Martin Ugalderen jaiotzaren mendeurrena ospatzeko, urtean zehar hainbat ekitaldi ari dira prestatzen zenbait eragile. Horien artean, atzo Hondarribiko Arma Plazako kultur eta informazio puntuan ireki zen «Martin Ugalde Orradre: jaiotzaren mendeurrena» erakusketa.

Ugalderen biografia, bere ekarpena politikan, literaturgintzan, kazetaritzan zein euskalgintzan eta bere izena daraman Andoaingo parkeari eskainitako atalak atondu dituzte, besteak beste.

“Martin Ugalde Orradre: jaiotzaren mendeurrena (Andoain 1921 –Hondarribia 2004)” erakusketaren aurkezpen ekitaldian izan ziren atzo Unai eta Itsaso Ugalde Martinen seme-alabak, Txomin Sagarzazu Hondarribiko alkatea, eta Joanmari Larrarte, Martin Ugalde Kultur Parkeko ordezkaria.