Ibilbide luzeko taldea izateko jaio zen Tenpora orain zazpi urte eta ibilbide horren hirugarren geltokia da ‘Berriro asma nazazu’ diskoa. Lehen aldiz ekoizle bat izan dute lagun, Aitor Etxebarria, eta elkarlanak euren kantuei «estetika ilunagoa» eman diela uste dute taldekideek.

Apirilerako amaitua behar zuen diskoak, baina itxialdiak grabazio betean harrapatu eta, azkenik, kasik udazkenarekin ikusi du argia ‘Berriro asma nazazu’, Tenporaren hirugarren diskoak. Lan berrian «azala berrituta» datozela azaldu du aurkezpenean Juantxo Zeberiok (teklatua), Tenpora «etengabe aldatzen ari diren bost musikarik» osatzen dutelako. Zeberiorekin batera, Hasier Oleagak (bateria), Itsaso Etxebestek (baxua), Beñat Barandiaranek (gitarra) eta Elene Arandiak (ahotsa) osatzen dute Tenpora.

«Musikaren estilo eta kolore aldetik garapen bat dago eta hala izatea nahi dugu, ez zaigulako errepikakorrak izatea gustatzen; musikariak bide berriak jarraitu behar ditu eta arriskuak hartu», aldarrikatu du Zeberiok eta, disko honen kasuan, taldeak hartu duen arriskua lehen aldiz ekoizle batekin lan egitea izan dela argitu du. «Aitor Etxebarria izan dugu lankide eta lagun», azaldu du.