• Ihobe (ingurumen-kudeaketa) eta EEE (Energiaren Euskal Erakundea) sozietate publikoek stand bana izango dute Bioterra azokaren 22. edizioan. Ekainaren 6tik 8ra egingo da, Irungo Ficoba erakustazokan. 

• Herritarrek bertatik bertara ezagutuko dituzte zeintzuk diren autokontsumorako energia berriztagarrien ekoizpen-sistemak (bai elektrikoak, bai termikoak) abiarazteko laguntza-programak, bai eta ibilgailu eraginkorragoak eta gutxiago kutsatzen dutenak jartzeko laguntza-programak ere.

• "Erronka klimatikoaren aurrean, herritarrak kontzientziatzearen alde egiten du Eusko Jaurlaritzak, energia aurrezteko eta iturri berriztagarrietatik sortzeko, baita etxean, mugikortasunean, aisialdian edo gure kontsumoan ohitura jasangarriagoak izateko ere”, nabarmendu du Irantzu Allende Trantsizio Energetikoko sailburuordeak Bioterraren inaugurazioan.

Beste urte batez, Eusko Jaurlaritzak jasangarritasunarekin duen konpromisoa berretsi du Bioterra azokan; 22. edizioa Ficoban egingo da, ekainaren 6tik 8ra. Ihobe (ingurumen-kudeaketa) eta EEE (Energiaren Euskal Erakundea) sozietate publikoen bidez, Eusko Jaurlaritzak bi stand izango ditu azokan, herritarrak bizi-ohitura jasangarriagoen alde egitera gonbidatzeko, mugikortasunetik hasi eta etxeraino, baita baliabideak aurreztera, energia-efizientziara eta energia berriztagarrietara egitera gonbidatzeko ere.

Duela bi hamarkada baino gehiago sortu zenetik, Bioterra ezinbesteko hitzordu bihurtu da garapen jasangarriarekin kontzientziatuta dauden profesional eta norbanakoentzat. Azoka sendoa da, eta 200.000 pertsona baino gehiago igaro dira bertatik 2004an lehen aldiz egin zenetik. 2025 honetan, 115 enpresa baino gehiagok mota guztietako produktu eta zerbitzu ekologikoak aurkeztuko dituzte, hainbat sektoretakoak, hala nola elikadura organikoa, energia berriztagarriak, kosmetika naturala, moda jasangarria, bioeraikuntza eta kontsumo arduratsua.

Gainera, herritarrek bertatik bertara ezagutuko dituzte zeintzuk diren autokontsumorako energia berriztagarrien ekoizpen-sistemak (bai elektrikoak, bai termikoak) abiarazteko Eusko Jaurlaritzaren laguntza-programak; datozen bi urteetan 80 milioi euroko inbertsioa egingo da laguntzetan. Emisio gutxiagoko ibilgailuak erosteko laguntza-programari buruzko informazioa ere emango da, auto zaharrenak eta kutsagarrienak ordezkatzeko.

Azokaren inaugurazioan Irantzu Allende Trantsizio Energetikoko sailburuordeak nabarmendu duenez, “Bioterra Euskadiko erreferentziazko azoka da bizitzeko modu ekologikoago, kontzienteago eta jasangarriagoan sinesten dugunontzat. Eusko Jaurlaritzak ere aletxoa jarri nahi du, eta aurten KLIMA Azoka ekarri dugu Bioterrara. Ihobe eta EEEren ekimen bateratua da, eta funtsezkoa euskal herritarrak klima-aldaketaren erronkaren aurrean sentsibilizatzeko eta mobilizatzeko”.

“Energia aurrezteaz eta iturri berriztagarrietatik sortzeaz ari gara, baita etxean, mugikortasunean, aisialdian edo gure kontsumoan ohitura jasangarriagoak txertatzeaz ere. Karpa tematiko, jolas eta dinamika desberdinei esker, KLIMA Azokak gure eguneroko ohiturei buruz hausnartzera eta gizarte jasangarriago baterantz aurrera egiteko ekintza txikiekin konprometitzera gonbidatzen gaitu. Gainera, herritarrei informazioa emango diegu gure etxeetan energia berriztagarria sortzeko sistemak abiarazteko edo ibilgailuak eraginkorragoak eta gutxiago kutsatzen dutenak eskuratzeko Eusko Jaurlaritzak dituen laguntza-programa guztiei buruz”, amaitu du Allendek.

Informazio gehiago Irekia atarian (Leiho berrian irekiko da)