Jon Maia, Migueltxo Molina y Pablo Iraburu: "Lo bonito ha sido que todos estábamos viviendo lo que estábamos contando"
Ezkerretik eskuinera, Migueltxo Molina, Pablo Iraburu eta Jon Maia, Bizimina dantza dokumentalaren zuzendariak. ARENA COMUNICACION
- Fecha22 de Septiembre
- Temática Artes escénicas
Konfinamenduko garairik zailenetan pilatutako emozioetatik sortu dute 'Bizimina' dantza ardatz duen film dokumentala Iraburuk, Molinak eta Maiak. Gaur aurkeztuko dute, Euskal Zinemaren Galan
Hibridazio bat, zinema dokumentalaren eta dantzaren artekoa. Tren geltoki baten irudiak, eta bi dantzari nasa banatan. Donostiako Konstituzio plaza, gizon gazte bat erdian, eta kamera haren inguruan biraka, dantzaria euskarri mugikor batean dantzan ari deneko inpresioa sortu arte. Hiru lagun zelai batean, erdira lotzen dituen oihalezko soka batez elkartuta, aparte baina batuta. Piezaz pieza osatzen den kontakizun bat da Bizimina. Sentipen askoren habia izan daitekeen berba horretan, garai oso jakin batean bizitakoak bildu dituzte Jon Maiak, Migueltxo Molinak eta Pablo Iraburuk: pandemiaren lehen unetakoak. Distantzia, desioa, ezina, nahasmena. Egileen hitzetan, «denok bizi genituen horiek». Irudien bidez, baina batez ere lengoaia koreografikoaren bidez, emozio horiei leku egin eta besteekin partekatzeko lan bat izan nahi du filmak. Kukai dantza konpainiako kideak arduratu dira gorputza jartzeaz, eta OrekaTx taldea musika gehitzeaz. Gaur estreinatuko dute emaitza Viktoria Eugenia antzokian, Euskal Zinemaren Galan.
Konfinamenduaren «egunik zailenetan» izan zuen ernamuina proiektuak. Apirila zen, eta Maiak buruan zerabilen nolakoa behar zuen izan euren lanak halako egoera batean. «Publikoaren, erakusteko espazioen eta sortzaile, kulturako langile edo zernahi garenon arteko hiruko banaezina puskatzen ikusi genuen. Bakoitza bere lekuan zegoen aparte. Baina, aldi berean, egungo teknologiak lagun, sentitzen nuen triangelu horrek segi zezakeela funtzionatzen. Horrekin batera, egoera berriak bizitzen ari ginen, gatazka berriak bizitzen eta espazioen okupazio berriak sortzen». Oskara dokumentala elkarrekin egin zutenetik ezagutzen zituen Molina eta Iraburu, eta haiengana jo zuen film proposamenarekin. «Denok ari ginen gaizki pasatzen, eta Jonek aukera bat eman zigun egiten dakiguna egiteko», oroitu du Iraburuk.