Euskal Herriko Agintaritzaren Aldizkaria

1. artikulua.– Xedea.

Agindu honen xedea honako hau da: etorkinei laguntzeko eta hauen autonomia pertsonala modu integral eta liberalizatzaile batez sustatzeko xedea duten irabazi asmorik gabeko Erakunde Pribatuen funtzionamendurako laguntza ekonomikoetarako deialdia egitea. Laguntzen helburua, berriz, atzerriko etorkinen gizarte eta laneko integrazioa da. Programak burutzeko epea 2004. urtea da.

Egoerarik txarrenean dauden pertsonentzako arretari lehentasuna emango zaio, era honetan pertsona hauek esparru ezberdinetan bertako biztanleekin baldintza-berdintasunean parte hartu ahal izan dezaten.

Berariazko helburu gisa gizarte-bazterketaren eta pobreziaren kontrako borroka gauzatzea edo horretan parte hartzea duten proiektu eta jarduerek ez dute diru-laguntzarik jasoko.

2. artikulua.– Erakunde onuradunak.

Honako hauek jaso ahal izango dituzte laguntzok: indarrean dagoen legeriari jarraiki eratuta dauden eta immigrazioaren esparruan integrazio-proiektuekin lan egiten duten irabazi asmorik gabeko berezko edo partzuergoko erakunde pribatuek.

3. artikulua.– Aurrekontu-kreditua.

Diru-laguntza jaso dezaketen 2004ko programetarako aurrekontu-kreditua 552.000,00 euro da. Aurrekontu-kredituaren zenbateko orokorra ekainaren 25eko 155/2002 Dekretuaren 3.1 artikuluan aurrez ikusitako baldintzetan aldatu ahal izango da.

4. artikulua.– Esleipen eta ponderazio irizpideak.

1.– Laguntzetarako esleipen eta ponderazio irizpideak ondokoak izango dira:

a) Jarduerak atzerriko etorkinen autonomia pertsonala sustatzera eta gainerako herritarrekin gizarteratzera zuzentzea. 10 puntura bitartean

b) Genero-ikuspegia barne hartzea, emakumezkoen eta gizonezkoen egoera, baldintza eta behar ezberdinak kontuan hartuta. 10 puntura bitartean

c) Aurreko ekitaldietan hasi ziren eta interes publikoko arrazoiak direla eta jarraitzea eskatzen duten programa edo jardueren jarraitasuna sustatzea. 10 puntura bitartean.

d)Erakundeak garatutako jarduera integrazio-esparruan dagoen eskarira egokitzea. 10 puntura bitartean.

e) Bestelako erakunde publiko edo pribatuek herriko jardueraren xedeari emandako babes maila. 10 puntura bitartean.

f) Esku-hartzearen hartzaile izan daitezkeen pertsonek programa lantzen eta gauzatzen parte hartzea, gizartearen parte-hartzea sustatzeko, esku-hartzea behar eta berezitasunetara egokitzeko eta gizarteratzeko irizpide orokorraren barruan. 10 puntura bitartean.

g) Gizarte-baliabide publiko zein pribatuen koordinazio eta optimizaziorako ekintzak bultzatzea. 10 puntura bitartean.

h) Programaren bideragarritasuna ondokoak kontuan hartuta: ezarpen-maila, bazkide, laguntzaile edo Erakundeari lotutako pertsonen kopurua eta Erakundeak finantzaketan izandako partaidetza kontuan hartuta. 10 puntura bitartean.

i) Ebaluazio-planak eta ebaluazio-adierazleak izatea. 10 puntura bitartean.

j) Euskal kulturaren eta euskararen ezagutza sustatzea integrazioa esparru guztietan errazteko baliabide gisa. 10 puntura bitartean.

2.– Administrazioak, izaera orokorrez eta erakunde onuradunekin bat etorriz, diru-laguntza ematen duen ebazpenaren ondoren aribideko ekitaldirako aurrez ikusitako jarduerak egiteko bidezkotzat hartzen diren elementu gehigarriak finkatu ahal izango ditu. Elementu gehigarri horiek, Agindu honen lehen artikuluan ezarritako laguntzaren xedearen definizio zehatza erabat errespetatuta finkatuko dira.

5. artikulua.– Prozedura.

Laguntzak emateko prozedura lehiaketarena izango da eta Euskal Autonomia Erkidegoko Ogasun Nagusiaren Antolarauei buruzko Legearen Testu Bategina onartzen duen azaroaren 11ko 1/1997 Legegintzako Dekretuaren 51.4 artikuluan aurrez ikusitako prozedura hartuko da halakotzat. Artikulu horretan adierazten denez, lehiaketa da laguntzak emateko erabiltzen den prozedura, hain zuzen ere aurkeztutako eskabideak konparatuz. Horrela, arau erregulatzaileetan aldez aurretik finkatutako balorazio-irizpideak kontuan hartuta, eskabideen arteko lehentasuna ezartzen da eta aipatutako irizpideak aplikatuta baloraziorik handiena lortzen dutenei soilik esleituko zaizkie laguntzak.

6. artikulua.– Ordainketa.

Etxebizitza eta Gizarte Gaietako Sailak onartzen den aurrekontuaren %80ra bitartean finantzatu ahal izango du. Gastuen justifikazioa jatorrizko dokumentuen bidez egingo da eta, salbuespen gisa, dokumentu horien kopia konpultsatuen bidez. Dokumentu hauek bi hilabeteko epean aurkeztu beharko dira, jarduera amaitzen denetik aurrera kontatzen hasita.

Ordainketa zatikatua izango da: %75, emakidaren unean ordainduko da, eta gainerako %25, berriz, aurrekontu osoaren gastuen %100 egin izana aldez aurretik justifikatu ondoren.

7. artikulua.– Eskabideen aurkezpena: forma eta epea.

Eskabideak, Agindu honi I. eranskin gisa gehitutako instantzia bidez eta, II.,III., IV. eta V. eranskinen arabera, beharrezko diren eskabide-orri eta dokumentazioarekin, Etxebizitza eta Gizarte Gaietako Saileko Immigrazio Zuzendaritzan aurkeztuko dira (Donostia kalea, 1 – 01010 Vitoria-Gasteiz).

Nolanahi ere, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluan aurrez ikusitakoa aplikatuko da.

Eskabideak aurkezteko epea hilabetekoa izango da, Agindu hau indarrean sartzen denetik aurrera kontatzen hasita.

Eskabidea aurkezteko unean ondokoak eramango dira:

1.– Eskabide-inprimakia behar bezala beteta, eranskinen arabera.

2.– Zerga-betebeharrak eta gizarte-segurantzarekikoak bete izana egiaztatuko duen Foru Ogasunaren eta Gizarte Segurantzako Diruzaintzaren ziurtagiri eguneratua, agindu hau argitaratu baino hilabete lehenagoko datarekin, gehienez ere, eta Identifikazio Fiskaleko Kodearen fotokopia.

3.– Erakunde eskatzaileak jaso dituen edo eskatuta dituen eta ebazteko geratzen diren diru-laguntzei buruz egindako ziurtagiria eta, hala badagokio, Erakundeak Programa egiteko dagokion partaidetza ekonomikoaren emaitzazko kopuruaren ziurtagiria.

4.– Erakundeak bazkideen, laguntzaileen eta Erakundeari lotutako bestelako pertsonen kopuruari buruz egindako ziurtagiria.

5.– Programan aurrez ikusitako gastuen aurrekontu xehatua.

6.– Programaren deskribapena; helburuen betetzea, jarduteko lehentasunak, eskuragarri dauden baliabideak, Ebaluazio Planak eta laguntzak esleitzeko interesa duten gainerako baldintzak zehaztuko dira.

7.– Hala badagokio, beste antzeko programa batzuen memoriak eta Erakunde eskatzaileak egindako ebaluazioak.

8.– Erakunde eskatzaileak zerbitzu normalizatuen eta jatorriz bertakoak diren pertsonekin baldintza-berdintasunean jardutea eragozten duten oztopoak kentzeko zerbitzuen prestazioan bestelako Erakunde Publiko edo Pribatuekin koordinatzeko egindako jardueren laburpena, eranskinen arabera

9.– Hala badagokio, zenbait Erakundek diru-laguntza partzuergo gisa eskatzen dutenean, Erakundeek Programaren garapenean dituzten konpromisoak bilduko dituen Erakundeen erabakia jasoko duen dokumentuaren ziurtagiria.

10.– Baldintzen betetzea egiaztatzen duten eta deialdi honetan I. Eranskinaren arabera aurrez ikusitako laguntza-eskabidearen azterketarako interesa duten bestelako dokumentuak.

8. artikulua.– Eskabidearen akatsak zuzentzea.

Diru-laguntzak jasotzeko eskabideak osorik betetzen ez badira edo adierazitako dokumentazioa falta bada, interesatuari errekerimendua egingo zaio hamar eguneko epean akatsa zuzen dezan edo aginduzko dokumentuak aurkez ditzan. Halaber, hala egin ezean bere eskaera atzera egintzat hartuko dela adieraziko zaio eta Administrazioa behartuta geratuko da eskaera horri buruzko berariazko ebazpena ematera eta ebazpen hori Herri Administrazioen Araubide Juridikoa eta Administrazio Prozedura Erkidea arautzen dituen azaroaren 26ko 30/1992 Legearen 71.1 eta 42.1 artikuluetan xedatutakoari jarraiki jakinaraztera.

9. artikulua.– Laguntzak kudeatzeko organoa.

Etxebizitza eta Gizarte Gaietako Sailaren 155/2002 Dekretuaren 9. artikuluan aurrez ikusitakoari jarraiki, deialdi honetan aurrez ikusitako laguntzak kudeatzeko zereginak egitea Etxebizitza eta Gizarte Gaietako Saileko Gizarte Gaietako Sailburuordetzako Immigrazio Zuzendaritzari dagokio.

10. artikulua.– Deialdiaren ebazpena.

1.– Etxebizitza eta Gizarte Gaietako Immigrazioko Zuzendariak, Euskal Autonomia Erkidegoko immigrazioaren esparruan jarduerak egiteko laguntzak arautzen dituen Dekretuan aurrez ikusitako kide anitzeko organoak aurkeztu diren eskabideei buruz egindako txostena aldez aurretik aztertu ondoren, diru-laguntzen emakidari buruzko Ebazpena emango du eta erakunde interesatuei jakinaraziko die sei hilabeteko gehieneko epean, Agindu hau indarrean sartzen denetik aurrera kontatzen hasita. Ondoren, ebazpena EHAAn argitaratuko da.

2.– Adierazitako epea amaitu eta jakinarazpena egin ez bada, egindako eskaera ezetsitzat hartu ahal izango da, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 44.1 artikuluan ezarritakoaren ondorioetarako; hala ere, Lege horrek Administrazioari berariaz ezartzen dio ebazpena eman beharra.

11. artikulua.– Betebeharrak.

1.– Agindu honen babesean emandako diru-laguntzen Erakunde onuradunek, immigrazioaren esparruan jarduerak egiteko laguntzak arautzen dituen ekainaren 25eko 155/2002 Dekretuaren 8. artikuluan aurrez ikusitako betebeharrak dituzte.

2.– Adierazitako araudiak aipatzen dituen memoriak eta egiaztagiriak aurkezteko epea bi hilabete izango da, jarduera amaitzen denetik aurrera kontatzen hasita.

AZKEN XEDAPENAK