• Eraikin berriak merkantzien biltegiratzea eta portuaren eguneroko funtzionamendua hobetzea ahalbidetuko du
• “Portuaren egunerokoa hobetzeko eta Bermeoko jarduera ekonomikoa indartzeko pentsatutako obra da”, azpimarratu du Amaia Barredok

Eusko Jaurlaritzako Elikadura, Landa Garapen, Nekazaritza eta Arrantza Sailak Bermeoko portu komertzialean zerbitzu-pabiloi baten berrikuntza eta handitzea bultzatuko du. Jarduketa horri esker, merkantzien kudeaketa hobetuko da, portuko lurzoruaren erabilera optimizatuko da eta udalerriari lotutako jarduera ekonomikoa indartuko da.

Jarduketak gaur egungo pabiloia eraistea aurreikusten du, egoera kaskarrean baitago eta edukiera mugatua baitu, eta biltegiratze-azalera handiagoa izango duen eraikin berri bat eraikitzea. Eraikin berriak portuan jarduten duten kontsignatarioek espazioarekiko duten gero eta eskaera handiagoari erantzuteko aukera emango du, bai itsasontzietatik bai kamioietatik datozen edukiontzietan sartu gabeko merkantzien biltegiratzea erraztuz.

Hobekuntza horrek portu ordenatuago, eraginkorrago eta funtzionalagoa ekarriko du, Bermeoko herritarrentzat onura argiekin. Portuko espazioen antolaketa hobeak jarduera logistiko arinagoa ahalbidetuko du, portuko bideetan interferentziak murriztuko ditu eta portu komertzialak tokiko indar ekonomiko gisa duen eginkizuna indartuko du.

“Instalazio hauen modernizazioa Bermeorentzat eta bermeotarrentzat lehiakorragoa, hobeto antolatua eta erabilgarriagoa izango den portu baten aldeko apustua da”, adierazi du Amaia Barredo sailburuak.

Jarduketa honetara bideratutako inbertsioa 670.269,64 eurokoa da (BEZa barne); horietatik 553.941,85 euro oinarrizko aurrekontuari dagozkio eta 116.327,79 euro BEZari. Obrari esker, nabarmen hobetuko dira Bermeoko portu komertzialaren azpiegiturak eta herritarrentzako zerbitzua.

Esku-hartzea Bermeoko Portuaren indarrean dagoen plangintzara egokitzen da, eta erabilgarri dagoen lurzoru eraikigarria ahalik eta gehien optimizatzea ahalbidetuko du, zerbitzuak instalazio bakar moderno batean kontzentratuz, egungo beharretara egokituta. Horrela, Eusko Jaurlaritzak portu-azpiegiturak hobetzeko eta kostaldeko udalerrien garapen jasangarria sustatzeko duen konpromisoa indartzen du.

Jarduketa hau Elikadura, Landa Garapen, Nekazaritza eta Arrantza Sailaren estrategiaren parte da, euskal portuak azpiegitura eraginkorrago eta funtzionalagoez hornitzeko, betiere herritarren eta tokiko ehun ekonomikoaren onura ardatz hartuta.

Informazio gehiago Irekia atarian (Leiho berrian irekiko da)