Bilboko Itsasmuseumek hartuko du urrira arte Jesus Mari Lazkanoren ‘Bilbo MMX’ margolan panoramikoa. Obra 2010eko Erakusketa Unibertsalerako sortu zuen Lazkanok eta hiriaren ikuspegi hiperrealista du ardatz.

Jesus Mari Lazkanoren ‘Bilbo MMX’ artelan panoramikoa urrira arte egongo da Itsasmuseumen. Obra ‘Obra Gonbidatua’ programaren baitan erakutsiko da museo bilbotarrean, Arte Eder Museoak utzita.

Margolana prentsaurrean aurkeztu dute astearte honetan artistak berak, Bilboko alkate Juan Mari Aburtok, Euskara eta Kultura diputatu Lorea Bilbaok eta Arte Eder Museoko eta Itsasmuseoko zuzendariek, Miguel Zugaza eta Jon Ruigomez, hurrenez hurren.

Obra 2010 urtean sortu zuen Lazkanok Shangaiko Erakusketa Unibertsalerako eta ‘Obra Gonbidatua’ programaren baitan Itsasmuseumi uzten den hirugarrena da. Aurretik Quintin Torresen ‘Lemazaina’ eta Julian de Tellaecheren ‘Itsasmutil zuria’ erakutsi dira.

Lazkanok ‘Bilbo MMX’ obrarekin batera erakusteko hamar marrazki ere utzi dizkio museoari eta, horiekin, «bisitaldiaren esperientziak balio erantsi bat izateaz gainera obraren konplexutasuna ulertzea errazten da», Bilbaoren aburuz.