RSS
214. zk., 2025eko azaroaren 6a, osteguna
- Bestelako formatuak:
- PDF (185 KB - 8 orri.)
- EPUB (125 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
AGINTARIAK ETA LANGILEAK
Prestatu eta trebatzeko ikastaroak
GOBERNANTZA, ADMINISTRAZIO DIGITAL ETA AUTOGOBERNUAREN SAILA
OSAKIDETZA-EUSKAL OSASUN ZERBITZUA
4716
1722/2025 EBAZPENA, urriaren 30ekoa, Administrazio Publikoaren Euskal Institutuko zuzendariarena eta Osakidetza-Euskal osasun zerbitzuko zuzendari nagusiarena. Honen bidez, 2025-2026 ikasturteko bigarren lauhileko euskara ikastaroetarako deia egiten zaie Osakidetzako langileei eta berari atxikitako Euskal Autonomia Erkidegoko Administrazioko langileei.
Euskararen erabilera arautzeko azaroaren 24ko 10/1982 Oinarrizko Legeak ezartzen du herri-agintariek xedezko neurriak hartuko dituztela Euskal Autonomia Erkidegoko herri-administrazioari atxikitako langileak arian-arian euskalduntzeko, herritarrei aitortzen zaien eskubidea gauzatzeko helburuarekin, administrazioarekin dituzten harremanak euskaraz nahiz gaztelaniaz izan daitezen.
Ebazpen honetan, hortaz, kontuan hartu dira azaroaren 24ko 10/1982 Legea, Euskararen Erabilpena Arauzkotzezkoa, eta lege hori garatzen duten dekretuak: otsailaren 22ko 19/2024 Dekretua, Euskal Sektore Publikoan Euskararen erabilera normalizatzekoa, lehendik indarrean zegoen 86/1997 Dekretua ordeztuz; eta euskararen erabilera Osakidetzan normalizatzeko martxoaren 18ko 67/2003 Dekretua. Halaber, kontuan hartu dira Osakidetzan Euskararen Erabilera Normalizatzeko III. Plana (2022ko urtarrilaren 27an onartua) eta Administrazio Publikoaren Euskal Institutuak (IVAP) eta Osakidetzak hizkuntzaren eta normalizazioaren arloan sinatutako lankidetza hitzarmena.
Hori dela eta, hau
EBAZTEN DUGU:
Atal bakarra.– Osakidetzako langileentzako 2025-2026 ikasturteko euskara-ikastaroetarako deialdi osagarria onartzea, I. eta II. eranskinetan ezarritako oinarriekin bat etorrita. Deialdi honek 2025-2026 ikasturteko bigarren lauhilekoa arautzen du, eta C1 mailara arteko ikastaroak eskaintzen ditu.
Administrazio Publikoaren Euskal Institutuak azaroan argitaratuko du 2025-2026 ikasturteko bigarren lauhilekorako euskara-ikastaroen deialdi osagarria egiteko ebazpena, IVAPekin lankidetza-hitzarmena duten erakunde publikoetako langileentzat.
Ebazpen honetan jasotako aurreikuspenen eta IVAPen ebazpen horren artean desadostasunik badago, azken horretan xedatutakoa nagusituko da.
Era berean, IVAPen ebazpena aplikatuko da deialdi honetan berariaz aurreikusi ez diren gai guztietan.
Vitoria-Gasteiz, 2025eko urriaren 30a.
Administrazio Publikoaren Euskal Institutuko zuzendaria,
LEIRE CORRALES GOTI.
Osakidetza-Euskal osasun zerbitzuko zuzendari nagusia,
MIREN LOREA BILBAO ARTECHE.
I. ERANSKINA
OINARRIAK
Lehenengoa.– Helburua.
Osakidetzako langileen euskarazko hizkuntza-gaikuntza bultzatzea eta haien euskalduntze-prozesuan eragitea.
Bigarrena.– Nori zuzendua.
1.– Deialdi honetan parte har dezakete Osakidetzako langileek, lan-harremana edozein izanda ere, baldin eta 2025-2026 ikasturteko euskara-ikastaroen deialdi orokorra arautu zuen 632/2025 Ebazpenaren datatik (2025eko apirilaren 10a) deialdi honetako ikastaro-modalitate bakoitzari dagozkion eskabideak aurkezteko epea amaitu arte zerbitzu aktiboan, senitartekoak zaintzeko eszedentzian edo zerbitzu berezietan badaude.
2.– Deialdi honetan eskaintzen den hizkuntza-prestakuntza IVAPek finantzatuko du, nolanahi ere, dituen aurrekontu-baliabideen barruan.
3.– Halaber, ordu-kreditua agortuta izateagatik IVAPek finantzatuko ez duen langileen hizkuntza-prestakuntza Osakidetzak finantzatuko du, horretarako duen aurrekontuaren bidez. Langileak Osakidetzaren laguntza jaso ahal izateko, Giza Baliabideen zuzendariak 2024ko martxoaren 14an emandako 1/2024 Jarraibideetan ezarritako baldintzak bete beharko ditu. Aurrekontua nahikoa ez balitz, aipatutako 1/2024 Jarraibideetan ezarritako lehentasun irizpideak ezarriko dira. Jarraibide horiek ordu-kreditua agortuta izanda euskara ikasten jarraitu ahal izateko ohiz kanpoko laguntzari buruzkoak dira.
4.– Lanorduetan euskarazko prestakuntza jasotzeko baimenak ematerakoan, zerbitzu-erakundeek Osakidetzan euskararen erabilera normalizatzeko III. Planaren 8.1.2. puntuan ezarritako irizpideak aplikatuko dituzte, baita Osakidetzako Giza Baliabideen Zuzendaritzak Instrukzio bidez ezarriko dituen irizpideak ere.
Hirugarrena.– Arau orokorrak eta ikastaroetan parte hartzeko baldintzak.
3.1.– Arau orokorrak.
2025-2026 ikasturteko bigarren lauhilekoaren egutegia kontuan hartuta, ondoren zerrendatutako gaiak arautzeko 2025-2026 ikasturteko deialdi nagusiaren oinarriak aplikatuko dira (632/2025 Ebazpena, apirilaren 10ekoa; Euskal Herriko Aldizkari Ofizialean 2025eko apirilaren 30ean argitaratua).
– Mailaketa-probak (5.1. oinarria): Beharrezko bada, IVAPek mailaketa proba egitera deituko du langilea. IVAPek Osakidetzako Giza Baliabideen Zuzendaritzari jakinaraziko dio mailaketa proba nork egin behar duen, baita non eta noiz egin behar duen ere.
– Administrazio-taldeak antolatzea (5.2. oinarria): Ikastaroaren egutegi zehatza ikastaroa hasi baino lehenago banatuko da, eta bertan adieraziko dira jai eta zubi egunak.
– Matrikula-kodearen bitartez eskolatzea. Matrikulazioa, ordainketa eta kostua (5.3. eta 6.3. oinarriak).
– Liberatutako pertsonala. Betebeharrak eta ordainsariak (5.4. oinarria).
– Eskolan hastea eta berandu hastea (7.1. oinarria).
– Lanorduetako ikastaroen asistentzia-arauak (7.2. oinarria).
– Ikastaroari uko-egitea (8. oinarria).
– Eskola behin betiko uztea (9. oinarria).
– Ordu-kredituari buruzko araubidea (10. eta 11. oinarriak).
– Eskaintzen diren moduluak (egunean 2/3 ordukoak, trinkoak eta barnetegiak).
Administrazio-taldeak osatze aldera, deialdi osagarri honetan mailaketa proba egingo da. Proba egun batean bakarrik egingo da.
3.2.– Ikastaroetan parte hartzeko baldintzak.
Oraingo deialdi honetan otsailetik ekainera arteko eskaera egin edo hilabeteko barnetegia eskatu ahal izango dute interesdunek, betiere baldintza hauen pean:
– Ikastaroa 2025eko urrian hasi ez duten langileek aurrez aurreko bost orduko ikastaroa edo barnetegikoa eskatu ahal izango dute soilik, biak lanorduetan.
– Ikastaroa 2025eko urrian hasi duten langileek, aldiz, hurrengo aukerak izango dituzte:
a) Lanorduetan bi orduko ikastaroa egiten ari direnek modulu aldaketa eskatu ahal izango dute, hau da, bi orduko ikastarotik trinkora edo barnetegira, betiere lanorduetan.
b) Lanorduetan trinkoa edo barnetegia egiten ari direnek matrikula berritzeko edo moduluz aldatzeko eskaera egin dezakete, alegia, trinkotik edo barnetegitik bi orduko ikastarora (lanorduetan nahiz lanorduz kanpo).
c) Lanorduz kanpo ikasten ari direnek (aurrez aurrekoa zein autoikaskuntza) ezingo dute ikastaro berririk eskatu. Salbuespen izango dira deialdi nagusian trinkoa onartua duten langileak, matrikula berritzeko eskaera egin beharko baitute.
Oraingo deialdi honetan ezin izango da autoikaskuntza ikastarorik hasi.
Ikastaroek, betiere, HABEk araututako moduluak izan behar dute, eta otsailetik ekainera arteko iraupena izan, hilabeteko barnetegiko ikastaroak izan ezik.
Laugarrena.– Eskabideak egiteko eta tramitatzeko epeak.
Eskabidea egiteko epea 2025eko azaroaren 10etik 21era bitartean (biak barne) izango da.
Deialdi honetan parte hartu nahi duten langileek eskaera telematikoa egin beharko dute, Osakidetzaren intranet korporatiboaren bidez. Hona hemen helbideak eta bideak:
– www.osakidetza.eus (Profesionalak > Euskara > Euskara ikasi > (ikastaro mota aukeratu)).
– www.osakidetza.eus (Profesionalak > GGBBko Informazio sistemak > Euskara > Aplikaziora sartu > Euskalduntza ikastaroak).
Interesdunek deialdi honetan eskabide elektronikoa bete beharko dute eta deialdian eskainitako modulu eta ordutegi bakarra aukeratu.
Eskaera telematikoa egitea ezinezko den kasuetarako, interesdunek zerbitzu-erakundeetako langileen zuzendaritzetan aurkeztu ahal izango dute izena emateko eskabidea.
Deialdian onartua izateko beharrezkoa da eskabidea epearen barruan eta behar bezala aurkeztea, aurreikusitako modalitateetako edozeinetan. Zerbitzu-erakunde bakoitzeko langileen zuzendaritzen ardura da, euskara zerbitzuen laguntzaz, aurkeztutako eskabideak aztertzea eta eskatzaileen artean aukeraketa egitea, betiere Osakidetzako Giza Baliabideen Zuzendaritzak eta III. Euskara Planak ezarritako lehentasunak eta hautaketa-irizpideak aintzat hartuta.
Eskabideak Giza Baliabideen Zuzendaritzak horretarako prestatu duen aplikazio informatikoaren bidez kudeatuko dira, eta onartutako eta ez onartutako eskaeren zerrendek Osakidetzako Giza Baliabideen Zuzendaritzan egon beharko dute 2025eko abenduaren 11rako.
Osakidetzako Giza Baliabideen Zuzendaritzak eskaeretan egokitzapenak egin ahal izango ditu eta, Solsakidegune aplikazio informatikoaren bidez, behin betiko eskaeren berri emango dio IVAPi 2025eko abenduaren 12rako. Epe horretatik kanpo ez da eskaerarik ez aldaketarik onartuko, ez bada onartutako erreklamaziorik aurkezten behintzat.
Bidalitako eskabideak aztertu eta gero, IVAPek Osakidetzari jakinaraziko dio baztertutakoak zeintzuk diren, ukatzeko arrazoiarekin batera, 2025eko abenduaren 19a baino lehen.
Zerbitzu-erakundeen zuzendaritzek interesdunei jakinaraziko diete idatzizko jakinarazpenaren bidez haien eskabidea baimendu duten ala ez; onartu ez dutenean, arrazoia espresuki azaldu beharko diete interesdunei. Jakinarazpena 2025eko abenduaren 23rako egin beharko da beranduen ere.
Idatzizko jakinarazpena egin eta hurrengo egunetik hasita, interesdunek 10 egun naturaleko epea izango dute bere zerbitzu-erakundeko langileen zuzendaritzari egoki iritzitako erreklamazioa aurkezteko. Erreklamazioak Osakidetzako edozein zerbitzu-erakundetako erregistroan aurkeztu ahal izango dira eta, halaber, Administrazio Publikoen Administrazio Prozedura Erkidearen urriaren 1eko 39/2015 Legearen 16. artikuluan jasotako edozein eratan.
Aukeratutako langileen behin betiko zerrendaren arabera osatuko dira ikastaroak eta taldeak.
Bosgarrena.– Lanorduetako ikastaroetan onartzeko araubidea.
Osakidetzako Giza Baliabideen Zuzendaritzak aldiro-aldiro arautuko ditu aukeratzeko irizpideak eta prozedurak, eta euskararen erabilera normalizatzeko prozesuaren araberako aldaketa eta egokitzapenak egingo ditu.
Deialdi honetan, hurrengo dokumentuetan zehaztu ditu Osakidetzako Giza Baliabideen Zuzendaritzak lanorduetako ikastaroen hautaketa-irizpideak: martxoaren 20ko 2/2024 Jarraibideetan, Osakidetzan Euskararen Erabilera Normalizatzeko III. Planean eta Osakidetzako Giza Baliabideen Zuzendaritzak horri buruz argitaratuko duen instrukzioan.
Zerbitzu-erakunde bakoitzeko zuzendaritzaren ardura da lanorduetako ikastaroak eskatzen dituzten langileen artean aukeraketa egitea.
Seigarrena.– Lanorduetako eta lanorduz kanpoko ikastaroak.
Deialdi hau 2025-2026 ikasturteko bigarrena da, eta bertan egiten den ikastaro-eskaintza mugatua da, gorago aipatu den apirilaren 10eko 632/2025 Ebazpenean iragarri bezala. Deialdi osagarri honetan egin daitezkeen ikastaroak II. eta III. eranskinetan daude jasota. Ebazpen honen II. eranskinean daude adierazita deialdi honetan, lanorduetan, egin daitezkeen ikastaroak.
Ikastaroen hasiera eta amaiera egunak eta ordutegiak II. eranskinean zehaztutakoak dira. Halere, IVAPek ondoen iritzitako egokitzapenak egin ditzake II. eranskinean zehazten diren hasiera eta bukaera egunetan nahiz ordutegietan.
Ikastaroa hasi baino lehen, IVAPek Osakidetzako Giza Baliabideen Zuzendaritzari helaraziko dio administrazio-taldeetan eskolatuko diren langileen zerrenda, langile bakoitzak non eta noiz eskolatu behar duen zehaztuta. Era berean, ikastaroen egutegi zehatza ere banatuko du, eta izan daitekeen edozein aldaketa garaiz jakinaraziko da.
Administrazio-taldeetara egokitzen ez diren langileentzat, bestelako ordutegi edo herritan ikasi nahi dutenentzat, edo lanorduz kanpoko ikastaroa egin behar dutenentzat eskolatzea matrikula-kodearen bidez egingo da, lehen aipatutako apirilaren 10eko 632/2025 Ebazpeneko 5.3. atalean zehazten den moduan.
Baldintza horiek betetzen direla egiaztatu ondoren, langilearen matrikula onartu eta dagokion kostua ordainduko du IVAPek. Barnetegiko ikastaroen kasuan, barnetegiko ostatua eta mantenua ere ordainduko ditu. Aldiz, IVAPek ez ditu bere gain hartuko bestelako gastuak: joan-etorriak, materialak, etab.
Matrikula-kodea 2026ko otsailaren 26a baino lehen entregatu beharko da euskaltegi publiko edo pribatu homologatutan.
Zazpigarrena.– Ikastaroen hasierari buruzko arau orokorrak.
Ikastaroa hasten den egunean bertan hasi beharko du langileak eskolan. IVAPek bertan behera utziko ditu eskolan hasi ez diren langileen eskaerak.
IVAPek eta Osakidetzak arrazoi hauengatik soilik onartuko dute eskolan berandu hastea: gaixotasun luzea edo larriagatik, erditzeagatik, amatasunagatik edo aitatasunagatik eta adopzio edo harreragatik. Nolanahi ere, kasu horietan apirilaren 10eko 632/2025 Ebazpeneko 7.1. ataleko baldintzak bete beharko dira.
Moduluz aldatzen diren ikasleen kasuan, hasiera-dataren erreferentzia ikastaro trinkoa izango da, beraz:
– Ikastaro trinkotik 2 ordukora aldatzen diren ikasleek, lehenik eta behin, ikastaro trinkoa bukatu behar dute, eta ondoren aldatuko dira 2 orduko ikastarora.
– 2 orduko ikastarotik trinkora aldatzen diren ikasleek 2 orduko ikastaroan jarraituko dute, harik eta ikastaro trinkoa hasi arte.
Zortzigarrena.– Datu pertsonalen babesari buruzko informazioa.
Datu pertsonalen tratamenduari dagokionez pertsona fisikoak babesteari eta datu horien zirkulazio askeari buruzko Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduaren 13. artikulua betez, jakinarazten da deialdi honen eremuan euskara-ikastaroak kudeatzeko datu pertsonalen tratamendua, alde batetik, Osakidetzaren ardurapean egingo dela, eta, beste alde batetik, IVAPen ardurapean.
Interesdunari jakinarazten zaio bere datu pertsonalak Osakidetzak tratatuko dituela eta Giza Baliabideen Kudeaketa Integratua izeneko tratamendu-jardueran sartuko direla. Tratamendu horren helburua da Osakidetzako langileak kudeatzea, interes publikoaren izenean edo tratamenduaren arduradunari emandako botere publikoak erabiliz egindako misio bat betetzeko. Datuak hirugarren erakundeei jakinaraz dakizkieke. Interesdunak datuak eskuratzeko, zuzentzeko eta ezabatzeko eskubidea du, bai eta haien tratamendua mugatzeko edo aurka egiteko ere.
Datuen babesari buruzko informazio gehiago nahi izanez gero, jo webgune honetara:
https://www.osakidetza.euskadi.eus/datuenbabesa
Halaber, interesdunari jakinarazten zaio bere datu pertsonalak IVAPek tratatuko dituela eta EAEko Administrazio Publikoetako Langileen Euskalduntzea izeneko tratamendu-jardueran sartuko direla. Tratamendu horren helburua da EAEko administrazio publikoetako langileen hizkuntza-gaikuntzako ikastaroak kudeatzea eta ebaluatzea, eta, hala badagokio, programatzea eta bertaratzea gestionatzea, bai eta hizkuntza-gaikuntzagatik esleitutako ordu-kreditua kudeatzea ere. Hori guztia, interes publikoaren izenean edo tratamenduaren arduradunari emandako botere publikoen izenean egindako eginkizun baten arabera.Datuak hirugarren erakundeei jakinaraz dakizkieke. Interesdunak datuak eskuratzeko, zuzentzeko eta ezabatzeko eskubidea du, bai eta haien tratamendua mugatzeko edo aurka egiteko ere.
Datuen babesari buruzko informazio gehiago nahi izanez gero, jo webgune honetara:
II. ERANSKINA
BARNETEGIKO IKASTAROAK ETA ADMINISTRAZIOKO LANGILEEZ OSATUTAKO TALDEAK
1.– Barnetegiko ikastaroak.
Barnetegiko ikastaroak Zornotzako Aurten Bai barnetegian eta Lazkaoko Maizpide euskaltegian egin ahal izango dira ondorengo egutegiaren arabera:
– Maizpide (Lazkao): otsailak 16 - ekainak 24.
– Aurten Bai (Zornotza): otsailak 16 - ekainak 26.
Barnetegiko ikastaroak euskaltegien egutegiari eta ordutegiari egokituko zaizkie.
IVAPek bere gain hartuko ditu matrikula eta egonaldiaren gastuak.
2.– Bost orduko ikastaroak.
Modulu honek egun osoko lan-liberazioa eskatzen du, eskola orduei ikasleak lan pertsonalerako behar duen denbora gehitu beharra dagoelako.
IVAPek bere gain hartuko ditu matrikula gastuak.
Bigarren lauhilekoaren iraupena ondorengoa izango da: 2026ko otsailaren 16tik ekainaren 26ra.
Ikastaroaren egutegi zehatza ikastaroa hasi baino lehenago banatuko da eta izan daitekeen edozein aldaketa garaiz jakinaraziko da.
3.– Modulu aldaketak.
3.1.– Bost orduko ikastarotik bi orduko ikastarora:
Bost orduko ikastarotik IVAPeko bi orduko talde batera aldatzen diren ikasleek ondorengo egutegia izango dute: 2026ko otsailaren 16tik ekainaren 19ra arte.
Administrazio-taldeetako ikastaroen ordutegia 08:00etatik 10:00etara izango da Bilbon, Donostian eta Vitoria-Gasteizen.
Ikastaroaren egutegi zehatza ikastaroa hasi baino lehenago banatuko da eta izan daitekeen edozein aldaketa garaiz jakinaraziko da.
Matrikula-kode bidez eskolatzen diren ikasleek euskaltegiaren egutegia eta ordutegia jarraituko dute.
3.2.– Bi orduko ikastarotik bost orduko ikastarora:
Bi orduko ikastarotik IVAPeko bost orduko talde batera aldatzen diren ikasleek eranskin honen 2. puntuan adierazitako egutegia izango dute.
Aldiz, matrikula-kodearekin eskolatzen dien ikasleek euskaltegiaren egutegia eta ordutegia izango dute.
III. ERANSKINA
MATRIKULA-KODEAREN BIDEZ FINANTZATUKO DIREN IKASTAROAK
1.– Lanorduetako ikastaroak:
(Ikus .PDF)
2.– Lanorduz kanpoko ikastaroak: