Kultura eta Hizkuntza Politika Saila

Johnson, Samuel

Ingeles idazle eta lexikografoa (Lichfield, Staffordshire, 1709 - Londres, 1784). Oxforden hasi zituen letra ikasketak baina, dirurik ez zuela eta, Londresa itzuli zen 1737an. Ospea hartu zuen, egunkarietan (Gentleman’s Magazine, 1741-1744) idatzi zituen artikuluei eta argitara eman zituen bi satira poemari esker: London (1742, Londres) eta The Vanity of Human Wishes (1749, Giza nahikerien hutsalkeria). 1746an hasi zen Dictionnary of the English Language (1746-1754, Ingeles hizkuntzaren hiztegia) hiztegi handia prestatzen, eta 1754an argitaratu zuen XVIII. mendeko ingeles hiztegia ezagutzeko ezinbesteko bihurtu den obra hau. Ospe handia eman zion obra honek, baina bitartean ez zituen literatura eta kazetaritza bazter utzi. 1750. urtean hasi zen The Rambler (Ibiltaria) egunkaria argitaratzen eta 1758an The Idler (Nagia) aldizkariak jarraitu zion kazeta honi. The History of Rasselas, Prince of Abyssinia eleberri moralista argitaratu zuen ondoren (1759, Rasselas Abisiniako printzearen historia). Entziklopedia moduko lan bati ekin zion bizitzako azken urteean, The Lives of the Most Eminent English Poets (1777, Ingeles poeta nagusien bizitza). Bere garaiko literaturan eragin handia izan zuen Samuel Johnsonek, bere lagunekin (Gibbon, Reynolds eta Burkerekin) osatu zuen taldeak, batez ere.