Polo, Asier
Bizkaitar biolontxelista (Bilbo, 1971). Oinarrizko ikasketak egin ondoren, Kolonian (Alemania) zabaldu zituen ikasketa horiek, eta Madrilgo Reina Sofía eskolan. Karrera profesionalari ekin ondoren sari ugari eskuratu ditu, bai ganbera musikan, bai biolontxelista gisa. Orkestra askorekin aritu da bakarlari moduan, besteak beste, Brasilgo Orkestra Sinfonikoarekin, Espainiako Orkestra Nazionalarekin, Euskadiko Orkestra Sinfonikoarekin eta Bilboko Orkestra Sinfonikoarekin. Ahots handien laguntzaile ere izan da. Besteak beste, Alfredo Krausekin aritu zen, ahotsa eta biolontxeloaren arteko uztarketa deigarria lortuz. Euskal Herrian ospatzen diren musika jaialdi garrantzitsuenetan parte hartu izan du. Atzerrian ere arrakasta handiko saioak emandakoa da. Azken urteetan, Marta Zabaleta pianista gipuzkoarrarekin batera aritu da binakako kontzertuak eskaintzen. Kontzertu horietan, obra klasikoak lantzeaz gain, jazzerako eta beste musika batzuetarako hurbilketa ere egin du. Bakarkako lehen diskoa Canciones sin palabras izen zen, Edelmiro Arnaltes Alfredo Krausen pianistaren laguntzaz osatua. Horretaz gain, beste hainbat grabazio ere egin ditu.
