Euskararen tresnak

Lur hiztegi entziklopedikoa

Kultura eta Hizkuntza Politika Saila

Tejada Villaverde, Gonzalo

Gipuzkoar musikagilea (Donostia, 1960). Kontrabaxu-jotzaile eta kopositorea da, eta jazz musikari bezala nabarmendu da, nahiz eta oso gaztetan pop eta rock taldeetan aritua izan. 1985ean Eiderjazz bikotea osatu zuen Iñaki Gonzalezekin batera, eta hamarkada horren amaieran Tríptico taldea, Josetxo Silguero eta Sorkunde Fernandezekin. Jazz musikari famatu askorekin aritua da Gonzalo Tejada, eta izan dituen harreman profesional emankorrenen artean aspaldi honetan Iñaki Salvadorrekin duen elkarlana aipa daiteke. Euskadiko Orkestra Sinfonikoarekin ere bitan aritu da elkarlanean. Azken urteotan, bere konposizio lanekin eta emanaldiekin jarraitzeaz gain, Iñaki Salvador Trio taldeko kide da Salvadorrekin eta David Xirgu bateriarekin batera. Gonzalo Tejadak Donostiako, Baionako, Orthezeko, Gasteizko, Madrilgo eta Getxoko Jazz Jaialdietan parte hartu izan du, eta Donostiako Jazzle eskolan kontrabaxu irakasle bezala dihardu. Konpositore bezala ere trebatua da –1990ean Eusko Jaurlaritzak emandako Konposizio saria eskuratu zuen–, eta 1999an bere proposamenik berritzaileenetako bat estreinatu zuen Donostiako Musika Berrien Jaialdian, jazza eta gaurko musika uztartzen dituen En tránsito konposizioa. Lan horretan orkestra –Et Incarnatus taldea, kasu horretan– eta jazz hirukotea –Gonzalo Tejada bera kontrabaxuan, Iñaki Salvador pianoan eta Daniel Pérez gitarran– bildu zituen, eta izen bera eman zion 2000. urtean aurkeztu zuen diskoari, nahiz eta diskoan beste konposizio batzuk ere sartu.