George Méliès zinematografia modernoaren aitzindaria gogoratzen dabe artelanek.

Film&Video, Bilboko Guggenheim Museoko aretorik barritzaile eta esperimentalenetariko bat, William Kentridge hegoafrikarraren sorkuntzen erakusleku izango da, bagilaren 14ra arte. Hiru ikus-entzunezko pieza dira, bederatzi pantailatan banatuta. Izan be, lau hamarkada daroaz Kentridgek sorkuntza zinematografikoaren eta bideografikoaren arloetan.

William Kentridge: 7 atal izeneko erakusketa honetan, Kentridgek zinematografia modernoaren sortzaile eta bultzatzailetzat joten dan George Méliès hartu dau gogoan, aldi berean autoerretratu bitxia eginaz, amesetakoa dirudiana. Aretoa mikrokosmos bihurtu dau artisteak, Manuel Cirauqui komisarioak azaldu dauenez.

Instalazinoa zuri-baltzean eginda dago, eta artistearen benetako irudiak eta stop motion teknikaz egindako marrazkiak buztartzen ditu. Kasu honetan, ikatz-ziriz marrazteko ekintzea bera grabetan dau filmean, ondoren marrazkiak kamereari erakusten deutsaz, zati batzuk ezabatzen eta barriro marrazten ditu. Era horretara, animazinoaren azken irudiek aurreko bersinoetan ezabatutakoa be erakusten dabe.