Hooke, Robert
Ingeles fisikari, matematikari, astronomo eta asmatzailea (Freshwater, Whight uhartea, 1635 - Londres, 1705). Bere garaiko mekanikalaririk hoberentzat jotzen da. Newton-ekin lehian aritu zen, eta bien arteko eztabaidak teoria askoren akuilagarri izan ziren. Berak aztertu zituen lehenik, 1667an, landare zelula handituak (kortxoarenak); zelula hitza biologian erabiltzen hasi zen; gorputz trinkoetan deformazioaren eta tentsioaren arteko proportziozko harremana finkatu zuen; 1678an bere izenez ezagutzen den legea azaldu zuen; kristalen egituraz ikuspegi zehatza eman zuen ezagutzera; grabitazioari buruz eta argiaren uhin izaerari buruz hipotesiak moldatu zituen; eter izena asmatu zuen argiaren eroalea izendatzeko; errefrakzio eta interferentzia gertakariak aztertu zituen; fisikako tresna asko hobetu zituen; 1658an aire bonba eta mikroskopioa hobetu zituen;1684an optikazko telegrafo bat asmatu zuen. Grabitate indarra penduluaren bidez neurtu zitekeela ohartu zen lehena izan zen. Behaketa eta aurkikunde astronomiko asko egin zituen, eta Lurrak Eguzkiaren itzulian egiten duen mugimendu eliptikoa frogatzen saiatu zen. Bera da, halaber, landare fosilen eta bizien anatomia konparatuaren sortzailea. v Hooke-ren legea. Mek. Elastikotasunaren teoriaren oinarrizko legea, gorputz trinkoen elastikotasunak duen mugaren barruan, badela zuzeneko erlazio bat tentsioaren (presioa, tiratzea, etab.) eta dilatazioaren (deformazioa) artean, esaten duena. l luzerako burdin hari bati s tentsio mekanikoa (indarra/azalera) eragiten zaionean izaten duen dilatazioak (Dl) lege hau betetzen du:
bertan E elastikotasun modulua delarik eta A hariaren epai zuzenaren azalera.
