Haren lehen lan abstraktuak ere badaude ikusgai

«Ezin nuen irudikapenean gehiago sinetsi, eta abstrakziora pasatzea erabaki nuen». 1988an eman zuen figuraziotik harago joateko jauzia Albert Oehlen artista alemanak (Kreferd, Alemania, 1954), baina, Bilboko Guggenheim museoan azaldu duenez, abstrakziorako bide hori ez zen oztoporik gabekoa izan. Irribarrez eman du esplikazioa, bibote eta betaurreko erridikuludun aurpegi itsusi erraldoi bat ageri duen Artaburua koadroaren aurrean. «Hasieran ez nekien zer pintatu, eta orri zuriaren aurrean sentitzen den beldur hori sentitu nuen, harik eta erabaki nuen arte margotzeko gai bat bilatu behar nuela, eta erabaki nuen gai erabat ergela aukeratzea zela bidea, horrela inork ez baitzuen pentsatuko margolana benetan gai hori irudikatzeko egin nuenik». Artistaren garai horretako eta geroagoko hamabost artelan bildu ditu orain museoak Albert Oehlen: Irudiaren atzean erakusketan, eraikineko lehen solairuan. Otsailaren 5era arte egongo da zabalik.

«Ez zait kaosa interesatzen, ordenarik gabeko kontrola baizik». Behin baino gehiagotan esan da artistaren esaldi hori nazioartean eskaini zaizkion erakusketetan, eta balio dezake sortzailearen asmoa azaltzeko. Dioenez, askatasun artistikoa du helburua, eta ez du maite bere lanei buruzko azalpen eta interpretaziorik ematen aritzea. Koadroaren gainazala da haren erronka. «Ez dut nahi publikoak margolanetan ezer bilatzerik: koadro hauek direna dira, eta kito», azaldu du Bilbon. Baina bada alderik koadrotik koadrora. Izan ere, guztiak nahasian zintzilikatu badituzte ere, hiru atal ditu erakusketak: hasierako lan abstraktuak daude batetik, ordenagailu bidez sortutako pinturak bestetik, eta azken hiru urteetan lantzen dabilen Zuhaitzak izeneko neurri handiko margolan serieko lan sorta bat azkenik. Gainera, bi autorretratu ere hautatu ditu bildumarako.

Leer información completa en el sitio web de la fuente