«Elementuak» proiektua 2015ean abiatu zuen Lapurdiko hirukoteak. Horren inguruan, berrargitalpen bat eta kolaborazio disko bat eramanen ditu Kalakanek Durangoko Azokara. Elkarlana Mongoliako Alexandre Arkhincheev-ekin batera egin dute, heldu den urtean musikariarekin batera egingo duten birari begira. Bestalde, hirukotearen lanak ekoizten dituen Saroia elkartea lehen aldiz beste talde batekin ere ariko da lanean, Berçaits anaiekin. 

Bi lan oso ezberdinekin joango da Kalakan Durangora, baina oinarrian proiektu beraren parte dira bi diskoak. 2015. urtean abiatu zen “Elementuak” egitasmoa. Orduan Jamixel Bereau eta Xan Errotabehererekin batera Thierry Biscary ari zen. Orain, aldiz, hirukotea Pierre Sanglak osatzen du.

Duela bi urte sartu zen kide honek izaera berria ekarri dio musikari; hori dela-eta egitasmoaren izena daraman diskoa berriz argitaratzea deliberatu dute. «Duela hiru urte ireki genuen liburu bat ixtea da xedea, baina eguneratuz, gaurko Kalakanen soinuarekin. Gure aztarna berria garbiki utziz», azaldu du Xan Errotabeherek.

Aldaketarekin izaera berri bat hartu du taldeak, eta kontzertuen ondoren saltzen dituzten diskoetan ikusleek entzun dutenarekin bat egiten duen obra aurkitu nahi dutela baieztatu du Jamixel Bereauk: «Orain kide berriaren ahotsa agertzen da, bere nortasuna ezberdina delako, taldearen nortasuna aldatzen da pixka bat, eta soinua ere bai». Bere kideak gaineratu du: «Gure instrumentua den ahotsean, bere tinbrearen ezberdintasuna nabaria da». Sangla, kantari eta musikaria ez ezik, perkusionista ere badela gaineratu du: «Bere jakitatea perkusio aldetik ageria da».

Diskoko kantuen bertsioez gain, «badira beste aldaketa batzuk, nahiz eta handiak ez izan», azaldu du Bereauk. Kide berriarekin kantatu dituzten kantu guztiak daude, jatorri duen diskokoez gain Kalakanen lehen CDkoak, eta orain arte grabatu gabeko batzuk ere atzematen ahalko dira.