Euskal Herriko Agintaritzaren Aldizkaria

206. zk., 2026ko urriaren 28a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LANBIDE-EUSKAL ENPLEGU ZERBITZU PUBLIKOA

4546

EBAZPENA, 2026ko urriaren 20koa, Lanbide-Euskal Enplegu Zerbitzu Publikoaren zuzendari nagusiarena, zeinaren bidez argitara eman baita Euskal Autonomia Erkidegoan enplegu-, prestakuntza- eta laneratze-proiektu integralak garatzeko laguntzen 2026ko eta 2027ko ekitaldietarako deialdia, laneratzera eta lan-merkatuaren beharrizanak asetzera begira, administrazio-erregularizazioko prozesuei lotutako jarduketak txertatuta.

Lanbide-Euskal Enplegu Zerbitzu Publikoaren Administrazio Kontseiluak, 2026ko urriaren 19ko bileran hartutako erabakiaren bidez, Euskal Autonomia Erkidegoan enplegu-, prestakuntza- eta laneratze-proiektu integralak garatzeko 2026. eta 2027. ekitaldietarako laguntzen deialdia onetsi du, laneratzera eta lan-merkatuaren beharrizanak asetzera begira, Lanbideren Estatutuetako administrazio-erregularizazioko prozesuei lotutako jarduketak txertatuta, Lanbide-Euskal Enplegu Zerbitzu Publikoaren Estatutuak onetsi dituen apirilaren 29ko 93/2025 Dekretuak 14.2 artikuluko n) zenbakian xedatutakoarekin bat etorriz.

Horrenbestez, honako hau

EBAZTEN DUT:

Lehenengoa.– Euskal Autonomia Erkidegoaren eremuan enplegu-, prestakuntza- eta laneratze-proiektu integralak garatzeko 2026ko eta 2027ko ekitaldietarako laguntzen deialdia argitaratzea, laneratzera eta lan-merkatuaren beharrizanak asetzera begira, administrazio-erregularizazioko prozesuei lotutako jarduketak txertatuta, Lanbide-Euskal Enplegu Zerbitzu Publikoaren Administrazio Kontseiluak 2026ko urriaren 19ko bileran hartutako erabakiaren bidez onetsia, eta ebazpen honen eranskin gisa jasoa.

Bigarrena.– Jakinaraztea Lanbide-Euskal Enplegu Zerbitzu Publikoaren Administrazio Kontseiluaren Erabaki honek Euskal Autonomia Erkidegoan enplegu-, prestakuntza- eta laneratze-proiektu integralak garatzeko 2026ko eta 2027ko ekitaldietarako laguntzen deialdia onetsi duela, laneratzera eta lan-merkatuaren beharrizanak asetzera begira, Lanbideren Estatutuetako administrazio-erregularizazioko prozesuei lotutako jarduketak txertatuta, eta Euskal Herriko Agintaritzaren Aldizkarian ebazpen hau argitaratu eta hurrengo egunetik aurrera izango dituela ondoreak.

Hirugarrena.– Adieraztea Lanbide-Euskal Enplegu Zerbitzu Publikoaren Administrazio Kontseiluaren Erabaki honen aurka (zeinaren bidez Euskal Autonomia Erkidegoan enplegu-, prestakuntza- eta laneratze-proiektu integralak garatzeko 2026ko eta 2027ko ekitaldietarako laguntzen deialdia onetsi baita, laneratzera eta lan-merkatuaren beharrizanak asetzera begira, administrazio-erregularizazioko prozesuei lotutako jarduketak txertatuta) berraztertzeko errekurtsoa aurkeztu ahal izango zaiola organo berari, hilabeteko epean, ebazpen hau Euskal Herriko Agintaritzaren Aldizkarian argitaratu eta hurrengo egunetik zenbatzen hasita, edo, bestela, administrazioarekiko auzi-errekurtsoa aurkeztu ahal izango dela zuzenean, Vitoria-Gasteizko Administrazioarekiko Auzietako Epaitegian, bi hilabeteko epean, ebazpena argitaratu eta hurrengo egunetik zenbatzen hasita.

Vitoria-Gasteiz, 2026ko urriaren 20a.

Lanbide-Euskal Enplegu Zerbitzu Publikoaren zuzendari nagusia,

FRANCISCO PEDRAZA MORENO.

ERANSKINA

EUSKAL AUTONOMIA ERKIDEGOAN ENPLEGU-, PRESTAKUNTZA- ETA LANERATZE-PROIEKTU INTEGRALAK GARATZEKO 2026. ETA 2027. EKITALDIETARAKO LAGUNTZEN DEIALDIA, LANERATZERA ETA LAN-MERKATUAREN BEHARRIZANAK ASETZERA BEGIRA, ADMINISTRAZIO-ERREGULARIZAZIOKO PROZESUEI LOTUTAKO JARDUKETAK TXERTATUTA

Deialdi honek helburu du langabeei eta, hala badagokio, ibilbidearen unearen arabera deialdian adierazitako beste profil batzuei zuzendutako enplegu-, prestakuntza- eta laneratze-proiektu integralak finantzatzea. Proiektu horiek bideratuta daude pertsona horiek enplegua benetan lortzen laguntzea, lan-merkatuaren beharrizanetara, parte-hartzaileen ezaugarrietara eta laneratzeko benetako aukeretara egokitutako ibilbideak garatuz, eta, hala badagokio, enplegua lortzea baldintzatzen duten administrazio-egoerei lotutako jarduketak barne hartuta, besteak beste, erregularizazio-prozesuak.

Deialdiaren diseinuaren funtsean dago aitortzea lan-merkatuaren zailtasunek ez dietela faktore koiunturalei soilik ihardesten, baizik eta egiturazko itxura dutela jarduera-eremu jakin batzuetan, eta operatiboki artikulatzen dela esku-hartze ildoen medioz eta, parte-hartzaileen enpleguarekiko benetako hurbiltasun-mailaren arabera, esku-hartzea modulatzea ahalbidetzen duten laneratze-mailen bitartez.

Horretarako, beharrezkoa da esku hartzeko eredu integralak bultzatzea, ekoizpen-sarearen beharrizanak langabeen eta erregularizazio-prozesuan dauden pertsonen beharrizanekin batera jorratu ahal izateko. Testuinguru horretan, deialdi honen babesean finantzatutako proiektuak ibilbide konbinatu eta moldagarri gisa eratuta daude, eta modu koherentean integratzen dituzte enpresa-prospekzioko jarduketak, banakako orientazioa eta akonpainamendua, prestakuntza eta, hala badagokio, ekoizpen- eta kontratazio-inguruneetan esperientzia eskuratzea, laneratze eraginkorra, jasangarria eta parte-hartzaileen ezaugarriekin eta lan-merkatuaren benetako eskariarekin lerrokatua hauspotzeko.

Langabeen laneratzea euskal enplegu-politikaren funtsezko ardatzetako bat da, eta lanerako prestakuntzaren arloko politika publikoen lehentasunezko helburua. Testuinguru horretan, deialdi hau ekoizpen-sarearen benetako beharrizanen eta parte-hartzaileen aktibazio-, trebakuntza- eta laneratze-prozesuen arteko lotura indartzeko tresna gisa egituratuta dago, profil profesionalen eta lan-merkatuaren beharrizanen arteko egokitzapena hobetzen eta laneratze eraginkorra, egonkorra eta jasangarria faboratzen laguntzeko.

Testuinguru horretan, beharrezkoa da estrategiak artikulatzea, modu eraginkorrean aurrera egin ahal izan dezagun enpresek langileak hartzeko dituzten beharrizanen eta langabeen enplegagarritasuna hobetzeko prozesuen arteko loturan. Horretarako, lan-merkatuaren benetako eskarira egokitutako profil profesionalak identifikatzea eta parte-hartzaileei laneratze-prozesuan zehar lagunduko dieten ibilbideak garatzea erraztuko duten jarduketak sustatu behar dira.

Zentzu horretan, deialdi honen xede diren jarduketak, lehentasunez, lan-merkatuaren beharrizanei erantzutera bideratuta daude, pertsona parte-hartzaileak benetako enplegu-aukerak dituzten eremuetan sartzea erraztuz.

Ondorioz, xedatutako jarduketen, parte-hartzaileen profilaren eta espero diren laneratze-emaitzen arteko koherentzia bermatuta diseinatu beharko dira proiektuak, laneratze-prozesurako benetan lagungarriak izan daitezen.

Euskal ekoizpen-sarearen azkenaldiko bilakaera aztertuta, agerian utzi da profil profesionalak ekoizpen-prozesuetako aldaketetara egokitu behar direla, bai eta enplegua benetan lortzea erraztuko duten mekanismoak indartu ere. Inguruabar horiek erakusten dute hainbat faktorek eragiten dutela lanpostuak betetzeko eta enplegua lortzeko orduan, hala eskakizun profesionalen bilakaerari lotuta, nola askotariko oztopoak egoteari lotuta.

Inguruabar horiek agerian uzten dute beharrezkoa dela esku hartzeko tresnak finkatzea, ekoizpen-sareak nahiz langabeek dituzten egoerei eraginkortasunez eta egokituta erantzun ahal izateko. Xede horrez, funtsezkoa da enplegagarritasuna hobetzera, enplegua lortzea erraztera eta profil profesionalen eta lan-merkatuaren beharrizanen arteko egokitzapen hobea erdiestera bideratutako hainbat jarduketa modu koordinatuan integratuko dituzten proiektuak artikulatzea.

Ildo horretan, deialdiak jarduketa koordinatuen multzo bat osatzen duten proiektuak sustatzen ditu, haien xedearen eta ezaugarrien arabera. Jarduketa horien artean, besteak beste, enplegua bilatzeko aktibazio intentsiboko jarduketak egon daitezke, hots, esku-hartze espezifikoak, intentsiboak eta epe laburrean enplegua eraginkortasunez lortzera zuzendutakoak:

– Lan-prospekzioko eta -bitartekaritzako jarduketak, kontratazio-beharrizanak identifikatzeko, profil profesionalak doitzeko eta hautaketa-prozesuak errazteko.

– Orientazio-, aholkularitza- eta akonpainamendu-ibilbide pertsonalizatuak, gaitasunak garatzera eta parte-hartzaile bakoitzaren banakako jarraipenera bideratuak.

– Talde-lanerako lanbide-heziketa, enpresen benetako eskakizunetara eta proiektuaren xede diren langintzetara egokitua.

– Banakako pestakuntza lanpostuan, ekoizpen-ingurunean gaitasunak zuzenean eskuratu ahal izateko.

– Enplegurako eta laneratzeko euskarri izango diren jarduketak.

Jarduketa horien konfigurazioak aukera ematen du proiektuak parte-hartzaileen beharrizan espezifikoetara eta ekoizpen-sarearen benetako eskarira egokitzeko, laneratze-prozesu eraginkorragoak eta jasangarriagoak faboratuta.

Ikuspegi horri esker, halaber, laneratzeko orduan aldez aurreko, aldi bereko edo ondorengo prozesu administratiboak ezinbesteko dituzten egoerei heldu ahal zaizkie, bai eta administrazio-erregularizazioko prozesuei edo enplegua ahalbidetuko duen administrazio-egoera batera pixkanaka iristeko prozesuei lotutakoei ere. Testuinguru horretan, edonork parte hartu ahal izango du, hasierako administrazio-egoera edozein dela ere, baldin eta ibilbidean xedatutako jarduketek aukera ematen badute enplegua lortzeko bidean benetan aurrera egiteko, indarrean dagoen araudiaren arabera. Prozesu horiek laneratzea erraztera bideratutako elementu instrumental gisa integratzen dira ibilbideetan, eta ez dira inola ere esku-hartzearen helburu autonomo bihurtuko.

Kontratazio-konpromisoei lotutako prestakuntza-programak laneratzea errazteko eta lan-merkatuaren beharrizanei erantzuteko tresna eraginkor gisa finkatu dira Euskadin. Zehatzago esanda, bereziki egokiak dira buru egiteko lanpostu jakin batzuk betetzeko zailtasunak dauden egoerei, bai hautagai nahikorik ez dagoelako, bai eskura dauden gaitasunen eta enpresen eskakizunen arteko desegokitasunagatik.

Garatutako esperientziek frogatu dute ahalmena dutela emandako prestakuntzaren eta ekoizpen-sarearen benetako beharrizanen arteko egokitzapena hobetzeko, benetako kontratazioa areagotuz eta enpleguaren egonkortasuna faboratuz.

Deialdi honek ikuspegi horretatik jarraitzen du, eta, gainera, malgutasun handiagoko esparru bat txertatzen du, laneratzeak aldez aurretik edo aldi berean aktibazio-, akonpainamendu-prozesuak edo administrazio-erregularizaziokoak eskatzen dituen egoerei erreparatzeko, betiere laneratzera bideratutako tasun finalistari eutsita, deialdi honetan ezarritako baldintzetan.

Atzerritartasunaren arloko arau-esparruaren azkenaldiko bilakaerarekin bat dator ikuspegi hori, atzerritarren laneratze progresiboa errazteko. Zehazki, indarrean dagoen araudiak onartzen du aukera dagoela enplegua berehala kontratatzeari halabeharrez lotuta ez dauden ibilbideen bidez lortzeko, eta hainbat elementu txertatzen ditu, hala nola enplegua aktiboki bilatzen ari dela egiaztatzea, gizarteratze- eta laneratze-prozesuetan parte hartzea eta dagozkion administrazio-baimenak izapidetzen diren bitartean lan egiteko behin-behineko gaikuntza. Esparru horretan, deialdi honetan adierazitako jarduketek bermatu beharko dute atzerritarrei buruzko araudian xedatutakora erabat egokitzen direla, eta ez dute inola ere ekarriko administrazio-baimenen arloan eskumena duten organoen eginkizun propiorik beren gain hartzea.

Testuinguru horretan, laneratzea prozesu progresiboa da, eta hainbat mailatan garatu daiteke, parte-hartzaileen egoeraren eta unean kokatuta dauden ibilbideko puntuaren arabera. Maila horietan sartuta daude bai lan-kontratuak formalizatzea, bai enplegura begira egiaztatu daitezkeen beste aurrerapen batzuk, ezertan galarazi gabe laneratzearen azken emaitzaren irismen desberdina.

Laneratzea progresiboa izateak ez du esan nahi finalista izateari utzi dionik, beti baitago enpleguan benetan sartzera bideratuta, eta, ahal dela, lan-kontratuak formalizatuz gauzatzen da hori.

Proiektuak, hala badagokio, atzerritartasunaren arloan indarrean dagoen araudian xedatu diren administrazio-erregularizaziora iristeko bideekin koherente izanik diseinatu beharko dira, eta, zehazki, sustraitze-arrazoiengatik, modalitate soziolaboraletan eta soziohezitzaileetan, eta Estatuko Administrazio Orokorrak onetsitako erregularizazio-prozesu bereziekin koherente izanik.

Ondore horietarako, xedatutako jarduketek baimen horietarako galdatzen diren baldintzak betetzea erraztu beharko dute, batez ere prestakuntzari, gizarteratzea egiaztatzeari eta lan-eskaintza edo -kontratu bat lortzeari dagokienez, eta proiektuak administrazio-egoera erregularretarako eta enplegua benetan lortzeko trantsizio-tresna gisa eratuko dira, baldin eta hori parte-hartzaileen profilerako eta xedatutako jarduketen tasunerako egokia bada.

Egoera-aniztasun horri erantzuteko asmoz, deialdi honek hainbat jarduketa- eta finantzaketa-ildoren bidez artikulatzen ditu bere tresnak, eta, haiei esker, laneratze-mailei modu bereizian heldu ahal zaie: enpleguari lotutako kualifikazio- eta trebakuntza-prozesuetatik hasi eta enplegua benetan lortzera bideratutako aktibazio intentsiboko jarduketetaraino, berariaz barne hartuta administrazio-erregularizazioarekin lotutako testuinguruetan enplegua lortzeko prozesuak erraztera bideratutakoak, noiz eta haiek eraginkortasunez laneratzeko eta, hala badagokio, lan-kontratuak formalizatzeko beharrezkotzat jotako elementua baitira. Egituraketa horri esker, esku-hartzearen intentsitatea eta euskarri-mekanismoak parte-hartzaileen enpleguarekiko benetako hurbiltasunera egokitu daitezke, betiere bermatuta proiektuak laneratzera bideratuta daudela modu finalistan eta esku-hartze eremu bakoitzean lan-merkatuaren beharrizanetara egokituta daudela.

Ekimen honen bidez, langabeei hobeto laneratzen lagundu nahi zaie, eta ekoizpen-sarearen enplegu-beharrizanak errazago ase, parte-hartzaileen ezaugarrietara eta lan-merkatuaren aukeretara egokitutako ibilbideen medioz, garapen ekonomikoari eta sozialari, ekoizpen-sarearen indarketari eta kalitatezko enpleguaren sorrerari laguntzeko.

Deialdi hau garatzeko eta jasangarri egiteko, Bizialdi Osoko Ikaskuntzari buruzko 1/2013 Legeak azpimarratu du enpleguari lotutako lanbide-heziketako sistema integratu bat eratu behar dela, enplegagarritasuna hobetzera eta laneratzera bideratua, barnean hartuta hasierako lanbide-heziketa eta enplegurako lanbide-heziketa, titulartasun publiko eta pribatuko zentro-sare baten bidez. Bestalde, Euskadiko Lanbide Heziketari buruzko ekainaren 28ko 4/2018 Legeak aurrera egin du eredu horretan, lanbide-heziketako sistema integratu bat sortuz, eta eredu konbinatu bat txertatuz, zeinak berrikuntza aplikatuaren eta ekintzailetzaren eremuetako ikaskuntzak barne hartzen baititu. Ikuspegi hori koherentea da deialdi honen diseinuarekin, prestakuntza-prozesuak eta lan-merkatuaren benetako beharrizanak lotuko dituzten esku-hartze integralak artikulatzera bideratuta baitago.

Lanbide Heziketako Euskal Sistemaren helburuen artean, Lege honek sistema malguak itxuratzea ezarri du, oinarri hartuta emaitzen araberako ikaskuntza-ikuspegia eta prestakuntza-eskaintzen eta hezkuntza- nahiz lan-sistemaren mailen arteko transferentzia erraztuko duten ibilbideen garapena. Aldi berean, lanbide-heziketaren arloan instituzioen arteko koordinazioa bermatuko da, eta langileak ekoizpen-sistemen aldaketetara etengabe egokitzea erraztuko da, langileak ekoizpen-sistemen aldaketetara hobeto egokitzen eta laneratzen lagunduz.

Deialdi honen ikuspegi integralarekin bat etorriz, deialdi honi lotutako prestakuntza-eskaintzaren kudeaketa aplikagarria den Estatuko araudiari ere itsatsita dago. Bereziki, prestakuntza egiaztagarriaren kontuetan, Lanbide Heziketa Antolatzeko eta Integratzeko martxoaren 31ko 3/2022 Lege Organikoa indarrean jarri eta uztailaren 18ko 659/2023 Errege Dekretuaren nahiz uztailaren 9ko 658/2024 Errege Dekretuaren bidez garatu ondoren.

Araudi horretan ezarritako araubide iragankorraren arabera, lanbide-ziurtagirien egungo ordenazioak indarrean jarraituko du erregelamenduz egokitu arte, bai eta Lanbide Kualifikazioen Katalogo Nazionalak ere, Lanbide Gaitasunen Estandarren Katalogo Nazional berria onesten ez den bitartean. Halaber, baimendutako eta egiaztatutako zentroek eta erakundeek prestakuntza-eskaintzak ematen jarraituko dute, Lanbide Heziketako Ikastetxeen Erregistro Orokorra arautu arte indarrean dauden baldintzetan.

Lehendakariaren ekainaren 23ko 18/2024 Dekretuak 7.1.d) artikuluan, Ekonomia, Lan eta Enplegu Sailari esleitu dio Lanbide-Euskal Enplegu Zerbitzu Publikoaren elkarlanarekin garatutako enplegu-politikaren eta enplegurako lanbide-heziketaren arloko eskumena.

Lanbide-Euskal Enplegu Zerbitzu Publikoak, sail horri atxikitako ente publikoa den aldetik, honako eginkizun hauek ditu, besteak beste: enplegu- eta lanerako prestakuntza-programak kudeatzea, eta langileen enplegagarritasuna hobetzeko ekimenak garatzea, apirilaren 29ko 93/2025 Dekretuaren bidez onetsitako estatutuei jaramon eginez.

Orobat, Euskal Autonomia Erkidegoan Lanerako Lanbide Heziketa arautu duen maiatzaren 31ko 82/2016 Dekretuak Lanbideri esleitu dio prestakuntza horren programazioa, kudeaketa eta kontrola Euskal Autonomia Erkidegoan.

Esparru horretan, Lanbideri dagokio langabeentzako prestakuntza-eskaintzak garatzea, deialdi honen moduko ekimenak barne, laneratzera eta lan-merkatuaren beharrizanei erantzutera bideratuta.

Gaur egun, Lanbideri esleitutako kudeaketak prestakuntza egiaztagarria eta Prestakuntza Espezialitateen Euskal Katalogoan jasotako gainerako prestakuntza biltzen ditu. Prestakuntza egiaztagarrian, espezialitate berriak sartu dira Lanbide Heziketako Sistemaren garapenaren ondorioz, 3/2022 Lege Organikoa eta hura garatzeko araudia onetsi ostean.

Esparru horretan, ekimen hau xedatuta dago Lanbide-Euskal Enplegu Zerbitzu Publikoaren 2026-2029 aldirako Dirulaguntzen Plan Estrategikoan, enplegagarritasuna, laneratzea eta enplegu-eskaintzaren eta -eskariaren arteko egokitzapena hobetzera bideratutako helburu estrategikoen barruan, bai eta 4. zeharkako helburuan ere («Aukera-berdintasuna, euskal enplegu-politikaren ardatz nagusia») eta 4.1 gako estrategikoan ere («Laneko alorrean genero-berdintasunaren aldeko konpromisoa»). Plan hori bigarren lehendakariordearen eta Ekonomia, Lan eta Enpleguko sailburuaren 2026ko urtarrilaren 14ko Aginduaren bidez onetsi zen, Dirulaguntzen Araubidea Erregulatzeko abenduaren 21eko 20/2023 Legeak 6. artikuluan xedatutakoa betez, eta Lanbideren webgunean (www.lanbide.euskadi.eus) argitaratu da, «Laguntzak eta Dirulaguntzak» atalean.

Horregatik guztiagatik, Lanbide-Euskal Enplegu Zerbitzu Publikoaren zuzendari nagusiaren proposamenez, zuzenbide pribatuko ente publiko horren Administrazio Kontseiluak, 2026ko urriaren 19ko bilkuran, oinarriak onetsi ditu Euskal Autonomia Erkidegoan langabeentzako enplegu-, prestakuntza- eta laneratze-proiektu integralak finantzatzeko 2026ko eta 2027ko ekitaldietarako laguntzen deialdirako, laneratzera eta lan-merkatuaren beharrizanak asetzera begira, honela:

1. artikulua.– Deialdiaren xedea eta baliabide ekonomikoak.

1.– Oinarri hauen xedea da honako hauek finantzatzeko dirulaguntzak ematea 2026ko eta 2027ko ekitaldietarako:

a) Enplegu- eta prestakuntza-proiektu integralak, langileak hartzeko beharrizana duten sektoreetan eta enpresetan laneratzea errazteko, parte-hartzaileen ezaugarriekin eta benetako enplegu-aukerekin bat etorriz.

b) Administrazio-erregularizazioko prozesuen aurreko, aldibereko edo ondorengo prozesuen esparruan laneratzea erraztera bideratutako proiektuak eta jarduketak, bereziki enplegua bilatzeko eta benetan enplegua lortzeko aktibazio intentsiboko jarduketen bidez, prozesu horiek beharrezkoak direnean laneratzeko, eta betiere instrumentalak laneratzeko helburuari dagokionez.

c) Goiko letretan adierazitako proiektu integraletatik eratorritako lan-kontratuei lotutako dirulaguntzak, laneratzeko ibilbideen azken emaitza gisa.

Proiektu guztiek, diseinuaren arabera, jarduketa hauek bildu ditzakete:

– Enpresa-prospekzioa eta lan-bitartekaritza.

– Orientazio- eta laguntza-ibilbide pertsonalizatuak.

– Talde-lanerako prestakuntza.

– Ekoizpen-inguruneko lanpostuan banaka lan egiteko prestakuntza.

– Enpleguan eta kontratazioan euskarri izateko jarduketak, proiektuaren laneratzeko helburuarekin koherente izanik.

Diruz lagundu daitezkeen jarduketak zehatzago garatuko dira deialdi honen 3. artikuluan.

Jarduketa horien konbinazioak ibilbide integral bat eratzen du, benetako laneratze egonkorra eta kalitatezkoa lortzera bideratua, proiektuaren jarduketa-ildoaren arabera eta parte-hartzaileak dauden unearen arabera egokitu daitekeena.

Proiektuaren jarduketa-ildoaren arabera, xedatutako jarduketek modu bereizian erantzun beharko diote proiektuaren helburu nagusiari. Zehazki, 1. ildoko proiektuetan lehentasuna emango zaie enpleguari lotutako kualifikazio- eta trebakuntza-jarduketei; 2. ildoan, aktibazio intentsiboko eta enplegua benetan lortzeko jarduketei, administrazio-erregularizazioko prozesuei lotutakoak barne, hala badagokio; eta 3. ildoan, lan-kontratuak formalizatzeari, ibilbidearen azken emaitza gisa. Egikaritze-baldintzak, emaitza galdagarriak eta ebaluazio-irizpideak bereizita aplikatuko dira, jarduketa-ildo horren arabera.

Goikoarekin bat etorriz, deialdi honetan xedatutako jarduketak esku hartzeko eta finantzatzeko hainbat ildotan egituratzen dira, zeintzuek laneratze-prozesuaren uneei erantzuten baitiete, eta barne hartzen baitituzte bai prospekzioko, orientazioko eta prestakuntzako jarduketak, bai enplegua bilatzeko aktibazio intentsiboko jarduketak, eta, hala badagokio, lan-kontratuak formalizatzeari lotutakoak, lan-merkatuaren ezaugarrien eta proiektua kokatzen den laneratze-ibilbidearen unearen arabera.

Deialdi honen ondoreetarako, definizio hauek hartuko dira kontuan:

a) Laneratze eraginkorra: 6. artikuluan esandakoaren arabera, deialdi honetan galdatutako gutxieneko baldintzak betetzen dituen lan-kontratu bat formalizatzea. Kontratu horren balioa 18. artikuluan ezarritako kitapen-irizpideen arabera zehaztuko da.

b) Laneratze progresiboa: enplegurako aurrerapen eraginkorra egiaztatzea, zenbait jarduketatan parte hartuz (aktibazioa, bitartekaritza, prestakuntza edo ibilbideko mugarriak betetzea), baldin eta jarduketa horiek aldez aurretik definituta badaude onetsitako proiektuan, objektiboki egiaztagarriak badira, behar bezala dokumentatuta badaude eta koherenteak badira proiektua laneratzeko helburuarekin.

c) Ibilbidearen amaiera: parte-hartzaile bakoitzarentzat xedatutako jarduketak modu substantzialean egikaritzea, proiektuan onetsi den diseinuaren arabera, 18. artikuluan ezarritako egikaritze- eta partaidetza-irizpideei jarraituz.

Deialdi honen ondoreetarako, laneratzeak esan nahiko du benetan laneratuko dela edota, hala badagokio, emaitzak ikusten dituela laneratze progresiboan, hargatik eragotzi gabe dirulaguntzaren zenbatekoa zehazteko, kitatzeko eta ez-betetzeak mailakatzeko tratamendu desberdina, 18. eta 23. artikuluetan adierazitakoaren arabera.

Definizio hauek deialdiaren ondore guztietarako aplikatuko dira, bereziki dirulaguntzen balorazio-, justifikazio- eta kitapen-prozesuetan, hargatik eragotzi gabe 18. eta 23. artikuluetan adierazitako berezitasunak.

Proiektu integralak, osorik edo zatika, gizarteratzeko eta laneratzeko zailtasun bereziak dituzten kolektiboetako pertsonei zuzentzen zaizkienean, inguruabar pertsonalek, sozialek edo administratiboek enplegua lortzea mugatzen dutelako, deialdiaren xedeak gizarteratze- eta laneratze-ibilbide integralak garatzea ere hartuko du barnean, eta banakako akonpainamendu-, jarraipen- eta euskarri-jarduketa espezifikoak txertatuko ditu, laneratzearen benetako bideragarritasuna eta jasangarritasuna bermatze aldera.

Era berean, programa horiek lagundu ahal izango dute administrazio-erregularizazioko prozeduretan eta bizileku- eta lan-baimenak lortzeko prozeduretan eskatzen diren baldintzak betetzen, atzerritartasunaren arloan indarrean dagoen araudiaren arabera, eta diruz lagundutako jarduketek ez dute xede izango, inola ere, atzerritartasunaren arloko administrazio-prozedurak zuzenean finantzatzea.

Diruz lagundutako jarduketak pertsonak kualifikatzera eta kontratatzera bideratu beharko dira, lan-merkatuaren beharrizanen eta proiektuan identifikatutako enplegu-aukeren arabera, betiere ibilbidearen diseinuaren, parte-hartzaileen profilaren eta aurreikusitako laneratze-emaitzen arteko koherentzia bermatuz.

Inola ere ez dira diruz laguntzeko moduko gastutzat joko xede nagusia atzerritartasunaren arloko administrazio-izapidetzea duten jarduketak, eta laneratzeko ibilbideari lotutako euskarri instrumentaleko jarduketetara mugatuko dira.

2.– Deialdia urte anitzekoa denez, haren finantzatzeko baliabide ekonomikoen zenbatekoa 7.950.380 euro da; horietatik 4.200.000 euro 2026ko ordainketa-kredituari dagozkio, 3.750.380 euro 2027ko konpromiso-kredituari, eta honela banatuta daude dirulaguntza-ildotan:

a) 1. ildoa: parte-hartzaileen enplegagarritasuna eta kualifikazioa hobetzera bideratutako prospekzio-, orientazio- eta prestakuntza-proiektu integralak finantzatzea, lan-merkatuaren beharrizanei eta proiektuaren laneratze-helburuei erantzuteko.

3.400.000 euro prospekzio-, orientazio- eta prestakuntza-proiektu integralak finantzatzeko; horietatik 2.074.810 euro 2026ko ordainketa-kredituari dagozkio, eta 1.325.190 euro 2027ko konpromiso-kredituari.

b) 2. ildoa: enplegua bilatzeko aktibazio intentsiboko jarduketak finantzatzea, epe laburrean laneratze eraginkorra errazteko, bereziki enplegua lortzeko prozesuak edo laneratze-ibilbideetan parte-hartze aktiboa indartzea beharrezkoa den kasuetan.

3.400.000 euro enplegua bilatzeko aktibazio intentsiboko jarduketak finantzatzeko; horietatik 2.074.810 euro 2026 ordainketa-kredituari dagozkio, eta 1.325.190 euro 2027 konpromiso-kredituari.

Jarduketa horien xedea ez da izango administrazio-erregularizazioko prozedurak zuzenean finantzatzea, baizik eta laneratzera bideratutako ibilbideetan behar bezala integratzea.

c) 3. ildoa: proiektu integraletatik eratorritako lan-kontratuak finantzatzeko, deialdi honen esparruan garatutako laneratze-ibilbideen azken emaitza gisa.

1.150.380 euro lan-kontratuak finantzatzeko; horietatik 50.380 euro 2026 ordainketa-kredituari dagozkio, eta 1.100.000 euro 2027 konpromiso-kredituari.

Kopuru horiek % 10 gehitu daitezke, kasuari badagokio, baldin eta indarreko legeriaren arabera aurrekontu-aldaketak onesten badira. Aldaketa horiek egiten badira, publiko egingo dira Lanbide-Euskal Enplegu Zerbitzu Publikoaren zuzendari nagusiaren ebazpen bidez.

3.– Aurrekontu-kreditua lurralde historikoka banatuko da, honako ehuneko hauen arabera:

– Araba: % 16,16.

– Bizkaia: % 50,39.

– Gipuzkoa: % 33,45.

Lurralde historiko batera bideratutako kreditua agortzen ez bada, esleitu ez diren soberakinak beste lurralde historikoetako proiektuak finantzatzeko bideratuko dira, ildo bakoitzean aurkeztutako eskaeren hurrenkerari jarraituz.

4.– Baldin eta dirulaguntza-ildoetako batean kreditua agortzen ez bada, beste ildoetako laguntzak finantzatzeko erabili ahal izango da soberakina.

5.– Deialdi honen xede diren dirulaguntzak Europako Gizarte Funtsak kofinantzatuta egon daitezke, osorik edo partez, Euskal Autonomia Erkidegoko EGF Plus 2021-2027 programaren esparruan.

2. artikulua.– Entitate eta enpresa onuradunak.

1.– Deialdi honen esparruan, honako erakunde hauek izan ahalko dira finantzaketaren onuradun, kontratazioarekin lotuta ez dauden laguntzetarako eskaera aldez aurretik bidalita, lan-merkatuaren beharrizanekin eta proiektuaren laneratze-helburuekin bat datozen jarduketak garatzeko daukaten gaitasunaren arabera, bai eta parte-hartzaileen ezaugarriekin eta benetako enplegu-aukerekin koherenteak diren ibilbideak artikulatzeko daukaten gaitasunaren arabera ere:

– Foru-aldundiak eta foru-sektore publikoa.

– EAEko udalak eta tokiko sektore publikoko entitateak.

– EAEko sektore publikoko entitateak.

– EAEko tokiko edo eskualdeko garapenerako agentziak eta haiekin lotutako entitateak.

– Merkataritza-ganberak, gutxienez 36 hilabeteko aurretiazko esperientzia egiaztatua daukatenak, langabeei enplegua emateko orientazio profesionaleko ekintzak zuzenean egiten, Lanbide-Euskal Enplegu Zerbitzuarekin edo sektore publikoko beste edozein administraziorekin edo erakunderekin elkarlanean eskuratua, 2020ko urtarrilaren 1aren eta 2025eko abenduaren 31ren artean, denboran gainjarri gabe.

– Prestakuntza-erakunde akreditatuak, publikoak nahiz pribatuak, irabazi-asmodunak edo harik gabekoak, eta/edo dagokion Prestakuntza Entitateen Erregistroan agertzen direnak.

– Irabazi-asmorik gabeko erakundeak, beren helburuen artean enplegua lortzeko zailtasun bereziak dituzten kolektiboak gizarteratzea eta laneratzea dutenak, edo laneratze-programak gauzatzen gutxienez 36 hilabeteko esperientzia egiaztatua daukatenak, migratzaileentzako jarduketak barne, bereziki enplegua ahalbidetzen duen administrazio-egoera batera iristeko prozesuan daudenentzakoak.

– Enpresa pribatuak, banaka edo taldeka, kontratazio-beharrizanak dituztenak eta proiektuetan sustatzaile, kolaboratzaile edo enplegua sortzen duten erakunde gisa parte hartzen dutenak, profil profesionalak identifikatzen, prestakuntza-ibilbideak diseinatzen eta laneratzeko benetako aukerak sortzen aktiboki lagunduz, deialdiaren helburuarekin bat etorriz.

Prestakuntza-erakundeetan, Lanbide Heziketa Antolatzeari eta Integratzeari buruzko martxoaren 31ko 3/2022 Lege Organikoak lehenengo xedapen iragankorrean xedatutakoa aplikatuko da, zeinaren arabera, enplegurako lanbide-heziketa emateko baimendutako eta egiaztatutako zentroek eta erakundeek beren baimen-baldintzei eutsiko baitiete Lanbide Heziketako Zentroen Erregistro Orokorrean inskribatzeko prozesua arautu arte.

Erakunde onuradunek proiektua osatzen duten jarduketak garatzeko beharrezkoak diren baldintza teknikoak eta antolamenduzkoak bete beharko dituzte, haien tasunaren eta helburuaren arabera, eta xedatutako ibilbideak behar bezala gauzatzen direla eta erakundearen gaitasunen, parte-hartzaileen profilaren eta deialdian ezarri diren laneratze-emaitzen arteko koherentzia bermatuko dute.

2.– Goiko zenbakian zerrendatutako erakundeek proiektuak banaka edo beste erakunde batzuekin elkarlanean garatu ahal izango dituzte, jarduketak behar bezala gauzatzeko eta eskuragarri dauden baliabideak optimizatzeko beharrezkoa denean.

Hainbat erakunderen arteko elkarlanetan, bermatu beharko da proiektua behar bezala koordinatuko dela, parte hartzen duen erakunde bakoitzaren erantzukizunak argi eta garbi identifikatuko direla eta Lanbide-Euskal Enplegu Zerbitzu Publikoaren aurrean ordezkari eta solaskide bakar gisa jardungo duen erakunde bat izendatuko dela.

Proiektuaren tasunak edo konplexutasunak hala eskatzen duenean, elkarlan hori formalizatu ahal izango da aldi baterako enpresa-elkarte bat, partzuergo bat edo zuzenbidean onartutako beste formula juridiko batzuk eratuz.

3.– Enpresa taldetzat joko da merkataritza-araudian zehaztutako egoeretako edozeinetan sozietateen artean kontrol-harreman bat edo eragin nagusi bat ikusten denean.

Kasu horietan, eskaera aurkezten duen enpresa izango da erakunde onuraduna, hargatik eragotzi gabe taldeko beste enpresa batzuek proiektua gauzatzen eta pentsatutako kontratazioetan parte hartu ahal izatea.

4.– Erakunde onuradunek egiaztatu beharko dute badituztela xedatutako jarduketak eraginkortasunez garatzeko behar adina baliabide tekniko, giza baliabide eta antolamendu-baliabide, eta bermatu beharko dute laneratze-ibilbideak behar bezala gauzatzen direla eta koherentzia dagoela erakundearen gaitasun operatiboaren, parte-hartzaileen profilaren eta proiektuan aurreikusi diren laneratze-emaitzen artean.

Lan-merkatuan sartzeko zailtasun bereziak dituzten kolektiboei zuzendutako proiektuetan, erakundeek, gainera, esperientzia espezifikoa egiaztatu beharko dute gizarteratzeko eta laneratzeko ibilbideak garatzen, bertan barne hartuta banakako orientazioa, etengabeko akonpainamendua eta baliabide publikoekin edo pribatuekin koordinatzea.

5.– Proiektuen eta esku hartu nahi diren langintzen jarduketa-eremuak identifikatzeko, erakunde eskatzaileek egindako azterketan oinarritu beharko da, proiektuaren memorian behar bezala justifikatuta, kontratazio-beharrizanei, ekoizpen-sarearen ezaugarriei eta parte-hartzaileen laneratzeko benetako aukerei dagokienez, hargatik eragotzi gabe proiektuaren memorian egikaritze-maila eta laneratze-emaitzak ebaluatzeko definitutako jarraipen-adierazleak erabiltzea. Nolanahi ere, identifikazio hori proiektuaren koherentzia globalean eta benetako laneratze-emaitzak sortzeko gaitasunean justifikatu beharko da.

Zentzu horretan, erakundeek proposatutako jarduketen, parte-hartzaileen profilen eta aurreikusitako laneratze-emaitzen arteko koherentzia justifikatu beharko dute.

6.– Kontratazio-beharrizanak dituzten enpresek proiektu propioak sustatu ahal izango dituzte, edo beste erakunde batzuekin elkarlanean ateratakoak, aktiboki lagunduz eskatutako profil profesionalak definitzen, prestakuntza-ibilbideak diseinatzen eta enplegurako aukerak sortzen. Gainera, beharrizan horien, definitutako profil profesionalen eta proiektuan xedatutako jarduketen arteko koherentzia bermatu beharko dute, bai eta proiektuari lotutako laneratze-emaitzen arteko koherentzia ere. Ondore horietarako, honako hauek bultzatu ahal izango dira:

a) Euskal Autonomia Erkidegoko jarduera-eremu bereko enpresak ordezkatzen dituzten erakunde sektorialek bultzatutako eskaerak, kontratatzeko konpromisoa hartu duten enpresak elkarte eta sektore horretakoak badira.

Erakunde sektorialek formalki eratuta egon beharko dute 2024ko urtarrilaren 1a baino lehenagotik, eta Eusko Jaurlaritzako edozein sailetan indarrean dauden enpresaz gaindiko elkarteen erregistroren batean identifikatuta.

Erakunde sektorial horiek langile propioak izan beharko dituzte. Langile horiek erakunde horri edo sektore horretan bildutako enpresen interesak ordezkatzeko beharrezkoak diren kudeaketa-zerbitzuak ematen dituen erakunde bati atxikita egon behar dute. Erakunde horrek gaitasun nahikoa izan behar du ekimen honen garapenaren xedea zuzentzeko eta kudeatzeko.

b) Euskal Autonomia Erkidegoan kokatutako haien jarduera-sektoreetako beste enpresa batzuetan trakzio-enpresa gisa eta/edo kontratazio-sortzaile gisa diharduten enpresek sustatutako eskaerak. Beste batzuen trakzio-enpresa bat dela ulertzen da enpresa horren eta bere enpresa kolaboratzaileen artean harreman egonkorra, denbora luzatua eta zerbitzuen azpikontratazioak definitua dagoenean, bai eta beste enpresa horien produktuen kontsumoak ere; horrela, zuzenean eta zeharka, enpresa trakzionatuen enplegua, hazkundea eta garapen ekonomikoa sortzen dira. Trakzio-enpresak sustatuko eta bultzatuko ditu enplegu berrirako beharrizanak enpresa trakzionatuetan.

c) Goiko a) letran aipatutako erakunde sektorialen eta b) letran aipatutako trakzio-enpresen babesik ez duten eskaerak, baina beren interesei erantzuten dietenak, beren laneratze-proiektuak sustatuz, beren kontratazio-beharrizanak asetzeko, eskatutako profil profesionalen arabera.

7.– Lan-kontratuak finantzatzeko dirulaguntzen onuradun izan daitezke lantokia Euskal Autonomia Erkidegoan duten enpresa pribatuak, pertsona fisikoak nahiz juridikoak, baldin eta 6. artikuluan ezarritako baldintzetan kontratatzen badituzte parte-hartzaileak.

Kanpoan geratzen dira administrazio publikoak eta sektore publikoko entitateak, bai eta jarduera nagusia eskulana lagatzea edo azpikontratatzea duten enpresak ere.

Enpresa onuradunek langileen legezko ordezkaritzari jakinarazi beharko diote deialdi honen babespean egindako kontratazioa.

8.– Ezingo dira onuradun izan egoera hauetako batean diren entitateak:

a) Epai irmo bidez, dirulaguntzak edo laguntza publikoak lortzeko aukera galtzeko zigorra jaso ez izana edo prebarikazioa, eroskeria, diru publikoen erabilera bidegabea, influentzia-trafikoa, iruzurrak eta ordainarazpen ilegalak edo hirigintza-delituengatik zigorra jaso izana.

b) Konkurtso boluntarioaren deklarazioa eskatuta izatea, edozein prozeduratan kaudimengabetzat jota egotea, konkurtsoan deklaratuta egotea –salbu eta horretan hitzarmen bat indarrean jarri bada–, esku-hartze judizialaren mende egotea, edo Konkurtsoari buruzko uztailaren 9ko 22/2003 Legearen arabera desgaituta egotea, edo hala egon izana, konkurtsoa kalifikatzeko epaian ezarritako desgaikuntza-aldia igaro gabe egonik.

c) Administrazioarekin egindako edozein kontratu ebazpen irmoz indargabetu izana, dena delako kausagatik errudun deklaratzeagatik.

d) Merkataritza-sozietateen administratzaileak edo beste pertsona juridiko batzuen legezko ordezkariak badira, Administrazio Publikoen Zerbitzuko Langileen Bateraezintasunei buruzko abenduaren 26ko 53/1984 Legean edo Kargu publikodunen jokabide-kodea eta haien interes-gatazkak arautu dituen ekainaren 26ko 1/2014 Legean ezarritako bateraezintasun-araubideko egoeraren batean egotea edo Hauteskunde Araubide Orokorrari buruzko ekainaren 19ko 5/1985 Lege Organikoan araututako hautapen bidezko karguren bat betetzea, arau horretan edo gai horiek arautzen dituen araudi autonomikoan ezarritakoaren arabera.

e) Zerga-betebeharrak eta Gizarte Segurantzarekikoak egunean ez edukitzea, Ekonomia eta Ogasuneko sailburuaren 2023ko otsailaren 13ko Aginduak (2023ko otsailaren 17ko EHAA) xedatutakoaren arabera.

Organo kudeatzaileak automatikoki egiaztatuko du zerga-betebeharrak eta Gizarte Segurantzarekikoak betetzen diren, dirulaguntza eman eta ordainketa bakoitza egin baino lehen. Hala ere, erakunde edo enpresa eskatzaileak berariaz aurka egin diezaioke egiaztatze horri, eta, halakorik egiten baldin badu, baldintza hori betetzen duela egiaztatzen duten ziurtagiri eguneratuak aurkeztu beharko ditu.

f) Egoitza fiskala paradisu fiskaltzat jotako herrialde edo lurralde batean izatea.

g) Dirulaguntzei dagokienez, itzulketa-betebeharren ordainketak egunean ez izatea, Ekonomia eta Ogasuneko sailburuaren 2023ko otsailaren 13ko Aginduak 4. artikuluan xedatutakoaren arabera (2023ko otsailaren 17ko EHAA). Konpromisoa hartu beharko dute egoera horretan gertatzen den edozein aldaketaren berri emateko, emandako dirulaguntza osoa justifikatu arte.

h) Epai edo administrazio-ebazpen irmo baten bidez kondenatuta edo zehatuta egotea, eta, horren ondorioz, dirulaguntzak edo laguntza publikoak lortzeko aukera galduta izatea, kondena- edo zehapen-aldia igaro gabe egonik, arrazoi hauengatik, besteak beste:

– Sexuagatiko diskriminazioa eragiteagatik, edo Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onetsi duen martxoaren 16ko 1/2023 Legegintzako Dekretuak 3.1 artikuluan adierazitako diskriminazio anizkoitza eragiteagatik.

– Ebazpen irmo baten bidez zehapen osagarri bat jasotzeagatik, Lan Arloko Arau Hausteei eta Zehapenei buruzko Legearen testu bategina onetsi duen abuztuaren 4ko 5/2000 Legegintzako Errege Dekretuak 46.1.b) eta 46 bis 1.b) artikuluetan xedatutakoaren arabera.

i) Laguntzak edo dirulaguntzak jasotzea eragozten dion legezko kausa bat edukitzea, hauek barne:

– Ez izatea berdintasun-planik indarrean, estatuko araudiaren arabera horretara behartuta dagoen enpresa izanik.

– Ez edukitzea ezarrita neurririk sexu-jazarpena, sexuagatiko jazarpena edota sexu-indarkeriak prebenitzeko eta borrokatzeko, emakumeen eta gizonen berdintasunaren arloan Estatuak ezarrita dituen legeen arabera, 50 langile baino gehiago dituzten enpresen kasuan.

– LGTBIfobia gauzatzea, piztea edo sustatzea, konbertsio-terapiak sustatzea edo egitea barne.

j) Zehapena ezarrita izatea arau-hauste astun edo oso astun batengatik, Hondakinak eta Lurzoru Kutsatuak arautzeko eta Ekonomia Zirkularra bultzatzeko apirilaren 8ko 7/2022 Legean edo Euskadiko Ingurumen Administrazioaren abenduaren 9ko 10/2021 Legean xedatutakoaren arabera, administrazio-bideko ebazpen irmo baten bidez, harik eta behar diren neurri zuzentzaileak hartu eta zehapena ordaindu arte.

k) Desgaitasuna dutenentzat lanpostuak gordetzeko legez ezarritako kuota ez betetzea, edo, bestela, hori betetzeko ordezko neurriak hartu gabe egotea.

l) Elkarteen kasuan, Elkartzeko Eskubidea arautu duen martxoaren 22ko 1/2002 Lege Organikoak 4. artikuluko 5. eta 6. zenbakietan zehaztutako debeku-kausen eraginpean egotea.

m) Legez kontrako egintza penalen zentzuzko zantzuak aurkitu zaizkiola-eta inskripzio-prozedura administratiboa eten zaion elkarte bat izatea, Elkartzeko Eskubidea arautu duen martxoaren 22ko 1/2002 Lege Organikoak 30.4 artikuluan xedatutakoa aplikatuta, dagokion erregistroan inskribatzeko aukera ematen dion ebazpen judizial irmorik ez dagoen bitartean.

n) Dirulaguntzen Araubidea Erregulatzeko abenduaren 21eko 20/2023 Lege Orokorrak 13. artikuluko 3. eta 5. zenbakietan xedatu dituen egoeraren batean izatea.

ñ) 30.000 eurotik gorako dirulaguntzetan, eta eskatzailea irabazi-asmoa duen pertsona fisikoa edo juridikoa bada, zuzenbide publikoko entitate ez dena, ez betetzea Merkataritza Eragiketetan Berankortasunaren Aurkako Neurriak ezarri dituen abenduaren 29ko 3/2004 Legeak ezarritako ordainketa-epeak, Dirulaguntzei buruzko azaroaren 17ko 38/2003 Lege Orokorrak 13.3 bis artikuluan xedatutako moduan.

Eskakizun hori betetzat joko da abenduaren 29ko 3/2004 Legeak xedatutako ordainketa-epeen betetze-maila Enpresak Sortu eta Handitzeko irailaren 28ko 18/2022 Legeak azken xedapenetako seigarreneko d) letrako bigarren apartatuan zehaztutako ehunekoaren parekoa edo handiagoa denean (aurreko ekitaldian hornitzaileei egindako ordainketa guztietatik ordaindutako fakturen % 90, abenduaren 29ko 3/2004 Legeak ezarritako gehieneko epea igaro baino lehen).

9.– Lanbide-Euskal Enplegu Zerbitzu Publikoak ez badu egiaztatzen 8. zenbakian aipatutako inguruabarren bat, erantzukizunpeko adierazpen baten bidez egiaztatu beharko da; adierazpen hori eskaera-orriaren parte izango da.

Dena den, ñ) letrako betekizuna egiaztatzeko, dokumentazio hau aurkeztu beharko da:

a) Pertsona fisiko edo juridiko eskatzaileak kontabilitate-araudiaren arabera galdu-irabazien kontu laburtua aurkezteko modurik badu, 38/2003 Legeak 13.3 bis artikuluko a) letran aipatutako ziurtagiria aurkeztu beharko du, Lanbide-Euskal Enplegu Zerbitzu Publikoak emandako eredua erabiliz.

Ziurtagiri hori dirulaguntza-eskaerarekin batera aurkeztu beharko da.

b) Eskatzaileak ezin badu aurkeztu galdu-irabazien kontu laburturik kontabilitate-araudiaren arabera, betekizun hori 38/2003 Legeak 13.3 bis artikuluko b) letran aipatu dituen agirien bidez egiaztatuko da, hau da, Kontu Auditoreen Erregistro Ofizialean inskribatuta dagoen auditore batek emandako ziurtagiriaren bidez, zeinak letra horretako 1. zenbakian galdatutako edukia izango baitu; edo, ziurtagiri hori egitea ezinezkoa bada, Prozedura Adostuen Txostenaren bidez, letra horretako 2. zenbakian eta Dirulaguntzei buruzko azaroaren 17ko 38/2003 Lege Orokorrak Erregelamenduaren 22 bis artikuluan xedatutako eran (erregelamendu hori uztailaren 21eko 887/2006 Errege Dekretuaren bidez onetsi zen).

Lanbide-Euskal Enplegu Zerbitzu Publikoak, hala badagokio, dirulaguntzak emateko ebazpenak eman aurretik eskatuko die erakunde eskatzaileei goiko paragrafoan aipatu diren dokumentuak aurkezteko.

10.– Erakunde eskatzaileek enpresa ez deslokalizatzeko konpromisoa hartuko dute, Dirulaguntzen Araubidea Erregulatzeko abenduaren 21eko 20/2023 Legeak 49. artikuluan ezarritakoaren arabera. Konpromiso hori dirulaguntza eskatzeko inprimakian sartuko den erantzukizunpeko adierazpenaren parte izango da.

11.– Deialdi honetan xedatutako prestakuntza-ekintzak egiteagatiko dirulaguntza lortzeko, prestakuntza-entitateek dirulaguntzaren xede den prestakuntza-proiektua osatzen duten prestakuntza-ekintzak egiteko behar diren pertsonak eta bitarteko materialak eduki beharko dituzte, edo dirulaguntza esleitu ondoren, prestakuntza-jarduera hasten denean, haiek lortzeko konpromisoa hartu beharko dute.

Instalazio eta baliabide horiek norberarenak edo beste erakunde pribatu edo publiko batzuenak izan daitezke; gainera, Euskal Autonomia Erkidegoaren lurraldean eduki beharko dira.

Informazio hori egiaztatzeko, entitatearen legezko ordezkariak erantzukizunpeko adierazpen bat egingo du (erantzukizunpeko adierazpena eskaera-orrian jasota dago). Nolanahi ere, erakunde eskatzaileak Lanbide-Euskal Enplegu Zerbitzu Publikoak eskuratzeko moduan eduki beharko ditu adierazpen horretan jasotako datuak egiazkoak direla frogatzen duten agiriak.

Ez dago baimenduta azpikontratatzea prestakuntza-jarduera egikaritzeko, salbu eta helburu sozial nagusia prestakuntza ez duten erakundeetarako bada. Horren harira, ez da azpikontrataziotzat joko prestakuntza emateko irakasleak (pertsona fisikoak) kontratatzea. Enpresa-prospekzioari, lan-orientazioari, laguntzari eta jarraipenari lotutako jarduera osagarriak azpikontratatu daitezke, 3.6 artikuluan ezarritako baldintzen arabera.

12.– Prospekzio-jarduketetara eta gizarteratzeko eta laneratzeko orientazio-jarduketetara iristeko, zuzenean edo erakunde onuradunaren erantzukizun teknikoaren pean gauzatuko dira, hargatik eragotzi gabe jarduketa osagarriak azpikontratatzeko aukera, 3. artikuluan ezarritako baldintzetan.

3. artikulua.– Diruz lagundu daitezkeen jarduketak.

Artikulu honetan xedatutako jarduketak proiektuaren jarduketa-ildoaren arabera aplikatuko dira, eta koherentziaz erantzun beharko diote proiektuaren helburu nagusiari. Ondore horietarako, jarduketa guztiak ez dira nahitaezkoak izango proiektu guztietan, eta justifikatu egin beharko da haiek txertatzeko arrazoia, ibilbidearen diseinuaren eta erdietsi nahi diren laneratze-helburuen arabera (ez dira nahitaezkoak izango proiektu guztietan).

Honako hauek lagundu ahal izango dira deialdi honetan bildutako dirulaguntzen babesean:

1.– Enplegu-aukeren prospekzioa baliagarri izango da kontratatzeko prest dauden enpresak edo erakunde enplegatzaileak harremanetan jartzeko eta inplikatzeko, enplegu-beharrizanak identifikatuz eta laneratze-prozesuak erraztuz, atzerritartasunari buruzko araudiaren esparruan bizileku- eta lan-baimenak eskuratzeko aukera ematen duten lan-kontratuak formalizatzea barne, bai eta eskainitako lanpostuei lotutako lanbide-eskakizunak eta haien benetan betetzea errazten duten baldintzak ezaugarritzea ere.

Jarduketa horretan, gutxienez, honako jarduera hauek sartzen dira:

a) Lanpostuak betetzeari eta langileen trebakuntzari eta gaitasunei buruz enpresa-sareak dituen beharrizanak aztertzea eta identifikatzea, lan-merkatuaren beharrizanen arabera laneratzea erraztuko duen ibilbidea behar bezala definitzeko.

b) Dirulaguntzaren xede den taldeari egokitutako enplegu-aukerak bilatzea eta erakartzea, banakoa oinarri hartuta. Enpresak erakartzea, proiektuaren xede diren langintzekin eta identifikatutako enplegu-beharrekin lotutako lan-kontratuak sinatzeko edo laneratzeko aukerak sortzeko.

c) Proiektuaren xede diren langintzekin lotutako enpresetan laneratzeko ibilbide integralen proiektuak biltzen dituen jarduketei buruzko informazioa ematea, sentsibilizatzea eta azalpenak ematea, proiektuaren eragile aktibo gisa parte hartzea eta laneratzeko konpromisoa sustatzeko asmoz.

d) Enpresei informazioa eta akonpainamendua ematea kontratazioari lotutako administrazio-prozeduren inguruan, atzerritartasunaren arloan eskumena duten agintarien funtzio propioak bere gain hartzea inola ere ekarri gabe.

e) Proiektuetan parte hartzen dutenak kontratatzeko sustapen-laguntzaren eskaera izapidetzeari dagokionez, informazioa eta akonpainamendua ematea.

f) Lanpostuen identifikazioa eta azterketa xehatua: enpleguaren ezaugarriak eta garapen-baldintzak zehaztea, prestakuntza-ibilbidearen egokitzapena definituko duen informazio garrantzitsu guztia eskuratzeko, bai prestakuntza-erakundean, bai lanpostuan bertan.

g) Parte-hartzaileen artean hautagai egokien aurretiko aukeraketa egitea. Lanpostu hori betetzeko behar diren ezaugarriak dituzten pertsonak identifikatzea.

h) Lan-eskaintzen eta enplegu-eskarien arteko kasazioa egitea. Bateragarritasuna aztertzea: alde batetik, lanpostuaren profila, eta, bestetik, postu hori betetzeko hautatutako pertsona.

Parte-hartzaileek enplegua lortzeko muga administratiboak dituztenean, enpresa-prospekzioko jarduketek, gainera, euskarri teknikoa eta akonpainamendua eman ahal izango diete enpresa kontratatzaileei lan-harremana formalizatzeko eta mantentzeko beharrezkoak diren administrazio-izapideetan, hargatik eragotzi gabe beste erakunde batzuei esleitutako eskumenak, atzerritartasunaren arloan eskumena duten agintarien funtzio propioak inola ere bere gain hartu gabe.

2.– Parte-hartzaileentzako informazio-, orientazio- eta akonpainamendu-zerbitzu pertsonalizatuak.

Ibilbide horietan, gutxienez, jarduera hauek sartzen dira:

a) Orientazioa, aholkularitza eta banakako laguntza ematea pertsona laneratzera doanean helburuak eta estrategiak zehazteko eta martxan jartzeko eta plangintza egiteko.

b) Laguntza ematea helburu profesionala zehazteko orduan, eta azalpenak ematea gauzatu beharreko prestakuntza-ekintzetako langintzen eta ondorengo lan-kontratuaren artean egon behar den loturaren gainean.

c) Parte-hartzaileak bere ibilbidea garatzean gauzatu dituen ekintzen banakako jarraipen pertsonalizatua egitea, ibilbidea berrikustea eta eguneratzea, eta mugarriak, etapak eta betebeharrak finkatzea eta ikuskatzea.

d) Enplegua aktiboki bilatzeko aholkularitza eta teknikak ezartzea. Atal honetan, informazioa emango da besteren konturako enplegua bilatzeko eskuragarri dauden bitartekoen, tekniken eta tresnen inguruan, eta haiek erabiltzen erakutsiko dira (oinarrizko erabilera). Horren barruan emango da bitarteko telematikoak eta sare sozialak erabiltzeko aholkularitza.

e) Lanekoak ez diren praktiketan akonpainamendua eta jarraipena egitea, halakorik dagoenean, edo lanpostuko banakako prestakuntza-prozesuan (FCOO0026OV espezialitatea – Tutoretza eta banakako prestakuntza lanpostuan). Teknikariek parte-hartzaile bakoitzaren jarreraren eta eskumenen jarraipena egingo dute, astero, esku hartzeko modurik egokienean, zereginen ohiko jardunean eragin gabe.

f) Enpresako solaskideak ebaluazio jarraitua egiteko erraztasunak jartzea eta hurrengo fasera pasatzeko helburuan laguntzen ez duten disfuntzionaltasun posibleak bideratzea.

g) Akonpainamendu pertsonalizatua ematea eta jarraipen indibidualizatua egitea, kontratazioa hasitakoan. Kontratua formalizatu ondoren, kontratatutako pertsonaren eta enpresaren artean jarraipena egiteko beharrizana ezartzen da, laneratzea behar bezala garatzen dela bermatzeko eta sortu daitezkeen doikuntzak estaltzeko.

h) Ebaluazioa egitea: hala prozesu guztiaren garapenaren balorazioa, nola gogobetetze-mailarena, bai parte-hartzailearena, bai enpresarena.

i) Akonpainamendu intentsiboa, laneratzeak prestakuntza-, administrazio- eta lan-jarduketak segidan eta koordinatuta gertatzea eskatzen duenean, ibilbideari lotutako mugarrien, epeen eta betebeharren kudeaketa barne.

j) Gizarteratze- eta laneratze-prozesuaren bideragarritasunerako beharrezkoak diren beste baliabide edo zerbitzu publiko edo pribatu batzuekin koordinazio aktiboa izatea.

k) Banakako jarraipen indartua, lan-kontratua formalizatu ostean, lanpostura behar bezala egokitzen dela, lan-harremanarekin jarraitzen dela eta laneratzea finkatzen dela bermatzeko.

Halaber, orientazioak administrazio-erregularizazioari eta egoitza- eta lan-baimenak eskuratzeari buruzko aholkularitza orokorra jaso ahal izango du, betiere zerbitzu espezializatuekin koordinatuta eta laneratzeko jarduketa nagusien osagarri gisa.

3.– Taldeko prestakuntza-ekintzak, ziurtagarriak eta/edo egiaztagarriak, 5. artikuluan araututako eskakizunak eta baldintzak betetzen dituztenak. Prestakuntza-ekintza horiek Euskal Autonomia Erkidegoko Prestakuntza Espezialitateen Katalogoan sartuta egon beharko dute. Enpresa kontratatzaileen beharrizan zehatzei eta proiektuaren xede diren langintzei erantzuteko programatu diren prestakuntza-espezialitate berriak izan daitezke, baldin eta Espezialitateen Euskal Katalogoan sartu badira eta, eskaera aurkezteko unean, prestakuntza-erakundea Prestakuntza Erakundeen Erregistroan inskribatuta badago, eta enplegu-premiei, lanpostuen eskakizun profesionalei eta proiektuaren oinarri den laneratze-ibilbidearekin daukan koherentziari buruz egindako azterketaren arabera diseinatu beharko dira.

Prestakuntza-ekintza programagarriak honela sailkatzen dira:

a) Prestakuntza egiaztagarria: Lanbide Kualifikazio Profesionalen Katalogo Nazionalari edo, hala badagokio, Gaitasun Profesionalen Estandarren Katalogo Nazionalari lotutako ekintzak, gaitasun-egiaztapen partzialak, profesionaltasun-ziurtagiriak edo profesionaltasun-ziurtagiriak lortzera bideratutakoak, ibilbide osoen arabera –espezialitateko ordu guztiak programatzean– edo prestakuntza-moduluen arabera programatu daitezkeenak. 1., 2. edo 3. kualifikazio-mailakoak izan daitezke.

C Gradua (profesionaltasun-ziurtagiria) lortzeko prestakuntza-ekintzak prestakuntza-erakundeek emango dituzte, baldin eta Hezkuntza Sailaren baimena badute prestakuntza-ekintza horiek integratzen dituen D Gradua emateko.

b) Prestakuntza egiaztagarria: prestakuntza-espezialitateen katalogoko prestakuntza-ekintza horiek ez dute bide ematen eskuratutako gaitasunak egiaztatzeko.

4.– Banakako prestakuntza-programa enpresaren ekoizpen-ingurunean, parte-hartzaileak laneratzearekin konpromiso fede-emailea duena.

Jarduketa hori prestakuntzaren eta laneratze eraginkorraren arteko tarteko fasea da.

4.1.– Ekoizpen-inguruneko banakako prestakuntza-programa laneratze-ibilbidearen elementu nagusia da, eta prestakuntzatik enplegurako trantsizio eraginkorra erraztera bideratuta dago, gaitasunak benetako lan-testuinguru batean eskuratuz.

Enpresa bakoitzean esleitutako lanpostuari edo lanpostuei dagozkien jardueretan parte hartzen duen bakoitzarentzako prestakuntza indibidualizatua da, jarduerok proiektuaren xede diren langintzei dagozkiela eta identifikatutako laneratze-aukerei lotuta daudela.

Ibilbide hori, oro har, FCOO0026OV – Tutoretza eta banakako prestakuntza lanpostuan espezialitatearen arabera egingo da (100 ordu), baina ez da eragozpena izango ibilbidearen unearen arabera eta kontratazioa aldez aurretik formalizatzen bada egokitzeko.

Halaber, prozesu horrek aukera emango du parte-hartzaileak enplegura zenbateraino hurbildu diren egiaztatzeko. Ebidentzia horiek kontuan hartu ahal izango dira lortutako laneratze-maila baloratzeko, deialdi honek 1. artikuluan ezarritako definizioen arabera.

Administrazio-erregularizazioko prozesuetan dauden pertsonei begira, ekoizpen-inguruneko prestakuntzaren helburua izan daiteke sustraitze soziohezitzaileagatiko edo soziolaboralagatiko baimenak lortzeko galdatzen diren baldintzak betetzea, gaitasun profesionalak eskuratuz eta lanpostura egokituz.

4.2.– Enpresan prestakuntza egiteko lanak FCOO0026OV – Tutoretza eta banakako prestakuntza espezialitateko prestakuntza-programan oinarrituko dira, lanpostuaren ezaugarrietara, enpresaren beharrizanetara eta ibilbidearen unera egokituta, eta parte-hartzailea etorkizunean lanean hastera bideratutako aurretiazko fase gisa eratuko da.

4.3.– Kasazio-prozesua, bete beharreko lanpostua aztertu ondoren, bete beharreko lanposturako eskuragarri dauden profilen artean hobekien ahokatzen dena bilatuz egingo da, urrats hauei jarraituz:

a) 100 orduko prestakuntza-plana taxutzea, egin beharreko atazak, erabili beharreko tresnak eta erdietsi beharreko helburuak zehaztuta.

b) Parte-hartzailearen prestakuntzaz eta koebaluazioaz arduratuko den enpresako instruktorearen identifikazioa.

c) FCOO0026OV – Tutoretza eta banakako prestakuntza espezialitateko lanposturako 100 orduko prestakuntza-akordioa sinatzea enpresarekin. Bertan, prestakuntza-plana, helburuak, edukia eta egin beharreko lanpostuko prestakuntza-zereginak zehaztuko dira, bai eta prestakuntza emango duen erakundeko programako teknikariek egin beharreko jarraipen-sistema ere.

4.4.– Gainera, proiektuko teknikariek honako eginkizun hauek bete beharko dituzte, gutxienez, prestakuntza honetan:

a) Prozesuan zehar, lanbide-jarduera gauzatzearekin lotutako ohitura soziopertsonalak, jarrerak eta gaitasunak indartzeko eta hobetzeko euskarri teknikoa.

b) Gaitasun sozio-profesionalen banakako balantzea eta lanpostura egokitzea.

c) Teknikariek parte-hartzaile bakoitzaren jarreraren eta eskumenen jarraipena egingo dute, astero, esku hartzeko modurik egokienean, zereginen ohiko jardunean eragin gabe (presentziala, telefonoa, e-maila, eta abar).

d) Enpresako instruktoreak ebaluazio jarraitua egiteko erraztasunak jartzea eta hurrengo fasera pasatzeko helburuan laguntzen ez duten disfuntzionaltasun posibleak bideratzea.

e) Parte-hartzaileei informazioa eta laguntza ematea administrazio-prozeduretarako beharrezkoa den dokumentazioa prestatzeko, bai eta jarraitu beharreko urratsei buruzko orientazioa ere, atzerritartasunaren arloan eskumena duten agintarien eginkizun propioak inola ere bere gain hartu gabe.

4.5.– Prestakuntza-jarduketa horren iraupena, oro har, 100 ordukoa izango da, FCOO0026OV – Tutoretza eta banakako prestakuntza espezialitatearen arabera, eta laneratze-prozesuaren arabera egokitu ahal izango da.

Hala ere, parte-hartzailearen kontratazioa prestakuntza amaitu aurretik formalizatzen denean, prestakuntza amaitutzat joko da ibilbidearen ondoreetarako, baldin eta ekoizpen-ingurunean gutxienez 60 orduko prestakuntza gainditu bada eta lanpostuan behar adina jardun dela egiaztatzen bada.

4.6.– Proiektuko teknikariek akonpainamendua eta aholkularitza tekniko-juridikoa emango dute laneratzeko prozesu osoan.

4.7.– Behin lan-kontratazioa hasita, banakako akonpainamenduaren jarraitutasuna ziurtatu beharko da, laneratzea behar bezala garatzen dela ziurtatzeko.

4.8.– Laneratzeko zailtasun bereziak dituzten kolektiboei zuzendutako proiektuetan, lanpostuko prestakuntzan akonpainamendu teknikoa ematean, beharrezkoa izanez gero, euskarri espezifikoa ematea ere sartuko da, etorkizuneko kontratazioari lotutako administrazio-izapideak kudeatzeko, bai eta haien bideragarritasuna eta jarraitutasuna bermatzeko beharrezkoak diren betekizunen jarraipena egiteko ere.

4.9.– Laneratze-prozesuaren barruan kontuan hartze aldera, lanpostuko prestakuntzak ebidentzia objektiboak eduki beharko ditu, ibilbidearen egikaritze-maila eta parte-hartzaileak enplegura benetan hurbiltzen direla egiaztatzeko.

Aurrekoari dagokionez, honako hauek joko dira ebidentzia baliozkotzat, besteak beste:

– Ekoizpen-ingurunean banakako prestakuntza-plana egotea, behar bezala formalizatua, atazak, helburuak eta egutegia identifikatuta.

– Prestakuntza-prozesuaren jarraipenaz eta ebaluazioaz arduratuko den enpresako instruktore bat izendatzea.

– Parte-hartzailearen jardunaren asteroko edo aldizkako jarraipena erregistratzea, haren gaitasunen bilakaera eta lanpostura egokitzeko duen maila barne.

– Ekoizpen-inguruneko prestakuntza-prozesuaren amaierako ebaluazioa, instruktoreak emana eta proiektuko teknikariek baliozkotua.

– Pertsonak lanpostuaren benetako atazetan benetan parte hartzea, ohiko enpleguaren antzeko baldintzetan.

– Parte-hartzailea lanpostura eta ekoizpen-ingurunearen benetako baldintzetara pixkanaka egokitzen ari dela ikusteko ebidentzia.

– Hautaketa-prozesuetan parte hartzea edo bete nahi den lanpostuari lotutako lan-eskaintza jakin bat egotea.

Ebidentzia horiei esker, kontratazio aurreko fase gisa erdietsitako laneratze-maila baloratu ahal izango da, deialdi honek 1. artikuluan ezarritako definizioen arabera.

5.– Euskal Autonomia Erkidegoan kokatutako lanpostuak betetzeko asmoz parte-hartzaileekin sinatzen diren lan-kontratuak, aldi baterakoak zein mugagabeak, baldin eta 6. artikuluan ezarritako betekizunak eta baldintzak biltzen badituzte.

Lan-kontratuak hasteko azken eguna 2027ko uztailaren 1a izango da, tartean eskatutako eta Lanbide-Euskal Enplegu Zerbitzu Publikoaren Enplegu eta Prestakuntzako zuzendariak baimendutako salbuespen justifikatuko egoeraren bat ez bada behintzat.

6.– Enplegua bilatzeko aktibazio intentsiboa.

Jarduketa hori, nagusiki, 1. artikuluan definitutako 2. ildoan zerrendatutako esku-hartzeei dagokie.

Diruz laguntzeko moduko jarduketatzat joko dira parte-hartzaileak benetan laneratzea erraztera bideratuta dauden enplegua bilatzeko aktibazio intentsiboko ekintzak, baldin eta parte-hartzaileok, administrazio-erregularizazioko prozesuetan parte hartzearen ondorioz, enplegua aktiboki bilatzen ari direla egiaztatu behar badute bizileku- eta lan-baimena mantentzeko, luzatzeko edo aldatzeko, atzerritartasunari buruzko araudian ezarritako baldintzetan. Horrela, parte-hartzaileak benetan aktibatzen eta enplegua lortzen lagunduko da. Jarduketa horiek orientazio-jarduketetatik desberdintzen dira, intentsiboak eta finalistak delako, eta zuzenean lotuta daudelako benetako enplegu-eskaintzekiko lan-bitartekaritzarekin.

Jarduketa horiek finalistak izango dira, eta epe laburrean benetako enplegua lortzera bideratu beharko dira, aurrera eramandako ekintzen trazabilitatea eta administrazio eskudunen aurrean egiaztatu ahal izatea bermatuta.

Gutxienez, honako jarduera hauek bilduko dituzte:

a) Enplegagarritasunaren diagnostiko indibidualizatua, berehala laneratzera bideratua.

b) Enplegua aktiboki bilatzeko estrategia pertsonalizatuak definitzea eta planifikatzea, proiektuaren xede diren eta lan-merkatuan eskaria duten langintzekin lerrokatuta.

c) Enpresekiko bitartekaritza trinkoa, aurrez identifikatutako eskaintzetarako hautagaiak zuzenean aurkeztea barne.

d) Benetako enplegu-eskaintzekin lotutako hautaketa-prozesuetarako prestakuntza espezifikoa.

e) Parte-hartzaile bakoitzak lana bilatzeko astean behin egiten duen jardueraren etengabeko jarraipen sistematikoa.

f) Lanbide-Euskal Enplegu Zerbitzu Publikoan enplegu-eskaera inskribatzen, mantentzen eta eguneratzen laguntzea.

g) Lana aktiboki bilatzeko burututako jarduerak erregistratzea eta dokumentatzea, atzerritartasunaren arloko administrazio-prozeduretan egiaztatzeko.

Jarduketa horiek nahitaez bermatu dute parte-hartzaileek behar diren bitartekoak eta ebidentziak dauzkatela enplegua aktiboki bilatzen ari direla egiaztatzeko, aplikagarri den Estatuko araudian ezarritako betekizunekin bat etorriz. Jarduketa horiek kontuan hartu ahal izango dira proiektua betetzen den baloratzeko, 18. eta 23. artikuluetan xedatutakoarekin bat etorriz, laneratze-ibilbidearen progresibitatearekin eta 1. artikuluan ezarritako definizioekin koherente izanik.

7.– Erakunde onuradunek prospekzioarekin, orientazioarekin, laguntzarekin eta jarraipenarekin lotutako jarduketa osagarriak azpikontratatu ahal izango dituzte, baldin eta jarduketa horiek ez badute eraginik sortzen proiektuaren zuzendaritza teknikoan edo koordinazioan, erakunde onuradunak zuzenean hartu beharko baititu bere gain. Kasu horietan, dirulaguntzen arloan aplikagarri den araudian ezarritako debekuak errespetatzeaz gain, Lanbideren aurretiazko baimena beharko da azpikontratatutako zenbatekoa dirulaguntzaren guztizkoaren % 20 baino handiagoa eta 60.000 eurotik gorakoa denean, edo pertsona edo erakunde loturadunekin kontratatzen denean. Baimena eman dela ulertuko da hamar eguneko epean berariaz ebazten ez bada. Horretarako, baimen-eskaerarekin batera, sinatu nahi den kontratuaren proposamenaren kopia aurkeztuko beharko da, eta Lanbide-Euskal Enplegu Zerbitzu Publikoaren Enplegu eta Prestakuntzaren zuzendariak ebatziko du.

Zenbaki honen babespean burututako jarduketak behar bezala identifikatuta eta dokumentatuta geratu beharko dira proiektuaren jarraipen-sisteman, eta kontuan hartu ahal izango dira 18. eta 23. artikuluetan ezarritako baldintzetan proiektua betetzen den baloratzeko, hargatik eragotzi gabe erakunde onuradunak proiektua behar bezala egikaritzeari buruz duen amaierako erantzukizuna.

8.– Proiektu integralak gehienez ere 20 parte-hartzailerekin eta gutxienez zortzirekin onetsiko dira, tartean eskatutako eta Lanbide-Euskal Enplegu Zerbitzu Publikoaren Enplegu eta Prestakuntzako zuzendariak baimendutako salbuespen justifikatuko egoeraren bat ez bada behintzat.

Baldin eta, taldeko prestakuntza hasi aurreko bajen ondorioz, parte-hartzaileen kopurua prestakuntza-ekintza hasteko galdatzen den gutxienekoaren azpitik geratzen bada, erakundeak pertsona gehiago hartu ahal izango ditu gutxieneko horretara iritsi arte, betiere prestakuntza hasi aurretik.

4. artikulua.– Deialdiaren jasotzaileak.

1.– Parte hartu ahal izango dute Lanbide-Euskal Enplegu Zerbitzu Publikoan, beste enplegu-zerbitzu publiko autonomiko batean edo Gazte Bermearen Sistema Nazionalaren fitxategian enplegu-eskatzaile gisa izena emanda dauden langabeek eta enplegu-intentsitate txikiko landunek, 2. zenbakian ezarritako baldintzetan.

Proiektuetan parte hartzeak ez du eragotziko pertsonek enplegua lortzeari dagokionez duten administrazio-egoera, baldin eta ibilbidean xedatutako jarduketek enplegua lortzerainoko abantzu eraginkorra ahalbidetzen badute, aplikagarri den araudiak dioenaren legez, bereziki atzerritartasunaren arloan, hasierako administrazio-egoera gorabehera.

Beren egoeraren eta ibilbidearen unearen arabera, honako kolektibo hauek parte hartu ahal izango dute:

a) Gizarteratzeko eta Diru Sarrerak Bermatzeko Euskal Sistemaren (DSBE edo BGDS) onuradun diren pertsonak, Gizarteratzeko eta Diru Sarrerak Bermatzeko Euskal Sistemari buruzko abenduaren 22ko 14/2022 Legearen esparruan.

b) Enplegu-erregulazioko espediente baten eraginpean dauden langileak.

c) Arrazoi ekonomikoak, teknikoak, antolakuntzakoak edo ekoizpenekoak tarteko edo ezinbesteko kausen ondorioz aldi baterako enplegu-erregulazioko espedienteen, lan-kontratuaren etenduren edo lanaldi-murrizketen eraginpean dauden langileak langabetzat joko dira ondore horietarako.

d) Laneratzea lortzeko beharrizan espezifikoak dituzten gazteak, beren azpikualifikazioarekin edo gainkualifikazioarekin lotutakoak edo proiektuaren xede diren langintzekin eta identifikatutako benetako enplegu-aukerekin bat etortzeko zailtasunak dituztenak.

e) Iraupen luzeko langabeak.

f) 45 urtetik gorako langabeak.

g) Adingabeak edo mendeko pertsonak ardurapean dituzten pertsonak, bai eta gizarte-bazterkeriako egoeran edo arriskuan dauden pertsonak ere.

h) Desgaitasuna duten pertsonak.

i) Atzerritartasunaren arloan indarrean dagoen araudiari erreparatuz administrazio-erregularizazioko prozesuetan parte hartzen duten migratzaileak, azkenaldiko arau-aldaketetatik eratorritakoak barne.

j) Arestian aipatutako erregularizazio-prozesuetan parte hartzeko aukerarik ez duten migratzaileak, baina sustraitze-prozesu konbentzionaletan edo aplikagarri den araudiaren arabera enplegua lortzeko pixkanaka aurrerantz joaten lagundu dezaketen beste ibilbide batzuetan parte hartzeko hautua ematen zaienak.

k) Atzerrian bizi eta EAEra lanera itzultzeko asmoa duten langile landunak zein langabeak, Itzultzeko borondatea duten pertsonen erregistroan izena emanda daudenak.

l) Langile landunak edo langabeak, baldin eta beren prestakuntza-mailagatik espezializazioa behar badute enpresek eskatutako eta lan-merkatuan identifikatu diren enplegu-aukerei lotutako langintzetan.

Askotariko profilak parte hartzen uztearen arrazoia da kalteberatasun-egoerei zein enplegu-eskaintzaren eta enplegu-eskariaren arteko desorekei heltzea beharrezkoa dela lan-merkatuko hainbat segmentutan.

2.– Lanaldi partzialeko kontratu batekin ari diren landunak, baldin eta beren lanaldia lanaldi osoz aritzen den pertsona batek duenaren herena baino laburragoa bada –konparagarriak izan behar dute–.

3.– Proiektu integraletan, emakumeei lehentasuna ematen saiatuko da, emakumeengan eragin handiagoa baitute langabeziak, lan-prekaritateak, soldata-arrakalak eta lan-merkatuko egiturazko beste desberdinkeria batzuek. Horrela, bada, beharrezkoa da sektore horrentzako ekintza positiboko neurriak ezartzea enplegu-politika aktiboetan.

4.– Jasotzaileak enplegua lortzeko oztopo administratibo, sozial edo pertsonal garrantzitsuak dituzten kolektiboetakoak badira, proiektuek gizarteratze- eta laneratze-ibilbidearen eraginkortasuna bermatzeko behar diren jarduketa espezifikoak bildu beharko dituzte, deialdi honek 3. artikuluan xedatutakoarekin bat etorriz, bai eta lan-merkatuaren ezaugarrietara eta proiektuaren oinarri diren benetako laneratze-aukeretara egokitzen direla bermatzeko ere.

5. artikulua.– Gizarteratze-ibilbideen esparruko prestakuntza-ekintzen betekizunak eta baldintzak.

1.– Taldeko prestakuntza-ekintzak, ziurtagarriak edo egiaztagarriak, laneratze-ibilbideetan integratutako elementu gisa eratu beharko dira, proiektuaren xede diren lanpostuak betetzeko edo ibilbidearen xedearen arabera enplegua lortzea errazteko beharrezkoak diren gaitasun pertsonalak eta profesionalak garatzera bideratuta.

Ekintza horiek proiektuaren xede diren langintzekin zuzenean lotuta egon beharko dute, identifikatutako enplegu-beharrizanekin lerrokatuta, bai eta onetsitako proiektuaren oinarri diren benetako laneratze-aukerekin ere.

Era berean, prestakuntza-ekintzak ekoizpen-inguruneko prestakuntza-jarduketekin osatu ahal izango dira, deialdi honek 3. artikuluan ezarritako baldintzetan.

Lanpostuan prestakuntza ematea txertatzen duten proiektuetan, jarduketa hori laneratze-ibilbidearen fase integratutzat jo beharko da, ekoizpen-ingurunean gaitasunak eskuratzera eta kontratatzeko prestaketa eraginkorrera bideratuta, proiektuaren helburuarekin bat etorriz.

FCOO0026OV – Tutoretza eta banakako prestakuntza lanpostuan espezialitatean oinarritutako lanpostuko prestakuntzaren kasuan, malgutasunez eta laneratze-ibilbidera, lanpostuaren ezaugarrietara eta parte-hartzailearen egoerara egokituta aplikatuko da, eta aurretiazko fase gisa eratuko da, kontrataziora bideratuta, enpleguranzko benetako trantsizioa errazteko.

Prestakuntza-ekintzak proiektuaren jarduketa-ildoari moldatu beharko zaizkio, eta xedatutako laneratze-ibilbidearekin eta identifikatutako enplegu-beharrizanekin koherentea dela bermatu beharko dute.

Bestalde, lanpostuan prestakuntza ematean, FCOO0026OV – Tutoretza eta banakako prestakuntza lanpostuan espezialitatean ezarritakoaren arabera, enpresa barruan lanpostua berariaz betetzeko eskatzen diren gaitasun pertsonalak eta profesionalak sustatu beharko ditu.

Prestakuntza diseinatu eta gauzatu ahal izango da sustraitze soziohezitzaileagatik egoitza-baimenak lortzeko galdatzen diren baldintzetara egokitzeko moduan, lan-merkatuaren beharrizanekin lotutako langintzetara bideratutako prestakuntza-ekintzak barne, baldin eta egokitzapen hori koherentea bada laneratze-ibilbidearekin eta proiektuaren helburuarekin.

Helburu nagusi gisa trebakuntza tekniko intentsiboa ez, baizik eta aktibazio edo laneratze progresiboa duten proiektuetan, prestakuntza moldatu ahal izango da iraupenari eta egiturari dagokienez, betiere onetsitako ibilbidearekin koherentzia mantentzen dela bermatuta.

2.– Prestakuntza-ekintzak presentzialak baino ez dira izango.

3.– Taldeko prestakuntzak gutxienez 120 ordu eta gehienez 560 ordu iraungo du (enpresa edo organismo parekatuko prestakuntza-modulua sartu gabe, profesionaltasun-ziurtagiriak edo profesionaltasun-ziurtagiria lortzera bideratutako prestakuntza-ekintzen kasuan), salbu eta enpresa batek edo prestakuntza-erakunde batek eskatutako espezialitateetarako, baldin eta erakunde sektorial batek (2.1 artikuluko a) kategoria) edo trakzio-enpresa batek (2.1 artikuluko b) kategoria) sustatua bada eskaera, zeintzuek ez baitute zertan egon muga horien pean, Lanbide-Euskal Enplegu Zerbitzu Publikoaren Enplegu eta Prestakuntza zuzendariak eskatu, justifikatu eta baimena eman ondoren.

4.– Diruz lagunduko diren prestakuntza-ekintzak 2026ko ekitaldian hasi beharko dira, eta, gehienez ere, dirulaguntza emateko ebazpena jakinarazi eta bi hilabeteko epean, eta 2027ko urriaren 30a baino lehen amaitu beharko dira (enpresa edo organismo parekaturen batean egindako prestakuntza-aldia edo lanekoak ez diren praktikak barne, hala badagokio).

5.– Prestakuntza-helburu hau erdietsi beharko da: gutxienez % 60 amaitu beharko da, kitapenean aplikatu beharreko zenbaketa-irizpideak albo batera utzi gabe.

6.– Prestakuntza-ekintza egiaztagarriak espezialitatearen iraupen osorako eman beharko dira.

Profesionaltasun-ziurtagiri bati edo C gradu bati lotutako prestakuntza-ekintzak programatu ahal izango dira ziurtagiri osoa emateko, lanbide-moduluka, C gradu osoak emateko edo B graduko multzotan.

Prestakuntza-planean sartzen bada profesionaltasun-ziurtagiri bat edo C Gradu bat osorik ematea, kasuan kasuko profesionaltasun-ziurtagiriak edo C Graduak zenbat lanbide-modulu edo B Gradu dituen, beste hainbeste prestakuntza-ekintzatan zatituko du Lanbide-Euskal Enplegu Zerbitzu Publikoak.

Zentro batek C gradu bat edo profesionaltasun-ziurtagiri bat, horiek osatzen dituzten B gradu guztiak edo lanbide-modulu guztiak jasotzen dituenak, programatzen badu, zentroak nahitaez jaso beharko du enpresan edo organismo parekatu batean 80 orduko prestakuntza-aldi bat egiteko eskaintza, B graduak metatuz C Gradua eskuratu edo lanbide-moduluak metatuz profesionaltasun-ziurtagiria eskuratu nahi duten pertsona guztientzat, bat etorriz uztailaren 18ko 659/2023 Errege Dekretuak 60.2 artikuluan esandakoarekin.

7.– Prestakuntza-ekintzak onesteko, gehieneko parte-hartzaileen kopurua 20 izango da, eta gutxienekoa zortzi. Hala ere, dirulaguntza jasoko dutenez gain, beste bi parte-hartzaile ere onartu ahal izango dira prestakuntza-ekintzetan, prestakuntza-zentroak kopuru hori hartzeko egiaztatuta edo inskribatuta badaude. Parte-hartzaile gehigarri horiengatik ez da dirulaguntzarik jasoko.

Ezin izango da hasi zortzi parte-hartzaile baino gutxiagoko taldeko prestakuntza-ekintzarik, tartean eskatutako eta Lanbide-Euskal Enplegu Zerbitzu Publikoaren Enplegu eta Prestakuntza zuzendariak baimendutako salbuespen justifikatuko egoeraren bat ez bada behintzat.

8.– Ikasgelan edo tailerrean irakatsitako zati teoriko-praktikoa soilik lagunduko da diruz. Enpresetan edo lantokietan egindako praktikak ez dira diruz lagunduko.

9.– Enplegu-aukerak aztertzeko ekintzak (lan-eskaintzak hautematea, erregistratzea eta kudeatzea) Lanbide-Euskal Enplegu Zerbitzu Publikoarekin bitartekotza-zerbitzua emateko elkarlanean diharduten erakundeek egin ahalko dituzte, Lanbideko zuzendari nagusiaren 2022ko urriaren 27ko Ebazpenak xedatutako prozedurari jarraituz (EHAA, 212. zk., 2022-11-07koa).

Goian aipatutakoez gain, aurretiazko prozeduraren arabera Lanbide-Euskal Enplegu Zerbitzu Publikoaren laguntzaileak ez izan arren, enplegu-agentzia gisa eratuta ez dauden erakunde onuradunek ere enplegu-aukerak aztertzeko ekintza osagarriak egin ahal izango dituzte, proiektu integraleko parte-hartzaileekin soilik, Enpleguari buruzko 3/2003 Legeak 41.2 artikuluan jasota duen bezala.

10.– Orientazio-ekintzak pertsona fisikoek edo juridikoek, publikoek zein pribatuek, egin ahal izango dituzte, orientazioko jarduketa egitean hauek dituzten heinean:

a) Interneterako banda zabaleko sarbide eraginkorra, Lanbide-Euskal Enplegu Zerbitzu Publikoaren informazio-sistemarekin konektatzeko.

b) Tableta grafikoko periferiko bat, sinadura digitala jasotzeko euskarri modura. Lanbide-Euskal Enplegu Zerbitzu Publikoaren informazio-sistemara konektaturik egon behar du, eta, horrez gain, bateragarria izan beharko du STU 430 modeloari edo baliokideari dagokion WACOM gailuarekin, eta haren zehaztapen teknikoak bete behar ditu.

Orientazio-ekintzak egiten dituzte langileak profil honekin egongo dira kontratatuta: Gizarte Segurantzako 1. eta 2. kotizazio-taldeetako teknikariak, unibertsitate-ikasketak amaituta dituztenak eta orientazio profesionalean, dinamizazio soziolaboralean edo prestakuntza-arloko aholkularitzan espezializatuta daudenak, eta bulegotikari, Interneti eta lan-merkatuari buruzko jakintza ere badutenak.

11.– Laneratzeko zailtasun bereziak dituzten kolektiboei zuzendutako proiektuetan, prestakuntza-ekintzen plangintzak bermatu beharko du bateragarria dela parte-hartzaileen ibilbide soziolaboralarekin, irizpide hauek kontuan hartuta: ordutegien arrazionaltasuna, prozesuen jarraitutasuna eta inguruabar pertsonaletara eta administratiboetara egokitzea, hargatik eragotzi gabe galdatutako baldintza teknikoak, eta proiektuan definitutako laneratze-helburuei benetan egiten dieten ekarpena.

6. artikulua.– Kontratuen betekizunak eta baldintzak.

1.– Proiektuak 1. eta 2. Ildoen babesean garatzen badira, erreferentziazko helburu gisa, eraginkortasunez laneratzearen eta/edo laneratze progresiboaren emaitzak lortu beharko dituzte, xedatutako ibilbidea amaitzen duten pertsonen % 50ean, gutxienez. Emaitza horiek artikulu honetan ezarritako baldintzen pean lan-kontratuak formalizatuz gauzatu ahal izango dira, edo 1. artikuluan zehaztutako laneratze-emaitza progresiboen bidez, proiektuaren tasunaren eta helburuaren arabera.

3. Ildoko dirulaguntzek laneratze-prozesu horietatik eratorritako lan-kontratuak finantzatuko dituzte, deialdi honetan ezarritako betekizunak eta baldintzak betetzen dituztenean.

Deialdi honek 18. eta 23. artikuluetan adierazitako ez-betetzeak kitatzeko eta mailakatzeko irizpideei jarraituz zehaztuko da aipatu helburu horren galdagarritasuna.

Kontratazioak formalizatzeko epea luzatu ahal izango da behar bezala justifikatutako kasuetan, aldez aurretik eskaera arrazoitua eta Lanbide-Euskal Enplegu Zerbitzu Publikoaren Enplegu eta Prestakuntzako zuzendariaren berariazko baimena izanez gero, proiektuaren garapenean gertatzen diren inguruabarrak kontuan hartuta.

Konpromiso hori proiektuaren tasunarekin eta hura kokatuta dagoen jarduketa-ildoarekin bat etorriz aplikatuko da, parte-hartzaileak enplegura zenbateraino hurbildu diren eta lan-merkatuaren baldintzak kontuan hartuta, deialdi honek 18. eta 23. artikuluetan adierazitako ez-betetzeak kitatzeko eta mailakatzeko irizpideei jarraituz.

Era berean, eta salbuespen gisa, garatutako ekimenari atxikitako kontrataziotzat joko dira, ezarritako aldian, parte-hartzaileek garatutako prestakuntza-prozesuari eta lortutako titulazioari esker eskuratutako kontratazio guztiak, baldin eta haiek gabe kontratazio berria egitea ezinezkoa izango balitz, eta artikulu honetan adierazitako gutxieneko kontratazio-baldintzak betetzen badira. Salbuespen horiek Lanbide-Euskal Enplegu Zerbitzu Publikoaren Enplegu eta Prestakuntzako zuzendariari justifikatu eta eskatu beharko zaizkio, ondoren baimena eman dezan.

Aurretiazko prozesuetan parte hartzen duten pertsonei zuzendutako proiektuetan edo jarduketetan, administrazio-erregularizazioan zehar edo geroago, artikulu honetan ezarritako kontratazio-konpromisoa aplikatuko da ibilbidearen berezitasunak eta auziko administrazio-baldintzak kontuan hartuta, baina horrek ez du esan nahi deialdi honetan ezarritako laneratze-orientaziorako konpromisotik automatikoki salbuetsiko denik, eta, nolanahi ere, proiektuak enplegua lortzeko orientazio eraginkorra mantendu beharko da, baldintzek ahalbidetzen dutenean.

Ondore horietarako, eta salbuespen gisa, proiektuaren memorian behar bezala justifikatu ostean eta Enplegu eta Prestakuntzako zuzendariaren berariaz baliozkotuta, exijitutako epeak eta kontratazioen benetako kopurua doitzeko baimena eman ahal izango da, baldin eta egiaztatuta geratzen bada xedatutako jarduketa guztiak zuzenki burutu direla, ibilbidea finalista dela eta proiektua benetan laneratzera bideratuta dagoela.

Erakunde onuradunarekin zerikusirik ez duten eta behar bezala justifikatuta dauden arrazoiengatik xedatutako kontratazio-mailetara iristea ezinezkoa denean, erdietsitako laneratze-maila baloratu ahal izango da, ibilbidea benetan gauzatzearen eta lortutako emaitzen arabera, eta, hala badagokio, laneratze progresiboaren emaitzak barne hartuta, 1. artikuluan ezarritako definizioen arabera.

Kasu horietan, proiektua betearazi ahal izateko, xedatutako jarduketen garapena, hartzaileen benetako parte-hartzea eta proiektua laneratzera bideratuta dagoela egiaztatuko da, behar den beste, betiere deialdi honek 18. eta 23. artikuluetan adierazitako ez-betetzeak kitatzeko eta mailakatzeko irizpideei jarraituz. Kasu horietan, 23. artikuluan zerrendatutako gutxitze-irizpideak behar bezala justifikatutako inguruabar horiek aintzat hartuta aplikatu beharko dira.

Artikulu honetan xedatutakoa kontuan hartuko da dirulaguntza kitatzeko eta ez-betetzeak mailakatzeko.

Horretarako, erdietsitako laneratze-maila deialdi honek 1. artikuluan ezarritako definizioen arabera baloratuko da.

2.– Diruz lagundu ahal izateko, aldi baterako lan-kontratuek gutxienez sei hilabetez iraun beharko dute, eta lan-kontratu mugagabeek, ordea, gutxienez hamabi hilabetez mantendu.

Deialdi honen babespean diruz lagundu daitezkeen lan-kontratuak lanari buruz indarrean dagoen legedian ezarritako kontratu-modalitateen arabera formalizatu ahal izango dira, baldin eta deialdi honetan ezarritako gutxieneko iraupen- edo mantentze-baldintzak errespetatzen badituzte.

Finantzaketatik kanpo geratuko dira ikas-ekinezko prestakuntza-kontratuak, merkataritza-kontratuak, aldizkako kontratu finkoak eta aldi baterako laneko enpresek langileekin enpresa erabiltzaile bati lagatzeko sinatutako kontratuak.

Diruz laguntzeko moduko lan-kontratuek baldintza hauek bete behar dituzte.

a) Kontratazioak erreferentzia egin beharko die kontratatu behar den pertsonaren profil profesionalaren arabera egokiak diren lanpostuei, hau da, ikasketa- edo prestakuntza-maila eta/edo lanbide-esperientziarako egokiak direnei, baldin eta prestakuntza hori ezinbestekoa bada bete beharreko lanposturako.

b) Lan-kontratuak idatziz formalizatu beharko dira, eredu ofiziala erabilita, eta berariaz jaso beharko dituzte honako hauek: langilearen prestakuntza edo kualifikazio profesionala, kontratuaren hasiera-data eta, hala badagokio, amaiera-data, kontratuaren iraupena, lanaldia eta bete beharreko lanpostua.

c) Lan-kontratuak lanaldi osokoak edo lanaldi partzialekoak izan daitezke, baina, azken kasu horretan, inoiz ez dira izango ezarritako lanaldiaren % 70etik beherakoak.

d) Eskaeran, urteko ordainsari gordinaren zenbatekoa adierazi beharko da lan-kontratu mugagabeetan, eta gutxienez sei hilabeteko iraupena duten kontratuetan, berriz, hileko ordainsari gordina.

Deialdian eskatzen den gutxieneko soldata-ordainsari gordina zehazteko, oinarrizko soldata, aparteko ordainsariak eta soldata-osagarriak baino ez dira kontuan hartuko, eta berariaz geratuko dira zenbaketatik kanpo soldataz kanpoko bestelako ordainsariak eta osagarriak.

Lan-kontratuek dirulaguntza jaso ahal izateko, lanaldi osoko urteko soldata-ordainsari gordina ez da, ezein kasutan, taula honetan azaltzen diren zenbatekoak baino txikiagoa izango:

(Ikusi .PDF Fitxategia)

Halaber, diruz lagundutako kontratazioek enplegua sortzea eragin beharko dute, diruz lagunduko diren lan-kontratuen xede diren langileak lanean hasi aurre-aurreko sei hilabeteetan enpresak Euskal Autonomia Erkidegoan dituen lantokietako batez besteko langile-kopuruarekin alderatuta. Kontratu berriaren ondorioz, esandako batezbestekoak gora egin beharko du kontratazio-egunean.

Baldintza hori betetzeko, ez dira kontuan hartuko bidegabetzat edo deuseztzat jo ez diren kausa objektiboengatik edo kaleratzeengatik azkendutako lan-kontratuak, langileen erretiro, dimisio, heriotza, ezintasun iraunkor oso, absolutu edo baliaezintasun handiagatik azkendu diren kontratuak, ezta langileak hasiera batean hitzartutako lan-denbora borondatez murriztutako kontratuak ere.

3.– Kontratazio-konpromisoaren betetze-ondoreetarako, kontrataziotzat joko da parte-hartzailea bazkide-langile edo lan-bazkide gisa sartzea kooperatiba-sozietate batean, edo lan-sozietate batean bazkide-langile gisa sartzea. Horretarako, sozietate horretan sartu dela egiaztatzen duten dokumentuak aurkeztu beharko dira.

4.– Laneratzea proiektuarekin lotutako prestakuntza-ekintzaren eskaeran oinarri hartutako enpresetan egingo da ahal dela. Salbuespenez, enpresa horietako batean sartzea eragozten duten kausak –agiri bidez justifikatuak– daudenean soilik onartu ahal izango da beste enpresa batzuetan laneratzea. Horretarako, kontratua egin baino 15 egun baliodun lehenago gutxienez, erakunde kontratatzaile berri bat onartzeko eskaera aurkeztu beharko da LANF aplikazioaren bidez, eta, eskaerarekin batera, kontratazio-konpromisoaren eranskina eta enpresa kontratatzaile berria sinatzen duen pertsonaren ordezkaritza-gaitasuna egiaztatzen duen dokumentua aurkeztu beharko dira. Gainera, beste enpresa bat sartzeko salbuespenezko eskaerarekin batera, justifikazio dokumentalak aurkeztu beharko dira, banakakoak eta pertsonalizatuak, enpresa bakoitzaren legezko ordezkariak sinatuta, hitzeman zituzten lan-kontratuak formalizatzea eragozten duten arrazoi zehatzak zehaztuta. Kontratazio horiek Euskal Autonomia Erkidegoko lantokietan egingo dira.

5.– Kontratazioa proiektuan zehaztutako langintza batean egin beharko da, emandako prestakuntza-espezialitatearekin eta identifikatutako enplegu-beharrizanekin lotuta, eta gutxienez prestakuntza jaso duen lanpostuan edo goragokoan. Alde horretatik, lanpostu egokitzat joko da aurretiazko prestakuntzan eskuratutako ezagutza teoriko-praktikoekin lotutako lanak egitea xede duena.

6.– Taldeko prestakuntza-ekintzaren % 75 burutu ostean eta banakako prestakuntza-aldi osoan zehar onartu ahal izango dira kontratazioak. Kontratazioa prestakuntza-aldiak amaitu baino lehen egiten bada, prestakuntza-ekintza amaitzen denean hasiko da kontratazio-konpromisoa betetzeko exijitzen den aldia.

7.– Ez dira diruz lagunduko hauekin egindako kontratuak: ezkontidearekin, ondorengoekin eta bigarren mailara arteko (hori barne) odolkidetasuneko edo ahaidetasuneko senideekin, enpresaburuarekin edo enpresa-kontrola dutenekin, zuzendaritza-karguekin edo sozietatearen forma juridikoa duten enpresetako administrazio-organoetako kideekin egindakoak, ez eta azken horiekin egindakoak ere.

8.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, artikulu honetan ezarritako kontratazio-baldintzak aplikatu beharko dira benetako bideragarritasuna eta laneratzearen jasangarritasuna bermatzeko beharrizana kontuan hartuta. Aldez aurretik justifikatuta, baloratu ahal izango da kontratatutako pertsonen inguruabar pertsonaletara eta administratiboetara egokitzen diren kontratuaren iraupena eta ezaugarriak, hargatik eragotzi gabe ezarritako gutxieneko baldintzak betetzea, betiere proiektuan definitutako kontratazio-baldintzen eta laneratze-helburuen arteko koherentzia bermatuta, eta deialdi honek 1. artikuluan ezarritako definizioekin.

7. artikulua.– Dirulaguntzaren zenbatekoa.

1.– Artikulu honetan zehaztutako zenbatekoak 1. artikuluan definitutako jarduketa-ildoekin bat etorriz egituratuko dira, diruz lagundutako esku-hartze mota bakoitzarekin lotutako laneratze-mailei eta jarduketa-ildo bakoitzaren bitartez ase nahi diren enpleguaren eta lan-merkatuaren beharrizanen ezaugarriei erantzunez. Hori aplikatzeko, aintzat hartuko dira jarduketa-ildo bakoitzaren espezifikotasuna eta diruz lagundutako jarduketak kokatuta dauden proiektuaren xede nagusia. Xede horrez, laneratze-mailak deialdi honek 1. artikuluan ezarritako definizioen arabera interpretatuko dira.

Artikulu honetan ezarritako zenbatekoak gehienekoak izango dira, eta dirulaguntzaren kitapen-prozesuan zehaztuko dira, 18. artikuluan xedatutakoaren arabera, jarduketen gauzatze-mailaren eta erdietsitako laneratze-emaitzen arabera.

Artikulu honetan ezarritako zenbatekoak proiektuaren tasunaren eta helburuaren arabera aplikatuko dira, jarduketen gauzatze-mailarekin eta erdietsitako laneratze-emaitzekin bat etorriz, 18. artikuluan xedatutakoaren arabera.

3.1 artikuluan xehatutako merkatu-prospekzioko eta bitartekaritzako jarduketak egiteagatik, 2.800 euroko dirulaguntza emango da lortutako lan-kontratu bakoitzeko edo, hala badagokio, proiektutik eratorritako benetako laneratze-kasu bakoitzeko, deialdi honek 1. artikuluan ezarritako definizioen arabera. Zenbateko hori benetan aplikatze aldera, dirulaguntzaren kitapena egin beharko da 18. artikuluan xedatutakoaren arabera, eta 6. artikuluan ezarritako baldintzak bete beharko dira.

Laneratzea lan-kontratuak formalizatzean gauzatzen bada, 6. artikuluan ezarritako baldintzak bete beharko dituzte, eta artikulu horretan xedatutako epearen barruan hasita egon beharko dute.

2.– Banakako ibilbideak garatzeko asmoz 3.2 artikuluan zehaztu diren jarduketetarako dirulaguntzak 2.240 euroko zenbatekoa izango du erreferentzia gisa, xedatutako gizarteratze-ibilbidea osatzen duen parte-hartzaile bakoitzeko. Zenbateko hori kitapen-prozesuan zehaztuko da, 18. artikuluan xedatutakoari jaramon eginez, gauzatze-mailaren eta erdietsitako emaitzen arabera.

3.– Taldeko prestakuntza-ekintza bakoitza finantzatzeko dirulaguntzaren zenbatekoa parte-hartzaile eta prestakuntza-ordu bakoitzaren kostuaren arabera ezarriko da, jarraian zehaztuko diren modulu ekonomikoen arabera, laneratze-ibilbideen barruan duen tasun instrumentalarekin koherente izanik.

Modulu ekonomiko bakoitzak hiru ditu: horietako bi zuzeneko kostuei dagozkienak –langileak (A) eta funtzionamendua (B)– eta hirugarrena zeharkako kostuei (C) dagokiena –kostu zuzenei dagozkien moduluen baturari % 10eko ehunekoa aplikatuz kalkulatua–.

a) A modulua: langileen kostua.

Zuzeneko kostuaren kontzeptu honek irakasleen, bitartekotza-tutorearen eta ikasketa-burutzaren kostuak biltzen ditu. A moduluan, unitateko kostuaren balio ekonomikoa hau izango da: 4,99 euro orduko eta ikasleko.

Prestakuntza-ekintzetako parte-hartzaileen kopurua gehienez hogei eta gutxienez zortzi bada, deialdiaren 5.7 artikuluan jasotako kasua barnean dela, modulu hau hamabost parte-hartzaileko kopuru finkoari aplikatuko zaio.

Horrenbestez, moduluaren baremo estandarrak balio finkoa izango du prestakuntza-talde bakoitzeko: 74,85 euro orduko.

b) B modulua: funtzionamendu-gastuak.

b.1.– Modulu horretan, bi motatako zuzeneko kostuak sartzen dira:

b.1.1.– Mantentze-kostuak. Honako hauek sartzen dira: altzariak berritzea, konponketak, publizitatea, komunikazioak, bilerak eta ikastaroak, enpresekin egin beharreko gestioak, liburuak eta argitalpenak, eta higiezinen eta ekipamenduen alokairuak eta amortizazioak.

b.1.2.– Material didaktiko espezifikoaren kostuak. Prestakuntza-ekintzari dagokion lanbide-arloaren eta kualifikazio-mailaren arabera kalkulatzen dira kostu horiek.

Prestakuntza-ekintza bakoitzaren B moduluari dagokion zenbateko ekonomikoa Euskal Autonomia Erkidegoko Prestakuntza Espezialitateen Katalogoan Espezialitate Programagarri bakoitzerako zehaztutako modulu ekonomikoen arabera aplikatuko da. Katalogo hori eskuragai dago Lanbide-Euskal Enplegu Zerbitzuaren (LanF) prestakuntzako aplikazio informatikoan.

c) C modulua: zeharkako kostuak.

Modulu hau A eta B moduluen kostuen % 10 da, eta, besteak beste, kontzeptu hauek biltzen ditu: zuzendariaren pertsonal-gastuak, administrazio-langileen pertsonal-gastuak, berokuntza, argiztapena, garbitzea, instalazioen asegurua, itzalgailuak, alarmak, kanpoarekiko komunikazioak, batzarrak, hitzaldiak, ikastaroak eta bestelakoak, lokomozioa eta enpresekiko kudeaketa, fotokopiak (administrazio-arloa), bulegoko materiala eta informatikoa, ura, farmazia-produktuak, aholkularitzak eta gestoriak, telefonoa eta Internet, administrazio-sailerako softwarea, langileentzako mutuak, kalitate-sistemak, igogailuak konpontzea.

Prestakuntza-ekintza bakoitzerako onetsitako guztirako dirulaguntza honela kalkulatuko da:

Prestakuntza-ekintza bakoitzeko dirulaguntza, guztira = A + B + (A+B)ren % 10

Non:

A = A modulua x ordu-kopurua x 15 parte-hartzaileren kopuru estandarra.

B = B modulua x ordu-kopurua x parte-hartzaileen kopurua.

Azkenean aplikatu beharreko modulu ekonomikoek ezin izango dituzte inola ere gainditu abenduaren 30eko TES/1582/2025 Aginduan xedatutakoak, eta, profesionaltasun-ziurtagiriak edo profesionaltasun-ziurtagiriak eskuratzera bideratutako prestakuntza-ekintzetan, irailaren 23ko EFP/942/2022 Aginduan xedatutakoak.

Ondorioz, aplikatu beharreko azken modulua osatzen duten hiru moduluen batura handiagoa balitz aipatutako araudietan xedatutakoak baino –edo, hala badagokio, horien ordez ezartzen diren eta deialdi hau argitaratzen denean indarrean dauden araudietan xedatutakoak baino–, azken horiek aplikatuko dira.

4.– Produkzio-ingurunean 3. artikuluan xedatutako banakako prestakuntza-programa garatzeko jarduketak egiteagatik, ekoizpen-ingurunean banakako ibilbidea garatzeagatik emango den dirulaguntzaren zenbatekoa 1.150 eurokoa izango da prestakuntza-prozesuari ekiten dion pertsona bakoitzeko, eta 1.500 eurokoa hura amaitzen duen pertsona bakoitzeko (FCOO0026OV espezialitatea – Tutoretza eta banakako prestakuntza lanpostuan), edo, benetako lan-kontratazioagatik, lehenago uzten duen bakoitzeko. Zenbateko horiek dirulaguntzaren kitapenaren esparruan aplikatuko dira, 18. artikuluan xedatutakoari jarraituz, jarduketaren benetako gauzatze-maila eta laneratze-ibilbideari egiten dion ekarpena kontuan hartuta.

5.– Deialdi honen babespean sinatutako lan-kontratuetan, kontratu bakoitzeko diruz lagunduko den zenbatekoa zehazteko orduan, dirulaguntzaren xede den lanpostua betetzeko behar diren titulazio akademikoak edo ikasketak eta kontratuaren iraupena hartuko dira aintzat, taula honekin bat etorriz:

(Ikusi .PDF Fitxategia)

Jaso beharreko azken zenbatekoa doitu ahal izango da kitapen-prozesuan, 18. artikuluan xedatutakoaren arabera, eta, hala badagokio, 23. artikuluan ezarritako ez-betetzeen irizpideak aplikatuz.

6.– Adierazitako dirulaguntzen zenbateko guztiak % 15 handituko dira kontratatutako pertsonak gutxienez ezaugarri hauetako bat betetzen duenean: 55 urte edo gehiago izatea edo sektore maskulinizatu batean kontratatutako emakumea izatea, bai eta enplegua lortzeko zailtasun bereziak dituzten beste inguruabar batzuk gertatzen direnean ere, proiektuan justifikatu ondoren.

7.– Era berean, xedatutako dirulaguntza-zenbatekoak % 10 handituko dira formalizatzen den kontratua mugagabea bada eta, gutxienez, ezarritako lanaldiaren % 70eko lanaldia badu.

8.– Kontratatutako pertsonak goiko 6. eta 7. zenbakietan adierazitako baldintzak betetzen baditu, dirulaguntzaren zenbatekoa % 20 handituko da.

Taula hauetan ageri dira dirulaguntzen zenbatekoak, bai eta dirulaguntza-ehuneko gehigarriak ere:

(Ikusi .PDF Fitxategia)

9.– Aipatutako dirulaguntzen zenbatekoak lanaldi osoko lan-kontratuei dagozkie. Lanaldi partzialeko lan-kontratuetan, zenbatekoak lanaldiaren proportzioan doituko dira.

10.– Artikulu honetan xedatutako zenbateko guztiak gutxi gorabeherakoak eta gehienekoak dira, eta dirulaguntza kitatzeko prozesuaren emaitzaren arabera jasoko dira, 18. artikuluan xedatutakoaren arabera, eta, hala badagokio, 23. artikuluan ezarritako ez-betetzeen eta itzultzeen irizpideak aplikatuta.

8. artikulua.– Eskaerak aurkeztea.

1.– Elektronikoki izapidetuko dira deialdi honetan xedatutako proiektu integralak egiteko dirulaguntza-eskaerak, Lanbide-Euskal Enplegu Zerbitzu Publikoaren prestakuntza-aplikazio informatikoaren bidez (LanF).

Aplikazio horretara sarbiderik ez duten enpresek edo erakundeek Lanbide-Euskal Enplegu Zerbitzu Publikoaren web-orriaren bidez egin ahal izango dute eskaera: https://www.lanbide.euskadi.eus/prestakuntza/-/informazioa/erakundeen-erregistroa/

Administrazio-prozedurei buruzko informazio-fitxa (elektronikoki izapidetzeko jarraibideak ematen dituena) helbide hauetan egongo da eskuragarri:

– 1. ildoari dagozkion eskaeretarako: https://www.euskadi.eus/servicios/1272101

– 2. ildoari dagozkion eskaeretarako: https://www.euskadi.eus/servicios/1272102

Eskaera independente bat aurkeztuko da proiektu bakoitzeko.

Eskaerak modu egokian formulatu daitezen, proiektuak laneratze-ibilbide integratu gisa diseinatu beharko dira, eta hainbat jarduketa-fasetan edo -ildotan egituratu ahal izango dira, hala nola orientazioan, prestakuntzan, ekoizpen-ingurunean esperientzia eskuratzean eta lan-kontratazioan, dirulaguntzen jasotzaileen profilaren arabera, enplegu-beharrizanei, lan-merkatuaren ezaugarriei eta proiektua funtsatzen duten laneratze-aukerei buruz egindako azterketarekin bat etorriz.

Nolanahi ere, xedatutako jarduketa guztiek koherentziaz erantzun beharko diete identifikatutako enplegu-beharrizanei eta lan-merkatuaren ezaugarriei, eta proiektuak laneratze-emaitza eraginkorrak sortzeko duen gaitasuna izango da diseinuaren ardatz nagusia.

Proiektu integralak egiteagatik dirulaguntza jasotzeko eskaerarekin batera, honako dokumentu hauek aurkeztu beharko dira:

a) Oro har:

a.1.– Laneratzeko proiektu integralaren deskribapen-memoria, LanF aplikazioan emandako ereduaren araberakoa. Memoria horrek modu bereizian egon behar du egituratuta proiektuan xedatutako jarduketa-ildo edo ibilbideko fase bakoitzerako, arreta berezia jarrita laneratze-ibilbidearekin eta, hala badagokio, administrazio-egoera erregular batera iristeko prozesuekin duen koherentziari.

Horretarako, proiektuaren memoria egituratzean bertan bildutako esku-hartze ildo bakoitzari dagozkion jarduketak bereizita egon beharko dira, eta haietako bakoitzerako helburuak, edukiak, metodologia, aurreikusitako emaitzak eta jarraipen-adierazleak zehaztu beharko dira, laneratze-ibilbidearen diseinuarekin eta deialdi honek 1. artikuluan ezarritako definizioekin bat etorriz.

Era berean, memoriak berariaz identifikatu beharko ditu proiektua justifikatzen duten enplegu-beharrizanak eta lan-merkatuaren ezaugarriak, eta haien tasuna zehaztu beharko du (kuantitatiboa, kualitatiboa edo enplegua lortzeko oztopoetatik eratorritakoa izatea), bai eta xedatutako jarduketek nola laguntzen duten haiei ihardesten eta benetako laneratze-emaitzak sortzen argi eta garbi, behar bezala eta proiektuaren tasunari eta irismenari doituta.

– Txosten bat proiektu integrala garatzeko beharrizana arrazoitzeko, bai eta enpresaren/enpresen jarduerari buruzko eta proiektuaren xede diren langintzekin eta aurreikusitako benetako laneratze-aukerekin lotutako enplegu-beharrizanei buruzko jarduketak arrazoitzeko ere.

Mahaigaineratutako beharrizanak lotura zuzena eduki beharko du proiektuaren xede diren langintzekin eta identifikatutako enplegu-beharrizanekin, eta langintza horiekiko koherentzia gorde beharko du proiektu osoak, bai eta proposatutako prestakuntzak, parte-hartzaileen profilak eta espero diren kontratazioak ere.

– Kontratatu nahi diren pertsonen profila: ezaugarriak eta eskakizunak. Ezin izango da sexua, adina edo proiektuaren xede den eta kontratatu nahi den langintzarako egokia ez den beste edozein baldintza zehaztu, kontratazio horrek programa bereziren bati heltzen ez badio behintzat. Ezaugarri horiek koherenteak izan beharko dute proiektuaren xede diren lanbideekin eta proiektuaren oinarri diren enplegu-beharrizanekin.

– Egin beharreko kontratu mota eta haren iraupena, urteko soldata-ordainsari gordina eurotan adierazita.

– Kontratazioa zer langintzatan eta lanbide-kategoriatan egingo den.

– Lanpostuaren edo lanpostuen kokapena.

– Kontratatutako pertsonek zerbitzuak emango dituzten enpresen zerrenda, IFZ eta EJSN identifikatuta.

– Lanekoak ez diren praktiken planaren deskribapena, egoki izanez gero (edukia, iraupena eta abar).

– Laneratzeko zailtasun bereziak dituzten kolektiboei zuzendutako proiektuetan, memoriak honako hauek jaso beharko ditu: proposatutako ibilbide soziolaboralaren deskribapen xehatua, xedatutako akonpainamendu-jarduketak, haien denbora-sekuentzia eta banakako jarraipen-mekanismoak.

– Proiektua, osorik edo zatika, administrazio-erregularizazioko egoeran edo prozesuan dauden pertsonei zuzentzen zaienean, ibilbidean jarduketa espezifikoak txertatu beharko dira, bizileku- eta lan-baimenak eskuratzeko exijitzen diren baldintzak betetzera bideratuta, eta proiektuaren diseinu globalean integratu beharko dira. Jarduketa horiek, nolanahi ere, koherentziari eutsi beharko diote proiektuaren xede diren langintzekin eta proiektua funtsatzen duten laneratze-aukerekin.

– Ondore horietarako, honako hauek xehatu beharko dira:

– Parte-hartzaileei aplikagarri zaizkien administrazio-erregularizazioko bideak, bereziki sustraitze soziolaboralagatiko edo soziohezitzaileagatiko baimenak edo beste erregularizazio-prozesu berezi batzuk.

– Xedatutako jarduketek (orientazioa, prestakuntza eta esperientzia ekoizpen-ingurunean) prozedura horietan exijitutako baldintzak betetzen laguntzea, batez ere prestakuntzari, gizarteratzeari eta enplegua lortzeari dagokienez.

– Enplegua lortzearekin zerikusia duten emaitzen aurreikuspena, atzerritartasunari buruzko araudiarekin bateragarriak diren eskaintzak edo lan-kontratuak lortzea barne.

– Administrazio-erregularizazioaren arloko akonpainamendu- edo aholkularitza-jarduketak, unean eskuragarri dauden baliabide espezializatuekin koordinatuta, hala badagokio.

Orientagarri gisa, bereziki egokitzat joko da jarduketa horiek honako hauetan zehaztuta egotea:

– Prestakuntzaren eta benetako enplegu-eskaria duten langintzen arteko lotura.

– Atzerritartasunari buruzko araudiaren eskakizunekin bateragarriak diren baldintzetan kontratatzeko aurreikuspena.

– Prestakuntzaren, ekoizpen-inguruneko esperientziaren eta enplegua lortzearen arteko sekuentzia koherentea.

– Koherentzia, batetik, xedatutako jarduketen, eta, bestetik, proiektuaren xede diren langintzen eta proiektuaren zimendu gisa identifikatutako enplegu-beharrizanen artean.

Informazio horren falta izateak edo nahikoa ez izateak, jasotzaileen profilari aplikagarria zaionean, zuzentzeko errekerimendua eragin dezake, artikulu honek 4. zenbakian ezarritako baldintzetan.

a.2.– Lanbide-Euskal Enplegu Zerbitzu Publikoak proiektuaren berezitasunen arabera exijitzen duen bestelako edozein informazio.

b) Enpresek prestakuntza-ekintza ematea kontratatzen badute, kontratazio-proposamena, hiru eskaintza eskatu izana eta amaierako aukeraketa justifikatuz, hala badagokio, bai eta Lanbide-Euskal Enplegu Zerbitzu Publikoari aldez aurretik eskatutako baimena ere, deialdi honek 11. artikuluan adierazitako kasuetan. Dokumentazio hori geroago aurkeztu ahal izango da, baina beti prestakuntza-ekintza hasi aurretik.

c) Erakunde sektorial batek edo trakzio-enpresek bultzatutako eta prestakuntza-erakunde batek aurkeztutako eskaeretan, goiko a.1 paragrafoan aipatutako memoriaz gain, erantzukizunpeko adierazpen bat aurkeztu beharko da, erakunde sektorialaren edo trakzio-enpresaren legezko ordezkariak sinatua, eta, bertan, proiektuaren jarduketa-eremuan kontratatzeko eta lanpostuak betetzeko beharrizanak daudela justifikatuko da: hautagai nahikorik ez dagoelako edo hautagaien eskumenak ez direlako egokiak enpresek eskatutakoekin konparatuz; halaber, justifikatu egin beharko da zergatik den beharrezkoa prestakuntza hori egitea, eta zer koordinazio- eta sustapen-jarduketa egingo dituen laguntza eskatzen duen erakundeak. Era berean, kontratatzeko prest dauden enpresen zerrenda eta egiteko prest dauden lan-kontratu guztiak adierazi beharko ditu, goiko a.1 paragrafoko memorian exijitzen diren xehetasunekin.

Era berean, 2.1 artikuluko a) eta b) letretan dauden baldintzak betetzen direla egiaztatzen duten dokumentuak erantsi beharko dira, bai eta sinatzailearen ordezkaritza-ahalordea ere (estatutuak, inskripzioa, eraketa-akta, ahalordeak eta abar).

d) Erakunde sektorial batek edo trakzio-enpresek bultzatzen ez dituzten eskaeretarako, dokumentu bat aurkeztu beharko da proiektuaren xede diren langintzak betetzeko kontratazioak egingo dituzten enpresa bakoitzaren kontratazio-konpromisoari buruz, langintzok identifikatutako enplegu-beharrizanei eta benetako laneratze-aukerei lotuta daudelarik (prestakuntza-erakundearen eranskina, LanF aplikazioan emandako ereduaren arabera). Halaber, enpresa kontratatzaileko sinatzailearen ordezkaritza-gaitasuna egiaztatzen duen dokumentua erantsi beharko da.

Memorian jasotako informazioak koherentea, nahikoa eta behar bezala garatua izan beharko du proiektuaren helburuei, jasotzaileen profilari eta proiektua funtsatzen duten langintzei dagokienez, bai eta identifikatutako enplegu-beharrizanei eta benetako laneratze-aukerei dagokienez ere, eta zuzentzeko errekerimendua jarri ahal izango zaio, artikulu honek 4. apartatuan ezarritako baldintzetan.

2.– Lan-kontratuak sinatzeagatiko dirulaguntza-eskaerak elektronikoki eta banaka izapidetuko dira egindako kontratu bakoitzeko (eskaera bat kontratu bakoitzeko), Lanbide-Euskal Enplegu Zerbitzu Publikoaren prestakuntzako aplikazio informatikoaren bidez (LanF).

Aplikaziora sartzeko aukerarik ez duten erakundeek edo enpresek Lanbide-Euskal Enplegu Zerbitzu Publikoaren webgunearen bidez eskatu ahal izango dute: www.lanbide.euskadi.eus

Administrazio-prozeduraren informazio-fitxa (elektronikoki izapidetzeko jarraibideak ematen dituena) helbide honetan eskuratu ahal izango da: https://www.euskadi.eus/servicios/1272103

Eskaerarekin batera, dokumentu hauek aurkeztu behar dira:

a) Egindako lan-kontratuaren kopia, aldi baterako kontratuen hasiera-data eta amaiera-data adierazita.

b) Langileen legezko ordezkaritzari idatziz igorritako jakinarazpena, egindako kontratazioari buruz, LanF aplikazioan eskuragai dagoen ereduaren arabera, edo, bestela, eskaeran bertan apropos egindako adierazpena, langileen legezko ordezkaritzarik ez daukala xedatzen duena.

3.– Eskaerak ordezkari baten bidez izapidetu ahal izango dira, eta, horretarako, ordezkaritza hori ahalordearen erregistro elektronikoan inskribatu ahal izango da, helbide honetan: https://www.euskadi.eus/ordezkariak

4.– Eskaerak ez baditu eskakizun guztiak betetzen, edo aurkeztutako dokumentazioa ez bada osoa edo nahikoa proiektuaren memoriarako exijitzen den gutxieneko edukiari erreparatuz, enpresa edo erakunde interesdunari jakinaraziko zaio hamar egun balioduneko epea duela, jakinarazpena jaso eta hurrengo egunetik aurrera, antzemandako hutsunea edo akatsa konpontzeko, edo aurkeztu beharreko dokumentuak bidaltzeko.

Horretarako, memorian bildutako informazioa zabaltzea edo zehaztea eskatu ahal izango da, bereziki laneratze-ibilbidearen diseinuari, xedatutako jarduketen koherentziari edo, hala badagokio, proiektua administrazio-erregularizazioko prozesuetara eta atzerritartasunari buruzko araudira egokitzeari dagokienez. Hala egin ezean, eskaeran atzera egin duela ulertuko da, horretarako ebazpena eman ostean.

5.– Hauek dira dirulaguntza-eskaerak aurkezteko epeak:

a) Proiektu integraletarako eskaerak aurkezteko epea EHAAn argitaratu eta hurrengo egunetik aurrera hasiko da, eta 2026ko urriaren 15ean bukatu.

b) Proiektu integraletatik eratorritako lan-kontratuetarako epea bi hilabetekoa da, lan-kontratua hasi eta hurrengo egunetik aurrera, eta, betiere, 2027ko urriaren 30a baino lehen, tartean eskatutako eta Lanbide-Euskal Enplegu Zerbitzu Publikoaren Enplegu eta Prestakuntzako zuzendariak baimendutako salbuespen justifikatuko egoeraren bat ez bada behintzat.

9. artikulua.– Prozedura eta ebazpena.

1.– Prozedura kudeatzeko organo eskuduna Lanbide-Euskal Enplegu Zerbitzu Publikoaren Enplegu eta Prestakuntzako zuzendaria izango da; eta ebazteko organo eskuduna, berriz, Lanbide-Euskal Enplegu Zerbitzu Publikoaren Administrazioaren eta Zerbitzu Orokorretako zuzendaria.

2.– Deialdian xedatutako proiektu integralak finantzatzeko dirulaguntza emateko prozedura ondoz ondokoa izango da.

2.1.– Proiektua deialdiaren helburura egokitzen dela behin egiaztatuta, eskaera kokatzen den jarduketa-ildoarekin lotutako administrazio-prozeduraren esparruan, bai eta beste alderdi batzuk ere (proposatutako ibilbidearen koherentzia, identifikatutako enplegu-beharrizanetara eta lan-merkatuaren ezaugarrietara egokitzen dela, jarduketak jasotzaileen profiletara egokitzen direla eta aurreikusitako laneratze-emaitzen bideragarritasuna) eta eskaerek deialdi honetan exijitutako baldintzak betetzen dituztela behin egiaztatuta, administrazio-prozeduran espedientea zein unetan osatuta dagoen kontuan hartuta emango dira dirulaguntzak, kasuari dagokion dirulaguntza-ildorako eta lotutako administrazio-prozedurarako aurreikusi den aurrekontu-zuzkidura agortu arte.

Lanbide-Euskal Enplegu Zerbitzu Publikoaren Administrazioaren eta Zerbitzu Orokorren zuzendariaren ebazpen bidez, EHAAn argitaratuko da laguntza horiek finantzatzeko baliabide ekonomikoak agortu direla, eta, beraz, ukatu egingo dira ebazteko zain dauden eskaerak.

2.2.– Lanbide-Euskal Enplegu Zerbitzu Publikoaren Administrazioaren eta Zerbitzu Orokorren zuzendariak laguntzak emateko edo ukatzeko ebazpena emango du, eta ebazpena banan-banan jakinaraziko da, bitarteko telematikoen bidez.

2.3.– Eskaerak ebazteko eta ebazpenak jakinarazteko gehieneko epea hiru hilabetekoa da, eskabidea Lanbide-Euskal Enplegu Zerbitzu Publikoaren erregistroan sartzen den egunetik aurrera; epe hori igarotakoan enpresa edo erakunde interesdunari ebazpena jakinarazi ez bazaio, ezetsitzat jo beharko da dirulaguntzaren eskaera.

2.4.– Proiektuen azterketa teknikoan honako hauek baloratuko dira: diseinuaren barne-koherentzia, proposatutako jarduketen egokitasuna, identifikatutako enplegu-beharrizanekin eta proiektua funtsatzen duten benetako laneratze-aukerekin bat etortzea, eta aurreikusitako laneratze-emaitzen onargarritasuna, proiektuaren tasunaren eta jasotzaileen profilaren arabera.

Era berean, baloratu egingo da proiektuak laneratze-ibilbide integralak antolatzeko daukan gaitasuna, enpresen inplikazio eraginkorra jarduketak definitzeko eta garatzeko, eta ibilbidearen faseen arteko sendotasuna.

Proiektua bere xede diren langintzetara eta identifikatutako enplegu-beharrizanetara egokitzen dela egiaztatuko da, bai eta xedatutako jarduketek langintza horiekin eta definitutako laneratze-helburuekin duten koherentzia ere.

Halaber, proiektuak laneratze-emaitza eraginkorrak eta egiaztagarriak sortzeko daukan gaitasuna baloratuko da, haren tasunaren arabera eta parte-hartzaileak enplegura zenbateraino hurbiltzen diren gogoan edukita, barne hartuta bai lan-kontratuen formalizazioa, bai deialdi honetan xedatutako ereduaren arabera behar bezala egiaztatutako laneratze progresiboko beste emaitza batzuk (proiektua osatzen duten jarduketa guztiak kontuan hartuta, eta ez soil-soilik haren prestakuntza-osagaiak).

3.– Ondoz ondoko emakida izango da lan-kontratuak egiteagatik deialdi honetan xedatutako dirulaguntzak emateko prozedura.

3.1.– Eskaerek deialdi honetako eskakizunak betetzen dituztela egiaztatu eta gero, bereziki 6. artikuluan ezarritako kontratazio-baldintzei dagokienez, espedientea osorik dagoen unearen arabera emango dira, 1. artikuluko 2. zenbakiko b) letran aurreikusitako aurrekontu-zuzkidura agortu arte.

Lanbide-Euskal Enplegu Zerbitzu Publikoaren Administrazioaren eta Zerbitzu Orokorren zuzendariaren ebazpen bidez, EHAAn argitaratuko da laguntza horiek finantzatzeko baliabide ekonomikoak agortu direla, eta, beraz, ukatu egingo dira ebazteko zain dauden eskaerak.

3.2.– Ez da bidezkoa izango dirulaguntzak lan-kontratuak egiteagatik ematea, gainerako ekimenak egiteagatiko dirulaguntza eman ez bada.

3.3.– Lanbide Euskal Enplegu Zerbitzu Publikoaren Administrazioaren eta Zerbitzu Orokorren zuzendariak laguntzak emateko edo ukatzeko ebazpena emango du, eta ebazpena banan-banan jakinaraziko da, bitarteko telematikoen bidez.

3.4.– Eskaerak ebazteko eta ebazpenak jakinarazteko gehieneko epea hiru hilabetekoa da, eskabidea Lanbide-Euskal Enplegu Zerbitzu Publikoaren erregistroan sartzen den egunetik aurrera; epe hori igarotakoan enpresa edo erakunde interesdunari ebazpena jakinarazi ez bazaio, ezetsitzat jo beharko da dirulaguntzaren eskaera.

4.– Lanbide-Euskal Enplegu Zerbitzu Publikoaren Administrazioaren eta Zerbitzu Orokorren zuzendariaren ebazpenek ez diote amaierarik ematen administrazio-bideari, eta haien aurka gora jotzeko errekurtsoa aurkeztu dakioke Lanbide-Euskal Enplegu Zerbitzu Publikoaren zuzendari nagusiari, hilabeteko epean, ebazpena jakinarazi eta hurrengo egunetik aurrera.

5.– Publikotasun-printzipioa betetze aldera, Lanbide-Euskal Enplegu Zerbitzu Publikoaren Administrazio eta Zerbitzu Orokorren zuzendari nagusiaren ebazpen bidez, Euskal Herriko Agintaritzaren Aldizkarian argitaratuko da deialdi honen babespean emandako laguntzen onuradun izan diren erakundeen zerrenda, jasotako zenbatekoak adierazita.

6.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, organo kudeatzaileak, laguntza eman aurretik, proposatutako ibilbidearen koherentzia teknikoa egiaztatuko du, eta akonpainamendu-, jarraipen- eta euskarri-jarduketak jasotzaileen ezaugarrietara egokitzen diren baloratuko du, bai eta proiektuan definitutako laneratze-helburuei egiten dieten ekarpena eta identifikatutako enplegu-beharrizanetara eta lan-merkatuaren ezaugarrietara egokitzen diren ere, proiektuaren integraltasunarekin eta laneratze-ibilbidea osatzen duten jarduketa multzoarekin koherente izanik.

10. artikulua.– Proiektu integraletan parte hartuko duten pertsonak hautatzea.

1.– Proiektu integraletan edo haiek osatzen dituzten prestakuntza-jarduketetan parte hartzeko hautagaiak honako bide hauetatik etorri daitezke:

a) Arrazoi ekonomikoak, teknikoak, antolamenduzkoak edo ekoizpenekoak tarteko, edo ezinbesteko kausen ondorioz, EEE-Enplegua Erregulatzeko espedienteen, ABEEE-Aldi Baterako Enplegu Erregulazioko espedienteen, lan-kontratuaren etenduren edo lanaldi-murrizketen eraginpean dauden langileak, ondore horietarako langabetzat hartuko direnak.

b) Enplegu-eskatzaileak (eta DSBE eta BGDS jasotzen dutenak), baldin eta Lanbide-Euskal Enplegu Zerbitzu Publikoko Orientazio Zerbitzuek prestakuntza-ekintza egiteko agindu badiete haien prestakuntza-ibilbidearen barruan.

c) Nire Lanbidenet-en bitartez ikastaro batean izena eman duten enplegu-eskatzaileak, haien prestakuntza-kontuko prestakuntza-aholkularitzaren bidez, lehentasunez.

d) Lanbide-Euskal Enplegu Zerbitzu Publikoak deitutako enplegu-eskatzaileak, prestakuntza-aholkularitzako edo ebaluazioko prozesu baten ondoren agindu zaien prestakuntza egin dezaten, lan-esperientziagatik edo prestakuntzako bide ez-formalen bitartez eskuratutako konpetentzia profesionalak ebaluatzeko eta egiaztatzeko prozeduran.

e) Lanbide-Euskal Enplegu Zerbitzu Publikoak deitutako enplegu-eskatzaileak, lan-merkatuan eskaria duen profesionaltasun-ziurtagiri baten egiaztapena osatzeko falta dituzten prestakuntza-moduluez eratutako prestakuntza-ekintza batean esku hartu dezaten.

2.– Eskaerarekin batera aurkeztu behar den prestakuntza-proiektuaren memorian enpresak adierazi duen pertsonen profila hartuko da kontuan, laneratzeko eta, hala badagokio, kontratatzeko premiekin bat datorrena, proiektuan identifikatutako enplegu-beharrizanekin eta hura funtsatzen duten benetako laneratze-aukerekin koherente izanik.

3.– Prestakuntza-ekintzetan parte hartzeko, indarreko araudian ezarritako eskakizunak bete beharko dira. Ildo horretatik, prestakuntza-ekintzetan parte hartzeko, 659/2023 Errege Dekretuak 75. artikuluan eta bosgarren xedapen gehigarrian ezarritako sarbide-betekizunak bete beharko dira. Era berean, katalogoan espezialitate bakoitzerako ezarritako sarbide-baldintzak bete behar dituzte prestakuntza-espezialitateen euskal katalogoan jasotako prestakuntza-espezialitateren bateko prestakuntza-ekintzetan parte hartu nahi dutenek.

4.– Ikastaroetan parte hartuko duten pertsonen amaierako hautaketa erakunde onuradunak egingo du, aurrez inskribatutako pertsonetatik abiatuta, eta kontratazioan interesa duten enpresek parte hartu ahal izango dute. Ondore horietarako, inskribatutako hautagaien datuetara sartu ahal izango da prestakuntza emango duen erakundea, Lanbide-Euskal Enplegu Zerbitzu Publikoaren prestakuntza-kudeaketarako aplikazioaren bidez (LanF), eta prestakuntza-ekintzak hasi aurretik eta dagozkion bermeekin egingo du hautaketa-prozesua.

Aurrez inskribatutako behar adinako parte-hartzailerik ez egoteak ez du esan nahi zentroak edo erakundeak ez duenik erantzukizunik izango proiektua eta bertan xedatutako prestakuntza-jarduketak gauzatzeko eta hautagai berriak bilatzeko. Ezin izango da proiektua edo bertan xedatutako prestakuntza-jarduketak hasi 5.7 artikuluan adierazi den gutxieneko parte-hartzaileen kopurura iristen ez bada, Enplegu eta Prestakuntzako zuzendariak baimendutako salbuespenetan izan ezik.

Hautaproba bat ere egingo dute, hala behar duten prestakuntza-ekintza guztietan. Hori erakunde sustatzailearen instalazioetan egingo da, Lanbide-Euskal Enplegu Zerbitzu Publikoko teknikariekin aurrez adostuta edo baimenduta, ekintza probetxuz egiten dela ziurtatzeko eta kualifikazio-ekintzen helburuak lortzeko ezinbestekoa den aurretiazko ezagutza-maila erreala zehazteko. Proba hori LanF aplikazioaren dagokion atalean erantsiko da, prestakuntza-ekintzak gauzatzeari buruz ematen diren jarraibideei jaramon eginez, eta probaren txantiloia, erantzunena eta ebaluazio-irizpideena igo beharko dira, bai eta proba egiten duten pertsonek egindako hautaprobaren dokumentuak ere.

5.– Profesionaltasun-ziurtagiriekin lotutako prestakuntza-ekintzetako parte-hartzaileak aukeratzeko hautaproba egin eta gero, eta etengabeko prestakuntza sustatze aldera, honela jokatuko da:

1. Profesionaltasun-ziurtagiria/ziurtagiri profesionala edo C gradu modularizatu konpleto bat ematen bada, prestakuntza-moduluren bat edo B gradua dutela egiaztatzen duten pertsonek hartu ahal izango dute parte. Parte-hartzaileak modulu horien prestakuntzara joango dira, baina ezin izango dira modulu horietan ebaluatu, gaindituta dituztelako eta prestakuntza-ekintza honetarako salbuetsita daudelako.

2. Prestakuntza-modulu edo B gradu solteak programatu badira, egiaztatutako prestakuntza-moduluren bat duten pertsonek izango dute lehentasuna prestakuntza-ekintzan parte hartzeko, beren prestakuntza-ibilbidea osatu dezaten. Haien artean, lehentasuna izango dute profesionaltasun-ziurtagiriaren/ziurtagiri profesionalaren edo C graduaren gainerako moduluak gaindituta dituzten pertsonek.

6.– Prestakuntza-ekintzara sartzeko eskakizunak betetzen dituzten eta, goiko atalean deskribatu bezala, dagokien hautaproba gainditzen dutenen artean, kolektiboen araberako lehentasun batzuk ezarri dira, lehentasun-hurrenkera honetan:

1. Lehenik eta behin, eta lehentasun-maila berean, enplegu-erregulazioko espedienteen (EEE) edo aldi baterako enplegu-erregulazioko espedienteen (ABEEE) prozesuek ukitutako langileak, lan-merkatuan integratzeko zailtasun bereziak dituzten langabeak, kualifikazio-maila baxua duten pertsonek lehentasuna edukirik: 30 urte arteko gazteak; emakumeak, langabeen kolektiboan duten pisuaren pareko proportzioan (langabezian dauden pertsona guztien % 55); luzaroko langabeak; 45 urtetik gorako langabeak; desgaitasunen bat duten pertsonak; Gizarteratzeko Errenta Aktiboaren onuradunak diren langabeak (GEA), bai eta Diru Sarrerak Bermatzeko Errenta (DSBE), terrorismoaren eta genero-indarkeriaren biktimak, eta aparteko langabezia-sorospena (ALS) jasotzen dutenak.

2. Bigarrenik, gainerako langabeak, oro har.

7.– Pertsona batek ezingo du proiektu integral batean baino gehiagotan parte hartu aldi berean, ibilbideari dedikazio egokia bermatu eta baliabide publikoak bikoiztea eragotzi dadin. Era berean, ezin izango ditu bi ikastaro batera egin, ikastaroan sartzeko baldintzak betetzen dituzten pertsonen eskaerak badaude.

8.– Hautaketa bukatu ondoren, erakunde onuradunek hautaketaren emaitza jakinaraziko diote Lanbide-Euskal Enplegu Zerbitzu Publikoari LanF kudeaketarako aplikazio informatikoaren bidez, eta aintzat hartuz zer jarraibide ematen dituen berariaz Lanbide-Euskal Enplegu Zerbitzu Publikoak.

9.– Prestakuntza-erakundeak bere instalazioetan erakutsiko ditu hautatuak izan direnen eta erreserba-egoeran gelditzen direnen zerrenda, prestakuntza-ekintzak abiarazi baino 24 ordu lehenago gutxienez eta hautagaiei aldez aurretik adierazi zaien leku batean. Horrekin batera, prestakuntza-ekintzak non, noiz eta zer ordutan egingo diren adierazi behar dute.

Aurrekoa gorabehera, prestakuntza-erakundeek egokitzat jotzen dituzten bitarteko osagarri guztiak erabili ahal izango dituzte parte-hartzaileei proiektuetan parte hartu dutela jakinarazteko.

10.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, parte-hartzaileak hautatzeko prozesuan enplegagarritasunari buruzko banakako diagnostikoak eta elkarrizketa espezifikoak sartu ahal izango dira, hautagaia proposatutako ibilbiderako egokia den baloratzeko eta laneratze-prozesuaren bideragarritasuna bermatzeko.

11. artikulua.– Prestakuntza-ekintzetan parte hartuko duten pertsonen eskubideak eta betebeharrak.

1.– Proiektu integralak doan egingo dira parte-hartzaileentzat, Lanbide-Euskal Enplegu Zerbitzu Publikoak eta FSE+ 2021-2027 funtsak diruz lagunduta.

2.– Parte-hartzaileek estalita dute prestakuntzara joateak, orientazioak eta garatu daitezkeen jarduera guztiek eragindako arriskua, laneratze-ibilbideari eta haren faseei buruzko informazioa barne.

Prestakuntza egiaztaezinaren barruan enpresetan egiten diren banakako prestakuntzan eta lanekoak ez diren praktiketan, egonaldiak eta enpresetarako joan-etorriak ere estalita dituzte, Eusko Jaurlaritzak istripuetarako eta erantzukizun zibilerako sinatutako polizaren bidez.

Prestakuntza egiaztagarriaren barruan enpresan edo organismo parekatu batean egiten diren prestakuntza-moduluetan, urriaren 30eko 8/2015 Legegintzako Errege Dekretuaren bidez onetsitako Gizarte Segurantzaren Lege Orokorraren testu bateginak 52. xedapen gehigarrian ezarritakoari erreparatuko zaio.

3.– Proiektu integraletan parte hartzen duten pertsonek honako hauek jasoko dituzte: egutegiak eta gauzatu beharreko programazioa, eskolako lehenengo eguna, ikastaroaren egutegia, prestakuntza-ekintzaren programa eta parte-hartzaileen eskubideei eta betebeharrei buruzko dokumentua, eta hori guztia jaso izanaren agiria sinatuko dute.

Halaber, idatziz jasoko dute xedatutako laneratze-irteerei buruzko informazioa, honako hauek barnean sartuta: kontratazio-baldintzak, zein enpresatan emango dituzten zerbitzuak, aurreikusitako kontratuen kopurua eta lan-kontratuen baldintza zehatzak.

Prestakuntza-erakunde batek eskatutako ekintzak, erakunde sektorial batek (2.1 artikuluko a) kategoria) edo trakzio-enpresa batek (2.1 artikuluko b) kategoria) sustatuak, ikastaroa hasten denean, enpresa kontratatzaile posibleei buruzko informazioa emango zaie, bai eta deialdi honetan exijitzen diren kontratuen ezaugarri orokorrak ere.

4.– Parte-hartzaileek prestakuntza-ekintzetara joan beharko dute, eta segitu beharko dute prestakuntza-ekintzei probetxua ateratzen. Horretarako, enpresa edo erakunde onuradunek eguneroko bertaratze-partea bete beharko dute, eta prestatzaileak zein parte-hartzaileek sinatu beharko dute. Profesionaltasun-ziurtagirien/ziurtagiri profesionalen kasuan, eguneroko parte hori bereiz egingo da prestakuntza-modulu bakoitzeko.

Taldeko prestakuntzan, erakundeek txartel grafikoko periferiko bat baliatu ahal izango dute Lanbide-Euskal Enplegu Zerbitzu Publikoaren informazio-sistemarako konexioa duen sinadura digitala jasotzeko, STU 430 modeloari edo baliokideari dagokion wacom gailuarekin bateragarria dena eta haren espezifikazio teknikoak betetzen dituena, ezarritako prozeduraren arabera eta Lanbide-Euskal Enplegu Zerbitzu Publikoak dagokion instrukzioa argitaratzen duen unetik.

5.– Parte-hartzaileek ezin izango dituzte proiektu integrala edo hura osatzen duten prestakuntza-jarduketak utzi, proiektua amaitu arte, salbu eta jarraipena egitea eragozten duen enplegua aurkitzen badute edo behar bezala justifikatutako arrazoi larriren batengatik. Justifikaziorik gabe utziz gero, gertatu daiteke pertsona hori lehentasunezko ez bihurtzea etorkizuneko prestakuntza-ekintzak irispidean izateko unean.

6.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, parte-hartzaileek eskubidea izango dute xedatutako ibilbide osoari buruzko informazio argia, ulergarria eta nahikoa jasotzeko, prestakuntza-, lan- eta akonpainamendu-faseak barne, bai eta haietako bakoitzari lotutako konpromisoei eta betebeharrei buruzko informazioa jasotzeko ere, prozesua behar bezala ulertzen dutela eta prozesuan aktiboki parte hartzen dutela bermatzeko.

12. artikulua.– Parte-hartzaileak baztertzeko arrazoiak eta prozedura.

1.– Honako hauek izango dira parte-hartzaileak baztertzeko arrazoiak:

a) Justifikatu gabeko hiru asistentzia-faltatik gora egitea hilabetean.

b) Prestakuntza-ekintzaren iraupen osoan % 25etik gorako ez-bertaratzea biltzea, dena delako arrazoiengatik, justifikatuta egon zein ez.

c) Prestakuntza-ekintzari probetxurik ez ateratzea, edo ekintza behar bezala egitea eragozten duen jokabide desegokia izatea, osasun- eta higiene-arauak ere kontuan hartuta.

Gizarteratzeko eta laneratzeko zailtasun bereziak dituzten kolektiboetako pertsonentzat, baztertzeko arrazoiak baloratzean kontuan hartuko dira aldi berean gertatzen diren inguruabar pertsonalak, sozialak edo administratiboak, eta aldez aurretik akonpainamendu-jarduketak edo ibilbidearekin jarraitzera bideratutako neurri zuzentzaileak onartu eta martxan jarri ahal izango dira, baldin eta prestakuntza-ekintza zuzenki garatzeko konpromisoa hartzen ez bada.

2.– Parte-hartzaileak baztertzeko prozedura honako hau izango da:

Prestakuntza-zentroak Lanbide-Euskal Enplegu Zerbitzu Publikoaren prestakuntzako teknikariari jakinaraziko dio baztertzeko arrazoietako bat gertatu dela, horretarako dagoen eredua erabiliz. Lanbide-Euskal Enplegu Zerbitzu Publikoak arrazoi hori ontzat ematen badu, Enplegu eta Prestakuntzako zuzendariak baztertzeko prozedura hasteko erabakia hartuko du. Erabaki horretan, ikaslea baztertzeko proposamenaren arrazoia azalduko da, eta ikasleak bost egun balioduneko epea izango du alegazioak aurkezteko. Lanbide-Euskal Enplegu Zerbitzu Publikoaren Enplegu eta Prestakuntzako zuzendariak ebatziko du prozedura, gehienez hamabost eguneko epean.

Egoerak hala eskatzen badu, baztertzeko prozedurari ekiteko erabakian behin-behineko neurriak hartu daitezke prestakuntza-jarduketaren jarraipen egokia bermatzeko. Neurri horietako bat pertsona ikastarotik behin-behinekoz baztertzea izan daiteke, erabakia jakinarazten zaionetik prozedura ebazten den arte. Ebazpenean, dagokion errekurtso-oina jasoko da.

Aste batean ikasle baten hutsegiteak prestakuntza-ekintzaren ordu-kopuruaren % 25 baino gehiago badira, edo justifikatu gabeko hiru hutsegite baino gehiago egiten baditu hilean, eta parte-hartzaileak ekintzara bertaratzen jarraitzen badu, prestakuntza-zentroak horren berri emango dio Lanbide-Euskal Enplegu Zerbitzu Publikoaren Enplegu eta Prestakuntzako zuzendariari, parte-hartzailea baztertzeko prozedura hasi dezan. Modulu oso bat geratzen bada egiteko zain, eta % 25etik gorako hutsegitea arrazoi justifikatu batengatik gertatu bada (adibidez, gaixotzea edo lanean hastea), pertsona horrek geratzen den modulua egiteko aukera izatea aztertu ahal izango da.

Parte-hartzaileren batek prestakuntza-ekintzara joateari uzten badio eta orduen kopuruaren % 25etik gora huts egiten badu, zentroak egoera horren berri emango dio Lanbide-Euskal Enplegu Zerbitzu Publikoari eta ofizioz emango zaio baja, baztertze-prozedura gauzatu beharrik izan gabe.

13. artikulua.– Prestakuntza-ekintzak gauzatzea eta eskuratutako gaitasunak egiaztatzea.

1.– Dirulaguntzaren erakunde onuradunak prestakuntza-ekintzak gauzatu beharko ditu proiektu integralaren esparruan, deialdi honetan ezarritakoari jarraituz eta Lanbide-Euskal Enplegu Zerbitzu Publikoak ematen dituen ereduen arabera. Horretarako zuzenbide pribatuko ente publiko horren prestakuntzarako aplikazio informatikoa (LanF) baliatuko du jakinarazteko prestakuntza-ekintza hasi dela (hasiera-eguna baino zazpi egun baliodun lehenago, gutxienez), geroagoko edozein aldaketa gertatu dela (gertatzen den unean) eta prestakuntza-ekintza bakoitzaren amaiera, bai eta parte-hartzaileen bertaratzearen kontrola ere.

Oro har, eta aurkako jarraibiderik eman ezean, gutxienez zazpi egun baliodun lehenago egin beharko zaizkio komunikazioak Lanbide-Euskal Enplegu Zerbitzu Publikoari. Prestakuntza-ekintzak ezingo dira hasi, harik eta Lanbide-Euskal Enplegu Zerbitzu Publikoak LanF aplikazioan Hasierako Komunikazioa baimendu arte.

Prestakuntza-ekintza hasi aurretik, enpresek, dirulaguntzaren onuradun direnean, enpresako langileen legezko ordezkari gisa jarduten dutenei jakinaraziko diete onetsi egin direla programa eta proiektuan ezarritako laneratze-baldintzak, bai eta proposatutako kontratazioaren oinarrizko baldintzak eta prestakuntza-ekintzan parte hartzen dutenen zerrenda ere.

Exekuzioa onetsitako proiektuaren edukira doitu beharko da, barne hartuta ibilbidearen diseinuari buruzko baldintzak, proiektuaren xede diren langintzekiko eta identifikatutako enplegu-beharrizanekiko koherentzia eta, hala badagokio, ezarritako laneratze-baldintzak.

2.– Deialdi honen barruko prestakuntza emango duten prestatzaileek Lanbide-Euskal Enplegu Zerbitzu Publikoaren baimena beharko dute, eta prestatzaileen fitxategian sartu beharko dira, indarreko araudian ezarritako betekizunen arabera.

Profesionaltasun-ziurtagiriak/ziurtagiri profesionalak eskuratzera bideratuta ez dauden prestakuntza-ekintzetan, enpresek eman behar badituzte zuzenean, ez da beharrezkoa izango Lanbide-Euskal Enplegu Zerbitzu Publikoak prestatzaileak baimentzea. Irakasle horiei ez zaie alta emango Lanbideren fitxategian.

3.– Dirulaguntza jasotzen duten pertsonez gain, beste bi joan daitezke prestakuntza-ekintzara, dirulaguntza jasotzeko eskubiderik gabe, hasierako komunikazioan hartarako eskaera egiten duten prestakuntza-erakundeetan, baldin eta instalazioak eta ekipoak badituzte eta parte-hartzaile guztientzat bermatzen badira berdintasun-baldintzak. Erabilgarri diren instalazioak eta ekipamenduak egiaztatutakoan emango da baimena; profesionaltasun-ziurtagiri/ziurtagiri profesionaletan, eskatutako parte-hartzaileen kopurua ere egiaztatuko da.

4.– Langile langabeek ezingo dute prestakuntza-ekintzetan egunean 7,5 ordu baino gehiagoz parte hartu. Nolanahi ere, astean ez dira izango 37,5 ordu baino gehiago. Muga horietan sartuko dira, hala dagokionean, profesionaltasun-ziurtagiri edo gradu bakoitzari edo ziurtagiri horiei ez dagozkien ekintzen praktikei dagokien enpresa edo organismo baliokidean egindako prestakuntza-aldiko orduak.

5.– Prestakuntza-erakundeak prestakuntza-ekintzak arrazoizko ordutegietan programatzen saiatu beharko dira, batez ere pertsona kalteberentzat direnak, prestakuntza eta bizitza pertsonala uztartzeko aukera eduki dezaten.

Behin prestakuntza-ekintza hasitakoan, erregulartasunez emango da, eta prestakuntza-entitateak ezingo du aldi baterako eten, ezinbesteko kasuan izan ezik, behar bezala justifikatuta eta Lanbide-Euskal Enplegu Zerbitzu Publikoak onartuta.

Lanbide-Euskal Enplegu Zerbitzu Publikoak prestakuntza-ekintza bat kautelaz eten ahal izango du, baldin eta prestakuntza emateko ohiko garapenean eragin nabarmena duten anomaliak hautematen badira.

6.– Erakunde onuradunek honako hauek emango dizkiete, gutxienez, parte-hartzaile guztiei prestakuntza-ekintzetan:

– Eskuliburu bat, argitaratua edo euskarri informatikoan, espezialitateko eduki guztiak bilduko dituena.

– Ikastaroa ondo garatzeko behar den idazmahaiko materiala.

– Beharrezkoak diren babes-elementuak.

– Geroagoko kontratazioari buruzko informazio idatzia, 11.3 artikuluan xedatutakoaren arabera.

Era berean, zer eskubide eta betebehar dituzten azalduko diete parte-hartzaileei, bai eta deialdi honek 11. eta 12. artikuluetan araututako kanporatzeko arrazoiak eta prozedurak ere.

Parte-hartzaileei dokumentuak eta informazioa eman zaiela egiaztatzeko, hartu-agiria sinaraziko zaie. Erakunde onuradunak LanF aplikazio informatikora igo beharko ditu hartu-agiri horiek.

7.– Parte-hartzaileren batek prestakuntza-ekintza uzten badu, haren lekuan beste parte-hartzaile bat sartu ahal izango da. Nolanahi, prestakuntza-ekintzaren iraupenaren % 25era bete baino lehen egin daiteke ordezkapen hori, non eta ez diren profesionaltasun-ziurtagiriak/ziurtagiri profesionalak edo graduak eskuratzeko prestakuntza-ekintzak. Halakoetan, ordezkapena bideratuko da, baina ehuneko hori gainditu ez bada oraindik, eta prestakuntza-ekintza hasi eta lehenengo bost eskola-egunen barruan.

Jada hasita dagoen prestakuntza-ekintza batean sartzen direnek maila nahikoa izan beharko dute, hartara ikastaroa probetxuz jarraitu ahal izateko, normaltasunez gauzatu dadila oztopatu gabe. Ildo horretan, prestakuntza-ekintzari probetxua ateratzeko eta ekintza normaltasunez garatzeko, parte-hartzaileen hautaketa-prozesuak irizpide batzuk ezarri beharko ditu, parte-hartzaileek prestakuntza-ekintza behar bezala jarraitzeko galdatu daitekeen gutxieneko maila dutela bermatze aldera.

8.– Prestakuntza-ekintzan parte hartzen duten langabeei dagokienez, batez ere langabezia-prestazioa edo -sorospena edo BGDS edo diru-sarrerak bermatzeko errenta jasotzen duten pertsonak badira, prestakuntza emateaz arduratzen diren erakunde onuradunek berehala jakinarazi beharko dizkiote Lanbide-Euskal Enplegu Zerbitzu Publikoari prestakuntza-ekintzei uko egin dietela, ez dituztela aurkeztu eta bertan behera utzi dituztela, inguruabar horien kausak adierazita.

9.– Egiaztapen-diploma bat eman beharko zaio aldeko ebaluazioarekin prestakuntza gainditu duen parte-hartzaile bakoitzari, Lanbide-Euskal Enplegu Zerbitzu Publikoak ezarritako ereduaren araberakoa, eta, hor, hauek agertuko dira gutxienez: prestakuntza-ekintzaren izena, prestakuntzaren edukiak, emateko modalitatea, iraupena eta emate-aldia. Halaber, prestakuntza-ekintza aldeko ebaluaziorik gabe amaitu duten parte-hartzaileei ikastaroan parte hartu dutela ziurtatzeko bertaratze-ziurtagiri bat emango zaie. Diploma eta bertaratze-ziurtagiria entregatzeko gehieneko epea bi hilabetekoa izango da, amaitzen dutenetik aurrera.

Erakunde onuradunak diploma edo bertaratze-ziurtagiri horren kopia gordeko du, LanF-ra igoko duena ikaslearen hartu-agiriarekin batera, non eta ziurtagiriok ez diren Metapostaren edo antzeko beste erakunde baten bidez kudeatu.

10.– Prestakuntza egiaztagarria denean, parte-hartzaileen ebaluazioak plangintza bat jaso beharko du, eta, bertan, ezarritako datak, erabili beharreko espazioak eta tresnak eta iraupena adierazi beharko dira (LanF aplikazio informatikoan emandako ereduaren arabera). Ebaluazio-tresna horiek eta parte-hartzaile bakoitzak egindako probak eskaneatuko dira, eta aplikazio informatikoan gordeko dira.

Prestakuntza-moduluetan egiaztatu beharreko ikaskuntzaren emaitzak haien gaitasunetan eta ebaluazio-irizpideetan jasotako ezaupideei eta trebetasun praktikei dagozkienak izango dira; horrela, osotasunean, gaitasun profesionalak eskuratu direla egiaztatu ahalko dute.

Gaitasun-unitateen egiaztapena lortzeko, beharrezkoa izango da horietako bakoitzari lotutako lanbide-moduluak edo B graduak gainditzea, ebaluazio positiboarekin, «gai» direla edo «gainditua» dutela adierazita.

Prestatzaileek txosten batean jasoko dituzte pertsonek prestakuntza-modulu bakoitzaren ebaluazioan lortutako emaitzak. Txosten horretan adieraziko da ikasle bakoitzaren jarduna, aplikatutako ebaluazio-tresnen arabera, egindako zuzenketak eta lortutako puntuazioak jasota (LanF aplikazio informatikoan eskuragai dagoen ereduaren arabera).

Modulua eman eta gero, ebaluazio-akta bete beharko da, LanF aplikazio informatikoaren bidez, parte-hartzaile bakoitzak lortutako emaitzarekin: «gai», «gai, egiaztaezina» edo «ez gai», profesionaltasun-ziurtagirien kasuan; eta «gainditua» edo «ez gainditua» graduen kasuan.

Lantokiko prestakuntza praktikoko modulua egiten den bitartean, parte-hartzaileen jarraipena eta ebaluazioa egingo du enpresak edo organismo parekatuak izendatutako tutoreak.

Profesionaltasun-ziurtagiriei dagozkien prestakuntza-ekintzak ematen dituen erakundeak honako datu edo agiri hauek sartu beharko ditu Lanbide-Euskal Enplegu Zerbitzu Publikoaren LanF aplikazioan:

• Ikastaroa hasi aurreko zazpi egun balioduneko epean:

– Ebaluazioaren plangintza, Lanbide-Euskal Enplegu Zerbitzu Publikoak LanF aplikazio informatikoaren bitartez eskuragai ezarritako ereduaren arabera.

– Erabiliko diren ebaluazio-tresnak, eta horiek zuzentzeko eta puntuatzeko euskarriak.

• Ikastaroa amaitu ondorengo zazpi egun balioduneko epean:

– Parte-hartzaileek emaitzak biltzen dituzten dokumentuak LanF aplikazioan, Lanbide-Euskal Enplegu Zerbitzu Publikoak LanF aplikazio informatikoaren bitartez eskuragai ezarritako ereduaren arabera.

– Ebaluazio-aktak betetzea.

11.– Dirulaguntzaren prestakuntza-erakunde onuradunek prestakuntza-ekintzak zuzenean gauzatzen direla bermatu beharko dute, 3. artikuluan jarduketa osagarriak azpikontratatzeari buruz xedatutakoa albo batera utzi gabe. Inola ere ezin izango da azpikontratatu prestakuntza-ekintzaren erdigune den irakaskuntza, hau da, parte-hartzaileek gaitasunak eskuratzearekin zuzenean lotutako irakaskuntza-jarduera, hargatik eragotzi gabe irakasleak pertsona fisiko gisa kontratatzea, hori ez baita azpikontrataziotzat joko.

Onuradun deritzona enpresa bat izanez gero, bitarteko propioak baliatuta eman dezake prestakuntza, edo kontratatzea aukeratu dezake, helburu horretarako egoki izanez gero. Halaber, behin bakarrik azpikontratatu ahal izango du prestakuntza-ekintza entitate egiaztatu batekin edo Lanbide-Euskal Enplegu Zerbitzu Publikoak kudeatutako prestakuntza-erakundeen erregistroan inskribatuta dagoen batekin, eta ez da azpikontrataziotzat joko irakasleak (pertsona fisikoak) kontratatzea diruz lagundutako prestakuntza emateko.

Kontratatzea aukeratuz gero, enpresa onuradunak gutxienez hiru eskaintza eskatzera derrigortuta egongo da, kontratuen zenbatekoak gainditzen badu Sektore Publikoko Kontratuei buruzko azaroaren 8ko 9/2017 Legeak 118. artikuluan kontratu txikietarako ezarritako zenbatekoen muga, ezaugarri bereziengatik zerbitzu hori ematen duten erakundeen kopurua merkatuan nahikoa ez den kasuetan izan ezik. Aurkeztutako eskaintzen arteko hautua efizientzia- eta ekonomia-irizpideei jarraituz egingo da, eta berariaz justifikatuko da memoria batean, hautatutakoa ez bada proposamen ekonomiko onena.

Azpikontratazioaren kasuan, enpresa onuradunak aldez aurreko baimena eskatu beharko dio dirulaguntza ematen duen organoari, azaroaren 17ko 38/2003 Legeak 29. artikuluko 3. eta 7.d) zenbakietan zerrendatutako kasuetan. Horretarako, eskaerarekin batera formalizatuko den kontratua aurkeztuko da. Enplegu eta Prestakuntzako zuzendariak 20 eguneko epean ebatziko du baimena, eskaera Lanbide-Euskal Enplegu Zerbitzu Publikoaren erregistroan sarrera eman den egunetik aurrera. Hala izan ezean, baimena emantzat joko da.

Edonola ere, 11. zenbaki honetan xedatuta ez dagoenerako, Dirulaguntzei buruzko azaroaren 17ko 38/2003 Lege Orokorrak 29. eta 31.3 artikuluetan edo Dirulaguntzen Araubidea Erregulatzeko abenduaren 21eko 20/2023 Legeak 31. artikuluan xedatutakoa zuzenean aplikatuko da.

12.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, erakunde onuradunek bermatu beharko dute koordinazio egokia dagoela prestakuntza-ekintzak gauzatzearen eta proiektuan xedatutako orientazio-, akonpainamendu- eta jarraipen-jarduketen artean, ibilbidearen koherentzia ziurtatzeko eta laneratze-unerainoko trantsizio progresiboa errazteko asmoz.

14. artikulua.– Enpresako edo organismo parekatu bateko prestakuntza eta lanekoak ez diren praktika profesionalak.

1.– Prestakuntza egiaztaezina denean, lanekoak ez diren praktika profesionalek ezingo dute iraun, oro har, 200 ordu baino gehiago, eta prestakuntza-ekintza amaitu osteko bi hilabeteko gehieneko epean hasi beharko dira.

2.– Prestakuntza egiaztagarrian, enpresako edo organismo parekatu bateko prestakuntza uztailaren 18ko 659/2023 Errege Dekretuak 60.2 artikuluan esandakoaren arabera garatuko da; hala, zentro batek C Gradu bat osatzen duten B Gradu guztiak proposatzen dituenean, derrigorrez xedatuko du enpresako edo organismo parekatu bateko 80 orduko prestakuntza-aldi bat eskaintzea beren prestakuntzaren barruan C Gradu bat lortu nahi duten pertsonei B graduen metaketaz.

Nolanahi ere, enpresako edo organismo parekatu bateko egonaldia hasi baino lehen, bermatu beharko da parte-hartzaileek kasuari dagokion prestakuntza-ikastaroa egin dutela, eskuratu ahal izateko laneko arriskuen prebentzioaren arloko oinarrizko mailako eginkizunez –Prebentzio Zerbitzuen Erregelamendua onartzen duen urtarrilaren 17ko 39/1997 Errege Dekretuaren 35. artikuluan ezartzen direnez– arduratzeko behar diren gaitasunak, hargatik eragotzi gabe uztailaren 18ko 659/2023 Errege Dekretuak 153.2.d) artikuluan ezarritakoa.

Horretarako, antolatu zirenean laneko arriskuen arloko modulu profesionalik edo prestakuntza-blokerik izan ez zuten profesionaltasun-ziurtagirietan, Lanbidek azkeneko modulu profesionalean 659/2023 Errege Dekretuko V. eranskineko 2. ikaskuntzaren emaitza sartuko du ofizioz, FCOS02–Laneko Arriskuen Prebentziorako Oinarrizko Ikastaroa espezialitatean jasotakoa.

3.– Prestakuntza-erakundeek enpresan edo organismo parekatuan eta aribideko espezialitate egiaztagarriarekin lotutako langintzetan prestakuntza-modulua egitea xedatu beharko dute ikastaroetan parte hartzen dutenen % 100erako, salbu eta prestakuntza egiaztagarrian araudi erregulatzaileak ezarritako salbuespen-kasuren bat duten parte-hartzaileentzat.

4.– Inork ezin izango du enpresako edo organismo parekatuko prestakuntza-modulua egin, ez eta prestakuntza-praktika ere, aurretik prestakuntza amaitu eta azken ebaluazioa izan gabe.

5.– Era berean, prestakuntza egiaztagarriaren barruan enpresako edo organismo parekatuko prestakuntza-modulua egitean, Gizarte Segurantzaren gaineko betebeharrak konplitu beharko dira, urriaren 30eko 8/2015 Legegintzako Errege Dekretuaren bidez onetsitako Gizarte Segurantzaren Lege Orokorraren testu bateginak berrogeita hamabigarren xedapen gehigarrian ezarritakoak.

6.– Enpresako edo organismo parekatuko prestakuntza-aldia egiteko, enpresaren eta prestakuntza-erakundearen arteko akordio bat sinatuko da, eta akordio horren berri emango zaio praktikak egingo dituen pertsonari. Akordio horretan, hauek azaldu beharko dira: praktiken edukia, iraupena, praktikak egiteko tokia eta ordutegia, eta praktiken jarraipena eta ebaluazioa egiteko tutoretza-sistema. Praktikak hasi baino lehen, enpresako langileen legezko ordezkariei emango zaie akordio horren berri. Baldintza hori bete dela ziurtatzeko, dokumentu bat erantsi beharko zaio hitzarmenari, langileen legezko ordezkariek hari buruzko informazioa jaso dutela adierazten duena, LanF aplikazioan eskuragarri jarriko den eredu ofizialaren bidez. Gainera, parte hartzen dutenen zerrenda bat ere erantsi beharko da.

7.– Enpresan edo organismo parekatuan praktikak eta prestakuntza-aldia Euskal Autonomia Erkidegoko lantokietan egin beharko dira, salbu eta behar bezala justifikatutako arrazoirik bada, Enplegu eta Prestakuntzako zuzendariak baimendu ondoren.

8.– Parte-hartzaileek ezin izango dute kontratu-harremanik izan enpresako edo organismo parekatuko praktikak eta prestakuntza-aldia egingo diren enpresarekin, instituzioarekin edo entitate publikoarekin edo pribatuarekin, Lanbide-Euskal Enplegu Zerbitzu Publikoak horretarako baimena eman ezean.

9.– Praktiken eguneko lanaldia ezin izango da 7,5 ordutik gorakoa izan.

10.– Ezinbesteko betekizuna da Lanbide-Euskal Enplegu Zerbitzu Publikoak enpresako eta organismo parekatuko praktiken eta prestakuntza-aldiaren akordioa baliozkotzea, eta haietan hasi aurretik egin behar da. Hori betetzen ez bada, aginduzko baimena ez duten praktikak baliogabetu ahal izango dira.

11.– Parte-hartzaileak gizarteratzeko eta laneratzeko zailtasun bereziak dituzten kolektiboetakoak direnean, enpresan edo erakunde parekatuan edo lanekoak ez diren praktika profesionaletan prestakuntza-aldia egiteko, banakako jarraipeneko eta euskarri teknikoko jarduketa espezifikoak egingo dira, ekoizpen-ingurunera zuzenki egokitzen direla eta ondoren laneratzea bideragarria dela bermatzeko.

15. artikulua.– Proiektuaren eta prestakuntza-ekintzen jarraipena eta kontrola.

1.– Lanbide-Euskal Enplegu Zerbitzu Publikoak, prestakuntza ematen duen zentroarekin elkarlanean, proiektuaren eta prestakuntza-ekintzen jarraipena eta kontrola egingo du. Bertan, deialdian ezarritako eskakizunak eta baldintzak betetzen direla egiaztatzeaz gain, gauzatzen diren jarduketen eta onetsitako proiektuaren arteko koherentzia egiaztatuko da, bereziki proiektuaren xede diren langintzetara eta identifikatutako enplegu-beharrizanetara eta laneratze-ibilbidearen diseinura moldatzen dela egiaztatzeari dagokionez.

2.– Jarduketa-plan bat ezarriko da deialdian ezarritako baldintzak betetzen diren eta prestakuntza-planak erregulartasunez gauzatzen diren egiaztatzeko eta, beharrezkoa izanez gero, bidezko neurri zuzentzaileak jartzeko. Jarduketa horien barruan sartuko da prestakuntza-jardueraren jarraipena egitea proiektuaren esparruan, ematen den tokian eta toki horretatik kanpo, diruz lagundutako prestakuntza-ekintzak gauzatzen diren bitartean eta/edo amaitu ondoren, dokumentuen bidez eta frogagiri fisikoen bidez, eta aurreikusitako laneratze-emaitzetan benetan egiten duen ekarpena.

Jarduketa horietan, prestakuntza eta gainerako jarduketak proiektuaren xede diren langintzetara eta identifikatutako enplegu-beharrizanetara moldatzen direla egiaztatuko da, bai eta ibilbidearen benetako garapena koherentea dela ere hasieran onetsitakoarekin.

3.– Batasunaren arautegian ezarri bezala, eta prestakuntza-erakundeak egiaztatzea arautu duen arautegiarekin bat etorriz, plan horretan in situ egiaztapen-bisitak sartuko dira Europako Gizarte Funtsaren finantzabideen baldintzak betetzen diren egiaztatzeko eta inskripzioa edo egiaztapena egiterakoan zentroak egiaztatu zituen baldintzak mantentzen diren ikusteko.

4.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, diruz lagundutako jarduketen jarraipenetan eta kontroletan txertatu egingo da, baldintza formalak betetzen direla egiaztatzeaz gain, ibilbidearen garapenaren azterketa kualitatibo bat, eta bereziki baloratuko dira akonpainamendu-jarduketen eraginkortasuna, parte-hartzaileen bilakaera eta ibilbidearen koherentzia proiektuaren xede diren langintzekin eta definitutako laneratze-helburuekin.

16. artikulua.– Prestakuntza-ekintzen ebaluazioa.

Lanbide-Euskal Enplegu Zerbitzu Publikoak deialdi honen kalitatea ebaluatuko du, parte-hartzaileek betetako galdetegietatik lortutako batez besteko emaitzetan oinarrituta, Estatuko Enplegu Zerbitzu Publikoaren 2009ko apirilaren 27ko Ebazpenean agindutakoari jarraituz, hark argitaratu baititu enplegurako prestakuntza-ekintzen kalitatea ebaluatzeko galdetegiak (BOE, 2009ko ekainaren 11koa), eta, hala badagokio, erdietsitako laneratze-mailari eta laneratze progresiboaren ibilbideen eraginkortasunari buruzko adierazleak ere ebaluatuko ditu.

Horretarako, dirulaguntzen onuradunek burutzen duten prestakuntzaren kalitatea ebaluatu eta kontrolatu beharko dute, prestakuntza-planean jasotako prestakuntza-ekintzak kudeatzeko jarduketen artean.

Edonola ere, prestakuntza-ekintza bakoitza amaitu aurretik, parte-hartzaileek kalitateari buruzko galdetegia bete beharko dute; oro har, prestakuntza egiaztagarriko ekintza guztietan, amaierako azterketa egitean emango zaie, bai eta egiaztagarria ez den baina amaierako azterketa egitea eskatzen duen prestakuntzaren kasuan ere. Gainerako prestakuntza-ekintzetan, ikastaroaren azken bi egunetan beteko da galdetegia.

Galdetegi horiek parte-hartzaileek beteko dituzte, telematikoki. Ikastaroa ematen duen erakundearen ardura da ziurtatzea kalitateari buruzko galdetegia betetzen dela; horretarako, parte-hartzaileen eskura jarriko dituzte behar adina baliabide, diruz lagundutako ikastaroa amaitzen duten ikasleek galdetegia bide telematikoz betetzea ahalbidetzeko. Parte-hartzaileen % 67k baino gutxiagok erantzuten badiote galdetegiari, dirulaguntzaren kitapena 18.1.1.a) artikuluan adierazten den bezala egingo da.

Gizarteratzeko eta laneratzeko zailtasun bereziak dituzten kolektiboei zuzendutako proiektuetan, ebaluazioak adierazle espezifikoak txertatu ahal izango ditu garatutako ibilbidearen egokitasunari, egindako akonpainamenduaren intentsitateari eta lortutako laneratzearen jasangarritasun-mailari buruz, mota horretako proiektuak etorkizunean hobetu eta egokitu ahal izateko ebidentziak edukitzeko asmoz.

17. artikulua.– Dirulaguntzak ordaintzea.

1.– Dagokion administrazio-prozeduraren esparruan, 1. eta 2. Ildoei dagozkien proiektu integralak gauzatzeko emandako dirulaguntza bi zatitan ordainduko da, haiek eskatu ondoren, honela:

a) Lehenengo ordainketa, onetsitako dirulaguntza osoaren % 60, proiektu integrala hasitakoan, 2026ko ekitaldiari dagokion ordainketa kredituaren kargura.

b) Bigarren ordainketa, dirulaguntzaren gainerakoa, 2027ko konpromiso-kredituaren kargura, diruz lagundutako jarduerak amaitutakoan eta kasuan kasuko justifikazio-dokumentazioa aurkeztutakoan, barne hartuta, hala badagokio, 6. artikuluaren arabera xedatu diren kontratuen formalizazioa eta 1. artikuluan ezarritako definizioak, 18. artikuluan ezarritako kitapenei-irizpideei jarraituz eta kasuan kasuko prozeduran onetsitako proiektuarekin bat etorriz.

Bigarren ordainketa diruz lagundutako jarduketak amaitutakoan eta kasuan kasuko justifikazio-dokumentazioa aurkeztutakoan egingo da, 18. artikuluan xedatutakoaren arabera.

2.– Lan-kontratuetarako emandako dirulaguntza, laguntza-tipologia horretarako ezarritako administrazio-prozedura espezifikoaren esparruan izapidetua, 2026ko edo 2027ko ekitaldiei dagokien ordainketa-kredituaren kargura ordainduko da, erabilgarri dagoen kreditu-xedapenaren arabera eta honako hauek kontuan hartuta:

a) Lehenengo ordainketa, kontratu bakoitzari dagokion dirulaguntzaren zenbatekoaren % 60, dirulaguntza ematen den unean, dirulaguntza emateko ebazpena igortzen den uneko aurrekontu-ekitaldian erabilgarri dagoen ordainketa-kredituaren kargura.

Ordainketa aurreratuak egiteko baldintza izango da kreditu egokia eta nahikoa egotea ordainketen aurrekontu-ekitaldian, eskaerak izapidetzeko eta ebazteko hurrenkeran, horrek berarekin ekarri gabe eskaerak ebazteko lehentasun-hurrenkera aldatzea.

b) Bigarren ordainketa, geratzen den dirulaguntza enparaua, kasuan kasuko aurrekontu-ekitaldiaren kargura, kontratua hasi zenetik galdatutako gutxieneko aldia igarotakoan eta kasuan kasuko justifikazio-dokumentazioa aurkeztutakoan, 18. artikuluan xedatutakoarekin bat etorriz.

Lan-kontratuaren hasiera-datagatik ezin bada egiaztatu 2027ko aurrekontu ekitaldiaren itxiera-data baino lehen langilearen altak gutxieneko aldi horretan irauten duela, bigarren ordainketa aurreratuta ordaindu ahal izango da, hargatik eragotzi gabe kitapenaren esparruan geroago egiaztatzea.

Diruz lagundutako aldia amaitu baino lehen langileak enpresan baja hartzen badu, 18.2 artikuluan xedatutako moduan likidatuko da.

3.– Ordainketa aurreratuen zenbatekoa 180.000 eurotik gorakoa bada, dirulaguntzaren erakunde onuradunak Lanbide-Euskal Enplegu Zerbitzu Publikoan aurkeztu beharko du, dagokion ordainketa egin baino lehen, Euskal Autonomia Erkidegoko Diruzaintzan bermearen, abalaren edo fidantzaren eraketaren frogagiria, aurreratutako zenbatekoari dagokiona.

4.– Emandako dirulaguntza erakunde onuradunak horretarako adierazitako banku-kontuan ordainduko da.

Erakundeak ez badu Lanbideren ordainketarik jaso edo banku-datuak aldatu nahi baditu, hirugarrenaren datuen fitxa bete beharko du. Helbide honetan egongo da eskuragarri: https://www.euskadi.eus/servicios/1113708

18. artikulua.– Dirulaguntzaren justifikazioa eta kitapena.

1.– Proiektu integralei dagokien dirulaguntzaren kitapenak, dirulaguntza eman den administrazio-prozeduraren esparruan, erakunde onuradunak jaso beharreko amaierako zenbatekoa zehaztuko du, diruz lagundutako jarduketen gauzatze-mailaren eta erdietsitako laneratze-emaitzen arabera. Kitapen horren emaitza izango da 23. artikuluan xedatutako ez-betetzeak eta, hala badagokio, diru-itzultzeak zehazteko oinarria.

Horretarako, benetako laneratzea eta, hala badagokio, laneratze progresiboaren emaitzak hartuko dira aintzat, deialdi honek 1. artikuluan ezarritako definizioekin bat etorriz eta proiektuaren tasunarekin eta hura kokatuta dagoen jarduketa-ildoarekin koherente izanik. Laneratze progresiboaren emaitzak proiektuaren gauzatze-maila zehaztean eta, hala badagokio, ez-betetzeak 23. artikuluan xedatutakoaren arabera mailakatzean soil-soilik izango du eragina, eta horrek ez du berez ekarriko benetako laneratzearen helburua erdiestea, ez eta dirulaguntza osorik jasotzeko eskubidea ere.

Proiektuaren memorian bildutako gauzatze- eta emaitza-adierazleak erabiliz kalkulatuko da kitapena, benetan garatutako jarduketen eta erdietsi nahi diren laneratze-helburuen arteko egokitasuna bermatuta.

1.1.– Prestakuntza-ekintzak egiteko emandako dirulaguntzaren justifikazioa eta kitapena parte-hartzaileen eta benetan burututako eskola-orduen arabera egingo dira, 7. artikuluan ezarritako modulu ekonomikoen arabera.

Kitatu beharreko dirulaguntzaren zenbatekoa kalkulatzeko, ez da aintzat hartuko ezarritako epeen barruan enpresan edo organismo parekatuan prestakuntza-aldia amaitu ez duten parte-hartzaileek jasotako prestakuntza.

1.1.a) Kitapena honela kalkulatuko da:

– A modulua hamabost parte-hartzailez biderkatuko da –baldin eta prestakuntza hasi zuten parte-hartzaileen kopurua ezarritako gutxieneko eta gehieneko mugen barruan badago–, eta emandako prestakuntza-orduez.

– Arestian aipatutako zenbatekoari gehituko zaio B moduluaren eta prestakuntza-ekintzak dituen orduen kopuruaren arteko biderketaren emaitza, ekintza amaitu duten pertsonen kasuan, hau da, ekintzaren iraupenaren gutxienez % 75era bertaratu direnen kasuan. Ondore horietarako, parte-hartzaileek ikastaroa amaitu dutela ulertuko da enplegua aurkitzeagatik prestakuntza-ekintza utzi behar izan badute, bai eta egiaztatutako gaixotasunagatik edo istripuagatik ikastaroan baja hartu badute ere, baldin eta azken bi kasu horietan prestakuntza-jarduera gutxienez % 25ean egin badute. Prestakuntza amaitu ez duten pertsonen kasuan, B modulua prestakuntza-ekintzan parte hartu duten orduen kopuru errealarekin biderkatuko da.

Kalkulu hori egiteko, ekintza onetsi zaien parte-hartzaileen kopuruaren muga errespetatuko da.

Ikastaroa amaitu duten (gainditu dutenen eta gainditu ez dutenen) parte-hartzaileen inkestak ez badira % 67ra iristen, ez da gehituko amaitutako parte-hartzaileen kopuruaren B moduluaren zenbatekoa, hau da, betetako ehunekoaren eta gutxienez exijitzen den % 67aren arteko aldea.

– Goiko bi eragiketak eginda ateratzen den azken balioari haren % 10 gehituko zaio, zeharkako gastuengatik.

Ekintzaren iraupenaren % 25 betetzean, hura hasi zuten parte-hartzaileen % 75ek jarraitzen ez badute, prestakuntza-ekintzak kitatzeko, oinarritzat hartuko da ekintzak amaitu dituzten parte-hartzaileen kopurutik abiatuta ateratako A + B + C moduluen zenbatekoa. Prestakuntza-ekintza bukatu duten parte-hartzailetzat joko dira gutxienez ekintzaren % 75era joan direnak; ondore horietarako, halakotzat joko dira enplegua aurkitu dutelako prestakuntza-ekintza utzi behar izan duten langabeak, bai eta behar bezala egiaztatutako gaixotasunagatik edo istripuagatik utzi dutenak ere, baldin eta, azken bi kasu horietan, prestakuntza-jarduera gutxienez % 25ean egin badute. Ikastaroa amaitu duten (gainditu dutenen eta gainditu ez dutenen) parte-hartzaileen inkestak ez badira % 67ra iristen, ez da gehituko amaitutako parte-hartzaileen kopuruaren B moduluaren zenbatekoa, hau da, betetako ehunekoaren eta gutxienez exijitzen den % 67aren arteko aldea.

1.1.b) Proiektua amaitu ondoren, erakunde onuradunak hamabost eguneko epea izango du justifikazio-memoria aurkezteko, LanF aplikazioaren bitartez. Memoria horretan honako hauek jaso beharko dira:

Justifikazio-memoriak honako dokumentu hauek jasoko ditu:

– Ikasle bakoitzak benetan egindako eskola-orduak eta (ezarritako modulu ekonomikoen eta artikulu honetan ezarritako irizpideei jarraituz) dagokien zenbatekoa jasotzen dituen laburpen-koadroa.

– Laneratze-helburua betetzeko formalizatutako lan-kontratuen zerrenda.

– Diruz lagundutako jarduera osorik edo zatika finantzatu duten beste diru-sarrera edo dirulaguntza batzuei buruzko adierazpena, zenbatekoa eta jatorria adierazita, edo bestela, halakorik ez dagoela dioen adierazpena. Kontuan hartu behar da 22.1 artikuluan xedatutakoaren arabera deialdi honen babespean eta prestakuntza-ekintzak egiteagatik emandako dirulaguntza bateraezina dela beste edozein laguntzarekin edo dirulaguntzarekin.

–. Parte-hartzaileei eta erakunde onuradunen eta haien plantillaren titularrei buruzko informazioa, sexuaren arabera bereizia.

2.– Kontrataziorako dirulaguntzaren enpresa onuradunak honako dokumentu hauek aurkeztu beharko ditu Lanbide-Euskal Enplegu Zerbitzu Publikoan, LanF aplikazio telematikoaren bitartez, diruz lagundutako aldia amaitzen denetik edo kontratua aldez aurretik azkentzen den egunetik gehienez hamabost eguneko epean:

– Kontratatutako pertsonaren Gizarte Segurantzako Kotizazio Datuen Txostena-KDT.

– Diruz lagundutako lan-kontratua osorik edo zatika finantzatu duten beste diru-sarrera edo dirulaguntza batzuei buruzko adierazpena, zenbatekoa eta jatorria adierazita, edo bestela, halakorik ez dagoela dioen adierazpena. Kontuan hartu behar da, 22.2 artikuluan xedatutakoaren arabera, lan-kontratuak egiteagatik emandako dirulaguntza bateraezina dela beste edozein laguntzarekin edo dirulaguntzarekin, Gizarte Segurantzaren kotizazioaren murrizketekin eta/edo hobariekin izan ezik.

–. Enpresa onuradunaren eta haren plantillaren titularrei buruzko informazioa, sexuaren arabera bereizia.

Laguntza horiek kitatzeko, Lanbide-Euskal Enplegu Zerbitzu Publikoak egiaztatuko du egindako kontratuen iraupena.

Lan-kontratua azkentzen bada bertan ezarritako aldian, kontratuan adierazitako probaldia ez gainditzeagatik, borondatez uzteagatik, bidegabetzat edo baliogabetzat jo ez diren arrazoi objektiboengatik edo kaleratzeagatik, kontratatutako pertsonaren erretiroagatik, heriotzagatik, ezintasun iraunkor osoagatik, absolutuagatik edo baliaezintasun handiagatik, enpresak idatziz jakinarazi beharko dio inguruabar hori Lanbide-Euskal Enplegu Zerbitzu Publikoari.

Komunikazio hori kontratua azkendu eta hilabeteko gehieneko epean egin beharko da, kontrataziorako dirulaguntzaren behin betiko zenbatekoa kontratatutako pertsonak lan egindako aldiaren zati proportzionalera doitzeko.

Doikuntza proportzional hori egiteko, kontratuan ezarritako aldia eta kontratuaren amaiera-data hartuko dira kontuan.

Ezarritako aldian lan-harremana arestian adierazi ez den beste kausaren batengatik azkendu bada, kontrataziorako dirulaguntza oso-osorik itzuli beharko da, deialdi honek 23. artikuluan ezarritakoari jarraituz.

3.– Goiko zenbakietan ezarritako epeak igaro eta bertan jasotako dokumentuak aurkeztu ez badira, organo eskudunak hamabost eguneko epe luzaezina emango dio onuradunari dokumentu horiek aurkeztu ditzan. Azken epe horretan justifikaziorik aurkeztu ezean, itzultze-prozedura hasiko da.

4.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, justifikazio-memoriak laguntza-ibilbidearen garapenaren, burututako jarduketen eta lortutako mugarri nagusien deskribapen espezifikoa jaso beharko du, hargatik eragotzi gabe oro har galdatzen den dokumentazio ekonomikoa eta administratiboa.

Ondore horietarako, laneratze progresiboaren emaitzak egiaztatzen dituzten jarduketak erdietsi den laneratze-mailaren zatitzat jo ahal izango dira, eta, hala badagokio, bizileku- eta lan-baimenak eskuratzeko prozesuei lotutakoak ere hartuko dira barnean, betiere jarduketa horiek laneratze progresiboko prozesuetan txertatzen badira, 1. artikuluan xedatutakoaren arabera.

Laneratze progresibotzat jotzeak ez du inola ere automatikoki ekarriko dirulaguntza osorik jasotzeko eskubidea, eta proiektuaren xedea betetzeko benetan egin duen ekarpena baloratu beharko da.

19. artikulua.– Erakunde eta enpresa onuradunen betebeharrak. Jarraipena eta kontrola.

1.– Onuradunen betebehar izango dira, oinarri hauen artikuluetan ezarritakoez gain, Dirulaguntzen Araubidea Erregulatzeko abenduaren 21eko 20/2023 Legeak 14, 27. eta 42. artikuluetan oro har ezarritakoak, eta, prestakuntza-ekintzen dirulaguntzei dagokienez, enplegurako lanbide-heziketako sistema erregulatu duen araudiak xedatutako betebeharrak.

2.– Zehazki, laguntzen onuradunek Lanbide-Euskal Enplegu Zerbitzu Publikoak, Ogasun eta Finantza Sailaren Kontrol Ekonomikoko Bulegoak, Ekonomia, Lan eta Enplegu Sailak eta Herri Kontuen Euskal Epaitegiak egindako egiaztatze- eta kontrol-jarduketak onartu beharko dituzte. Prestakuntza-erakundeek erraztasunak emango dituzte lokaletara eta instalazioetara sartzeko eta prestakuntza-ekintzetako parte-hartzaileekin eta elkarrizketatu beharrekotzat jotzen diren gainerako pertsonekin harremanetan jartzeko.

EGF+ 2021-2027 funtsarekin batera finantzatutako prestakuntza-ekintzek Europar Batasunaren araudiaren ondorioz Lan eta Gizarte Ekonomiako Ministerioak, Europako Batzordeak eta Europako Kontuen Auzitegiak egiten dituzten egiaztapen- eta kontrol-jarduketak onartu beharko dituzte.

3.– Onuradunak, kontrol-jarduketa horiek onartzeko betebehar orokorraren barruan, honako hauetara behartuta daude:

– Finantzatutako ekimena gauzatzeari edo bideragarria izateari buruzko edozein informazio ematera eta eskatzen zaizkion jarraipen-agiriak betetzera eta bidaltzera.

– Lanbide-Euskal Enplegu Zerbitzu Publikoari jakinaraztera beste erakunde batzuei dirulaguntzak edo laguntzak eskatu dizkiela edo lortu dituela, deialdi honetan diruz lagundutako ekintza guztiei edo batzuei eragiten badiete.

– Diruz lagundutako jardueraren xedea edo tasuna funtsean aldatzen duen edozein gorabeheraren berri ematera, bai eta dirulaguntza emateko kontuan hartutako edozein zirkunstantziaren aldaketaren berri ere, proiektuan erdietsitako laneratze-mailari dagokiona barne.

4.– Lanbide-Euskal Enplegu Zerbitzu Publikoak, ekintza garatzen den bitartean jarraipena egiteaz gain, auditoretza eta ikuskapen plan bat ezarri ahal izango du, deialdiak ezarritako baldintzak betetzen direla egiaztatzeko, bai eta diruz lagundutako ekintzak gauzatzeko baldintza errealak baieztatzeko ere. Horretarako, honako hauetara behartuta egongo dira erakunde onuradunak:

a) Bereizitako kontabilitate bat erabiliz edo kontabilitateko kodeketa egokia eta bereizia erabiliz erregistratzera dirulaguntza honen eraginpeko mugimendu guztiak. Europako Gizarte Funtsak finantzaketan parte hartu duela adierazi beharko da, eta bermatu beharko da kontabilitate-egozketa kontabilitate orokorraren arloan eta merkataritzako legediaren arloan indarrean dauden araudiekin bat datorrela.

b) Ekintza gauzatu dela, gastuak egon direla eta ordainketak benetan egin direla egiaztatzeko dokumentazio moduan balio dezaketen jatorrizko agiri kualitatiboak eta kuantitatiboak gordeko dituzte, bost urtez, kudeaketa-agintaritzak onuradunari azken ordainketa egiten dion urteko abenduaren 31tik aurrera, Europako Parlamentuaren eta Kontseiluaren 2021eko ekainaren 24ko (EB) 2021/1060 Erregelamenduaren 82.1 artikuluaren arabera.

Agiri horiek jatorrizkoetan edo jatorrizkoen kopia konpultsatuetan gordeko dira, edo oro har onartutako datu-euskarrietan; bereziki, jatorrizko agirien bertsio elektronikoak edo bertsio elektronikoan soilik dauden agiriak.

5.– Erakunde onuradunen ordezkariak edo ahaldunak datu pertsonalei dagokien konpromisoa sinatu beharko du derrigorrez, datu horien tratamenduaren arduradun den aldetik, arlo hori arautzen duen indarreko legerian ezarritako baldintzen arabera.

6.– Prestakuntza ematen duen erakundeak, edo, hala badagokio, enpresak, gela bat jarri beharko du parte-hartzaileen esku, diruz lagundutako ikastaroa amaitzen duten parte-hartzaileak adina ordenagailu dituena, 16. artikuluan adierazitako inkesta telematikoa bete ahal izateko. Halaber, erakundea edo enpresa bera izango da inkesta hori betetzen dela bermatzeaz arduratu beharko dena.

7.– Gizarteratzeko eta laneratzeko zailtasun bereziak dituzten kolektiboei zuzendutako proiektuetan, erakunde onuradunek bermatu beharko dute langile tekniko nahikoa eta kualifikazio egokia izango dutela xedatutako akonpainamendu-jarduketak garatzeko, bai eta banakako jarraipena egiten jarraituko dutela ere ibilbidearen fase guztietan.

20. artikulua.– Lanbide-Euskal Enplegu Zerbitzu Publikoaren eta EGF+ 21-27ren finantzaketagatik sortutako komunikazio-betebeharrak.

Diruz lagundutako jarduketa guztietan eta haien ondorio diren ekintzetan, erakundeek berariaz eman beharko dute Lanbide-Euskal Enplegu Zerbitzu Publikotik jasotzen duten finantzaketaren berri, eta Lanbide-Euskal Enplegu Zerbitzu Publikoaren komunikazio-eskuliburuan ezarritako baldintzak bete beharko dituzte horretarako (LanF prestakuntza-aplikazioaren bidez erakunde onuradunen eskura jarriko da eskuliburu hori).

Halaber, dirulaguntza jasotzen duten erakunde onuradunen zerrenda argitara emango da Europako Parlamentuaren eta Kontseiluaren 2021eko ekainaren 24ko (EB) 2021/1060 Erregelamenduak 49. artikuluan adierazi duen webgunean.

Onuradunek eta finantza-tresnak gauzatzen dituzten erakundeek aintzatetsi egingo dute funtsek eragiketari emandako laguntza, eta, horretarako:

a) Prestakuntza-erakundearen edo enpresa onuradunaren webgune ofizialean, webgune hori dagoenean, eta hedabide sozialetako kontuetan eragiketaren deskribapen labur bat egingo dute, laguntzaren mailaren, helburuen eta emaitzen araberakoa, eta Batasunaren finantza-laguntza nabarmenduko dute.

b) Adierazpen bat egingo dute, Batasunaren laguntza nabarmentzeko, eta ageriko tokian jarriko dute eragiketa gauzatzearekin zerikusia duten komunikazioaren arloko agirietan eta materialetan, jendeari edo parte-hartzaileei zuzendutakoetan.

c) Jendeak ongi ikusteko moduko toki batean, A3 neurriko kartel bat gutxienez edo pantaila elektroniko baliokide bat jarriko dute, eragiketari buruzko informazioa jasota, eta Funtsen laguntza nabarmenduko dute bertan; onuraduna pertsona fisikoa bada, onuradun horrek, ahal den neurrian, funtsen laguntza nabarmentzeko informazio egokia izango duela bermatuko du, publikoak ikusteko moduko leku batean edo pantaila elektroniko baten bidez.

21. artikulua.– Dirulaguntza aldatzea.

Dirulaguntza emateko kontuan hartutako baldintzetan ezer aldatuz gero, gertatu liteke emandako dirulaguntza ere aldatzea; nolanahi ere, eutsi egingo zaie deialdi honetan dirulaguntzen onuradun izateko ezarritako gutxieneko eskakizunei eta Dirulaguntzen Araubidea Erregulatzeko abenduaren 21eko 20/2023 Legeak 25. artikuluan jasotakoei.

Baldintzen aldaketa horren ondorioz dirulaguntza osoa edo zati bat itzuli behar bada, itzultzeko prozedura hasiko da, Dirulaguntzen Araubidea Erregulatzeko abenduaren 21eko 20/2023 Legeak 40. artikuluan esandakoarekin bat etorriz.

22. artikulua.– Beste dirulaguntza edo laguntza batzuekiko bateragarritasuna.

1.– Deialdi honetan prestakuntza-ekintzak egiteko ematen diren dirulaguntzak bateraezinak dira administrazio honek edo beste administrazio edo entitate publiko edo pribatu batzuek kontzeptu eta xede beragatik emandako beste edozein motatako dirulaguntza edo laguntza guztiekin.

2.– Lan-kontratuak egiteagatiko deialdi honetan xedatutako dirulaguntzak bateraezinak dira kontratazio bereko beste edozein motatako dirulaguntzak edo laguntzak eskuratzearekin, Gizarte Segurantzako kotizazioan izandako murrizketa edo hobariekin izan ezik.

23. artikulua.– Ez-betetzeak eta dirulaguntzak itzultzea.

1.– Dirulaguntza kobratzeko eskubidea galduko da, edo, hala badagokio, jasotako zenbatekoak osorik edo zatika itzuli beharko dira, dagokion berandutze-interesa galdatuarekin batera, araudi aplikagarrian (Dirulaguntzen Araubidea arautu duen abenduaren 21eko 20/2023 Legeak 14. eta 42. artikuluetan oro har ezarritako betebeharrak) eta deialdi honetan zerrendatutako kasuetan, 18. artikuluaren arabera egindako likidazioaren emaitzarekin bat etorriz.

Eta, bereziki, kasu hauetan:

a) Diruz lagundutako jarduketak 18. artikuluan xedatutakoaren arabera egin izana justifikatzeko betebeharra ez konplitzea.

b) Dirulaguntza lortzea horretarako galdatzen diren baldintzak bete gabe.

c) Egiaztapen- eta kontrol-jarduketei uko egitea, oztopoak jartzea edo erresistentzia erakustea.

d) Diruz lagundutako proiektua edo jarduketak gauzatzeari dagokionez, errealitatearekin bat ez datozen datuak edo informazioa ematea.

e) Deialdi honek 20. artikuluan ezarritako komunikazio- eta hedapen-betebeharrak ez konplitzea.

f) Deialdi honetan finkatutako beste edozein betebehar, baldintza edo betekizun ez betetzea.

2.– Itzuli beharreko zenbatekoa zehazteko, 18. artikuluan xedatutakoaren arabera egindako kitapenaren emaitza hartuko da kontuan, dirua itzultzea eskatu aurretik.

Ondore horietarako, ez-betetze osoa eta ez-betetze partziala bereiziko dira.

2.1.– Ez-betetze osotzat joko da honako inguruabar hauetakoren bat gertatzen denean:

a) Diruz lagundutako jarduketak ez egitea edo onetsitako proiektuarekin alderatuz gero substantzialki desbideratzea.

b) Diruz lagundutako jarduketa osoa ez justifikatzea edo behar bezala ez justifikatzea.

c) Proiektuaren helburuarekin argi eta garbi bateraezinak diren emaitzak erdiestea, bereziki laneratze-ibilbidea benetan gauzatu dela egiaztatzen ez denean.

d) Proiektuan ezarritako gutxieneko helburuak ez betetzea, noiz eta ezin baita egiaztatu jarduketak benetan gauzatu direla edo laneratze-emaitzak erdietsi direla, ez eta modalitate progresiboan ere, 1. artikuluan definitutako baldintzetan eta 18. artikuluan ezarritako egiaztapen-irizpideen arabera.

Kasu horietan, emandako dirulaguntzaren % 100 itzuli beharko da.

2.2.– Ez-betetze partzialtzat joko da, 18. artikuluaren arabera egindako kitapenaren ondorioz, aurreikusitako betetze-maila edo laneratze-emaitzak lortzen ez direnean.

Kasu horietan, dirulaguntza proiektuaren benetako gauzatze-mailara egokituko da, honako arau hauek aplikatuz:

a) Kontrataziora bideratutako proiektuak.

Helburu nagusi gisa kontratazio bidez laneratzea duten jarduketetan, prestakuntza-ibilbidea amaitu duten parte-hartzaile guztien gainean kontratatutako pertsonen ehunekoaren arabera kalkulatuko da dirulaguntzaren murrizketa, eskala honen arabera:

(Ikusi .PDF Fitxategia)

Kontratazioaren ehunekoa % 30etik beherakoa denean, ez-betetze osotzat jo ahal izango da, behar bezala justifikatutako inguruabarrak egiaztatzen direnean izan ezik.

Kasu horietan, eta ibilbidea benetan gauzatu dela egiaztatzen bada, laneratze progresiboko emaitzatzat joko ahal izango dira amaierako likidazioa kalkulatzeko. Emaitza horiek ez-betetzea mailakatzeko baino ez dira aintzat hartuko, eta ez dute inola ere ekarriko benetako laneratzearen konpromisoa betetzea, ez eta dirulaguntza osorik mantentzeko eskubidea ere.

b) Aktibazio edo laneratze progresibora bideratutako proiektuak.

Helburu nagusi gisa enplegurako aktibatzea edo laneratze progresiboa duten jarduketetan, ibilbidearen gauzatze-mailaren eta erdietsitako emaitzen arabera kalkulatuko da murrizketa, honako irizpide hauei jarraituz:

(Ikusi .PDF Fitxategia)

Ondore horietarako, bete dela ulertuko da parte-hartzaileek beren ibilbidean xedatutako jarduketak modu eraginkorrean garatu dituztenean, baldin eta jarduketa horiek behar bezala egiaztatuta eta dokumentatuta badaude 18. artikuluan xedatutakoaren arabera.

3.– Laneratze progresiboaren emaitzak egoteak ez du inola ere automatikoki ekarriko dirulaguntza osorik jasotzeko eskubidea, eta proiektuaren xedea betetzeko benetan egin duen ekarpena baloratu beharko da, 18. artikuluan ezarritakoarekin bat etorriz.

4.– 18. artikuluaren arabera egindako kitapena albo batera utzi gabe, kontratazioagatiko dirulaguntzetan, diru osoa edo zati bat itzuliko da 6. artikuluan ezarritako baldintzei eusten ez zaienean, batez ere kontratuaren gutxieneko iraupenari dagokionez.

Justifikatutako arrazoiengatik aldez aurretik azkentzen bada, benetan lan egindako aldiari proportzionalki doituko zaio dirulaguntza.

Beste kasu batzuetan, artikulu honetan xedatutakoaren arabera itzuliko da dirua.

5.– Lanbide-Euskal Enplegu Zerbitzu Publikoaren Administrazio eta Zerbitzu Orokorren zuzendari nagusiak abiaraziko du itzultze-prozedura, organo eskudunaren akordio bidez, eta idazkia bidaliko dio erakunde onuradunari, ez-betetzea eragin duen gertaera edo gertaerak jakinarazteko, eta adieraziko dio hamabost eguneko epea duela egoki ikusten dituen alegazioak edo egiaztagiriak aurkezteko.

Alegazioak aurkeztu ostean edo alegazio horiek egiteko epea igaro ostean, Lanbide-Euskal Enplegu Zerbitzu Publikoaren Administrazio eta Zerbitzu Orokorren zuzendariak ebazpena emango du.

Laguntzak itzultzeko prozedura gehienez hamabi hilabeteko epean ebatzi beharko da.

6.– Ebazpenean ez-betetzeren bat izan dela iritziz gero, galdutzat emango da dirulaguntza jasotzeko eskubidea, eta, hala badagokio, bidezko diru-kopuruak Lanbide-Euskal Enplegu Zerbitzuari itzuli beharko zaizkio, ebazpena jakinarazten denetik bi hilabete igaro baino lehen. Epe hori borondatezko alditzat joko da.

Borondatezko epe horretan dirulaguntza itzultzen ez bada, dirulaguntza premiamendu-bidetik eskuratzeko izapideak hasiko dira, Euskal Autonomia Erkidegoko Ogasun Nagusiaren Diru Bilketa Erregelamenduan ezarritakoaren arabera zorraren konpentsazioa aplikatu behar denean izan ezik.

24. artikulua.– Datu-babesari buruzko informazioa.

Datu pertsonalen babesaren arloan, Lanbide-Euskal Enplegu Zerbitzu Publikoak bi xedapen hauen arabera jokatuko du: Datuak Babesteko (EB) 2016/679 Erregelamendu Orokorra eta Datu Pertsonalak Babesteko eta Eskubide Digitalak Bermatzeko 3/2018 Lege Organikoa. Biltzen diren datu pertsonalak «Enplegurako eta enpleguko prestakuntzarako dirulaguntzak» izeneko tratamendu-jardueraren barruan egongo dira. Jarduera horren arduraduna Lanbide-Euskal Enplegu Zerbitzu Publikoa da, eta jardueraren helburua da Lanbide-Euskal Enplegu Zerbitzu Publikoaren eskumen diren enplegu-politika aktiboekin zerikusia duten dirulaguntzak kudeatzea eta kontrolatzea, bai eta iruzurrari jazartzea eta datuak estatistiketan erabiltzea ere. Biltzen diren datuak beharrezkoak dira Lanbide-Euskal Enplegu Zerbitzu Publikoari emandako botere publikoak gauzatzeko eta lege-betebeharrak konplitzeko, eta arlo horretan eskumena duten administrazio publikoei komunikatu ahal izango zaizkie.

Datuen titularrek datuak irispidean izateko, zuzentzeko eta ezerezteko eta informazioaren tratamendua mugatzeko eta tratamenduaren aurka egiteko eskubideak erabili ahal izango dituzte tratamenduaren arduradunaren aurrean, datuen babesaren arloko eskubideak baliatzeko prozeduraren bidez, zeina www.euskadi.eus/zerbitzuak/10842/ helbidean baitago argitaratuta.

Datuen babesari buruzko informazio osagarri eta zehatza kontsultatzeko:

https://www.euskadi.eus/informazio-klausulak/web01-sedepd/eu/gardentasuna/074300-capa2-eu.shtml

25. artikulua.– Lehiari buruzko Europako araudia.

1.– Deialdi honetan lan-kontratuak egiteagatik zehaztutako laguntzek bat etorri beharko dute Batzordearen 2023ko abenduaren 13ko 2023/2831 (EB) Erregelamenduarekin, zeina Europar Batasunaren Funtzionamendu Tratatuaren 107. eta 108. artikuluak «minimis» laguntzei aplikatzeari buruzkoa baita. Kalifikazio horren ondorioz, enpresa bakar bati ezin zaio guztira 300.000 euro baino gehiago eman «minimis» laguntzetan, hiru urteko edozein alditan.

Muga hori aplikatzeko, kontuan hartu beharko da nola definitzen duen «enpresa bakarra» Erregelamendu horrek 2.2 artikuluan.

2.– Laguntza eskatzen duenak aurreko hiru urteetan jasotako «minimis» laguntzei buruzko aitorpena egin beharko du, ziurtatzeko «minimis» laguntza berriak ez duela gainditzen aipatu erregelamenduan ezarritako gehieneko muga.

26. artikulua.– Aplikatu beharreko arauak.

1.– Laguntza-programa honi Dirulaguntzen Araubidea Erregulatzeko abenduaren 21eko 20/2023 Legean eta Dirulaguntzen azaroaren 17ko 38/2003 Lege Orokorrean eta hura garatzen duen Erregelamenduan –uztailaren 21eko 887/2006 Errege Dekretuaren bidez onartua– bildutakoa aplikatu behar zaio.

Abenduaren 21eko 20/2023 Legeak 17. artikuluan ezarritako erregelamenduzko xedapena ematen ez den bitartean, bermeen araubideari dekretu hau aplikatuko zaio, lege horren kontra ez doan guztian: 698/1991 Dekretua, abenduaren 17koa, Euskal Autonomia Erkidegoaren Aurrekontu Orokorraren kontura emandako dirulaguntzen bermeen eta itzultzearen araubide orokorra arautu duena eta kudeaketan parte hartzen duten erakunde laguntzaileen betekizunak, araubidea eta betebeharrak ezarri dituena.

2.– Laguntzak EGF+ funtsak kofinantzatuta daudenez, onuradunak Europar Batasunaren erregelamendu hauetan xedatutakoa bete beharko du:

– (EB) 2021/1060 Erregelamendua, Europako Parlamentuarena eta Kontseiluarena, 2021eko ekainaren 24koa, zeinaren bitartez ezartzen baitira Eskualde Garapeneko Europako Funtsari, Europako Plus Gizarte Funtsari, Kohesio Funtsari, Bidezko Trantsizio Funtsari eta Itsasoko, Arrantzako eta Akuikulturako Europako Funtsari buruzko xedapen komunak, bai eta funts horietarako finantza-arauak eta Asilo, Migrazio eta Gizarteratzeko Funtserako, Barne Segurtasuneko Funtserako eta Mugak eta Bisen Politika Kudeatzeko Laguntza Finantzariorako Tresnarako finantza-arauak ere.

– 2021/1057 (EB) Erregelamendua, Europako Parlamentuarena eta Kontseiluarena, 2021eko ekainaren 24koa, Europako Plus Gizarte Funtsa (EGF+) ezarri duena eta 1296/2013 Erregelamendua (EB) indargabetu duena.

3.– Prestakuntzaren arloan, deialdi honetan xedatu ez den horretan, aplikagarri izango dira 30/2015 Legea, irailaren 9koa, Lan-arloko enplegurako lanbide-heziketaren sistema arautu duena; 694/2017 Errege Dekretua, uztailaren 3koa, zeinaren bitartez garatu baita 30/2015 Legea, irailaren 9koa; eta TMS/368/2019 Agindua, martxoaren 28koa, zeinaren bidez garatu baita 694/2017 Errege Dekretua, uztailaren 3koa, Lanbide Heziketa Antolatu eta Integratzeko martxoaren 31ko 3/2022 Lege Organikoaren aurka ez doan horretan.

Prestakuntza egiaztagarriari dagokionez:

– EFP/942/2022 Agindua, irailaren 23koa, Lanbide Kualifikazioen Katalogo Nazionalari lotutako lan-esparruko lanbide-heziketako sistemaren prestakuntza-eskaintza, administrazio eskudunek egindakoa, arautu duena, eta haren oinarri arautzaileak eta finantzaketa-baldintzak ezarri dituena.

– 3/2022 Legea, martxoaren 31koa, Lanbide Heziketa Antolatu eta Integratzekoa.

– 659/2023 Errege Dekretua, uztailaren 18koa, 3/2022 Legeak arautu duen Lanbide Heziketako Sistemaren antolamendua garatu duena.

– 658/2024 Errege Dekretua, uztailaren 9koa, errege-dekretu hauek aldatu dituena: 132/2010 Errege Dekretua, otsailaren 12koa, Haur Hezkuntzako bigarren zikloko, Lehen Hezkuntzako eta Bigarren Hezkuntzako irakaskuntzak ematen dituzten ikastetxeen gutxieneko baldintzak ezarri dituena, eta 659/2023 Errege Dekretua, uztailaren 18koa, Lanbide Heziketako Sistemaren antolamendua garatu duena:

27. artikulua.– Deialdi honetako ehunekoen kalkulua.

Deialdi honetako ehunekoren batean zenbaki dezimalik egonez gero, zati osoa baino ez da hartuko kontuan, dezimalak albo batera utzita.

Azterketa dokumentala