Turismo- enpresak modernizatzeko laguntza programa 2010

1.- Eskabideak, errekerimenduak, jakinarazpenak eta Agindu honetan inplikatutako gainerako kudeaketak bitarteko elektronikoen bitartez egiteko aukera izango da, administrazio-prozeduretan bitarteko elektroniko, informatiko eta telematikoen erabilera arautzen duen abenduaren 18ko 232/2007 Dekretuarekin (22. EHAA, 2008ko urtarrilaren 31koa), Euskal Autonomia Erkidegoko Administrazio Orokorraren eta bere erakunde autonomiadunen erregistroen sarrera, antolaketa eta funtzionamenduari buruzko apirilaren 29ko 72/2008 Dekretuarekin (102. EHAA, 2008ko maiatzaren 30ekoa) eta EAEko Administrazioak prozeduren tramitazio telematikoan erabiliko dituen izaera horizontaleko programa eta aplikazio elektroniko, informatiko eta telematikoak onartzen dituen Informatika eta Telekomunikazioen zuzendariaren 2003ko maiatzaren 13ko Ebazpenarekin bat etorriz.

Aukeratutako izapidea telematikoa bada, jarraibideak eta eskabide-eredua eskuratzeko, eskabide hori Administrazioan aurkezteko, espedienterako sarbidea izateko eta beste hainbat izapide egiteko, www.euskadi.net webgunean sartu beharko da, behin Merkataritza eta Turismoko sailburuordearen ebazpenaren bitartez laguntzen deialdia egin ondoren.

Erakunde eskatzailea ordezkatzeko legezko gaitasuna duen pertsonaren baimendutako sinadura elektronikoaz gain, eskabidearekin batera aurkeztu beharreko dokumentazio guztia eta Administrazioak eska dezakeen dokumentazioa aurkeztuko da eskabidearekin batera, administrazio-prozeduretan bitarteko elektronikoen, informatikoen eta telematikoen erabilera arautzen duen abenduaren 18ko 232/2007 Dekretuan xedaturikoaren arabera.

2.- Aurreko aukeraren alternatiba gisa, Turismo Zuzendaritzara zuzendutako eskariaren bitartez ere egin ahal izango da eskabidea; bide hori aukeratuz gero, Industria, Berrikuntza, Merkataritza eta Turismo Sailaren dagokion Lurralde Ordezkaritzan aurkeztu beharko da, zuzenean edo Herri Administrazioen Araubide Juridikoaren eta Administrazio Prozedura Erkidearen Legean aurreikusitako baliabideen arteko edozeinen bitartez.

3.- Industria, Berrikuntza, Merkataritza eta Turismo Sailaren edozein lurralde ordezkaritzatan eskabide-eredu bat eta inprimakiak eskainiko dira, edo bestela www.euskadi.net web-orrian egongo dira eskuragarri, behin laguntzen deialdia egin ondoren Merkataritza eta Turismoko sailburuordearen ebazpenaren bitartez.

Erakunde eskatzailea ordezkatzeko legezko ahalmena duenak sinatuko du eskaria.

4. – Enpresa eskatzaileek berariaz horretarako prestatu diren eskabide-eredu eta inprimakiak bete beharko dituzte. Horiekin batera, zinpeko aitorpenak aurkeztu beharko dituzte, honako puntu hauek direla-eta:

a) Eskabidearen ekitaldiaren aurreko ekitaldiko abenduaren 31ko langile kopurua, hilabete horretako TC2 inprimakiaren arabera, sexuaren arabera bereizita.
b) Eskabidea egin aurreko ekitaldiko abenduaren 31n izandako fakturazioaren zenbatekoa.
c) Eskabidea egin aurreko ekitaldiko abenduaren 31n egindako urteko balantze orokorraren zenbatekoa.
d) ETE ez den enpresa batek edo zenbait ETEk aldi berean, zuzenean edo zeharka, erakunde eskatzailearen kapitalaren % 25etik gorako partaidetza ez dutela egiaztatzen duen dokumentua.
e) Proiektu bererako beste erakunde publiko edo pribatuen aldetik jasotako laguntzak.
f) Azken hiru ekitaldietan enpresak jasotako laguntzak, laguntza eskatu den urtea azken urtearen erreferentziatzat hartuta.
g) Erantzukizun-aitorpena, erakunde eskatzailea zigor- eta administrazio-arloan diru-laguntza edo laguntza publikoak lortzeko aukera galtzearekin zigortuta ez dagoela adierazten duena, ezta hartarako ezgaitzen duen legezko debekuaren eraginpean ere, sexu-diskriminazioaren ondoriozko debekuak barne, 4/2005 Legearen (otsailaren 18koa, Emakumeen eta Gizonen arteko Berdintasunerakoa) Azken Xedapenen arteko seigarrenean xedatutakoari jarraiki.

Datu horiek eskabidean jasota ageri dira, eta, espedientea izapidetzerakoan, datuok egiaztatzeko eska liteke edozein momentutan, egia direnentz frogatzearren.

Eskatzaileak gorago aipatutako zinpeko aitorpenaren barnean hartutako daturen bat faltsutzen badu, indarrean dagoen zigor-erregimena ezarriko zaio, administratiboa zein penala.

Industria, Berrikuntza, Merkataritza eta Turismo Sailak datuak babespean tratatzeko konpromisoa hartzen du, izaera pertsonaleko datuak babesteari buruzko abenduaren 13ko 15/1999 Lege Organikoan eta aplikatu beharreko gainerako araudian ezarritakoarekin bat etorriz.

5. – Eskatzaileek honako dokumentazio hau erantsi beharko diote eskabideari:

a) Pertsona eskatzailearen ordezkaritza-ahalmenaren eta eratze-eskrituraren fotokopia, geroztik eskriturak izandako aldaketekin eta dagozkion erregistroetako inskripzioa ere bai.
b) Pertsona juridikoaren identifikazio fiskaleko txartelaren fotokopia
c) Eskatzailearen NANaren fotokopia.
d) Jarduera Ekonomikoen gaineko Zergan izandako altak eta bajak egiaztatzeko agiria.
e) Gizarte Segurantzarekiko betebeharrak beteta dituela adierazten duen ziurtagiriaren kopia.
f) Enpresa eskatzailearen Hirugarrenaren Altari buruzko dokumentua, soilik aurretik aurkeztu ez bada edo datuak aldatu badira.
g) Eskabidearen xede den inbertsio-proiektuan sartutako aktiboen behin betiko fakturak (originalak edota horien fotokopia konpultsatuak). Inbertsioen egiaztapena faktura elektronikoen bidez ere egin ahal izango da, betiere zerga-arloan onartuak izateko betekizunak betetzen badituzte.
h) Zerga-betebeharrak eguneratuak izan beharko dituzte erakunde onuradunek. Euskal Autonomia Erkidegoko Aurrekontu Orokorren kargurako edo haren ordezko araudiko diru-laguntzen erakunde onuradunen zerga-betebeharrak egiaztatzeari buruzko Ogasun eta Finantza sailburuaren 1991ko urriaren 7ko Aginduan ezarritako kasuetan, Euskal Autonomia Erkidegoaren Administrazioak, betiere erakunde eskatzailearen esanbidezko baimena badu, laguntzen eta diru-laguntzen erakunde eskatzaileen zerga-betebeharrak bete izanaren egiaztagiria eskatuko die zuzenean zerga-alorreko organo eskudunei. Erakunde interesdunen esanbidezko baimen hori espedientean jasota ez badago, dagokion ziurtagiria aurkeztu beharko dute.
i) Hala badagokio, egiaztatutako kalitate-arauak bete izanaren ziurtagiri eguneratuaren kopia (ISO 9001:2000, ICTEko Turismo Kalitateari buruzko Marka); eta, EFQM errekonozimenduren bat jaso badu, Euskaliten ziurtagiriaren edo egindako kanpo-ebaluazioaren emaitzaren kopia.
j) Hala badagokio, EAEko turismo-elkarte sektorial bateko edota turismoa dinamizatzeko elkarte edo erakunde publiko-pribatu bateko kidea dela egiaztatzen duen agiri eguneratua.

6.- Jadanik Industria, Berrikuntza, Merkataritza eta Turismo Sailaren eskura dauden indarreko dokumentuak ez dira nahitaez aurkeztu beharko. Kasu horretan, eskabide-orrian adierazi beharko du eskatzaileak zer egunetan eta zer organo edo bulegotan aurkeztu zituen aipatutako dokumentuak, azaroaren 26ko 30/1992 Legearen 35. artikuluaren f) idatz-zatian ezarritako baldintzei jarraiki.

7.- Erakunde eskatzaileek laguntza jasotzeko eskaera aurkeztu ahal izango dute horrekin batera aurkezten den dokumentazioarekin, haiek aukeratu duten hizkuntza ofizialean. Gainera, laguntza-eskabidetik eratorritako jardunetan eta prozedura osoan, erakunde eskatzaileak aukeraturiko hizkuntza baliatuko da, euskararen erabilera normalizatzeko azaroaren 24ko 10/1982 oinarrizko Legean ezarritakoaren arabera.