Euskal Herriko Agintaritzaren Aldizkaria

95. zk., 2026ko maiatzaren 22a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

KULTURA ETA HIZKUNTZA POLITIKA SAILA

2176

AGINDUA, 2026ko maiatzaren 5ekoa, Jaurlaritzako lehenengo lehendakariorde eta Kultura eta Hizkuntza Politikako sailburuarena, zeinaren bidez 2026ko ekitaldiko musika-jarduera profesionaletarako dirulaguntzak emateko arauak ezarri eta deialdia egiten baita.

Arte- eta kultura-alorreko jarduerei loturiko eskumenak eta haien zabalkundeari dagozkionak Kultura eta Hizkuntza Politika Sailari dagozkio, hala xedatuta baitago Euskal Autonomia Erkidegoaren Administrazioko sailak sortu, ezabatu eta aldatzen dituen eta sail bakoitzaren egitekoak eta jardín-arloak finkatzen dituen lehendakariaren ekainaren 23ko 18/2024 Dekretuan.

Bestalde, Kultura eta Hizkuntza Politika Sailaren egitura organikoa eta funtzionala ezartzen duen azaroaren 26ko 389/2024 Dekretuaren 12. artikuluak ezartzen duenez, Kultura Sustatzeko eta Kultura eta Sormen Industrietako Zuzendaritzari dagokio dekretu honen 6. artikuluan ezarritako egitekoak betetzea musikaren, arte eszenikoen, liburuaren, ikus-entzunezkoen, ikusizko arteen eta kultura- eta sormen-industrien arloetan.

Zuzendaritza horrek, bere eskumenen esparruan, egokitzat jotzen du musika-jarduera profesionalari laguntzea, musika ekoizteko, sustatzeko eta zabaltzeko proiektuetarako dirulaguntzak emanez. Horretarako, honako laguntza-modalitate hauek aurreikusten dira: partituren edizioa, musika-ekoizpena eta sektore-garapena. Bestalde, Zuzen-Zuzenean zirkuituaren modalitatearen bidez, musika-aretoek tokiko musika-eszenan duten inplikazioa aitortu nahi da, eta tokiko musika-taldeen presentzia sustatu. Era berean, musika-zikloen modalitatearen bidez, programazio estilistikoaren eskaintza askotarikoa eta egonkorra sustatu nahi da.

Horrekin guztiarekin, balio-kate osoa indartu nahi da, sorkuntzatik hasi eta erakusketa eta kontsumora arte, musikarien lana eta enpresen eta programazioaren egonkortasuna babestuz. Hori guztia kulturaren ikuspegitik ez ezik, merkataritzaren ikuspegitik ere egin behar da, musikariek beren lana aintzat har dezaten merkatuaz zabalduz, publiko berriak sortuz eta fidelizatuz eta, horrela, herrialdeko musika-jardueraren finantzaketa eta bideragarritasuna areagotuz.

Agindu hau Kultura eta Hizkuntza Politika Sailaren 2025-2028 aldirako Dirulaguntzen Plan Estrategikoaren barruan dago. Jaurlaritzako lehenengo lehendakariorde eta Kultura eta Hizkuntza Politikako sailburuaren 2025eko otsailaren 27ko Aginduaren bidez onartu zen, eta aipatutako sailaren webgunean argitaratuta dago.

Ondorioz, honako hau,

EBAZTEN DUT:

Artikulu bakarra.– Agindu honen eranskinean jasotako oinarri arautzaileak onartzea eta 2026an musika-jarduera profesionaletarako dirulaguntzak emateko deialdia egitea.

AZKEN XEDAPENETAKO LEHENENGOA

Agindu honek amaiera ematen dio administrazio-bideari, eta, beronen aurka, berraztertze-errekurtsoa aurkez dakioke Jaurlaritzako lehenengo lehendakariorde eta Kultura eta Hizkuntza Politikako sailburuari, hilabeteko epean, edo, zuzenean, administrazioarekiko auzi-errekurtsoa aurkez daiteke Euskal Autonomia Erkidegoko Justizia Auzitegi Nagusiko Administrazioarekiko Auzien Salan, bi hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera.

AZKEN XEDAPENETAKO BIGARRENA

Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

LEHENENGO XEDAPEN GEHIGARRIA

Deialdi honetan aurreikusitako dirulaguntzen programa Batzordearen 2014ko ekainaren 17ko (EB) 651/2014 Erregelamenduaren mende dago. Erregelamendu horren bidez, zenbait laguntza-kategoria barne-merkatuarekin bateragarritzat jotzen dira, Tratatuaren 107. eta 108. artikuluak aplikatuz (2014-06-26ko EBAO, L 187); zehazki, 53. artikuluan («Kulturarako eta ondarea kontserbatzeko laguntzak») jasotzen direnen mende, eta, beraz, Europako Batzordeari jakinaraztetik salbuetsita dago.

BIGARREN XEDAPEN GEHIGARRIA

Kulturako sailburuordearen ebazpen baten bidez, 1.2 artikuluan kontsignatutako zenbateko osoa % 10eraino handitu ahal izango da, eskatutako dirulaguntzen zenbateko osoa kontuan hartuta, Kultura eta Hizkuntza Politika Saileko Kultura Sailburuordetzaren beste programa batzuk exekutatu ondoren agortu gabe geratzen diren aurrekontu-baliabideen arabera. Ebazpen hori EHAAn argitaratu beharko da.

Vitoria-Gasteiz, 2026ko maiatzaren 5a.

Jaurlaritzako lehenengo lehendakariorde eta Kultura eta Hizkuntza Politikako sailburua,

IBONE BENGOETXEA OTAOLEA.

ERANSKINA

DIRULAGUNTZEN DEIALDIAREN OINARRI ARAUTZAILEAK

I. KAPITULUA

ARAU OROKORRAK

1. artikulua.– Xedea, baliabide ekonomikoak, modalitateak eta proiektuak garatzeko epea.

1.– Oinarri hauek 2026ko ekitaldiko musika-jarduera profesionaletarako dirulaguntzak emateko araubidea ezartzen dute.

2.– Dirulaguntza horien gehieneko zenbateko osoa 1.000.000 eurokoa da. Zenbateko hori ondorengo modalitateen artean banatuko da; kasu bakoitzean aipatutako deialdiaren kapituluan azaltzen diren jarduera motaren, sartzeko baldintzen eta balorazio-irizpideen arabera:

a) Partituren edizioa: 55.000 euro (II. kapitulua).

b) Musika-ekoizpena: 550.000 euro (III. kapitulua).

c) Sektore-garapena: 155.000 euro (IV. kapitulua).

d) Zuzen-Zuzenean zirkuitua: 155.000 euro (V. kapitulua).

e) Musika-zikloak: 85.000 euro (VI. kapitulua).

3.– Diruz lagunduko diren proiektuen garapenerako, onartutako gasturako eta justifikaziorako epea honako hau izango da:

a) Partituren edizio-modalitateak, musika-ekoizpena eta sektore-garapena: 2026ko urtarrilaren 1etik 2027ko azaroaren 10era.

b) Zuzen-Zuzenean zirkuituaren eta musika-zikloen modalitateak: 2026ko irailaren 1etik 2027ko abuztuaren 31ra.

2. artikulua.– Laguntzak emateko prozedura.

1.– Oinarri hauetan aurreikusitako dirulaguntzak lehiaketa bidez ebatziko dira, eta, horretarako, modalitate bakoitzerako aurreikusitako balorazio- eta banaketa-irizpideak eta 12. artikuluan ezarritako prozedura aplikatuz, eskabideak baloratuko dira eta dirulaguntzak banatuko dira, deialdiari esleitutako kredituak agortu arte, hala badagokio.

2.– 12.5 artikuluan aurreikusten den bezala, balorazio-batzordeen txostenak ikusita, deialdia kudeatzen duen organoak egin beharreko behin betiko ebazpen-proposamenetan modalitateen arteko zenbatekoen transferentzia jaso ahal izango da.

3. artikulua.– Dirulaguntza eskuratzeko baldintza orokorrak.

1.– Modalitate bakoitzerako ezarritako beste baldintza batzuk alde batera utzi gabe, oinarri hauetan araututako dirulaguntzen onuradun izan ahalko dira betekizun orokor hauek betetzen dituzten eskatzaileak:

a) Nortasun juridiko propioa duten pertsona fisiko edo juridiko pribatuak izatea, Euskal Autonomia Erkidegoan erroldatuta daudenak edo egoitza soziala Euskal Autonomia Erkidegoan dutenak, edo, bestela, aurkeztutako proiektua Euskal Autonomia Erkidegoan jaio edo bizi diren musikarien obrei buruzkoa izatea, edo euskarazko errepertorioa guztizkoaren % 75etik gorakoa izatea.

b) Ekonomia-jardueren gaineko zergan alta emanda egotea oinarri hauen I. eranskinean zerrendatutako epigraferen batean, lehiatzen den modalitatearen arabera.

c) Zerga-betebeharrak eta Gizarte Segurantzarekikoak egunean izatea, bai eta dirulaguntzak itzultzeko betebeharrak ere, Dirulaguntzen Araubidea Erregulatzeko abenduaren 21eko 20/2023 Legean eta Ogasun eta Finantzetako sailburuaren 2023ko otsailaren 13ko Aginduaren 4. eta 7. artikuluetan ezarritakoaren arabera (agindu hori zerga-betebeharrak eta Gizarte Segurantzarekikoak betetzen direla egiaztatzeari buruzkoa da).

2.– Artikulu honen 1. paragrafoan ezarritako baldintza orokorrak eta modalitate bakoitzerako espezifikoak egiaztatzeko, 8. artikuluan adierazitako prozedurak edo dokumentuak aurkeztuko dira.

3.– Honako pertsona edo erakunde hauek ezingo dira onuradun izan:

a) Administrazio publikoaren izaera duten erakundeak, administrazio horietako baten sektore publikoaren parte badira, edo haien kapital sozialean, fundazio-ondarean edo gobernu-, administrazio- edo zuzendaritza-organoetan partaidetza nagusia edozein administrazio publiko edo instituzionalena edo sektore publikoko, finantzako edo kredituko entitateena bada.

b) Laguntza edo dirulaguntza publikoak eskuratzea eragozten duen zehapen administratibo edo penalik duen eskatzailea, edo horretarako legezko inolako debekurik duena, sexu-bereizkeriagatiko debekuak barne, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 23.2 artikuluan xedatutakoarekin bat etorriz, zehapenak ezartzen duen aldian. Era berean, ezin izango dituzte laguntzak edo dirulaguntzak eskuratu berdintasun-plan bat izan behar duten baina Estatuko araudiaren arabera indarrean dagoen berdintasun-planik ez duten enpresek, ez eta 50 langiletik gorako enpresek ere, baldin eta egiaztatzen ez badute sexu-jazarpena edo sexuan oinarritutako jazarpena prebenitzeko eta horri aurre egiteko neurriak ezarri dituztela, emakumeen eta gizonen berdintasunaren arloko Estatuko legeriak ezarritakoaren arabera.

c) Trans pertsonen berdintasun erreal eta eraginkorrerako eta LGTBI pertsonen eskubideak bermatzeko otsailaren 28ko 4/2023 Legearen 82. artikulua betetzen ez duen eskatzailea.

d) Europako Batzordeak aurretiaz erabaki badu laguntza bat legez kanpokoa eta merkatu erkidearekin bateraezina dela, berreskuratze-agindu baten mende dauden pertsonak.

e) Krisian dauden enpresak, krisialdian dauden enpresa ez-finantzarioak salbatzeko eta berregituratzeko estatu-laguntzei buruzko zuzentarauen definizioaren arabera (2014-07-31ko AO, C249). Termino hori Batzordearen 2014ko ekainaren 17ko (EB) 651/2014 Erregelamenduaren 2. artikuluko 18. apartatuan dago definituta.

f) Dirulaguntzen Araubidea Erregulatzeko abenduaren 21eko 20/2023 Legearen 13. artikuluaren 1., 3., 4. eta 5. apartatuetan jasotako egoeraren batean dauden pertsonak edo entitateak.

4. artikulua.– Bideragarritasuna, aurrekontua, diruz lagundu daitezkeen gastuak eta azpikontratazioa.

1.– Pertsona edo erakunde eskatzailea izango da proiektuaren gastuaren eta kudeaketa ekonomikoaren titularra eta arduraduna, eta, hala badagokio, diruz lagundutako proiektuaren justifikazioarena, 15. artikuluan arautzen den bezala.

2.– Proiektuak ekonomikoki bideragarriak direla egiaztatzeko, aurrekontu orekatu bat aurkeztu beharko da, proiektua garatzeko behar den gastu arruntaren eta gastu hori estaltzeko aurreikusitako diru-sarreren artean, diru-sarrera horien artean deialdi honetan eskatutako zenbatekoa sartuta.

3.– Administrazio publikoen ekarpen ekonomikoen gehieneko guztizkoak ezin izango du onartutako gastu-aurrekontuaren % 80 gainditu.

4.– Aurkeztu beharreko aurrekontuak irizpide eta betekizun hauek bete beharko ditu:

a) Dirulaguntzen Araubidea Erregulatzeko abenduaren 21eko 20/2023 Legearen 30. artikuluaren esparruan, aurrekontuan sartutako eta justifikatu beharreko gastuek bat etorri beharko dute 1.3 artikuluan ezarritako aldian proiektua garatzeko behar-beharrezkoak direnekin.

b) Gastuen aurreikuspena banakatuta aurkeztu beharko da, artikulu honen 5., 6. eta 7. apartatuetan aipatzen diren kontzeptuen eta mugen tipologiaren arabera.

c) Diru-sarreren atala honako bloke eta baldintza hauen arabera banakatu beharko da:

1. Pertsona edo erakunde eskatzaileak emandako zenbateko ekonomikoa.

Pertsona fisiko autonomoen kasuan, ekarpen horrek orekatu ahal izango du, hala badagokio, aurrekontuan sartutako langile-gastua, eskatzaileak proiektuan zuzenean egindako zereginei dagokienez, artikulu honen 7. apartatuan ezarritako mugaren eta baldintzen arabera.

2. Beste erakunde publiko edo pribatu batzuen ekarpen ekonomikoak, erreferentzia hauen arabera:

i) Pertsona edo erakunde eskatzaileak eskabidearen xede den proiektua garatzeko kontratu edo dirulaguntza gisa jasotako zenbatekoak.

ii) Beste pertsona edo erakunde batzuek koprodukzio- edo lankidetza-araubideko proiektuen esparruan zuzenean beren gain hartutako proiektuaren gastuak, 5. artikuluan adierazitako baldintzen arabera.

iii) Deialdi honetan egindako eskaera ekonomikoa. Eskabide horrek ezin izango du inola ere gainditu modalitate bakoitzerako aurreikusitako dirulaguntzaren gehieneko zenbatekoa, ez eta artikulu honen 3. apartatuan aipatutako muga ere.

5.– Proiektuaren gastu-aurrekontuak honako kontzeptu-tipologia hau jaso ahal izango du, a) eta b).4. paragrafoetan adierazitako mugekin, bai eta 7.a) apartatuan adierazitako mugekin ere, langile-gastuei dagokienez.

a) Administrazio-jardueraren eta administrazio-kudeaketaren koordinazio edo antolaketa orokorra: aurrekontu osoaren % 15, gehienez.

b) Zereginak edo gastu-kontzeptu espezifikoak, modalitatearen arabera:

1. Partituren edizioa: Berrikuspena; – Kopiagintza; – Edizioa; etab.

2. Musika-ekoizpena: – Sorkuntza: konposizioa; sorkuntza- eta lankidetza-egoitzak; konponketak, saiakuntzak, etab.; – Interpretazioa; – Aurreprodukzio eta ekoizpen artistikoa; – Ekoizpen teknikoa; – Masterizazioa; – Nahasketak; – Edizioa eta fabrikazioa; – Lehen zuzenekoaren ekoizpena; etab.

3. Sektore-garapena: – Proiektua diseinatzea eta gauzatzea: parte-hartzaileen lana; behar diren materialak edo baliabideak; aurreikusitako azken produktua egitea.

4. Zuzen-Zuzenean zirkuitua: – Parte hartzen duten taldeen katxeak, 29.3.b) artikuluan adierazitako mugekin; – Ekoizpen teknikoa eta/edo koordinazioa, aurrekontu osoaren % 20 gehienez.

5. Musika-zikloak: – Cachesa eta parte hartzen duten musika-taldeen beste gastu batzuk; – Ekoizpen teknikoa; – Aurreikusitako jarduera paraleloen gastu espezifikoak.

c) Diruz lagundutako proiektuaren berri emateko eta zabaltzeko materiala; nolanahi ere, emandako dirulaguntza justifikatzeko ezarritako gehieneko epearen barruan egin beharko da.

d) Pertsona fisiko edo elkarte eskatzaileek honako egitura-gastu hauek sartu ahal izango dituzte proiektuaren aurrekontuan, jarduera garatzen den aldiari dagozkionak: entsegu-lokalaren alokairua, energia elektrikoa, bulegoa, telefonia, gestoria, dietak, etab.

6.– Ez da diruz lagunduko BEZ kengarriaren zenbatekoa, baldin eta pertsona edo erakunde onuraduna zerga horren aitorpena egitera behartuta badago. Kasu horretan, gastu gisa egotz daitekeen zenbatekoa egiaztagirien zerga-oinarriari dagokiona izango da. Bestela, kenkaria legez bidezkoa ez dela egiaztatzen duen agiria aurkeztu beharko du eskatzaileak.

7.– Pertsona fisiko eskatzaileak edo, pertsona juridikoen kasuan, erakundearen beraren langileek egin beharreko zereginen langile-gastuei dagokienez, honako muga eta baldintza hauek hartu beharko dira kontuan:

a) Pertsona fisiko eskatzaileen kasuan, gastu-tipologia horretarako gehieneko guztizko mugak ezin izango du proiektuaren aurrekontu osoaren % 35 gainditu, eta proiektuaren barruan artikulu honen 5.a) apartatuan adierazitako muga sartuko da.

b) Aurrekontuan eta, hala badagokio, justifikazioaren azken balantzean, inplikatutako pertsonek egin beharreko zereginak zehaztu beharko dira, bai eta gastu hori kalkulatzeko erabilitako denbora- eta ekonomia-erreferentziak ere.

c) Dirulaguntzaren kasuan, gastu horiek honela justifikatu beharko dira:

1. Onuraduna pertsona juridikoa bada: aurreikusitako zereginak garatzeko aldiari dagokion pertsona/arduradunen nominak.

2. Onuraduna pertsona fisikoa bada: egindako lanei buruzko adierazpen pertsonala, bai eta proiektua garatu bitartean autonomoen aseguruari dagozkion alta-agiriak eta ordainagiriak ere.

5. artikulua.– Koprodukzio- edo lankidetza-araubideko proiektuak.

Deialdi honen ondorioetarako, proiektu batean koprodukzioa edo lankidetza dagoela ulertuko da proiektua garatzeko aurrekontuko gastuen zati bat bi pertsonak edo erakundek edo gehiagok zuzenean beren gain hartu eta likidatuko dutela aurreikusten denean. Kasu horietan, eskaerek honako baldintza hauek bete beharko dituzte:

a) Proiekturako dirulaguntza eskaera bakarra aurkeztu ahal izango da, eta pertsona edo erakunde eskatzailearen partaidetza ekonomikoak aurreikusitako gastuen aurrekontuaren % 25 hartu beharko du gutxienez.

b) Proiektuaren memoria ekonomikoak eskaeraren xede den jardueraren aurrekontu osoa jaso beharko du, proiektuan parte hartzen duen pertsona edo erakunde bakoitzak bere gain hartutako kontzeptuak eta zenbatekoak behar bezala banakatuta. Gainera, gainerako eskabide-agiriekin batera, parte hartu duten alderdien artean egindako kontratua edo akordioa aurkeztu beharko da.

c) Dirulaguntzaren kasuan, gastu osoa justifikatu beharko da, aurreikusitako koprodukzio-planaren arabera, eta haren egiaztagiri guztiak aurkeztu beharko dira.

6. artikulua.– Beste dirulaguntza batzuekiko eta modalitate desberdinekiko bateragarritasuna.

1.– 4.3 artikuluan eta artikulu honetako gainerako paragrafoetan adierazitakoa alde batera utzi gabe, deialdi honetan aurreikusitako dirulaguntzak bateragarriak dira beste edozein erakunde publikok edo pribatuk helburu bererako ematen dituenekin, betiere gainfinantzaketarik gertatzen ez bada. Halakorik gertatuz gero, emandako dirulaguntza dagokion gehieneko mugaraino murriztuko da.

2.– Deialdiko edozein modalitatetan proiektu jakin bat egiteko dirulaguntza ematea bateraezina izango da Eusko Jaurlaritzako Kultura eta Hizkuntza Politika Sailak proiektu bererako ematen duen beste dirulaguntza batekin.

3.– Modalitate berean, bateraezina izango da pertsona fisiko bati eta entitate juridiko bati aldi berean dirulaguntza ematea, baldin eta pertsona fisiko hori bigarrenaren benetako titulartasunaren parte bada. Egoera horretan, balorazioan puntuazio handiena lortzen duen proiektuari emango zaio dirulaguntza.

4.– Ezin izango zaio eskatzaile berari dirulaguntza eman Zuzenean zirkuituko eta musika-zikloetako modalitateetan. Egoera horretan, balorazioan puntuazio handiena lortzen duen proiektuari emango zaio dirulaguntza.

7. artikulua.– Eskabideak: epea eta moduak.

1.– Eskabideak aurkezteko epea hilabetekoa izango da, deialdi hau Euskal Herriko Agintaritzaren Aldizkarian argitaratu eta hurrengo egunetik aurrera.

2.– Pertsona fisikoek, enpresaburu indibidualek edo autonomoek eta pertsona juridikoek bitarteko elektronikoen bidez aurkeztu beharko dituzte eskabideak, hurrengo puntuan adierazitako helbide elektronikoetara sartuta.

3.– Izapideei, eskabide-formularioei, erantzukizunpeko adierazpenei, justifikazioei eta gainerako ereduei buruzko jarraibideak honako helbide elektroniko hauetan daude eskuragarri:

a) Partituren edizioaren modalitatea: https://www.euskadi.eus/zerbitzuak/0247341

b) Musika-ekoizpenaren modalitatea: https://www.euskadi.eus/zerbitzuak/0247342

c) Sektore-garapenaren modalitatea: https://www.euskadi.eus/zerbitzuak/0247343

d) Zuzen-Zuzenean zirkuituaren modalitatea: https://www.euskadi.eus/zerbitzuak/0247344

e) Musika-zikloen modalitatea: https://www.euskadi.eus/zerbitzuak/0247345

Eduki horiek Zuzenean-Herritarrentzako Arreta Bulegoetan ere egongo dira eskuragarri, betiere aldez aurretik hitzordua eskatuta.

4.– Eskabidearen osteko izapideak, bide elektronikoz, helbide honetan egingo dira: http://www.euskadi.eus/nirekarpeta

5.– Helbide honetan eskuratu daitezke Euskal Autonomia Erkidegoko Administrazio Publikoaren egoitza elektronikoan onartutako identifikazio eta sinadura elektronikorako bitartekoak: https://www.euskadi.eus/ziurtagiri-elektronikoak

6.– Eskabidea eta ondorengo izapideak pertsona edo entitate eskatzailearen ordezkari batek egin ahal izango ditu. Horretarako, ordezkaritza ahalordeen erregistro elektronikoan inskribatu beharko da, helbide honetan: https://www.euskadi.eus/ordezkariak

7.– Pertsona eta erakunde eskatzaileek nahi duten hizkuntza ofizialean aurkeztu ahal izango dituzte eskabidea eta gainerako dokumentazioa. Halaber, eskabidea aurkeztu izanaren ondoriozko jarduketetan, eta prozedura osoan, erakunde eskatzaileak hautatutako hizkuntza erabiliko da, Euskararen Erabilera Normalizatzeko azaroaren 24ko 10/1982 Oinarrizko Legearen 5.2.a) eta 6.1 artikuluetan ezarritakoaren arabera.

8.– Eskabideak aurkezteak esan nahi du berariaz eta formalki onartzen direla deialdi honen oinarrietan zehaztutako baldintzak.

8. artikulua.– Betekizunak egiaztatzea, aurkeztu beharreko dokumentazioa eta erantzukizunpeko adierazpenak.

1.– Nortasuna eta administrazio-betekizunak egiaztatzea.

Deialdi honen organo kudeatzaileak automatikoki egiaztatuko ditu datu hauek, pertsona edo erakunde eskatzailearen baimenik behar izan gabe:

a) Pertsona edo erakunde eskatzailearen identitatea.

Pertsona edo erakunde eskatzaileak 7.6 artikuluan aipatutakoaren arabera jarduten badu, dagokion legezko ordezkaritza-ahalordea aurkeztu beharko du.

b) Zerga-betebeharrak eta Gizarte Segurantzarekikoak betetzea.

c) Jardueraren alta eta epigrafea (k) ekonomia-jardueren gaineko zergan.

Hala badagokio, aurreko b) eta c) puntuen egiaztapena 15.1 artikuluan aurreikusitako ordainketen unean ere egingo da. Hala ere, eskatzaileak berariaz aurka egin ahal izango dio egiaztapen horiek egiteari, eta, kasu horretan, dagozkion ziurtagiri eguneratuak aurkeztu beharko ditu.

2.– Erantzukizunpeko adierazpenak.

Dirulaguntzen Araubidea Erregulatzeko abenduaren 21eko 20/2023 Legearen 9.5 artikulua aplikatuz, betebehar hauek betetzen direla egiaztatuko da, eskabidearekin batera egindako erantzukizunpeko adierazpen baten bidez:

a) Helburu bererako dirulaguntzak, diru-sarrerak edo beste baliabide batzuk eskatu, eta, hala badagokio, jaso badira beste edozein administrazio edo erakunde publiko nahiz pribatutatik, horren berri ematea.

b) Eskatzaileak egunean dituela dirulaguntzak itzultzeko betebeharrak.

c) Pertsona edo erakunde eskatzaileak ez izatea dirulaguntza publikoak eskuratzea eragozten dion zehapen administratibo edo penalik, ezta horretarako legezko inolako debekurik ere, sexu-bereizkeriagatiko debekuak barne, Emakumeen eta gizonen berdintasunerako eta indarkeria matxistarik gabeko bizitzarako Legearen testu bategina onartzen duen martxoaren 16ko 1/2023 Legegintzako Dekretuaren 23.2 artikuluan ezarritako zehapenen eta debekuen arabera.

d) Pertsona edo erakunde eskatzaileak ez izatea Trans pertsonen berdintasun erreal eta eraginkorrerako eta LGTB pertsonen eskubideak bermatzeko otsailaren 28ko 4/2023 Legearen 82. artikuluan ezarritako inguruabarretako bat ere.

e) Hala badagokio, erakundearen gobernu-organoak deialdian parte hartzea erabaki duela.

f) Eskabideko eta harekin batera doan dokumentazioko datuak egiazkoak direla, eta dirulaguntza horiek jasotzeko indarrean dagoen araudian ezarritako betekizunak betetzen direla.

3.– Proiektuari buruz aurkeztu beharreko dokumentazioa.

a) Modalitate guztietarako dokumentazio komuna:

1. Modalitate bakoitzari dagokion inprimakia, euskadi.eus webgunean eskuragarri, behar bezala beteta, eduki honekin:

i) Pertsona edo erakunde eskatzailearen jarduerari eta eskaeraren xede den proiektuari buruzko datu eta erreferentzia espezifikoak.

ii) Proiektuaren gastuen eta diru-sarreren aurrekontua.

2. Proiektuaren memoria, oinarri hauen III. eranskineko tauletan modalitate bakoitzerako ezarritako edukien arabera.

3. Hala badagokio, koprodukzio- edo lankidetza-araubideko proiektuak, 5. artikuluan araututakoaren arabera: proiektuan parte hartzen duten pertsonen edo erakundeen arteko kontratua edo akordioa.

b) Dokumentu espezifikoak, modalitateen arabera.

1. Musika-ekoizpenaren modalitatea:

i) Eskaeraren xede den proiektuari buruzko soinu-artxibo espezifikoa (halakorik ezean, egungo «online» erreferentzia aurkeztu beharko da).

ii) Besteren musika-edukiak erabiltzen badira, egile-eskubideei buruzko ziurtagiria edo adierazpena.

iii) Hala badagokio, 23.1.a.ii artikuluan aurreikusitako modalitatean sartzeko baldintzak betetzeari buruzko adierazpena (enpresa eskatzaileak 2024 eta 2025 bitartean kudeatutako itunen zerrenda).

iv) Hala badagokio, 23.1.b.ii artikuluan aurreikusitako modalitatean sartzeko baldintzak betetzeari buruzko adierazpena (gutxienez musika-prestakuntzako 50 profesionalen edo proiektuaren sustatzaileetako baten zerrenda).

2. Zuzen-Zuzenean zirkuituaren modalitatea:

ii) Eskatzailea aretoko kudeatzailea ez bada: gerentzia horren egiaztagiria, eskatzaileari deialdi honen xede den musika-programazioa kudeatzeko emandako gaitasunari buruzkoa.

3. Musika-zikloen modalitatea: zikloaren azken edizioan lortutako dirulaguntzak egiaztatzea.

4.– Dokumentazioa aurkezteko formatua.

Eskaera-orriarekin batera eta erabilitako bidea edozein dela ere, dokumentazio guztia aurkeztu beharko da, ahal dela euskarri elektronikoan, honako ezaugarri hauen arabera:

a) Deskarga daitezkeen ereduak erabiliko dira. Gainerako dokumentazioa, ahal dela, pdf formatuan aurkeztuko da.

b) Musika- edo ikus-entzunezko erreferentziak dagokion dokumentuan aurkeztu ahal izango dira, kontsultatzeko web-helbide bat emanez.

9. artikulua.– Deialdia eta emandako dirulaguntzak kudeatzeko organoa.

Kultura Sustatzeko eta Kultura eta Sormen Industrietako Zuzendaritzari dagokio deialdi honetan aurreikusitako dirulaguntzak kudeatzeko lanak egitea, eta Kultura Sustatzeko eta Kultura eta Sormen Industrietako zuzendaria izango da horien organo arduraduna.

Zuzendaritza horrek, halaber, diruz lagundutako proiektuen kontrola eta jarraipena egingo du, eta, horretarako, egoki iritzitako ikuskapenak egin ahal izango ditu, proiektuak behar bezala gauzatzen direla bermatzeko. Horretarako, onuradunek eskatzen zaien dokumentazio eta informazio guztia eman beharko dute.

10. artikulua.– Eskabideak aztertzea, zuzentzea eta onartzea.

1.– Eskabidea izapidetzeko onartzeko eskatzen diren dokumentu batzuk falta direla edo haietan forma-akatsak daudela ikusiz gero, edo dagokion proiektua baloratzeko aurkeztutako dokumentuetan edo datuetan akatsak daudela ikusiz gero, hamar egun balioduneko epea emango zaio interesdunari akatsa zuzentzeko edo aurkeztu beharreko dokumentuak aurkezteko, eta ohartaraziko zaio ezen, hala egin ezean, eskabidean atzera egin duela edo izapidetzeko eskubidea galdu duela ulertuko dela, ebazpen baten bidez.

2.– Administrazio Publikoen Administrazio Prozedura Erkidearen urriaren 1eko 39/2015 Legearen 68.4 artikuluaren arabera, eskabideren bat aurrez aurre egiten bada, pertsona edo erakunde eskatzaileari eskatuko zaio zuzen dezala, elektronikoki aurkeztuta, eta, ondorio horietarako, zuzenketa egin den eguna hartuko da eskaeraren aurkezpen-datatzat.

3.– Zuzenketa-fasea amaitutakoan, organo kudeatzaileak aztertu egingo ditu aurkeztutako eskabideak eta dokumentuak, eta kasu bakoitzean egiaztatuko du betetzen direla deialdiaren baldintza orokorrak eta modalitate bakoitzaren betekizun espezifikoak. Ondoren, onartutako eta onartu gabeko proiektuen zerrenda bat egingo du, eta dagokion arrazoia emango du, eta 12. eta 13. artikuluetan aurreikusitako balorazio- eta ebazpen-prozesuan sartuko du. Nolanahi ere, jasotako eskabide guztiak ebatzi eta jakinaraziko dira, oinarri hauen 13. artikuluan aurreikusitakoaren arabera.

11. artikulua.– Balorazio-batzordeak.

1.– Onartutako proiektuak aztertu eta baloratzeko, balorazio-batzorde bat eratuko da modalitate bakoitzerako, Zuzen-zuzenean zirkuituaren modalitatean izan ezik. Kulturako sailburuordeak izendatuko ditu modalitate horiek, eta aldez aurretik argitaratuko dira EHAAn.

2.– Honako hauek osatuko dute batzorde bakoitza:

– Presidentea: Kultura Sustatzeko eta Kultura eta Sormen Industrietako zuzendaria; zuzendaria ez badago, batzordekide zaharrenak ordezkatuko du.

– Bokalak: bi eta bost pertsona artean, musikari lotutako profesionalen artean izendatuak, independenteak edo sektorea ordezkatzen duten Euskal Autonomia Erkidegoko entitateetan integratuak.

3.– Idazkari gisa, baina kide izan gabe, zuzendariak izendatutako zuzendaritza horretako teknikari batek jardungo du, hitzarekin baina botorik gabe.

4.– Balorazio-batzordeak eratzean, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 3.10 artikuluan ezarritakoa beteko da.

5.– Batzordeek, beharrezkotzat jotzen badute, egokitzat jotzen dituzten azalpen guztiak eskatu ahal izango dizkiete eskatzaileei kudeaketa-organoaren bidez, eta proiektuen arduradunekin elkarrizketak ere hitzartu ahal izango dituzte balorazio-bileretan. Elkarrizketa horiek ezin izango dira 15´baino luzeagoak izan.

6.– Modalitate bakoitzeko batzordeak, 12. artikuluan aurreikusitako prozeduraren arabera, balorazio-txosten bat egin eta organo kudeatzaileari helaraziko dio, eduki honekin:

a) Aurretiazko kudeaketa-prozesua, onartutako eta baztertutako eskabideen zerrenda eta arrazoia.

b) Onartutako proiektuak baloratzeko prozesua: aurreikusitako balorazio-irizpide guztietan izandako gorabeherak eta lortutako puntuazioak.

c) Zuzkidura ekonomikoaren banaketa kalkulatzeko prozesua, kalkulu horren arabera eta emaitzaren arabera.

d) Eman beharreko dirulaguntzen proposamena: pertsona edo erakunde onuradunen identitatea, proiektuen izenburua eta bakoitzari eman beharreko zenbatekoa.

e) Ukatuko diren eskabideen proposamena eta arrazoiak, eta, hala badagokio, erabilgarri dagoen zuzkidura agortzeagatik dirulaguntzarik lortzen ez duten onartutako proiektuen zerrenda.

f) Hala badagokio, modalitatean geratutako zenbatekoa.

12. artikulua.– Proiektuak baloratzeko eta ebazpen-proposamenak egiteko prozedura.

1.– Partituren edizioa, musika-ekoizpena, sektore-garapena eta musika-zikloak modalitateetan aurkeztu eta onartutako proiektuak oinarri hauen III. eranskinean modalitate bakoitzerako adierazitako irizpide eta prozeduren arabera baloratu eta puntuatuko dira.

2.– Modalitate bakoitzean eman beharreko zenbateko ekonomikoak kalkulatzeko, urrats hauei jarraituko zaie:

a) Aurreikusitako gutxieneko puntuazioa gainditu duten proiektuak horietako bakoitzak lortutako puntuazioaren lehentasun-ordenaren arabera sailkatuko dira. Ondoren, puntu gehien lortu dituen proiektuari onartutako eta hurrengo sailkapeneko eskatutako zenbatekoaren % 100 emango zaio. Zenbateko horiek erreferentzia horiekiko proportzionalak izango dira, baina inoiz ez onartutako eskatutako zenbatekoaren % 70etik beherakoak, betiere modalitate bakoitzerako ezarritako mugaren eta 4.3 artikuluan aurreikusitako gehieneko ehunekoaren arabera.

b) Kalkulu hori egin ondoren soberakinik geratzen bada, bigarren kalkulu bat egingo da lehenengoaren ondoriozko kopuruak handitzeko, prozedura beraren arabera eta modalitate bakoitzerako hasieran aurreikusitako zuzkidura ekonomikoa agortu arte.

3.– Balorazio eta banaketa-kalkulu horien emaitza dagokion balorazio-txostenari erantsiko zaio, eta organo kudeatzaileari helaraziko zaio, dagozkion ebazpen-proposamenak egiteko ardura baitu.

4.– Batzorde guztien balorazio-txostenetako datuak ikusita, eta modalitateen artean konpon daitezkeen desorekak egonez gero, organo kudeatzaileak aurreikusi ahal izango du zenbateko ekonomikoren bat haien artean eskualdatzea eta, ondorioz, eman beharreko behin betiko dirulaguntzak birkalkulatzea, betiere batzordeen eta deialdian finkatutako prozeduren eta mugen balorazioari jarraikiz.

5.– Behin betiko ebazpen-proposamenak deialdia ebazteko ardura duen organoari helaraziko zaizkio.

13. artikulua.– Ebazpena eta jakinarazpena.

1.– Kulturako sailburuordeak emango du deialdi honetan aurreikusitako modalitate guztietarako dirulaguntzak emateko ebazpena, organo kudeatzaileak egindako proposamenak ikusita, eta sei hilabeteko epean jakinaraziko die interesdunei, deialdi hau indarrean jartzen den egunetik aurrera.

2.– Adierazitako epea igaro ondoren ebazpena jakinarazi ez bada, eskabidea ezetsi egin dela ulertu ahal izango da, Dirulaguntzen Araubidea Erregulatzeko abenduaren 21eko 20/2023 Legearen 22.5 artikuluan ezarritakoaren ondorioetarako, hargatik eragotzi gabe Administrazioak berariaz ebazteko duen betebeharra.

3.– Ebazpena Euskal Autonomia Erkidegoko Administrazio Publikoaren egoitza elektronikoko «Nire karpeta» atalaren bidez jakinaraziko da: https://www.euskadi.eus/nirekarpeta. Jakinarazpen horretaz gain, ebazpena Euskal Herriko Agintaritzaren Aldizkarian argitaratuko da. Lehenik egin den jakinarazpen-data hartuko da jakinarazpen-datatzat, Administrazio Publikoen Administrazio Prozedura Erkidearen urriaren 1eko 39/2015 Legearen 41.7 artikuluan ezarritakoaren arabera.

4.– Aurreko paragrafoan aipatutako ebazpenek ez diote amaiera ematen administrazio-bideari, eta, haien aurka, gora jotzeko errekurtsoa aurkez dakioke lehenengo lehendakariorde eta Kultura eta Hizkuntza Politikako sailburuari, hilabeteko epean, ebazpena jakinarazi eta hurrengo egunetik aurrera, 39/2015 Legearen 121. eta 122. artikuluetan ezarritakoaren arabera.

14. artikulua.– Betebeharrak.

Onuradunek betebehar hauek izango dituzte:

a) Emandako dirulaguntza onartzea. Alde horretatik, dirulaguntza eman izanaren jakinarazpena jaso eta hamabost eguneko epean onuradunek berariaz uko egiten ez badiote, onartu egin dutela ulertuko da.

b) Dirulaguntza zertarako eman den, horretarako erabiltzea.

c) Diruz lagundutako proiektua eskabidean aurkeztutako baldintzetan garatzea. Hala ere, salbuespen gisa eta gerora sortutako arrazoiengatik, funtsezko aldaketarik ez dakarten eta proiektuaren bideragarritasun ekonomikoari eragiten ez dioten aldaketak edo atzerapenak onartu ahal izango dira. Horiek guztiak idatziz jakinarazi beharko zaizkio Kulturako sailburuordeari, proiektuak justifikatzeko epea amaitu baino hilabete lehenago gutxienez (15.5 artikulua), eta hark hamabost eguneko epea izango du, jakinarazpena jasotzen duen egunetik zenbatzen hasita, proiektuak onartzeko edo ez onartzeko. Epe hori igaro eta ez bada berariazko jakinarazpenik egin, proposatutako aldaketa onartutzat joko da.

d) Estatuko edo nazioarteko beste edozein administraziok edo erakunde publiko edo pribatuk helburu bererako emandako beste laguntza, dirulaguntza edo diru-sarrera batzuen berri ematea dirulaguntza ematen duen organoari.

e) Deialdi honetan jasotako jarduerei dagozkien betebeharrak eta araudi profesionalak eta lanekoak betetzea: musika-lanen ekoizpena eta edizioa, aretoen kudeaketa, musika-jardueren programazioa eta antolaketa.

f) Onuradunak ezingo du enpresa-deslokalizaziorik egin, Dirulaguntzen Araubidea Erregulatzeko 20/2023 Legearen 49. artikuluan ezarritakoaren arabera.

g) Ogasun eta Finantza Saileko Kontrol Ekonomikoko Bulegoari eta Herri Kontuen Euskal Epaitegiari dirulaguntzen fiskalizazio-lanetan behar duten informazio guztia ematea.

h) Eusko Jaurlaritzako Kultura eta Hizkuntza Politika Sailak emandako dirulaguntza berariaz aipatzea, gutxienez, Sailaren logoa argitaraturiko materialean txertatuz, bai argitaratutako materialetan, bai web-orrietan, plataforma digitaletan, katalogoetan, programetan, iragarki-karteletan edo diruz lagundutako obra edo jarduerari buruzko beste edozein materialetan. Material hori, Euskal Autonomia Erkidegoari zuzenduta dagoenean, gutxienez bi hizkuntza ofizialetan argitaratu beharko da. 16.2 artikuluan ezarritakoaren arabera, errekerimendu horiek justifikaziorik gabe ez betetzeak dirulaguntza jasotzeko eskubidea galtzea ekar dezake.

i) Oinarri hauetan ezartzen direnak eta Dirulaguntzen Araubidea Erregulatzeko abenduaren 21eko 20/2023 Legearen 14., 27. eta 42. artikuluetan ezarritako betebeharrak.

15. artikulua.– Dirulaguntzak ordaintzea eta justifikatzea.

1.– Dirulaguntzak honela ordainduko dira:

a) Lehenengo, emandako dirulaguntzaren % 50 ordainduko da, 14.a) artikuluan ezarritako epea igaro eta dirulaguntzari uko egin ez bazaio.

b) Gainerako % 50a 2027ko urtarrilaren 1etik aurrera, hurrengo apartatuetan ezarritako epean eta baldintzen arabera.

2.– Laguntzaren edo dirulaguntzaren zenbatekotik kendu egingo dira, hala badagokio, pertsona fisikoen errentaren gaineko zergaren (PFEZ) atxikipenak eta konturako ordainketak, zergaren araudia aplikatuz legozkiokeenak. Hala badagokio, jarduera hasteagatiko atxikipen-tasa onuradunak eskatu beharko du.

3.– Ez da inolako ordainketarik egingo onuradunak zerga-betebeharrak edo Gizarte Segurantzarekikoak egunean ez baditu edo dirulaguntzak itzultzeko betebeharrak egunean ez baditu.

4.– Laguntzaren pertsona edo erakunde onuraduna ez badago erregistratuta Eusko Jaurlaritzako Ogasun eta Finantza Sailaren Hirugarrenen Erregistroan, edo banku-datuak aldatu nahi baditu, informazio hori elektronikoki izapidetu beharko du, helbide honen bidez: https://www.euskadi.eus/hirugarrenaren-datuen-aldaketa/web01-sede/eu/

5.– Laguntzen azken justifikazioa jarduerak gauzatzeko epea amaitu eta hurrengo hiru hilabeteetan egin beharko da, eta betiere 2027ko azaroaren 10a baino lehen. Justifikazio-dokumentuak dagokion espediente elektronikoan aurkeztu beharko dira, helbide honetan: https://www.euskadi.eus/nire-karpeta/web01-sede/eu/

6.– Dirulaguntza justifikatzeko, erakunde onuradunek diruz lagundutako jarduera egin dutela egiaztatu beharko dute, bai eta gastuak egin dituztela ere, eskabidea egiteko unean aurkeztutako aurrekontu osoaren arabera. Horretarako, dokumentu digital edo elementu fisiko hauek aurkeztu beharko dira:

a) Jardueraren amaierako memoria, eduki honekin:

1. Egindako jardueraren garapena, gorabeherak eta ebaluazioa.

2. Jarduera sustatzeko eta zabaltzeko elementuen irudiak eta kopiak, jasotako dirulaguntzari buruzko aipamena jasotzen dutenak barne (14.h) artikulua).

b) Eskabidea egitean aurkeztutako inprimakia (8.3.a) artikulua), honako eduki hauei dagokienez eguneratua:

1. Diruz lagundutako proiektua gauzatzeari buruzko datu eta erreferentzia zehatzak:

i) Ekoizpenaren edo jardueraren garapena.

ii) Obraren erregistroa (k): tipologiaren arabera: (ISMN – International standard music number-/Lege-gordailua/Jabetza intelektuala.

iii) Sustapena eta hedapena: egindako ekintzak eta jarduera zabaldu den online guneetarako estekak.

2. Justifikazio ekonomikoaren laburpena, honako hauek barne:

i) Diruz lagundutako proiektuari dagozkion gastuen eta sarreren balantzearen erantzukizunpeko adierazpena.

ii) Diruz lagundutako proiektua gauzatzeko egindako gastuak justifikatzen dituzten dokumentu guztien zerrenda sailkatua.

iii) Diruz lagundutako jarduerarako lortutako beste edozein dirulaguntza edo diru-sarreraren zerrenda.

c) Proiektuaren garapenean egindako gastuak justifikatzen dituzten frogagiriak eta fakturak, formularioan aurkeztutako zerrendaren arabera modu korrelatiboan identifikatuak.

d) Ekoitzitako elementuak. Jardueraren modalitatearen edo tipologiaren arabera, edizioen fitxategi digitalak (soinuzkoak, ikus-entzunezkoak, partiturak, etab.) eta/edo dagokion jarduera garatzean landutako eta/edo erabilitako beste material batzuk.

e) Unitate kudeatzaileak, gainera, justifikazioaren formularioan eta memorian aitortutako datuei eta erreferentziei buruzko dokumentazio osagarria eskatu ahal izango dio pertsona edo erakunde onuradunari, bai eta argitaratutako material fisikoen aleak ere.

16. artikulua.– Aldatzeko ebazpena.

1.– Dirulaguntza emateko kontuan hartu diren baldintzak aldatzen badira proiektuaren hasierako planteamenduari eta aurrekontuari dagokienez, edo ezarritako mugak gainditzen dituzten dirulaguntza edo laguntza berriak sartzen badira, dirulaguntzak emateko ebazpena aldatu ahal izango da, Dirulaguntzen Araubidea Erregulatzeko abenduaren 21eko 20/2023 Legearen 16.4 eta 25. artikuluetan xedatutakoaren arabera.

2.– Aurreko kasuan, betiere proiektuaren helburua eta xedea betetzat jotzen badira, proportzionaltasun-printzipioa aplikatuz zehaztuko da atzera egin beharreko zenbatekoa, eta kontuan hartuko da aipatutako betetzea nabarmen hurbildu den erabateko betetzera, eta onuradunek argi eta garbi egiaztatu duten beren konpromisoak betetzeko jarduna izan dutela.

17. artikulua.– Ez-betetzeak.

1.– Honako hauek izango dira itzultzeko arrazoiak:

a) Jasotako dirulaguntza osoa edo zati bat oinarri hauetan aurreikusitakoez bestelako jardueretarako erabiltzea.

b) Oinarri hauetan ezarritako betebeharrak edo, hala badagokio, dirulaguntza emateko egintzan ezarritakoak ez betetzea.

c) Dirulaguntzen arloko beste edozein betebehar ez betetzea, zehazki Dirulaguntzen Araubidea Erregulatzeko 20/2023 Legearen 36. artikuluan jasotako ez-betetzeak.

2.– Ez-betetzeren bat gertatuz gero, jasotako zenbatekoak eta legezko interesak Euskal Autonomia Erkidegoko Diruzaintza Nagusiari itzuli beharko zaizkio, Dirulaguntzen Araubidea Erregulatzeko 20/2023 Legearen 40. artikuluan eta Euskal Autonomia Erkidegoko Aurrekontu Orokorren kargura ematen diren dirulaguntzen bermeei eta horiek itzultzeari buruzko abenduaren 17ko 698/1991 Dekretuan aurreikusitakoaren arabera eta bertan aurreikusitakoa bete ondoren.

18. artikulua.– Datuen babesari buruzko oinarrizko informazioa.

Datu pertsonalak «Kultura-arloko laguntzak eta dirulaguntzak» izeneko tratamendu-jardueran tratatu eta sartuko dira, eduki honekin:

a) Arduraduna: Kultura Sustatzeko eta Kultura eta Sormen Industrietako Zuzendaritza, Kultura eta Hizkuntza Politika Saila.

b) Helburua: kultura- eta sormen-arloko laguntzak eta dirulaguntzak.

c) Legitimazioa: tratamendua beharrezkoa da interes publikoaren izenean edo tratamenduaren arduradunari esleitutako botere publikoen izenean burututako eginkizun bat betetzeko.

d) Hartzaileak: arloan eskumena duten administrazioak.

e) Eskubideak: eskubidea duzu datuak irispidean izateko, datuak zuzentzeko eta ezerezteko, bai eta informazio gehigarrian adierazitako beste eskubide batzuk ere.

f) Informazio gehigarria: gure web-orrian kontsulta dezakezu datuen babesari buruzko informazio gehigarri eta zehatz guztia: https://www.euskadi.eus/datuen-babesaren-araudia/web01-a2datuba/eu/

II. KAPITULUA

PARTITURAK EDITATZEKO MODALITATEA

19. artikulua.– Xedea eta diruz lagundu daitezkeen jarduerak.

1.– Kapitulu honetan aurreikusitako laguntzak partituren edizio eta banaketa profesionaleko proiektuak finantzatzera bideratuta daude, zuzenean zabaltzeko.

2.– Proiektuaren aurrekontuak eta egin beharreko eskaera ekonomikoak 4. eta 20.3 artikuluetan jasotako erreferentziak eta mugak bete beharko dituzte.

3.– Kontuan hartu beharreko edizioek baldintza hauek bete beharko dituzte:

a) Egiletzari dagokionez: Euskal Autonomia Erkidegoan jaio edo bizi diren pertsonek osatutako obrak. Puntualki, kanpoko egiletzako obratzat hartu ahal izango dira, baldin eta, Balorazio Batzordearen iritziz, interesgarriak badira Euskal Herriko musika-jardueran edo -ondarean duten harreman edo eraginagatik.

b) Edizioari eta banaketari dagokienez:

1. Lan baten lehen edizioak, edo, bestela, beste edizio baten premia teknikoa eta interesa behar bezala justifikatuta badaude.

2. Edizio inprimatuaren kasuan, gutxienez 200 aleko tirada egitea (formatu handiko kamera-lanak edo sinfonikoak izan ezik, horietan ohiko erabilerak hartuko baitira kontuan, lan motaren eta argitalpenaren helburuaren arabera).

3. Nolanahi ere, salmentarako merkataritza-plataforma bat izatea.

4.– Deialdi honetatik kanpo geratzen da berariaz material didaktikoen edizioa.

20. artikulua.– Dirulaguntzak eskuratzeko betekizun espezifikoak eta gehieneko muga.

1.– 3.1 artikuluan adierazitako baldintzei kalterik egin gabe, honako baldintza hauek betetzen dituzten pertsonek edo erakundeek jaso ahal izango dituzte laguntzak, artikulu honen hurrengo apartatuetan ezarritako mugen arabera:

a) 2023. urtea baino lehen musika-jarduera profesionala egin izana.

b) 2023tik gutxienez EAEko konpositoreen hiru obratako partiturak editatu izana.

2.– Modalitate honetan, eskabide bakarra lagundu ahal izango da diruz onuradun bakoitzeko, baina bakoitzak 5 argitalpen-proiektu sartu ahal izango ditu gehienez, hurrengo 3.a) apartatuan jasotako sailkapenaren arabera. Nolanahi ere, proiektuan jasotako edizioak oro har baloratu eta ebatziko dira.

3.– Dirulaguntzen gehieneko mugak zehazteko, bi irizpide hartuko dira kontuan: editatu beharreko obra moten profila eta pertsona edo erakunde eskatzailearen profila, erreferentzia horien arabera.

a) Edizioen tipologiaren arabera.

Deialdi honen ondorioetarako, obra-tipologia eta laguntzaren gehieneko muga hauek aplikatuko dira:

(Ikusi .PDF Fitxategia)

b) Eskatzailearen nortasun juridikoaren eta katalogo-funtsaren arabera, 19.3.a) artikuluan ezarritako eremuari dagokionez, erreferentzia hauekin:

1. 100 partituratik gorako katalogo-funtsa egiaztatzen duten enpresa-erakundeak edo pertsona fisiko autonomoak: 10.000 eurora arte.

2. 10 partituratik 99ra bitarteko katalogo-funtsa egiaztatzen duten enpresa-erakundeak edo pertsona fisiko autonomoak: 7.500 euro arte.

3. Gainerako eskatzaileak: 6.500 euro arte.

21. artikulua.– Esleipen-irizpideak eta banaketa-prozedura.

1.– Modalitate honetan eman beharreko dirulaguntzen ebazpen-proposamena egiteko, deialdian sartzeko baldintzak egiaztatu dituzten proiektuak oinarri hauen III.1 eranskinean jasotako taulan zerrendatutako irizpideen arabera baloratu eta puntuatuko dira, bakoitzerako ezarritako prozeduraren, pisu erlatiboaren eta baremazio-irizpideen arabera.

2.– Finkatutako gutxieneko puntuazioa gainditu duen argitalpen-proiektu bakoitzari eman beharreko laguntzaren zenbatekoa zehazteko (45etik 80ra lehen fasean eta 55etik 100etik guztira, lehen eta bigarren faseetako balorazioen ondoren), 12.2 artikuluan ezarritako prozedurari jarraituko zaio.

III. KAPITULUA

MUSIKA-EKOIZPENAREN MODALITATEA

22. artikulua.– Xedea eta diruz lagundu daitezkeen jarduerak.

1.– Modalitate honen helburua da Euskal Autonomia Erkidegoan jaio edo bizi diren musikariek sortutako edo interpretatutako musika-lanak ekoizteko proiektuei laguntzea, bai eta euskarazko errepertorioa guztizkoaren % 75etik gorakoa dutenei laguntzea ere.

2.– Laguntzen irismenari dagokionez, deialdi honen ondorioetarako, ekoizpentzat hartuko dira musika-proiektu berri baten lehen aurkezpen publikoa ahalbidetzen duten aurretiazko entseguak eta gainerako emanaldi materialak.

3.– Proiektuaren aurrekontuak eta egin beharreko eskaera ekonomikoak 4. eta 24. artikuluetan jasotako erreferentziak eta mugak bete beharko dituzte.

4.– Deialdi honen esparruan ezarritakoa baino munta eta iraupen handiagoko beste fase batzuetako fase partzial gisa formulatutako proiektuak aurkeztu ahal izango dira, baldin eta eskabidearen xede den proiektuan azken produktu jakin bat aurreikusten eta formulatzen bada dirulaguntza justifikatzeko, hala badagokio, 15. artikuluan ezarritako baldintza eta epeetan. Nolanahi ere, deialdi honetan dirulaguntza lortzeak ez luke inolako lehentasunik edo merezimendurik ekarriko proiektu mota horretarako hurrengo deialdietan.

5.– Deialdi honetan kontuan hartu beharreko musika-produkzioak, bakoitzaren planteamendu bereziaren arabera, honako ezaugarri hauetara egokitu beharko dira:

a) Musika-prestakuntzei dagokienez: musika-talde egonkorrek edo sortu berriek edo beren izenarekin aurkezten diren musikariek bultzatu ahal izango dituzte proiektuak. Gainera, beste proiektu batzuk ere kontuan hartu ahal izango dira, baldin eta, beren helburu edo ezaugarriengatik, prestakuntza edo artista desberdinen arteko lankidetza puntualari erantzuten badiote.

Nolanahi ere, prestakuntza edo musikari bera ezin izango da bultzatzailea, liderra edo talde nagusia izan eskabide edo produkzio-proiektu batean baino gehiagotan.

b) Eduki musikalari dagokionez, tituluan identifikatutako planteamendu artistiko bat edo erreferentzia kontzeptual orokor bat izatea, eremu hauetakoren bati dagokiona:

1. Pertsonaren jatorrizko konposizioak edo sorkuntzak edo proiektua sustatzen duen musika-prestakuntza.

2. Beste musika-errepertorio batzuk berrinterpretatzea, betiere proiektuan inplikatutako musika-prestakuntzak aurretik erabili ez baditu.

c) Bolumenari dagokionez: gutxienez 8 gai eta/edo musika-interpretazioko 30 minutu aurreikustea. Betekizun horri dagokionez, onartu ahal izango da proiektuak barne hartzea aurkeztutako edukien heren bat, gehienez ere, deialdia argitaratu baino urtebete lehenago, baina aurkeztu beharreko aurrekontua eta, hala badagokio, justifikatu beharreko gastuak bat etorri beharko dira proiektua garatzeko 1.3.a) artikuluan aurreikusitako epearekin.

d) Jendaurreko aurkezpenari dagokionez, formatu edo tipologia hauetako bat edo gehiago aurreikustea:

1. Proiektu fonografikoak:

i) Edizio fisikoa cd, dvd, binilo, disko-liburu eta abarretan.

ii) Plataforma digitala.

iii) Soinu-banda: aurrez ekoizteko fasean dauden eta estreinatzeko berariazko aurreikuspena duten ikus-entzunezko edo eszenako proiektu zehatzetarako berariaz konposatutako musika, betiere proiektu horiek aurretik Kultura eta Hizkuntza Politika Sailak diruz lagundu ez baditu.

2. Zuzeneko estreinaldia. Eskabidearen xede diren musika-proiektuek egiaztatu beharko dute gutxienez 3 kontzerturentzako programazio-konpromisoak dituztela: estreinaldia (nolanahi ere, 1.3.a) artikuluan adierazitako epearen barruan) eta beste bi.

3. Beste batzuk, banaketa konbentzionalarekin (zuzenean edo formatu fonografikoan) bateraezinak diren ezaugarri artistiko edo teknikoak dituztenak.

6.– Nolanahi ere, diruz lagundutako proiektu guztiak gauzatu direla egiaztatu beharko da euskarri fonografikoko eta/edo ikus-entzunezko euskarriko artxibo baten edo gehiagoren bidez, 15.6.d) artikuluan arautzen den bezala.

7.– Berariaz baztertuta geratzen dira jarduera hauek eta dagozkien gastuak:

a) Diruz lagundutako musika-ekoizpen baten lehen aurkezpen fonografikoaren edo zuzenekoaren ondorengo kontzertuak.

b) Aurretik editatutako eduki fonografikoen berrargitalpenak edo bilduma berriak.

c) Eskaeraren xede den ekoizpena zuzeneko zirkuituan banatzeko merkataritza-sustapeneko eta -irudikapeneko materialak edo zereginak.

23. artikulua.– Sartzeko betekizun espezifikoak.

1.– 3.1 artikuluan adierazitako baldintzak eta 22.5 artikuluan proiektuen tipologiari buruzkoak alde batera utzi gabe, modalitate honetan sartu ahal izango dira honako bi jarduera-eremu hauetako baterako ezarritako baldintzak betetzen dituzten pertsonak edo erakundeak:

a) Musika-enpresen esparrua.

1. Apartatu honi atxiki ahal izango zaizkio 22.1 artikuluan ezarritako eremuan sartzen diren artistentzako edo prestakuntzentzako musika-ekoizpeneko jarduerak egiten dituzten enpresak, baldin eta horiei dagokienez gutxienez bi baldintza hauetako bat egiaztatzen badute:

i) 2024tik 2025era bitartean marka editorial propioarekin gutxienez 4 erreferentzia diskografiko argitaratu izana, edo gutxienez 10 erreferentzia izatea argitaletxe horren katalogoan.

ii) Gutxienez 40 kontzertu-kontratazio egiaztatzea guztira, gutxienez 3 musika-talde desberdin 2024 eta 2025 bitartean.

2. Ezingo dute paragrafo honetan sartu elkarte edo fundazioaren forma juridikoa duten erakundeek.

b) Ekimen unitarioen eremua.

1. Apartatu honen barruan, artista baten edo musika-prestakuntza baten ekoizpen-proiektu bakar bati buruzko eskabideak hartuko dira kontuan, baldin eta gutxienez bi baldintza hauetako bat betetzen duela egiaztatzen badu:

i) Gutxienez 2 disko argitaratu izana eta lehenengoa 2023a baino lehen edo, urte hori baino lehen, gutxienez 8 gai eta/edo 30 minutuko musika-interpretazioa.

ii) Gutxienez 50 kontzertu profesional egin izana proiektuaren xede den prestakuntzaren edo artistaren ibilbide musikalean zehar.

2. Aurreko betekizunei dagokienez, dagokion taldearen ibilbideari buruzko datu zehatzak eta erreferentzia egiaztagarriak aurkeztu beharko dira, edo, bestela, eskaeraren xede den proiektuaren sustatzaileetako batek aurreko musika-proiektuetan izandako egiletzaren eta ibilbidearenak.

24. artikulua.– Dirulaguntzen gehieneko muga.

1.– Modalitate honetan, eskabide bakarra lagundu ahal izango da diruz onuradun bakoitzeko, hargatik eragotzi gabe hurrengo artikuluetako 2. eta 3. apartatuetan ezarritakoa.

2.– 23. artikuluan ezarritako betekizunen arabera, pertsona edo erakunde eskatzaileek ekoizpen-proiektuen gehieneko kopuru hau aurkeztu ahal izango dute deialdi honetara, eta kasu bakoitzean adierazten diren gehieneko laguntzak eskatu edo eskuratu ahal izango dituzte:

(Ikusi .PDF Fitxategia)

3.– Musika-enpresen eremuari dagokionez, eskabide berean sartutako ekoizpen-proiektuak banan-banan baloratuko dira, eta, dirulaguntzaren kasuan, ebazpenak, erakundeari emandako guztizko zenbatekoaz gain, haietako bakoitzari emandako zenbatekoa ere zehaztuko du.

25. artikulua.– Esleipen-irizpideak eta banaketa-prozedura.

1.– Modalitate honetan eman beharreko dirulaguntzen ebazpen-proposamena egiteko, deialdian sartzeko baldintzak egiaztatu dituzten proiektuak honako taula hauetan ezarritako irizpideen, prozeduraren, pisu erlatiboaren eta baremazio-erreferentzien arabera baloratu eta puntuatuko dira:

a) Musika-enpresen proiektuak (23.1.b) artikuluan zehaztutako eremua: oinarri hauen III.2 eranskineko A) taula. Proiektu horiek gutxienez 38 puntu lortu behar dituzte 70etik lehen fasean, eta 55 puntu 100etik, guztira, lehen eta bigarren faseak baloratu ondoren.

b) Ekimen unitarioen proiektuak (23.1.a) artikuluan definitutako eremua: oinarri hauen III.2 eranskina, B taula). Proiektu horietarako, gutxienez, 80 puntutik 45 lortu behar dira lehen fasean, eta 100 puntutik 55, lehen eta bigarren faseak baloratu ondoren.

2.– Hautatutako proiektu bakoitzari dagokion dirulaguntzaren zenbatekoa zehazteko, prozedura honi jarraituko zaio:

a) Lehenik eta behin, bi poltsa ekonomiko desberdin kalkulatuko dira: 23.1 artikuluan deskribatutako eremu bakoitzerako. Horietako bakoitzean erreserbatu beharreko zenbatekoa deialdian parte hartzeko baldintzak betetzen dituzten proiektu guztietarako eskatutako zenbatekoen baturaren ehuneko erlatiboaren arabera zehaztuko da.

b) Ondoren, honela jokatuko da aipatutako eremu bakoitzerako: esparru bakoitzerako ezarritako gutxieneko puntuazioa gainditu duten proiektuak lortutako puntuazioaren arabera ordenatuko dira, eta banaketaren behin-behineko kalkulua egingo da, 12.2 artikuluan aurreikusitako prozedura aplikatuz.

IV. KAPITULUA

SEKTORE-GARAPENAREN MODALITATEA

26. artikulua.– Xedea eta diruz lagundu daitezkeen jarduerak.

1.– Kapitulu honetan aurreikusitako laguntzak Euskal Autonomia Erkidegoko musika-sektoreko eragileen jarduera garatzen eta hedatzen laguntzen duten proiektuak finantzatzeko dira.

2.– Proiektuaren aurrekontuak eta egin beharreko eskaera ekonomikoak 4. eta 27.3 artikuluetan jasotako erreferentziak eta mugak bete beharko dituzte.

3.– Diruz lagundu ahal izango dira jarduera bat edo gehiago barne hartzen dituzten proiektuak, gehienez ere tipologia edo bloke hauetako bitan taldekatuta:

a) Musikari edo musika-talde berriei zuzendutako prestakuntza-jarduerak, eszena profesionalaren testuinguruan.

b) Musikaren sektoreko beste eragile profesional batzuen prestakuntza.

c) Euskal Herriko musika-jardueraren zabalkunde orokorrerako jarduerak edo edukiak.

d) Musika-ikerketa, produktu jakin baten garapena dakarrena, bai eta produktu horren edo diruz lagundutako prozesuaren ondorioen aurkezpena edo jarduera irekia ere. Jarduera hori onuradunak berak antolatu eta zabaldu beharko du, eta Euskadin egin.

e) Erakunde eskatzailea musika-jardueraren eta -industriaren egungo panoramara egokitzeko ekintza espezifikoak.

4.– Berariaz baztertuta geratzen dira jarduera hauek:

a) Jaialdien edo musika-zikloen programan sartutako jarduerak, edo erakunde berak denboraldi berean antolatutakoak.

b) Itun konbentzionalak barne hartzen dituzten jarduerak, baldin eta haien kostuak aurrekontuaren % 30 baino gehiago hartzen badu.

c) Ekoizpen fonografikoak edo kontzertuak sustatzeko, banatzeko edo haien irudikapen komertziala egiteko jarduerak edo materialak.

d) Musika-taldeen eta musika ekoizten edo banatzen duten enpresen webguneen egitura edo edukiak eguneratzea.

e) Prestakuntza akademikorako edo eskola-prestakuntzarako soilik diren jarduerak edo materialen edizioa.

f) Sariak eta lehiaketak.

g) Abesbatza-eremutik bultzatutako jarduerak.

5.– Aurreikusitako jarduerei dagokienez, deialdi honetan ezarritakoa baino iraupen eta tamaina handiagoko beste batzuen fase partzial gisa formulatutako proiektuak aurkeztu ahal izango dira, baldin eta eskabidearen xede den proiektuan, hala badagokio, dirulaguntza justifikatzeko unean, 15. artikuluan ezarritakoaren arabera, aurkeztu beharreko produktu edo jarduera zehatz bat aurreikusten eta formulatzen bada. Nolanahi ere, deialdi honetan dirulaguntza lortzeak ez luke inolako lehentasunik edo merezimendurik ekarriko proiektu mota horretarako etorkizuneko deialdietan.

27. artikulua.– Dirulaguntzak eskuratzeko betekizun espezifikoak eta gehieneko muga.

1.– 3.1 artikuluan adierazitako baldintzak alde batera utzi gabe, laguntza hauek jaso ahal izango dituzte, artikulu honen 2. apartatuan ezarritako mugen eta erreferentzien arabera, hurrengo jarduera-eremuetako bakoitzerako ezarritako baldintzak betetzen dituzten pertsonek edo erakundeek.

a) Musika-enpresen esparrua:

1. Musika-arloko enpresa-jarduera egitura juridiko berean egitea 2023a baino lehen, inola ere ez elkartearen edo fundazioaren forma juridikoarekin.

2. Honako bi baldintza hauetako bat egiaztatzea:

i) 2025ean, musika ekoizteko, banatzeko edo zabaltzeko enpresa-euskarria gutxienez 4 euskal artista edo talderi eman izana, musika-proiektu bereiziekin.

ii) 30. artikuluan Zuzen-Zuzenean Zirkuituaren modalitaterako ezarritako sarbide-baldintzak betetzea.

b) Ekimen unitarioen eremua.

1. Musikaren arloan 2023a baino lehen gutxieneko jarduera-ibilbidea egiaztatzea.

2. Modalitate honetan jasotako eremuetan gutxienez beste bi proiektu garatu izana.

2.– Modalitate honetan, onuradun bakoitzak eskabide bakarra aurkeztu ahal izango du, eta, artikulu honen 1. apartatuan ezarritako betekizunen arabera, gehieneko laguntza hauek jaso ahal izango ditu:

a) Musika-enpresen esparrua: 15.000 euro.

b) Ekimen unitarioen eremua: 9.000 euro.

28. artikulua.– Esleipen-irizpideak eta banaketa-prozedura.

1.– Modalitate honetan eman beharreko dirulaguntzen ebazpen-proposamena egiteko, deialdian sartzeko baldintzak egiaztatu dituzten proiektuak oinarri hauetako III.3 eranskineko taulan zerrendatutako irizpideen arabera baloratu eta puntuatuko dira, bakoitzerako ezarritako prozeduraren, pisu erlatiboaren eta baremazio-irizpideen arabera.

2.– Ezarritako gutxieneko puntuazioa gainditu duen sektore-garapeneko proiektu bakoitzari eman beharreko laguntzaren zenbatekoa zehazteko, 12.2 artikuluan ezarritako prozedurari jarraituko zaio. Proiektu horietarako, gutxienez, 80 puntutik 45 lortu behar dira lehen fasean, eta 100 puntutik 55, lehen eta bigarren faseak baloratu ondoren.

V. KAPITULUA

ZUZEN-ZUZENEAN ZIRKUITUAREN MODALITATEA

29. artikulua.– Xedea eta diruz lagundu daitezkeen jarduerak.

1.– Dirulaguntzen modalitate hau 30. artikuluan ezarritako baldintzak betetzen dituzten zuzeneko musika-aretoetan euskal musika-taldeak programatzen laguntzeko da.

2.– Proiektuaren aurrekontuak eta egin beharreko eskaera ekonomikoak 4. eta 30.2 artikuluetan jasotako erreferentziak eta mugak bete beharko dituzte.

3.– Laguntza hauen bidez diruz lagundu beharreko itunek honako baldintza hauek bete beharko dituzte:

a) Euskal Autonomia Erkidegoko musikarien edo musika-taldeen banakako ekitaldietan edo ekitaldi partekatuetan egindako emanaldiak; bestela, ohiko errepertorioa euskara dutenen artean, betiere deialdirako finkatutako denbora-eremuaren barruan (1.3.b) artikulua).

b) Ordaindu beharreko ordainsariak 400 eta 2.500 euro artekoak izango dira (BEZik gabe).

30. artikulua.– Dirulaguntzak eskuratzeko betekizun espezifikoak eta gehieneko muga.

1.– Alde batera utzi gabe 3.1 artikuluan ezarritako baldintzak, laguntza hauek eskuratu ahal izango dituzte pertsona edo erakunde eskatzaileek, eta betekizun hauek egiaztatu beharko dituzte:

a) Lokalaren titulartasuna eta/edo programazioaren kudeaketa.

b) 2025ean ordaintzeko sarrera duten musika-ekitaldien gutxieneko kopuru hau programatu izana, DJen saio esklusiboak edo ospakizun partikularrak kontuan hartu gabe:

1. 100.000 biztanletik gorako herrietan: 16.

2. Gainerako herriak: 10.

c) Halaber, programa garatuko den aretoek honako baldintza hauek bete beharko dituzte:

1. Euskararen eremu geografikoaren barruan kokatzea (Euskal Autonomia Erkidegoa, Nafarroako Foru Komunitatea eta Euskal Autonomia Erkidegoa).

2. Musika-ekitaldietarako dagokion hirigintza- edo udal-lizentzia izatea.

3. Gutxienez 120 lagunentzako legezko edukiera izatea.

4. Musika-programaziorako ekipamendua eta langile tekniko egonkorrak izatea.

2.– Modalitate honetan, gehienez ere 20.000 euroko dirulaguntza emango da.

31. artikulua.– Dirulaguntzak esleitzeko irizpideak eta dirulaguntzak banatzeko prozedura.

1.– Modalitate honetan eman beharreko dirulaguntzen ebazpen-proposamena egiteko, deialdian sartzeko baldintzak betetzen dituztela egiaztatzen duten proiektuak puntuatu egingo ditu organo kudeatzaileak, oinarri hauen III.4 eranskinean jasotako taulan zerrendatutako irizpide objektiboen arabera.

2.– Irizpide horiek aplikatuta lortzen diren zuzeneko puntuazioak 3tik 9ra bitarteko tartean haztatuko dira entitate/areto eskatzaile guztientzat.

3.– Sala bakoitzari eman beharreko laguntzaren zenbatekoa zehazteko, 12.2 artikuluan ezarritako prozedura orokorra aplikatuko da aurreko kalkuluaren ondoriozko puntuazioen gainean.

VI. KAPITULUA

MUSIKA-ZIKLOEN MODALITATEA

32. artikulua.– Xedea eta diruz lagundu daitezkeen jarduerak.

1.– Dirulaguntzen modalitate hau ekimen pribatuko musika-ziklo espezializatuak antolatzen laguntzeko da.

2.– Proiektuaren aurrekontuak eta egin beharreko eskaera ekonomikoak 4. eta 33.2 artikuluetan jasotako erreferentziak eta mugak bete beharko dituzte.

3.– Kontuan hartu beharreko musika-zikloek baldintza hauek bete beharko dituzte:

a) Musika-genero espezifiko batean espezializatutako programazioaren edukia.

b) Gutxienez lau hilabeteko aldirako programazio-egutegia, 1.3.b) artikuluan finkatutako denbora-eremuaren barruan, eta gutxienez 12 kontzertu-data.

c) Parte hartzen duen edozein musika-heziketari 400 euroko gutxieneko ordainsaria ordaintzea (BEZik gabe).

d) Gutxienez honako baldintza hauetako hiru betetzen direla egiaztatzea:

1. Genero horretan erreferentziazkoa den kalitate-programa, parte hartzen duten musikarien edo musika-taldeen mailari dagokionez.

2. Programazioa Euskal Autonomia Erkidegoko hiru lurraldetan egingo da gutxienez.

3. Gutxienez 15 kontzertu-data.

4. Euskal Autonomia Erkidegoko musikarien antzezle eta/edo lanen % 40 gutxienez.

5. Aurreikusitako itunen gutxienez heren bateko ordainketa-sarrera behatzea.

6. Gutxienez beste bi erakunderen finantza-laguntza izatea (horietako bat publikoa), eta, guztira, programaren aurrekontu osoaren % 20 gutxienez.

4.– Kanpoan geratuko dira:

a) Jaialdi gisa izendatutako musika-programak edo artikulu honen 3.b) apartatuan adierazitakoa baino epe laburragoan programatutakoak.

b) Izaera orokorreko beste ekitaldi batzuen esparruan edo beste jarduera-mota batzuen osagarri gisa sartutako programak.

c) Areto edo musika-sustatzaile baten ohiko programazioa, orain arte ziklo espezializatu gisa identifikatu ez dena.

5.– Proiektuek honako hauek zehaztu beharko dituzte: kontzertu-kopuru osoa, gutxi gorabeherako egutegi bat eta programazioaren xehetasuna (gutxienez aurreikusitako kontzertuen % 30ekoa), aurrekontu xehatua eta dagokion eskaera ekonomikoa (inola ere ezingo dira izan deialdian ezarritako mugak baino handiagoak).

33. artikulua.– Dirulaguntzak eskuratzeko betekizun espezifikoak eta gehieneko muga.

1.– 3.1 artikuluan ezarritako baldintzez gain, laguntza hauek jaso ahal izango dituzte honako eskakizun hauek betetzen dituzten pertsonek edo erakundeek:

a) Eskatzaileari dagokionez: musika-jarduerarekin oro har eta proiektuaren xede den zikloaren musika-gai zehatzarekin lotutako profila eta ibilbidea, gutxienez 2015etik aurrera.

b) Musika-zikloari dagokionez: programaren antzinatasuna eta jarraitutasuna, genero-erreferentzia eta sustapen-marka berarekin, gutxienez 2017tik, eta gutxienez 8 edizio.

2.– Modalitate honetan, proiektu bakarra lagundu ahal izango da diruz onuradun bakoitzeko, eta gehienez ere 20.000 euroko dirulaguntza eskatu eta eman ahal izango da.

34. artikulua.– Esleipen-irizpideak eta banaketa-prozedura.

1.– Modalitate honetan eman beharreko dirulaguntzen ebazpen-proposamena egiteko, deialdian sartzeko baldintzak egiaztatu dituzten proiektuak oinarri hauen III.5 eranskinean jasotako taulan zerrendatutako irizpideen arabera baloratu eta puntuatuko dira, bakoitzerako ezarritako prozeduraren, pisu erlatiboaren eta baremazio-irizpideen arabera.

2.– Ezarritako gutxieneko puntuazioa gainditu duen sektore-garapeneko proiektu bakoitzari eman beharreko laguntzaren zenbatekoa zehazteko, 12.2 artikuluan ezarritako prozedurari jarraituko zaio. Proiektu horietarako, gutxienez, 80 puntutik 45 lortu behar dira lehen fasean, eta 100 puntutik 55, lehen eta bigarren faseak baloratu ondoren.

Azterketa dokumentala