Euskal Herriko Agintaritzaren Aldizkaria

1. artikulua.– Xedea.

Industria, Merkataritza eta Turismo sailburuaren 2003ko maiatzaren 8ko Aginduaren bitartez arautu zen Euskal Autonomia Erkidegoko Kontsumitzaileen Organizazioei diru-laguntzak emateko programa, eta, hain zuzen ere, 2004ko ekitaldirako laguntza horien deialdia egitea da ebazpen honen xedea.

Helburu hori betetze aldera, 491.920 euro zuzenduko dira, Euskal Autonomia Erkidegoaren Aurrekontu Orokorretan 2003ko ekitaldirako eta arlo horretarako izendatutako aurrekontu-kredituari jarraituz.

– 2003ko maiatzaren 8ko Aginduaren 4.a) artikuluak jasotzen dituen gastuak finantzatzeko 225.000 euroko aurrekontu kreditua xedatzen da. Funtzionamenduak, mantentze-lanek, defentsa juridikoak eta azpiegiturak eragindako bestelako gastuak dira horiek.

– 2003ko maiatzaren 8ko Aginduaren 4.b) artikuluak jasotzen dituen gastuak finantzatzeko 255.365 euroko aurrekontu kreditua xedatzen da. Kontsumo proiektuek eragindako gastuak dira horiek.

– 2003ko maiatzaren 8ko Aginduaren 4.c) artikuluak jasotzen dituen gastuak finantzatzeko 11.555 euroko aurrekontu kreditua xedatzen da. Instalatzeak, berritze-lanek, zabaltzeak edo ekipamenduak eragindako gastuak dira horiek.

Horretarako, betiere diru-laguntzei buruz ebazpena eman aurretik, eskatutako laguntzak guztira zenbatekoak diren ikusi behar da, eta, baldin eta Industria, Merkataritza eta Turismo Sailak beste programa batzuk burututakoan aurrekontuko diru-kopururik ahitu gabe geratzen bada, aurrekontuetan erabilgarri dagoen diruari ere begiratu behar zaio. Horrelako egoerarik gertatuz gero, horren berri jakinarazi behar da Merkataritza eta Kontsumo sailburuordearen ebazpen bidez.

2. artikulua.– Betekizunak.

Eskabidea egin nahi dutenek, Industria, Merkataritza eta Turismo sailburuaren 2003ko maiatzaren 8ko Aginduan (2003ko maiatzaren 29ko EHAA) iragarritako diru-laguntzetakoren bat eskuratu ahal izateko, agindu horretako 3. artikuluan ezarritako betekizunak errespetatu beharko dituzte.

3. artikulua.– Eskabideak eta epea.

1.– Eskabidea betetzeko eredua Eusko Jaurlaritzako Industria, Merkataritza eta Turismo Saileko lurralde-bulegoetan jaso daiteke, edo, bestela, interneteko helbide honetan ere bai: www.eragintza.net.

2.– Eskabide-orria eta gainerako agiri osagarriak Industria, Merkataritza eta Turismo Saileko Kontsumo Zuzendaritzari zuzenduta bidali beharko dituzte, eta, aurkeztu, Industria, Merkataritza eta Turismo Sailaren lurralde-bulegoetan aurkeztu behar dituzte, edo, bestela, azaroaren 26ko Herri Administrazioen Araubide Juridikoaren eta Administrazio Prozedura Erkidearen 30/92 Legearen 38.4 artikuluan ezarritako lekuetan.

3.– Eskabideak hilabeteko epean aukeztu behar dira, deialdi-ebazpen hau Euskal Herriko Agintaritzaren Aldizkarian argitaratu eta hurrengo egunetik kontatzen hasita.

AZKEN XEDAPENAK