2025eko ekainaren 19an eta 20an egindako bileran, Eusko Jaurlaritzako Ogasun eta Finantza Saileko ordezkariak, autonomia-erkidegoetako egitura-funtsen kudeaketako gainerako arduradunak eta Ogasun Ministerioa izan dira. 

Foro honen helburua 2021-2027 aldiari dagozkion Europako funtsen bilakaera aztertzea da, kudeaketa- eta kontrol-sistemei edo egiaztapen-estrategiei dagokienez, besteak beste. 

Halaber, lan-saioetan 2025eko birprogramazioen eszenatokia, aplikazio informatikoan egindako aurrerapenak eta eragiketen hautaketa eztabaidatu dituzte. 

Europarako Teknologia Estrategikoen Plataforma (STEP) sortzen duen Erregelamenduari dagokionez, subiranotasun-zigilua duten proiektuak aurkeztu dira, bai eta STEP inbertsio-eremuak bultzatzen laguntzen duten beste batzuk ere, hala nola teknologia digitalak eta teknologia sakoneko berrikuntza, teknologia garbi eta eraginkorrak eta bioteknologiak. Horrela, Euskadiko EGEF 2021-2027 programan, Europako Batzordeak 2025eko martxoan STEP eragiketa bat onartu zuen, Donostian instalatuko den Quantum System Two ordenagailuak erabiliko dituen teknologia kuantiko aplikatuak garatzeko.

 Parte-hartzaileek aukera izan dute, halaber, Europako lurralde-lankidetzako programen egoerari buruz hitz egiteko, bai eta berriki egindako 2021-2027 aldirako hiri-garapeneko deialdiari buruz ere, tokiko estrategia integralen bitartez.

 Eusko Jaurlaritza lau hilean behin autonomia erkidego ezberdinetan egiten den foro honetan egoteak berriro ere Europako Kohesio Politikarekin duen konpromisoa berresten du.