Orsini, Felice
Italiar iraultzailea (Meldola, 1819 - Paris, 1858). Zuzenbide ikasketak egin zituen Bolonian; Italia Gaztea higikundeko kide izan zen eta 1843ko liberalen matxinadan parte hartu zuen; 1844an atxilotu eta giltzapetu zuten eta 1846ean libre utzi zuten Pio XI.aren amnistiari esker. Toskanan bizi zela, berriro atxilotu zuten ezkutuko irarkola bat zuelakoan. 1849an Erromako errepublikako diputatu aukeratu zuten, eta frantsesen aurka borrokatu zen Garibaldirekin batera. Azpilanetan ibili zen Mazziniren aginduz eta matxinatzeko saioak egin zituen, alferrikakoak ordea. 1855ean atxilotu eta hiltzera kondenatu zuten; Londresa ihes egin zuen, eta han beste kide batzuekin batera Italiaren etsaitzat zuen Napoleon III.aren aurkako atentatu bat prestatu zuen. Frantziara joan zen eta 1858ko urtarrilaren 14an berak eta bere kideek hiru bonba jaurtiki zizkioten Napoleon III.ari eta haren segizioari; atentatu hark zortzi hildako eta zauritu asko egin zituen, baina Napoleon III.a bizirik atera zen eta Orsini hil egin zuten.
