Sopela
Bizkaiko kostaldeko udalerria (Uribe Kosta). Sopelana du izen ofiziala. Mugak: iparraldean, Kantauri itsasoa; ekialdean, Barrika eta Urduliz; mendebalean, Getxo eta Berango; hegoaldean, Berango eta Urduliz. Garaiera, 50 m. 8,42 km2. 1997ko datuen arabera, 9.858 biztanle (sopelarrak). Auzo nagusiak: Sopelako elizatea, Manene, Moreaga, Ugeraga eta Larrabasterra. Gobelas ibaiak zeharkatzen du Sopela. Hizkuntza banaketa 1996an: 3.008 euskaldun, 2.461 ia-euskaldun eta 3.740 erdaldun. Industria (altzairugintza, industria kimikoa, janari industria, makina-erreminta) eta zerbitzuak (oinarrizko zerbitzuak, udatiarrentzako azpiegiturak) dira ekonomia jarduera nagusiak. Aipagarria da XII-XIV. mendeko San Pedro Apostoluaren parrokia eliza (XVIII. mendean zaharberritua).