Euskal Herriko Agintaritzaren Aldizkaria

108. zk., 2017ko ekainaren 8a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN ETA AZPIEGITURA SAILA

2838

EBAZPENA, 2017ko apirilaren 10ekoa, Energiaren, Meategien eta Industria Administrazioaren zuzendariarena, zeinaren bidez egiaztatzeko entitate baimenduaren izendapena berritzen baitzaio Futuro Tecnológico Español, S.L. (Futtec, S.L.) enpresari, jendeari beltzarantze-zerbitzua eskaintzea helburu duten erradiazio ultramoreen bidezko beltzarantze artifizialeko aparatuen egiaztapenak egiteko instalazioaren tokian bertan.

Erreferentzia: DAI-MET/UV-01/17.

AURREKARIAK

1.– Industria eta Meategiak Administratzeko zuzendariaren 2005eko azaroaren 2ko Ebazpenaren bidez, Futtec, S.L. enpresari baimena eman zitzaion baimendutako laborategi onetsi legez beltzarantze artifizialeko izpi ultramoreko aparatuen –EAEn instalatuak– egiaztapen ofiziala egiteko.

2.– Industria Administrazioaren eta Segurtasuneko zuzendariaren 2012ko martxoaren 26ko Ebazpenaren bidez, Futtec, S.L. enpresari (helbidea: Ercilla kalea, 8-1 eskuma, Bilbao) baimena eman zitzaion egiaztatzeko entitate baimendu legez jendeari beltzarantze-zerbitzua eskaintzeko erradiazio ultramoreen bidezko beltzarantze artifizialeko aparatuen egiaztapenak egiteko instalazioaren tokian bertan.

3.– 2017ko otsailaren 24an, Futtec, S.L. enpresaren izenean eta ordezkaritzan diharduen David Baeza Moyanoren eskabide bat jaso zen Bizkaiko Lurralde Ordezkaritzan, hain zuzen ere, egiaztatzeko entitate baimenduaren izendapena berritzeko izpi ultramoreen bidezko beltzarantze artifizialeko aparatuen –EAEn instalatuak– egiaztapen ofiziala in situ egiteko entsegu-laborategi onetsi legez.

Eskariarekin batera, hauek aurkeztu ditu: larrua izpi ultramoreen eraginpean jartzeko aparatuetarako entsegu-laborategi legez aritzeko Egiaztatze Erakunde Nazionalak (ENAC) emandako egiaztatzea (455/LE 986 zk.; 2015-07-31ko 10 berrikuspen teknikoaren eranskina); langile kualifikatuen zerrenda; baliabide teknikoen zerrenda, eta Bizkaiko Lurralde Ordezkaritzako zerbitzu teknikoen aldeko txostena, zeinetan egiaztatzen baita betetzen dituela 2007ko martxoaren 8ko Aginduan eta 2013-07-05eko 1 Berr. UV-01 Jarraibidean ezarritako eskakizunak.

Espediente hau ebazteko, beharrezkoa da honako hauek aintzat hartzea:

ZUZENBIDEKO OINARRIAK

1.– Energiaren, Meategien eta Industria Administrazioaren Zuzendaritzak du ebazpen hau emateko eskumena, hala ezarrita baitago Ekonomiaren Garapen eta Lehiakortasun Sailaren egitura organikoa eta funtzionala ezartzen dituen apirilaren 9ko 190/2013 Dekretuaren 13. artikuluan (2013-04-24ko EHAA).

2.– Abenduaren 27ko 1002/2002 Errege Dekretuaren bidez, erradiazio ultramoreen bidez beltzarantzeko aparatuen salmenta eta erabilera arautu zen. Errege-dekretu horren 3. artikuluan, aparatuak erabiltzeko baldintzak ezarri ziren, eta 11. artikuluan, aldiz, ezarri zen eskumena duen administrazioak baimendutako erakunde batek burutu beharko dituela berrikusketa teknikoak.

3.– Urriaren 28ko 265/2003 Dekretuaren bidez arautu zen erradiazio ultramoreen bidez beltzarantzeko jarduera, eta, bertan ezarritakoaren arabera, entsegu-laborategi onetsiek edo baimendutako kontrol-erakundeek egin behar dituzte aparatuen egiaztapenak; bestela, baldin eta egiaztapena duen erakunderik ez badago, laguntza teknikoko zerbitzu baimenduek egingo dute, behin-behingoz.

4.– Industria, Merkataritza eta Turismoko sailburuaren 2007ko martxoaren 8ko Aginduaren bidez, beltzarantze artifizialeko aparatuen egiaztapen teknikorako erakundeen jarduerak arautu eta titularrek instalazioen egiaztapen teknikoa egiteko bete beharreko zereginak zehaztu ziren. UV-01 Jarraibideak, bere aldetik, ikuskatzeko prozedura, egiaztatzeko erakundeen baimena eta horien aldizkako kontrola zehazten ditu.

5.– Futtec, S.L. enpresak, aurkeztu dituen agirien bidez, egiaztatu du betetzen dituela onetsitako laborategi gisa beltzarantze artifizialeko aparatuak egiaztatzeko entitate legez baimentzeko baldintzak.

Aurreko legezko arauak eta aplikatu beharreko gainerako xedapen orokorrak aztertu ondoren, honako hau

EBAZTEN DUT:

Lehenengoa.– Baimena ematea Futtec, S.L. enpresari (helbidea: Ercilla kalea 8-1. esk., Bilbao) entitate baimendu legez erradiazio ultramoreen bidez beltzarantzeko aparatuak Euskal Autonomia Erkidegoan egiaztatu ahal izateko ofizialki onetsitako laborategi gisa.

Bigarrena.– Ondoren adierazten diren baldintzen menpe egongo da baimen honen edukia eta norainokoa:

1.– Orokorrak.

a) Bizkaiko Lurralde Ordezkaritzak egingo dituen ikuskaritza eta zaintza-lanen menpe jarriko da entitatea, eta baimena emateko baldintzak betetzen direla egiaztatzeko behar beste ikuskaritza egingo dute ordezkaritza horretako teknikariek.

b) Baimen honen indarrez Futtec, S.L.k burututako egiaztapenak egiaztapen-ziurtagiria eta aparatuari erantsiko zaion egiaztapen-etiketa oinarri hartuta bermatuko dira. Ziurtagirian eta etiketan identifikatu egin beharko da egiaztapen-enpresa hori.

c) Entitate horri zenbaki hau izendatu zaio:

48/LAB/01/UV

– Lehen bi digituek lurraldearen kodea izendatzen dute (Araba: 01; Gipuzkoa: 20; Bizkaia: 48).

– Hiru hizkiek (LAB) onetsitako laborategi izendatzen dute.

– Hurrengo bi digituak (01) zuzendaritza honek Futtec, S.L. beltzarantzeko aparatuen egiaztapenak burutu ahal izateko baimendutako enpresa legez identifikatzen duen zenbakiari dagozkio.

– Hurrengo hizkiek (UV) zerbitzu-mota identifikatzen dute.

d) Aparatua egiaztatu ondoren, kanpoko edozein begiralek ikusi ahalko du egiaztapen-etiketa. Kentzerakoan partikuletan degradatzeko modukoa izan beharko du etiketak, berriz ez erabiltzeko modukoa.

2.– Eskumenak. Futtec, S.L. enpresak eskumena du edozein ekoizleren beltzarantze aparatuak egiaztatu eta ziurtatzeko, betiere aplikagarriak diren prozedurei jarraituz.

3.– Kokapena. Futtec, S.L.ren helbidea: Ercilla kalea, 8-1 eskuma, Bilbao, Bizkaia.

4.– Kalibrazioak eta metodoak.

a) Enpresak neurketak egiteko erabiltzen dituen tresnen zerrenda xehatu bat du Industria Administrazioaren eta Segurtasunaren Zuzendaritzak. Tresna horiek arauzkoak dira, eta eskumena duen erakunde batek modu ofizialean kalibratu beharko ditu urtero.

b) Tresnetan aldaketaren bat gertatuz gero, Bizkaiko Lurralde Ordezkaritzaren bidez Industria Administrazioaren eta Segurtasunaren Zuzendaritzari jakinarazi beharko zaio, modu fede-emaile bat erabilita.

5.– Sei hilez behingo memoria. Sei hilero, garatutako jarduerak jasoko dituen txostena aurkeztuko du entitateak Industria, Ekonomiaren Garapen eta Lehiakortasun Sailaren Bizkaiko Lurralde Ordezkaritzan. Beltzarantzeko aparatu egiaztatuak, kokalekuak eta emaitzak emango ditu aditzera txosten horretan. Zuzendaritza honek onartutakoa izango da txostenaren formatua. Horretaz gain, kalibratu diren enpresaren egiaztapen-tresnak adieraziko dira, horiei dagozkien ziurtagiriak erantsita.

6.– Aplikatu beharreko gehieneko tarifak.

1) Lehenengo egiaztapena, aparatu bakoitzeko.

Aparatu bakarra duten bezeroak 146,28 euro + BEZa.

Bi aparatu edo gehiago duten bezeroak 120,00 euro + BEZa.

2) Onartu gabeko aparatu beraren bigarren egiaztapena.

Tarifa: 0,40 €/km

7.– Baimen honek 2010-04-22ra arteko indarraldia izango du, eta interesdunak data hori baino lehen eska dezake hura berriztatzea, betiere Beltzarantze aparailuak egiaztatzeko entitate baimendunak berriztatzeari buruzko 2007ko martxoaren 8ko Aginduan ezarritako baldintzak betez.

Hirugarrena.– Ebazpen hau entitate interesdunari jakinarazteko eta Euskal Herriko Agintaritzaren Aldizkarian argitaratzeko agintzen da.

Ebazpen honek ez dio amaiera ematen administrazio-bideari; beraz, beraren aurka, gora jotzeko errekurtsoa jar dakioke Industriako sailburuordeari, hilabeteko epean, ebazpen hau jakinarazi eta hurrengo egunetik aurrera, betiere Administrazio Publikoen Administrazio Prozedura Erkideari buruzko urriaren 1eko 39/2015 Legearen 122. artikuluan xedatutakoarekin bat.

Vitoria-Gasteiz, 2017ko apirilaren 10a.

Energiaren, Meategien eta Industria Administrazioaren zuzendaria,

AITOR PATXI OREGI BAZTARRIKA.

Azterketa dokumentala