeria jasaten dutenei eta babesik gabeko adingabeei ematen zaien arreta hobetzea eta areagotzea.

b) Ekonomia sustatzeko eta enplegua sortu eta mantentzeko politikak finantzatzea, bi foru arau hauek betetzearren: 9/2014 Foru Araua, urriaren 27koa, Gipuzkoako ekonomiari bultzada berria eman eta krisitik errazago ateratzeko laguntzei buruzkoa; eta 10/2014 oinarrien Foru Araua, urriaren 27koa, Gipuzkoako Foru Aldundia eskuordetzekoa aparteko plan bat egiteko, urte anitzekoa, 2015-2016, krisi ekonomikoari aurre egiteko, langabeziaren aurkako borrokarako eta Gipuzkoako ekonomia-ehunaren lehiakortasuna handitzeko.

c) Kultura jarduerak.

d) Aurrekontuan txertatzea Urola Erdia, Tolosaldea, Bidasoaldea eta Oarsoaldea eskualdeetan garatutako partaidetza prozesuetatik ondorioztatzen diren jarduketak.

2. artikulua.– Kreditu gehigarriak.

31.846.242,09 euroko kreditu gehigarriak onartzen dira Gipuzkoako Foru Aldundiaren 2015eko aurrekontu luzatuan, I. eranskinean jasotzen den xehetasunaren arabera.

3. artikulua.– Konpromiso kredituak.

Gipuzkoako Foru Aldundiaren 2015eko aurrekontu luzatuan 14.422.323 euroko konpromiso kredituak sartu eta haien epeak berrantolatzea onartzen da. II. eranskinean erakusten da zer banaketa duten 2015etik aurrerako aurrekontu ekitaldietan.

4. artikulua.– Kreditu gehigarrien finantzaketa.

Foru arau honetan baimentzen diren ordainketa kredituak finantzatzeko, erabiliko da eragiketa honetatik ateratzen den soberakin finantzarioa: 2014ko urriaren 14ko Finantzen Euskal Kontseiluan zerga itunduengatik adostutako diru sarrerak eta 2015erako aurreikusitako gainerako baliabideak ken indarrean dagoen araudiaren arabera aplikagarriak diren erakundeekiko konpromisoak, zama finantzarioa, eta luzatutako kudeaketa aurrekontu propioaren ordainketa kredituak. Horren xehetasuna III. eranskinean jasotzen da.

5. artikulua.– Finantza eta Aurrekontu Araubidearen Foru Arauan ezarritako mugetatik salbuestea.

1.– Foru Arau honetan onartutako kreditu gehigarriak indarrean dagoen aurrekontuaren hasierako kreditutzat hartzen dira, eta ezingo dira kreditu transferentzien objektu izan, edo ezabatu edo murriztu Gipuzkoako Batzar Nagusien berariazko baimenik gabe.

2.– Abenduaren 23ko 9/2013 Foru Arauak, Gipuzkoako Lurralde Historikoko 2014rako Aurrekontu Orokorrak onartzen dituenak –hain zuzen ere, foru arau horren hirugarren xedapen iragankorraren indarrez 2015erako luzatutakoak– 11. artikuluan ezartzen duen muga foru arau honetan onartutako konpromiso kredituen % 10 gehitzen da.

6. artikulua.– Kreditu gehigarrien eta konpromiso kredituen aurrekontu aldaketen araubidea.

Kreditu aldaketen xedapen arautzaileak hauexek izango dira: martxoaren 27ko 4/2007 Foru Araua, Gipuzkoako Lurralde Historikoaren Finantza eta Aurrekontu Araubideari buruzkoa, eta. III. tituluari dagokionez, abenduaren 23ko 9/2013 Foru Araua, Gipuzkoako Lurralde Historikoko 2014. urterako Aurrekontu Orokorrak onartzen dituena –foru arau horren hirugarren xedapen iragankorraren indarrez 2015erako luzatutakoak–.

LEHENENGO XEDAPEN GEHIGARRIA.– Batzar Nagusiei berri ematea.

Foru arau honetan xedatutakoari jarraikiz egiten diren jarduketa guztien berri emango die Foru Aldundiak Gipuzkoako Batzar Nagusiei.

BIGARREN XEDAPEN GEHIGARRIA.– «Kabia» foru organismo autonomoaren aurrekontua.

Baimena ematen zaio Ogasun eta Finantza Departamentuko titularrari egin ditzan beharrezkoak diren aurrekontu egokitzapenak, «Kabia» foru organismo autonomoa bere helburuak betetzeko beharrezkoa den aurrekontuaz hornitzeko.

AZKEN XEDAPENETATIK LEHENENGOA.– Martxoaren 27ko 4/2007 Foru Araua aldatzea, Gipuzkoako Lurralde Historikoko Finantza eta Aurrekontu Araubideari buruzkoa.

19. artikuluaren 2. apartatua aldatzen da, eta honela geratzen da idatzita:

«2.– Aurreko apartatuan xedatutakoa xedatuta ere, ez da interesik sortuko eta ez da exijituko eskaerak onartzeko bermerik jartzea, pertsona fisikoek bidegabeki jasotako eduki ekonomikoko prestazio sozialen itzulketak borondatezko epean geroratu edo zatikatzen direnean.»

AZKEN XEDAPENETATIK BIGARRENA.– Foru arauaren garapena.

Diputatuen Kontseiluari baimena ematen zaio foru arau honetan xedatutakoa garatu eta gauzatzeko behar diren xedapenak eman ditzan, betiere departamentuek proposatu ondoren.

AZKEN XEDAPENETATIK HIRUGARRENA.– Indarrean jartzea.

Foru arau hau Gipuzkoako Aldizkari Ofizialean argitaratzen den egun berean jarriko da indarrean.

(Ikus .PDF)

Azterketa dokumentala