Victoria
Australiako hego-ekialdeko estatua, kontinenteko kostalde menditsua hartzen duena. Mugak: iparraldean, Murray ibaiaz gaindi, Hego Gales Berria; mendebalean, Hego Australia; hegoaldean, Bass itsasartea; ekialdean, Tasmaniako itsasoa (Ozeano Barea). 227.620 km2 eta 4.405.000 biztanle. Hiriburua, Melbourne. Hiri nagusiak: Ballarat, Bendigo eta Geelong. v Orografia. Menditsua da hegoaldea eta hego-ekialdea eta bertaraino luzatzen dira Australiako ekialdeko Dividin Range mendialdeko mendiak. Mendialde honetatik mendebalera, iparraldera eta hegoaldeko kostaldera ordokia da nagusi. Erdialdeko goi-ordokietan daude estatuko baso trinkoenak; iparraldeko ordokia, Mallee deitua, antzua da, Murray ibaiaren ertzak salbu. Klima epela eta lehorra du. v Ekonomia. Laborantza (garia, garagarra, barazkiak, tabakoa, lihoa, lekadunak, mahatsa), abere hazkuntza (behi eta ardi azienda), mea baliabideen ustiapena (ikatza, urrea, lignitoa, petrolioa, gas naturala), industria (metalurgia, altzairugintza, zurgintza, janari industria, eraikuntzarako gaiak, larrugintza, ehungintza) eta zerbitzuak (garraiariak, finantza etxeak, bankuak) dira ekonomia jarduera nagusiak. v Historia. 1802. urtean John Murray lurralde honetako kostaldera iritsi ondoren, Tasmaniako kolono batzuek Melbourneko hiria sortu zuten (1835). Hego Gales Berriaren administraziopean egon zen 1851. urtean autonomia eskuratu zuen arte. Artzaintza zen orduko bizibidea, baina urrea aurkitu izanak erabat aldatu zuen biztanleen bizimodua. Atzerriko urreketariek (diggers) demografia hazkunde handia eragin zuten (77.000 biztanle izatetik 540.000 biztanle izatera heldu zen oso denbora gutxian). Lurren banakuntzaren garaian arazoak gertatu ziren baina 1862. urtean onartutako legearen arabera biztanle bakoitzak 130 ha izateko eskubidea zuen, akre bakoitza libra batean salduta.
