Eskatzaileek, eskabidearekin batera, enpresari buruzko informazio orokorra aurkeztu beharko dute, baita honako dokumentazio hau ere:

• a) Eskatzaileak egin beharreko inbertsioen memoria zehatza. Bertan, produktuari eta ekoizpen-prozesuari buruzko informazioa jasoko da, bai eta inbertsioaren aurreko eta osteko prozesua ere, CO2eq emisioen murrizketa kalkulatzeko azalpen batekin eta ekonomia eta finantza planaren xehetasunarekin eta hori guztia egiteko epeekin batera. (Memoria teknikoaren ereduaren arabera).
• b) Eskatzaileak bete beharreko kalkulu-orria, enpresei saihestutako isurien kalkulua egiteko aukera ematen diena. Kalkulu-orri horretan, dirulaguntzaren xede den inbertsioaren osteko CO2eq isuriak eta inbertsioaren aurreko egoeran zeuden CO2eq isuriak alderatzen dira. (Kalkulu-orriaren ereduaren arabera).

  Kalkulu-orri horrek kalkuluan erabilitako emisio-faktoreak estandarizatzen ditu, eta, horri esker, ebaluazio-faseko eskaerak irizpide bateratuen arabera konpara daitezke. Erregai eta energia-iturri bakoitzerako, kalkulu-orriak emisio-faktoreen aurrez definitutako zerrenda bat du, erreferentzia hauetan oinarrituta egina:

  • Karbonoan oinarritutako erregaiak: Emisio-faktoreak, karbono-aztarnaren erregistroa, konpentsazioa eta karbono dioxidoa xurgatzeko proiektuak; Trantsizio Ekologikorako eta Erronka Demografikorako Ministerioa; 2022.
  • Elektrizitatea: penintsulako sistema elektrikoaren sorreraren CO2eq emisioak eta emisio-faktorea; Espainiako Sare Elektrikoa, 2022.
  • Hidrogeno grisa: Batzordearen Erabakia, isurketa-eskubideen doako esleipena harmonizatzeko Batasunaren arau iragankorrak zehazten dituena, Europako Parlamentuaren eta Kontseiluaren 2003/87/EE Zuzentarauaren 10 bis artikuluari jarraiki.

  Kalkulu-orrian eskatzaile bakoitzak inbertsioaren xede den prozesuan erabilitako erregaiak eta energia-iturriak adieraziko ditu, eta inbertsioaren ondoren eta inbertsioa egin aurretik egoeran izandako kontsumoak sartuko ditu. Era berean, eskatzaile bakoitzak dirulaguntzaren xede den inbertsio hautagarriaren balioa sartu behar du.

  Kalkulu-orriak eskatzaile bakoitzak sartutako kontsumoen datuak eta aurrez definitutako emisio-faktoreak erabiltzen ditu saihestutako isuriak kalkulatzeko, eta inbertsio hautagarriaren eta saihestutako isurien arteko erlazioa kalkulatzen du.

• c) Eratze-eskritura, enpresa sortu berria bada soilik, identifikazio fiskaleko txartela eta eskatzailearen ordezkaritza-ahalordea, salbu eta horiek Ekonomiaren Garapen, Jasangarritasun eta Ingurumen Sailaren esku badaude eta aldaketarik izan ez bada. Interesdunak adierazi behar du noiz eta zer organoren aurrean aurkeztu zituen dokumentu horiek, salbu eta espresuki aurka egiten badu; kasu horretan, espedienteari erantsi behar dizkio (Ordezkari baten bidez elektronikoki izapidetzen bada, ordezkaritza Euskal Autonomia Erkidegoko Administrazio Publikoaren Ahalordeen Erregistro Elektronikoan inskribatu beharko da, helbide honetan: https://www.euskadi.eus/ordezkariak).
• d) Sozietateen gaineko zergaren edo, hala badagokio, pertsona fisikoen errentaren gaineko zergaren azken bi aitorpenak, edo azken bi ekitaldietan Merkataritza Erregistroan aurkeztutako urteko kontuak eta dokumentazio gehigarria.
• e) Eskatzailea ETEa dela egiaztatzen duen dokumentazioa, Europar Batasuneko arauen araberako ETEaren kalifikazioarekin bat datorrena; hau da, urteko enplegu-datuak, negozio-bolumena eta balantze orokorra, bai eta, hala badagokio, harekin elkartutako edo lotutako gainerako enpresenak ere. Taldearen datu orokorrak ere aurkeztu beharko dira, talde osoaren antolaketa-eskema barne, partaidetzak, enplegu-datuak, ustiapen-zifra eta balantzea adierazita, betiere laguntzak eskatu aurreko bi ekitaldiei dagokienez.
• f) Jarduera Ekonomikoen gaineko Zergan alta eman izanaren agiria.
• g) 50 langiletik gorako enpresek Euskal Autonomia Erkidegoko Hitzarmenen, Laneko Akordio Kolektiboen eta Berdintasun Planen Erregistroan eta Gordailuan inskribatuta daudela egiaztatzen duen agiria aurkeztu beharko dute.
• h) 30.000,00 eurotik gorako dirulaguntzei dagokienez, merkataritza-eragiketetan berankortasunaren aurkako neurriak ezartzen dituen abenduaren 29ko 3/2004 Legean ezarritako ordainketa-epeak zenbateraino bete diren egiaztatzeko, honako bide hauek erabiliko dira:
• a) Pertsona fisiko eta juridikoek, baldin eta, kontabilitate-araudiaren arabera, galeren eta irabazien kontu laburtua aurkez badezakete, pertsona fisikoak edo, pertsona juridikoen kasuan, administrazio-organoak edo baliokideak sinatutako ziurtagiri bidez, behar besteko ordezkaritza-ahalordea dutenak, eta abenduaren 29ko 3/2004 Legean aurreikusitako ordainketa-epeen betetze-maila lortzen dutela adierazten badute. Inguruabar hori hurrengo b) letran aurreikusitako frogabideetako baten bidez ere egiaztatu ahal izango dute, haren erregulazioaren arabera.
• b) Kontabilitate-araudiaren arabera, galera-irabazien kontu laburtua aurkeztu ezin duten pertsona juridikoek, honela:
• 1.- Kontu Auditoreen Erregistro Ofizialean inskribatutako auditoreak emandako ziurtagiria, ikuskatutako azken urteko kontuen memorian deskribatutako ordainketen arloko informazioaren transkripzio banakatua duena, kontu horietatik ondorioztatzen denean abenduaren 29ko 3/2004 Legean ezarritako ordainketa-epeen betetze-maila lortzen dela, apartatu honetan zehaztutakoa, abenduaren 29ko 3/2004 Legea aldatzen duen uztailaren 5eko 15/2010 Legearen hirugarren xedapen gehigarrian eskatutako informazioan oinarrituta.

  Ziurtagiri hori baliozkoa izango da hurrengo ekitaldiko urteko kontuak ikuskatu arte.

• 2.- Aurreko zenbakian aipatutako ziurtagiria («Adostutako Prozeduren Txostena») ezin bada egin, Kontu Auditoreen Erregistro Ofizialean inskribatutako auditore batek egina, zeinak, erreferentziako data batean sozietatearen hornitzaileei ordaintzeke dauden fakturen lagin adierazgarri baten berrikuspenean oinarrituta, amaitu behar baitu abenduaren 29ko 3/2004 Legearen ordainketa-epeak betetzeko salbuespenik detektatu gabe, edo, halakorik hautemanez gero, ez baitu eragotzi behar apartatu honen azken paragrafoan eskatutako betetze-maila lortzea.

  Lege honen ondorioetarako, apartatu honetan eskatutako baldintza betetzat joko da abenduaren 29ko 3/2004 Legean aurreikusitako ordainketa-epeen betetze-maila Enpresak Sortu eta Handitzeko irailaren 28ko 18/2022 Legearen azken xedapenetako seigarrenaren d) letraren bigarren apartatuan aurreikusitako ehunekoaren berdina edo handiagoa denean.

• i) Erakunde eskatzailearen erantzukizunpeko adierazpena. Administrazio- nahiz zigor-arloan indarrean dagoen zehapen-araubidearen mende geratuko da adierazpen hori, datuak faltsutzen badira, honako alderdi hauen egiazkotasunari dagokionez:
  • Enpresa eskatzaileak laguntza-deialdiaren agindu honetako artikuluetan eskatzen diren baldintza guztiak betetzen dituela.
  • Beste erakunde publiko edo pribatu batzuei inbertsio berberetarako eskatutako eta/edo haiengandik jasotako laguntzak aitortu dituela.
  • Enpresa eskatzailea ez dagoela zigor eta administrazio-arloan dirulaguntza edo laguntza publikoak lortzeko aukera galtzearekin zigortuta, ezta horretarako ezgaitzen duen legezko debekuen eraginpean ere.
  • Enpresa eskatzailea ez dagoela Euskal Autonomia Erkidegoko Administrazio Orokorrak eta haren erakunde autonomoek emandako izaera bereko laguntzen edo dirulaguntzen esparruan hasi eta oraindik izapidetzen ari den itzultze edo zehapen-prozeduraren batean.
  • Ingurumen-kalteak eta eragindako galerak konpontzeko eta ordaintzeko neurri zuzentzaile egokiak gauzatu dituela, eta, hala badagokio, zehapena ordaindu duela, Euskadiko Ingurumen Administrazioaren abenduaren 9ko 10/2021 Legean eta Hondakinei eta Lurzoru Kutsatuei buruzko apirilaren 8ko 7/2022 Legean aurreikusitako arau-hauste astun eta oso astunengatik zehatu badute.
  • Dirulaguntzak itzultzeko betebeharrak ordainduta dituela.
  • Ez dagoela berreskuratzeko agindu baten mende, Batzordeak aurretiaz hartutako erabaki baten bidez laguntza bat legez kanpokotzat eta barne-merkatuarekin bateraezintzat jo izanaren ondorioz, eta ez dela krisian dagoen enpresa bat, krisialdian dauden enpresa ez-finantzarioak salbatzeko eta berregituratzeko estatu-laguntzei buruzko Erkidegoko zuzentarauen arabera (EBAO, 2014/C 249/01).
  • Egoera erregularizatuta duela Ogasunarekin eta Gizarte Segurantzarekin.
  • Dirulaguntzei buruzko Lege Orokorraren 13. artikuluan eskatutako baldintzak betetzen dituela.

  Eskabideak ez badira osorik betetzen, edo haiekin batera ez bada eskatutako dokumentazio guztia aurkezten, erakunde eskatzaileari 10 egun balioduneko epea emango zaio, bitarteko elektronikoen bidez, akatsa zuzen dezan edo aginduzko dokumentuak aurkez ditzan, eta ohartaraziko zaio ezen, hala egin ezean, eskaeran atzera egin duela ulertuko dela, Administrazio Publikoen Administrazio Prozedura Erkidearen Legean aurreikusitakoaren arabera.

  Nolanahi ere, dirulaguntza hauek kudeatzen dituen organoak, Industriaren eta Energia Trantsizioaren zuzendariak, beste edozein agiri edo informazio eskatu ahal izango die erakunde eskatzaileei, beharrezkotzat jotzen badu haiek aurkeztutako eskabidea behar bezala ulertu, ebaluatu eta tramitatu ahal izateko. Agindu honetan berariaz aurreikusi ez diren gaietan, Administrazio Publikoen Administrazio Prozedura Erkidearen urriaren 1eko 39/2015 Legean xedatutakoa aplikatuko da.