Gizarte Ekonomia Estatistikaren helburua Euskadiko Autonomia Erkidegoa osatzen duten erakundeen egoera eta bilakaera aztertzea da, haien dimentsio sozioekonomikoaren ikuspegi osoa eskainiz.

Ikerketak Gizarte Ekonomiaren Forma Klasikoak (GEFK) hartzen ditu barne, hau da, Kooperatiba Sozietateak eta Lan Sozietateak; baita Hirugarren Sektorea (HS) ere (lehen gizarte ekonomiaren beste forma batzuk deitua). Azken horrek erakunde hauek biltzen ditu: Fundazioak, Onura Publikoko Elkarteak, Laneratzeko Enpresak, Enplegu Zentro Bereziak, Eraldaketarako Nekazaritza Sozietateak, Arrantzaleen Kofradiak eta Borondatezko Gizarte Aurreikuspeneko Erakundeak.

Eusko Jaurlaritzako Ekonomia, Lan eta Enplegu Sailak, Ikertalde Grupo Consultorrekin lankidetzan, egiten duen lan estatistiko honek aukera ematen du hainbat alderdi giltzarriri buruzko      informazio eguneratua izateko, besteak beste:

• Urteko ordaindutako enplegua
• Fakturazioa eta enpresa-emaitzak.
• Sortutako balio erantsi gordina (BEG).
• Sozietateko langileen parte-hartzea, genero-berdintasuna, talentuaren kudeaketa eta lan-giroa.
• Berrikuntza eta enpresen arteko lankidetza

Informazioa biltzea eta aztertzea bi urtez behin egiten da, nahiz eta urtez urteko aurrerapenak ere jasotzen diren sektorearen bilakaeraren irakurketa dinamikoa errazteko. Horrela, eragiketa estatistikoak ez ditu soilik magnitude nagusiak neurtzen, baizik eta euskal gizarte ekonomiaren egitura lurraldeko, sektoreko eta gizarte-profesionaleko ikuspegitik hurbiltzen du. 

Emaitzak modu agregatuan zein eskualde, sektore eta forma juridikoka desagregatuta aurkezten dira, eta, era horretan, datuek Euskadin ikerketarako, plangintzarako eta politika publikoak diseinatzeko duten erabilgarritasuna bermatzen da     .  

Gainera, datuak biltzeko prozesuan parte hartzea errazteko, erakundeei gutun bat eta posta elektroniko bat bidaliko zaizkie, galdetegira online      sartzeko estekarekin. Hala nahi izanez gero, galdetegia paper-formatuan bete dezakete, horretarako zuzenean Ikertalde Grupo Consultorrekin harremanetan jarrita, 900 102 965 telefono zenbakira deituz edo economiasocial@ikertalde.com helbide elektronikora idatziz.

 

Zer datu eskatzen dira?

• Enpresaren datu identifikatiboak eta orokorrak: sozietate-izena, IFK, helbidea, forma juridikoa, eraketa-data, establezimendu mota, enpresa-taldeetako kidea izatea, enpresa mota.
• Jarduera eta fakturazioa: jarduera nagusia eta bigarren mailakoa (EJSN), fakturazio-bolumena Euskadin, gainerako Estatuan eta atzerrian.

• Enplegua eta langile-egitura:
  • Bazkide langileen, soldatapekoen eta langile ez direnen kopurua.
  • Sexuaren, adinaren, kontratu motaren eta kotizazio-araubidearen araberako banaketa.
  • Lanorduak, batez besteko soldatak eta kudeaketa-organoetan parte-hartzea (Kontseilu Errektorea, lehendakaritza, zuzendaritza).
  • Desgaitasuna duten pertsonen inklusioa.

• Kontu ekonomikoak: gastuak (erosketak, kanpo-zerbitzuak, zergak, langile-gastuak, amortizazioak, etab.) eta diru-sarrerak (salmenta garbiak, diru-laguntzak, beste diru-sarrera finantzario edo ezohikoak).
• Inbertsioak eta esportazioak: egindako inbertsio materialak eta inmaterialak, esportazio-bolumena eta banaketa geografikoa.
• Funts propioak eta erreserbak: kapitala, erreserbak, gizarte ekonomiaren berariazko dotazioak.
• Barne-kudeaketa eta enpresa-politikak: plan estrategikoak , berdintasun-planak     , bateragarritasun-planak     , kalitate-kudeaketa, gizarte-erantzukizun korporatiboa, euskararen erabilera.
• Sozietate- artaidetza eta lan-giroa: bazkideen inplikazio-maila erabaki-organoetan, partaidetza indartzeko neurriak, laneko gogobetetasuna, soldata-tarteak.
• Berrikuntza eta digitalizazioa: I+G jarduerak, produktu eta prozesuen berrikuntza, enpresen arteko lankidetza, teknologia digitalen integrazio-maila, zibersegurtasuna eta adimen artifiziala.
• Talentua kudeatzea eta zahartzea: talentua erakartzeko/atxikitzeko zailtasunen aurreikuspena, plantilla gaztetzeko planak.
• Lurralde- eta multi-establezimenduen informazioa: lurralde historiko, udalerri edo herrialdeka zehaztua, establezimendu-kopurua, enplegua eta fakturazioa.

 

ZERTARAKO ERABILIKO DIRA INKESTAREN EMAITZAK?

Estatistika-eragiketa honen emaitzak funtsezko informazio-iturri dira Euskadiko Gizarte Ekonomiaren jarraipena eta azterketa egiteko. Bildutako informazioari esker, datu agregatuak izango dira eskuragarri,      Euskal Autonomia Erkidegoan gizarte ekonomia sendotzeko      eta sustatzeko      politika publikoak diseinatzen      eta ebaluatzen      laguntzeko     .

Bestalde, inkestari esker bildutako      informazioa publikoa izango da, eta emaitza nagusiak euskadi.eus webgunearen bidez zabalduko dira.

www.euskadi.eus/estatistikak-ele  

Itzuli