Halloween ospatuko duten edukiera handiko bederatzi lokaletako segurtasuna ikuskatu du Ertzaintzak
2017.eko urriak 23
Aurretiazko kontrol-kanpaina Ertzaintzaren unitate horretako ertzainek egiten dute urriaren 23tik 30era bitartean, Eusko Jaurlaritzako Segurtasun Sailaren Joko Zuzendaritzaren gainbegiradapean. Kanpaina horretan bisitatzen dituzte gau horretarako ospakizunak programatu dituzten Euskadiko edukiera handiko bederatzi diskotekak (6 Bizkaian, 2 Araban eta 1 Gipuzkoan).
Agenteek ostalaritza-establezimendu horietako bakoitzaren Larrialdi Planean ezarritako segurtasun-neurriak betetzen direla egiaztatzen dute. Horretarako, ebakuazio-bideak funtzionamendu-egoera onean daudela eta behar bezala seinaleztatuta daudela egiaztatzen dute. Era berean, suteen kontra babesteko bitartekoak, horien kokalekuak eta seinaleztapen egokia ikuskatzen dute. Bestalde, une horretara arte saldutako sarrera kopurua kontrolatzen dute, baita jai ezagun horretarako aurreikusten den asistentzia eta sarrera eta edukiera kontrolatzeko erabiliko diren bitartekoak ere.
Joko eta Ikuskizun Unitateko agenteek aisia-establezimendu horietako arduradunei gogorarazi diete kontrolatu beharko dutela 18 urte baino gutxiagoko gazteak ez direla sartzen.
Urriaren 31ko gauean bertan areto horietan egingo den ikuskapen batekin osatuko da aurretiazko lan hori. Bereziki kontrolatuko da edukieraren mugak errespetatzen direla eta ebakuazio-bideak libre daudela.