|
HAUTAKETA-PROZESUAN ONARTUA IZATEA
Atal honetan azaltzen da zer baldintza bete behar den deitutako prozeduretako
baten bidez irakaskuntzako funtzio publikora sartzeko. Eskabideak aurkezteko
unean kontuan hartzeko informazio erabilgarria ere aurkituko duzu.
Prozesuan sartu ahal izateko bete behar direnak
Baldintza orokor hauek bete beharko dituzte hautaketa-prozesurako onartu
ditzaten nahi dutenek:
1)
Baldintza orokorrak
a) Espainiarra izatea edo Europar Batasuneko gainerako estatuetako
bateko nazionala izatea, edo langileen zirkulazio libreari buruzko Europako
Parlamentuko 2004/38/EE Zuzentaraua eta zuzentarau hori Espainiako
lege-ordenamendura sartzeko ematen den araua aplika dakiokeen estaturen bateko
nazionala izatea.
Horrez gain, parte hartu ahal izango dute espainiar herritarren
ezkontideek, ondorengoek eta ezkontidearen ondorengoek, bai eta Europar
Batasuneko gainerako estatuetako bateko nazionalen eta Europar Batasunak
sinatutako nazioarteko itunen arabera langileen zirkulazio librea aplika
dakiekeen estatuetako nazionalen ezkontideek, ondorengoek eta ezkontidearen
ondorengoek, baldin eta dagokion itunean hala ezarrita badago eta espainiar
Estatuak berretsita badu, edozein nazionalitatetakoak izan arren, baldin eta
ezkontideak legez bananduta ez badaude eta ondorengoak hogeita bat urtetik
beherakoak badira edo adin horretatik gorakoak izan arren, gurasoen ardurapean
bizi badira.
b) Adina: Hemezortzi urte izatea eta erretiroa hartzeko oro har
zehaztutako adinera oraindik ez iristea.
c) Aukeratzen diren kidego eta espezialitatearen funtzioetan aritzearekin
bateraezina den gaixotasunik edo muga fisiko edo psikikorik ez izatea.
d) Zigor-espedientearen bidez edozein administrazio publikoren
zerbitzutik kendu ez izana, ezta funtzio publikoetan aritzeko ezgaituta egotea
ere.
Halaber, nazionalitate espainiarra ez duten izangaiek haien estatuan
funtzio publikoan sartzea eragozten dien diziplina-zehapen edo zigor penalik ez
dutela egiaztatu beharko dute.
e) Zer kidegotara sartu nahi den, kidego horretako karrerako
funtzionarioa edo praktiketakoa ez izatea, edo izendapenaren zain ez egotea.
f)
Hizkuntza-gaitasuna:
- HE2 egiaztatzea
- Hizkuntza-eskakizunekin homologaturiko hizkuntza-egiaztagiriren bat edukitzea
- Hautaketa-prozesu honetan hizkuntza-eskakizuna egiaztatzeko egingo diren
probak gainditzea.
2)
Berariazko baldintzak
2.1.
Baldintza orokor horiez gain, berariazko baldintza hauek bete beharko dituzte
izangaiek:
Ondorengo titulu hauetakoren bat izatea, edo hori emateko eskubideak ordainduta
izatea:
Maisu-maistraren titulua edo dagokion mailako titulua.
Oinarrizko Hezkuntza Orokorreko irakasle-titulua.
Lehen Hezkuntzako Maisu-maistraren titulua.
Titulazio horiek atzerrian lortu izanez gero, homologatuta egon beharko dute,
urtarrilaren 16ko 86/1987 eta otsailaren 20ko 285/2004 Errege Dekretuen eta
azaroaren 3ko ECI 3686/2004 Aginduaren arabera, edo, bestela, Maisu-maistra
lanbidean jarduteko aitortuta egon beharko dute, 89/48/EEE Zuzentarauak eta
urriaren 25eko 1665/1991 Errege Dekretuak zehaztutakoaren babesean, aplikatu
ahal diren heinean.
2.2.
Urritasuna dutenentzat erreserbatutako txandan parte hartzeko berariazko
baldintzak
Prozedura horretan parte hartu ahal izango dute lortu nahi duten kidegoan
sartzeko baldintza orokorrak eta berariazko baldintzak bete eta, horrez gain,
Foru Aldundietako Gizarte Ongizate Saileko, Lan eta Gizarte Gaietako
Ministerioko edo, hala egokituz gero, gai horretan eskuduntzak dituzten
gainerako autonomia-erkidegokoetako organo eskudunek gutxienez % 33ko urritasun
fisikoa aitortu diotenek, urritasuna irakaskuntzan aritzearekin bateraezina ez
bada.
Erreserba horretarako aukera parte hartzeko eskaeran egin beharko da, eta
berariaz adieraziko da horretarako eskatutako baldintza betetzen dela. Lanpostua
lortutakoan, eskumena duten organoen ziurtagirien bidez egiaztatu beharko da
adierazitako baldintza hori betetzen dela.
Sartzeko txanda horren hautua egiten dutenak ezingo dira espezialitate
berean txanda librean sartu, ezta beranduago txandaz aldatu ere.
Oinarri honetan aipatutako baldintza guztiak bete beharko dira eskaerak
aurkezteko epea amaitzean, eta karrerako funtzionarioaren kargua hartzeko
egunera arte bete beharko dira, gainera, hizkuntza-eskakizuna egiaztatzeko
baldintzarena izan ezik, deialdi honetako 6.1.2. oinarrian aipatzen den
hizkuntza-eskakizunak egiaztatzeko probaren emaitzak argitaratu aurretik eduki
eta egiaztatu behar baitira hizkuntza-eskakizunak.
Onartua izateko eskabideak
Hautaketa-prozesuan onartua izateko eskabidea egin aurretik, deialdia bera
arretaz irakurtzea komeni da, batez ere eskabideak aurkezteko epeei buruzko
atalak, eskabideak betetzeko jarraibideei buruzko atalak, etab.
Eskabide-inprimakiak jasotzea
Hautespen-prozesu honetan parte hartu nahi dutenek, eskabide-eredu bat bete
beharko dute; hain zuzen ere, interneteko helbide hauetan agertzen dena:
http://www.irakasle.net edo
http://www.hezkuntza.ejgv.euskadi.net.
Ondorengo bi bideetako bat erabil dezakete horretarako:
1. Eskabide-eredua
zuzenean bete aipatu internet-helbidean.
2. Eredu hori
lurralde historiko bakoitzaren hurrengo tokietan bete:
-
Araba: Lurralde Ordezkaritza, San Prudentzio hiribidea, 18 – Gasteiz
- Bizkaia: Lurralde Ordezkaritza, Gran Via, 85 – Bilbo
- Gipuzkoa: San Bartolome kalea, 28 – Donostia
Hauxe
gomendatzen dizugu: eskabidea betetzen hasi aurretik, arretaz irakur ditzazula
eskabidea behar bezala betetzeko argibideak, adierazitako internet-helbidean
ageri direnak.
Goian
aipatutako tokietan eskuratu ahal den eskabide ereduak bere
erreferentzia-zenbaki propio eta bereizia izango du, identifikatzeko. Eskabidea,
halaber, jatorrizko alea izango da, eta ez fotokopia, eta bertan jasoko dira,
nahitaez, izangaiak nahi duen kidegoa, espezialitatea, hizkuntza-eskakizuna eta
txanda.
Elbarritasuna edo ezintasuna duten hautagaiek laukitxo egokian adieraziko dute
hori, bai eta eskatzen duten egokitzapena azalduko ere.
Tasak
ordaintzea
Deialdi honetan parte hartu
nahi duen izangai bakoitzak, izen-ematearen tasa moduan, 16,63 euro ordaindu
beharko du.
Tasak eskaerak
aurkezteko epearen barruan ordaindu beharko dira, eta bi bideotako bat aukeratu
ahal izango da horretarako:
a) Jarraian aipatzen
diren bankuetako edozein sukurtsaletan zuzenean ordaintzea, erakunde
laguntzailearentzako frogagiria aurkeztuz:
1. Euskadiko Kutxa
2. BBK (Bilbao Bizkaia Kutxa)
3. Vital Kutxa
4. Gipuzkoa Donostia Kutxa
5. BBVA
6. Santander Central Hispano
7. Banco Guipuzcoano
8. La Caixa
9. Bankoa
Inprimakiek barren kodea
dutenez, kutxazain automatikoaren bidez egin daiteke ordainketa, irakurketa
optikoarekin edo datuak eskuz antzemanez.
b) ON-LINE ordaintzea:
banku elektronikoaren sistemaren bitartez, sistemak berak erakusten dituen
jarraibideen arabera, betiere interesduna modalitate horretako bezero baldin
bada adierazitako banku-erakundeetatik edozeinetan. Ordainketa-mota horren
bitartez, ez da alferreko joan-etorririk egin behar eta ez da ilaran itxaron
behar. Gainera, eguneko 24 orduetan erabil daiteke.
Azterketa egiteko
eskubideak ordaindu ezean edo epez kanpo ordainduz gero, izangaia prozesutik
kanpo geldituko da. Banku-erakundean agiriak aurkezteak eta tasak ordaintzeak ez
du, inola ere, ordezkatuko eskabidea behar den denboran eta eran, oinarri
honetan adierazitako moduan, aurkezteko izapidea.
Agiriak aurkeztea
Eskabideak eta bestelako dokumentazioa aurkezteko epea 20 egun naturalekoa
izango da, deialdi-agindua Euskal Herriko Agintaritzaren Aldizkarian argitaratu
eta hurrengo egunetik kontatzen hasita, eta honako tokietako batean
aurkeztu beharko da:
-
Araba: Lurralde Ordezkaritza, San Prudentzio hiribidea, 18 – Gasteiz
- Bizkaia: Lurralde Ordezkaritza, Gran Via, 85 – Bilbo
- Gipuzkoa: San Bartolome kalea, 28 – Donostia
-
Azaroaren 26ko 30/1992 Legeko, Herri Administrazioen Araubide Juridikoaren eta
Administrazio Prozedura Erkidearen Legeko, 38.4 artikuluan aurrez ikusitako
edozein eratan, xedapen horretan ezarritako baldintzen arabera.
Eskaera internet bidez
betetzen bada, hartuaren adierazpena eskuratuko da (erakunde
laguntzailearentzako alea). Esleitutako erreferentzia-zenbakia izango du, eta
deialdiaren 3.2. oinarrian aurreikusitako moduetan tasa ordaintzeko datu
zehatzak edukiko ditu. Bide batez eskuratuko da eskabidearen ordezkagiria (administrazioarentzako
alea), eta eskabideak aurkezteko epean deialdiaren 3.4.1. oinarriko a) eta b)
puntuetan aipatutako edozein tokitan aurkez daitezkeen merezimenduei eta
gainerako dokumentazioari erantsiko zaie.
Atzerrian egindako eskabideak tokian tokiko Espainiako ordezkaritza
diplomatikoetan edo kontsulatuetan aurkeztu ahal izango dira, deialdiaren
oinarriko 3.5 puntuan adierazitako epean aurkeztu ere, eta erakunde horiek
eskumena duen administraziora igorriko dituzte. Azterketa-eskubideen tasa
ordaintzeko deialdiko 3.2 puntuak xedatutakoari jarraituko zaio.
Agiriak
Ondoko agiriak aurkeztu beharko dituzte izangaiek, eskabidearekin batera,
eskabideak aurkezteko epean:
a) Kidegoan sartzeko eskatutako tituluaren fotokopia konpultsatua edo
titulua emateko eskubideak ordaindu direla adierazten duen ziurtagiriaren
fotokopia konpultsatua.
Titulazio horiek atzerrian lortu izanez gero, homologatuta egon beharko
dute, edo Maisu-maistraren lanbidean jarduteko aitortuta egon beharko dute,
89/48/EEE Zuzentaraua eta urriaren 25eko 1665/1991 Errege Dekretua aplikatu ahal
diren heinean.
Dokumentu hori aurkezten ez badu, izangaia hautaketa-prozesutik kanpo
geldituko da.
b) Urritasuna duten izangaiek urritasun-maila zehazteko organo tekniko
eskumendunak emandako medikuaren irizpen teknikoa aurkeztu beharko dute, fede
emanez egiaztatzen dituena aitortutako urritasun-maila eragin duten urritasun
iraunkorrak, hautaketa-organoak balioetsi ahal izan dezan eskatutako
egokitzapenak bidezkoak diren ala ez.
c) Espainiar nazionalitaterik ez duten izangaiek 6.1.1.1. oinarrian
adierazitakoaren arabera gaztelaniaren ezagutza-proba egitetik salbuetsita
geratu nahi badute oinarri horretan aipatutako tituluren bat dutelako, tituluen
fotokopia konpultsatua edo tituluak emateko eskubideak ordaindu direla
egiaztatzen duen agiriaren fotokopia konpultsatua aurkeztu beharko dute.
Halaber, aurreko deialdietan proba gainditu dutela-eta salbuetsita geratu
nahi duten izangaiek proba gainditua dutela egiaztatuko duen agiria aurkeztu
beharko dute.
Bi
kasuetan, dokumentu horiek aurkeztu ezean, interesdunak ezingo dira salbuetsi,
eta, hortaz, proba egin beharko dute, 6.1.1. oinarrian ezarritakoaren arabera.
Proba
hori egitetik salbuetsitzat joko dira, halaber, espainolaz besteko
nazionalitatea duten izangaiak, baldin eta, jatorria kontuan hartuta,
gaztelaniaz dakitela ondoriozta badaiteke.
d)
Zerbitzuak beste autonomia-erkidego batzuetako hezkuntza-administrazioetan
ematen dituztenek administrazio horiek emandako zerbitzu-orriak aurkeztu beharko
dituzte, B.2) ariketa ordeztea nahi badute. Zerbitzu-orri horretan adierazi egin
beharko da zein kidego eta espezialitatetan izendatu ziren izangaiok eta,
halaber, adierazi egin beharko da zein egun zehatzetan eman diren zerbitzuok.
e)
Deialdi honi lotutako I. eranskineko baremoak aipatzen dituen merezimenduak
baloratzeko, izangaiek merezimendu horiek egiaztatzeko agiriak (jatorrizkoak edo
fotokopia konpultsatuak) aurkeztuko dituzte. Horrenbestez, eskabideak aurkezteko
epean eta deialdi honek zehaztutako agirien bidez egokiro egiaztatzen diren
merezimenduak baino ez dira aintzat hartuko.
Alegatutako tituluaren espediente akademikoa baloratu ahal izateko,
titulua atzerrian eskuratu duten izangaiek lehenengo paragrafoan adierazitako
epean aurkeztu beharko dute titulua, baina eskabideak aurkezteko epea agortu
ondoren, beste hogei egun natural izango dituzte titulua eman zuen herrialdeko
hezkuntza-administrazioak karrera osoan lortutako kalifikazioen batez
bestekoaren egiaztapena eman dezan. Horrez gain, Espainiako kalifikazioekin
baliokideak zehazteko, atzerriko sistema akademiko horretan lor daitezkeen
kalifikazio gorenak zein diren ere adierazi beharko du.
Euskal Autonomia Erkidegoko bi hizkuntza ofizialetako bateko itzulpen
ofizial eta guzti aurkeztu beharko dira gaztelania ez den atzerriko hizkuntzaren
batean emandako dokumentazio guztiak. Titulazio akademikoei eta emandako
zerbitzuen orriei dagokienez, zinpeko interprete batek egin beharko du
itzulpena; gainerako dokumentazioaren itzulpenak, berriz, zinpeko interpreteak
egina beharko du, edo bestela, dagokion kontsulatu edo bulego diplomatikoak
baliozkotua.
Autonomia-erkidegoetako beste hizkuntzetan idatzitako dokumentuak ere
(euskaraz idatzitako dokumentuak izan ezik) Euskal Autonomia Erkidegoko bi
hizkuntza ofizialetako batera zinpeko interpreteak itzulita aurkeztu beharko
dira.
|
