Gipuzkoan 345.000 pertsona daude, 16 urtetik gorakoak, tratamendu mediko aktiboa dutenak, eta, horrek, preskribatutako medikazioa zuzen hartzen laguntzen duen aplikazio honen erabiltzaile potentzial bihurtzen ditu. 

Aplikazio berri honek harrera ona izan du Araban, izan ere, aktibatu zenetik 3.500 pazientek baino gehiagok, gehienak 65 urtetik gorakoak, instalatu dute bere telefono mugikorrean.  

“Nire Tratamendua” aplikazioa gaurtik dago eskuragarri Gipuzkoan, eta horri esker, tratamendu mediko aktiboa duten eta lurralde honetan bizi diren 16 urtetik gorako 345.000 pertsonak izango dute erabiltzeko aukera, eskueran izanik Osakidetzako beren medikuak preskribatutako medikazioa zuzen hartzen laguntzeko tresna pertsonal bat. 

Aplikazio berri honek, segurua, praktikoa, sinplea, erabiltzen erraza eta, batez ere, eraginkorra izanda, segituan jasotzen du kontsultan entregatzen den Tratamendu Medikoaren Orria, eta informazio hori guztia telefono mugikorretik eskuratu eta erabil daiteke. 

“Nire Tratamendua” Tratamendu Orria eta pilula-kaxa fisikoak osatzera dator –ez ditu ordezten–, eta pazienteei tratamendu medikoaren jarraipen egokia egiten laguntzen dienez, osasun-onuren mesederako izatearekin batera, pertsonen bizi-kalitate hobea ere ekarriko du. 

Eusko Jaurlaritzako Osasun Sailburu Jon Darpónek joan den astelehenean aurkeztu zuenetik, APPak jakin-min handia sorrarazi du; eta horren froga dugu Arabako lurraldean 3.500 pertsonak baino gehiagok instalatu dutela dagoeneko aplikazioa eta erabiltzen ari direla. Horietatik, erabilera-mailarik handiena 65 urtetik gorako pertsonen artean ikusten da. 

APP hau Osakidetzaren webgunean dago eskuragarri, eta abantaila hauek ditu: tratamendu aktibo guztiak adierazten ditu (tratamendu kronikoak, akutuak eta eskariaren araberakoak); etengabe eguneratutako informazioa dauka; medikazioa noiz, nola eta zer dositan hartu behar den adierazten du; farmazian emandako azken botika zein den ezagut dezakegu; medikazioa berrikusi, amaitu eta jasotzeko datak jakitera ematen ditu; preskribatu zaigun trataerari buruz gure medikuak emandako jarraibideak jaso ditzakegu. 

Osasun Sailburuaren hitzetan, aplikazioak “pertsonen osasuna eta bizi-kalitatea hobetzen laguntzen du, eta gainera, gure ardurapean dauden pertsonen tratamenduari jarraipena egin diezaiokegu”. 

“Nire tratamendua” Osakidetzaren Informatika eta Informazio Sistemen Zuzendaritzaordeak sortu eta garatu duen tresna bat da, eta 16 urtetik gorako 1.120.000 pertsona baino gehiagori eman diezaieke zerbitzua, hau da, euskal osasun zerbitzuan tratamendu aktiboak dituztenei. Tratamenduaren informazio pertsonal eta zehatza eskuratzeko ezinbestekoa da Osasun Zentroan erraz eska daitekeen Barku Jokoa edukitzea. 

Aipatu beharrekoa da aplikazio honek –osasun-arretako zerbitzu publiko batean ezaugarri horiek dituen bakarra izanik– Osakidetzan egindako preskripzioak bakarrik jasotzen dituela.

“Nire Tratamendua” APParen funtzionaltasunak:

Lau eremu nagusi ditu: Hartualdiak, Nire Tratamendua, Alarmak eta Postontzia

Hartualdiak: medikazioaren banaketa erakusten du otordutan eta ordutan zatiturik. Eredua otorduei egokitzen ez bazaie, aplikazioa uneko ordutik hurbilen dagoen otorduan kokatzen da. 

Nire Tratamendua: medikazioa ordenaturik agertzen da, kronikoa, akutua edo eskariaren araberako izan. Edozein medikamendu sakatzen badugu, hari buruzko zehaztasun gehiago ikus dezakegu.

Alarmak: “alertak” sortzeko aukera ematen du, medikazioa noiz jaso behar den edo tratamenduaren berrikuste- edo amaiera-datei buruzkoak.

Postontzia: hemen kontsulta daiteke APPra sartu ginen azkeneko alditik tratamenduan aldaketarik izan ote den, eta hainbat informazio: tratamendu-aldaketa, medikazioa farmazian jasotzeko hurrengo datak, etab.

            Gipuzkoan martxan jarri eta gero, Bizkaian hurrengo astelehenetik aurrera egongo da eskuragarri; hartara, aplikazioa Euskadi osoan hedatzeko prozesuari amaiera emango zaio.

Gasteizen, 2017ko martxoaren 27a