Husák, Gustav
Txekoslovakiako politikaria (Bratislava, 1913 - Praga, 1991). 1933an Alderdi Komunistako kide egin zen eta Bigarren Mundu Gerran alemanen aurkako eslovakiarren erresistentzian parte hartu zuen. Gerra ondoren Alderdi Komunistaren Presidiumeko kide izan zen, purga politikoaren ondorioz espetxeratu zuten arte (1951-1960); 1963an berriro onartu zuten alderdian. Ministro Kontseiluaren idazkariorde egin zuten 1968an, eta “Pragako udaberria” deitu zaionaren oinarri izan ziren erreforma liberalak egiten lagundu zuen; alabaina, Varsoviako Ituneko armada urte bereko abuztuan indarrez sartu zenean, jarreraz aldatu zen eta sobietarren jarrera gogorraren alde jarri zen. 1969an Alexander Dubceken ordezkari izendatu zuten Txekoslovakiako Alderdi Komunistaren idazkari nagusiaren karguan, eta 1975ean Errepublikako lehendakari izendatua izan zen. Husákek 1987ko abenduan utzi zuen alderdiaren buruzagitza baina estatuko buru izaten jarraitu zuen 1989ko abendua arte; orduan, bere dimisioarekin batera, etorri zen erregimen komunistaren gainbehera.
