RSS
199. zk., 2025eko urriaren 20a, astelehena
- Bestelako formatuak:
- PDF (326 KB - 29 orri.)
- EPUB (469 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
KULTURA ETA HIZKUNTZA POLITIKA SAILA
4404
EBAZPENA, 2025eko urriaren 6koa, HABEko zuzendariarena, euskaltegi pribatu eta euskararen autoikaskuntzarako zentro homologatuei, 2025-2026 ikasturteko euskara-ikastaroengatik, esleituko zaizkien dirulaguntzak arautzen dituena.
Uztailaren 22ko 179/2003 Dekretuaren 16. artikuluan xedatutakoari jarraikiz, HABE erakundeak dirulaguntzak emango dizkie Erregistroan inskribaturik dauden euskaltegiei eta euskararen autoikaskuntzarako zentro homologatuei, helduen euskalduntzegintzan egindako jarduera finantzatzeko. Dirulaguntza horiek HABEk ezarritako helburuak lortzera bideratuta egongo dira.
Ildo horretatik, 2025eko otsailaren 27ko Aginduaren bidez, Jaurlaritzako lehenengo lehendakariorde eta Kultura eta Hizkuntza Politikako sailburuak onartu zituen 2025-2028 epealdiko Dirulaguntzen Plan Estrategikoa (PES 2025-2028 Plana) eta 2025. urteko Dirulaguntzen Urteko Plana (PAS 2025). Dirulaguntzen Plan Estrategikoan eta Urteko Planean ezartzen denez, hizkuntza politikaren arloan helburu estrategikotzat hartzen da helduen euskalduntzea bultzatzea, besteak beste, euskaltegi pribatuei eta euskararen autoikaskuntzarako zentro homologatuei zuzendutako dirulaguntzen bidez. Kultura eta Hizkuntza Politika Sailaren beraren webgunean argitaratuak daude biak ala biak: PES 2025-2028: Dirulaguntzen Plan Estrategikoa. // PAS 2025, 2026, 2027, 2028: Dirulaguntzen Urteko Planak.
Bestalde, Gobernu Programak jasotzen ditu XIII. legegintzaldian herritarrekin hartutako konpromisoak betetzeko Jaurlaritzak bultzatu beharreko ekimenak. 43. konpromisoan, euskararen ezagutza handitzea eta ingurune guztietan euskararen erabilera sustatzea ezartzen da helburu nagusitzat. Konpromiso horren bosgarren ekimenean aurreikusten da helduei euskara irakasteko sistema finantzatzeko laguntza ematea, euskaltegietarako ohiko finantzaketa-deialdien bidez, irakasleen lan-baldintzak hobetzeko xedearekin.
Bidezkoa da, beraz, 2025-2026 ikasturterako dirulaguntzen deialdia egitea eta finantzaketa-moduluak ezartzea, honen bidez euskaltegi pribatu eta euskararen autoikaskuntzarako zentro homologatuei dagozkienak finkatuz.
Horregatik, aipatu xedapenek eta otsailaren 13ko 34/1996 Dekretuak, HABEren egitura organikoa ezartzen duenak, ematen dizkidaten eskumenez baliatuz, Dirulaguntzen Araubidea Erregulatzeko abenduaren 21eko 20/2023 Legeak araututakoari jarraikiz, hau
EBAZTEN DUT:
Lehenengoa.– Euskaltegi pribatu eta euskararen autoikaskuntzarako zentro homologatuei zuzendutako 2025-2026 ikasturteko dirulaguntza-deialdia egitea eta oinarriak onartzea.
Bigarrena.– Jakinarazten zaie interesdunei, administrazio-bidea agortzen duen ebazpen honen aurka, nahi izanez gero, berraztertzeko errekurtsoa jarri ahal izango dutela HABEko zuzendariaren aurrean, ebazpen hau argitaratu eta biharamunetik hilabeteko epean; edo, bestela, auzi-errekurtso administratiboa aurkeztu ahal izango dutela Donostiako Administrazioarekiko Auzietako Epaitegian, argitaratu eta biharamunetik bi hilabeteko epean.
Donostia, 2025eko urriaren 6a.
HABEko zuzendaria,
JOKIN AZKUE ARRASTOA.
OINARRIAK
1. oinarria.– Helburua eta zuzkidura ekonomikoa.
1.– Oinarri hauen helburua da 2025-2026 ikasturtean (2025eko urria eta 2026ko iraila bitartean) euskaltegi pribatuek eta autoikaskuntzarako zentro homologatuek euskara-ikastaroengatik jasoko dituzten dirulaguntzak nola esleituko diren, zein baldintzetan eta nola izapidetuko diren arautzea.
2.– Euskal Autonomia Erkidegoaren Aurrekontu Orokorretan xede horretarako HABEren urteko aurrekontuan aurreikusitako funtsen konturakoak izango dira, guztira 36.215.000 euroko zuzkidura ekonomikoarekin.
3.– Deialdi honek bi eskaera-aldi izango ditu:
3.1.– Deialdi honen lehen eskaera-aldirako, 35.494.321 euroko zuzkidura ekonomikoa aurreikusita dago. Diruz lagunduko diren jarduera-unitateen gehieneko kopurua II. eranskinean ezarritakoa izango da, eta muga hori ezin izango da gainditu.
3.2.– Bigarren eskaera-aldirako, 9.950 jarduera-unitate diruz laguntzeko 720.679 euroko zuzkidura ekonomikoa aurreikusi da. Zenbateko hori 2025-2026 ikasturtean zehar II. eranskinean aurreikusitako jarduera-unitateen % 103tik gorako kopurua gainditu eta talde-ratioa betetzen duten euskaltegiei zuzenduta dago. Bigarren eskaera-aldia lehen eskaeran onuradun izan diren euskaltegiei soilik dago zuzenduta.
4.– Bigarren eskaera-aldian aurkeztutako jarduera-unitateen eskaerak 3.2. atalean zehaztutako unitate-kopurua gainditzen badu, euskaltegi bakoitzari diruz lagunduko zaion jarduera-unitateen kopurua proportzionalki esleituko da, deialdian ezarritako irizpideei jarraikiz. Halaber, 3.1. atalean soberakinik balego, 3.2 atalean erabil daiteke.
5.– Hala ere, bigarren eskaerarako eskatutako dirulaguntzen zenbateko osoa kontuan hartuta, eta bigarren esleipen-ebazpena eman baino lehen, bigarren eskaera-aldirako aurreikusitako zuzkidura ekonomikoaren % 90eraino handitu ahal izango da. Aldaketa hori HABEko zuzendariaren ebazpen baten bidez onartu beharko da eta Euskal Herriko Agintaritzaren Aldizkarian (EHAA) argitaratu.
2. oinarria.– Onuradunak.
1.– Onuradun izan daitezkeen erakundeak.
Ebazpen honen bidez deitutako dirulaguntzen onuradunak izan daitezke HABEren Erregistroan inskribatutako euskaltegi pribatuak eta euskararen autoikaskuntzarako zentro homologatuak, bai eta horiek eratutako Aldi Baterako Enpresa Elkarteak ere, betiere oinarri hauetako 2. atalean ezarritako baldintzak betetzen badituzte eta Dirulaguntzen Araubidea Erregulatzeko Legearen 13. artikuluan aurreikusitako debeku-egoeretan ez badaude.
Dirulaguntzen Araubidea Erregulatzeko Legearen 13. artikuluan aurreikusitako egoeretan ez egotea erantzukizunpeko aitorpen bidez egiaztatuko da.
2.– Eskatzaileek bete beharreko baldintza orokorrak.
a) HABEren euskaltegien eta euskararen autoikaskuntzarako zentroen Erregistroan inskribatuta egotea, eta datu guztiak egunean edukitzea.
b) Dirulaguntzen Araubidea Erregulatzeko Legearen 13. artikuluan aurreikusitako egoeretan ez egotea, eta batez ere, zerga guztiak ordainduta edukitzea eta Gizarte Segurantzarekiko ordainketak egunean izatea.
Deialdi honen organo kudeatzaileak egiaztatuko du dirulaguntza eskatzen duten erakundeek zerga-betebeharrak eta Gizarte Segurantzarekiko betebeharrak egunean dituztela. Honetarako, aintzat hartuko da honakoa: Agindua, 2023ko otsailaren 13koa, Ekonomia eta Ogasuneko sailburuarena, Euskal Autonomia Erkidegoko aurrekontu orokorren kontura ematen diren laguntzen eta dirulaguntzen esparruan bai zerga-betebeharrak eta Gizarte Segurantzarekikoak bai dirulaguntzak itzultzeari buruzkoak betetzen direla egiaztatzeari buruzkoa.
c) Dirulaguntza-eskaera zuzen osatzea, deialdiaren III. eranskinean jasotako ereduaren arabera eta, eskariarekin batera 3. oinarrian eskatzen diren agiriak zuzen betetzea eta aurkeztea.
d) Giza eskubideak eta pertsonen arteko bizikidetzaren balioak errespetatzea. Ondorioz, dirulaguntza hauen onuradunek ezin izango dituzte agerian jarri herritarrentzat laidogarriak izan daitezkeen, erabiltzaileen duintasuna urratzen duten edo indarkeria iradokitzen duten ikurrak edo elementuak.
e) Ezingo dira deialdi honen onuradun izan: laguntza publikoak eskuratzeko aukera kentzen dieten legezko debekuren batean dauden erakundeak, edo zigorrik jasota duten erakundeak, kasuan kasuko epea amaitu arte, eta bereziki: sexu-bereizkeriagatik zigortutako erakundeak, martxoaren 16ko 1/2023 Legegintzako Dekretuak onartutako Emakumeen eta Gizonen Berdintasunerako eta Emakumeen aurkako Indarkeria Matxistarik gabe bizitzeko Legearen testu bateginak ezarritakoari jarraikiz.
3.– Eskatzaileek bete beharreko bestelako baldintzak.
a) Helduen Euskalduntzearen Oinarrizko Curriculuma (HEOC) uneoro aplikatzea, Hezkuntza, Hizkuntza Politika eta Kulturako sailburuaren 2015eko uztailaren 22ko Aginduaren arabera (EHAA, 2015eko uztailaren 31a, 144. zk.).
b) Euskaltegi eta autoikaskuntzarako zentroetako ikasleek Helduen Euskalduntzearen Oinarrizko Curriculumean ezarritako gaitasun-mailen ziurtagiriak eskura ditzaten, Kultura eta Hizkuntza Politikako sailburuaren 2020ko irailaren 9ko Agindua, euskarazko komunikagaitasun-mailen ebaluazioa eta egiaztatzegintza arautu eta euskara-ikasle helduentzako dirulaguntzen deialdietarako irizpideak finkatzen dituena betetzea.
c) Uztailaren 22ko 179/2003 Dekretuak ezarritako hurrengo baldintzak betetzea: irakaskuntza lokalak, irakasleak eta material didaktikoa.
Halaber, diruz lagundutako C2 mailako ikastaroetako irakasleek C2 mailako euskara-agiria edo baliokidea izan beharko dute, edo maila hori egiaztatzetik salbuetsita egon beharko dute, apirilaren 3ko 47/2012 Dekretuaren eta otsailaren 26ko 28/2019 Dekretuaren arabera.
d) Ikasleek matrikula finantza-entitate baten bitartez ordaindu beharko dute, eta gutxienez zenbateko osoaren herena, ikaslea ikastaroan hasi eta 10 laneguneko epean. Salbuespena izango dira matrikula erakunde publiko batek ordaintzen dien ikasleak.
e) Euskaltegiek edo autoikaskuntzarako zentroek ikasleen matrikulen transferentzien ordain-agiriak gorde beharko dituzte.
f) HABEko zuzendariak 2025-2026 ikasturterako ematen dituen jarraibideak osotasunean bete beharko dira. Halaber, euskaltegiek helduen euskalduntze-jardun osoaren berri eman beharko diote HABEri.
g) Diruz lagungarria den jardueraren aldetik, deialdi honen I. eranskinean jasotzen diren irizpideak bete beharko dituzte.
h) Euskaltegiek diruz lagungarria den jarduerari buruzko informazioa bidali beharko dute HABEra, honek adierazitako euskarri eta epeen arabera, eta bereziki, honako hauek:
– Euskaltegiaren oinarrizko informazioa, aurreko ikasturteko informazioarekiko aldaketarik egonez gero.
– Euskaltegiaren barruko karguak, aurreko ikasturteko informazioarekiko aldaketarik eman bada.
– Ikasturtean aritzen diren irakasle eta beste langile guztien jarduera, titulazioarekin batera.
– Ikasle guztiak, bakoitzaren oinarrizko datuak eta ezaugarriak: matrikula-ordainketak, ikasten emandako denbora eta aprobetxamendua. Barnetegien kasuan, ikaslea zein pentsio-motatan dagoen ere adieraziko da.
– Ikastalde bakoitzaren ezaugarriak: maila, ordutegia, egutegia, eta abar.
4.– Bigarren eskaera-aldiarekin lotutako berezitasunak.
a) Deialdi honen barruan bigarren eskaera-aldia aurreikusten da, jarduera-unitateen kopurua II. eranskinean ezarritakoa baino % 103tik gora burutu duten euskaltegi eta autoikaskuntzarako zentro homologatuentzat, betiere, ezarritako talde-ratioa betez gero. Bigarren eskaera-aldian parte hartu ahal izango dute lehen eskaeran dirulaguntza esleitua izan duten euskaltegi pribatu eta autoikaskuntzarako zentro homologatuek.
b) Bigarren eskaeraren izapidetzea lehen eskaerarako ezarritako prozeduraren bidez egingo da, eta eskaerak aurkezteko epea honakoa da: 2026ko ekainaren 24tik 2026ko uztailaren 24ra arte. Barnetegi iraunkorren kasuan, epea 2026ko irailaren 1era arte zabalduko da.
c) Oro har, bigarren eskaerarako ez da dokumentazio osagarririk aurkeztu beharko, HABEk bestelakorik eskatzen ez badu.
3. oinarria.– Eskabideen aurkezpena, epeak eta aurkeztu beharreko dokumentuak.
1.– Aurkezteko modua.
a) Euskaltegiek eta autoikaskuntzarako zentroek, dirulaguntza-eskabideak, izapideak eta beharrezko dokumentazioa bide elektronikoa erabiliz soilik aurkeztuko dituzte, Eusko Jaurlaritzaren Egoitza Elektronikoaren bitartez: https://www.euskadi.eus/zerbitzuak/1045509
b) Eskabidearen ondorengo izapideak -jakinarazpenak eta justifikazioak barne- Euskal Autonomia Erkidegoko Administrazio Publikoaren egoitza elektronikoko «Nire karpeta»-ren bidez egingo dira: https://www.euskadi.eus/nirekarpeta
c) Identifikazio eta sinadura elektronikorako onartzen diren bitartekoak honako helbide honetan daude eskuragarri (https://www.euskadi.eus/ziurtagiri-elektronikoak Era berean, izapideak ordezkari baten bidez egin daitezke elektronikoki. Horretarako, ordezkaritza Euskal Autonomia Erkidegoko Administrazio Publikoaren ahalordeen erregistro elektronikoan inskribatu beharko da, helbide honetan: https://www.euskadi.eus/ordezkariak).
2.– Lehen eskaerarako epea eta dokumentuak.
2.1 – Lehen eskaerarako eskabidea eta dagokion dokumentazioa aurkezteko epea izango da: Ebazpena Euskal Herriko Agintaritzaren Aldizkarian argitaratu eta hurrengo egunetik hasi eta 2025eko azaroaren 3ra arte.
2.2 – Lehen eskaerarekin batera aurkeztu beharreko dokumentuak honako hauek dira:
a) Eskabidea: III. eranskinean jasotako agiria telematikoki beteta. Bertan adierazi beharko da eskatzen den jarduera-unitateen kopurua. Diruz lagunduko diren jarduera-unitateen gehieneko kopurua II. eranskinean ezarritakoa izango da. Esleitutako jarduera-unitateen kopurua baino gehiago eskatu nahi izanez gero, bigarren eskaera-aldian eskatu ahal izango da, baldin eta esleitutakoa baino % 103tik gorakoa bada eta talde-ratioa betetzen bada, beti ere, bigarren eskaera-aldirako aurreikusitako baldintzetan.
b) Pertsonalaren fitxa: egun osoko jarduera duen irakaslearen ordainsaria, emango dituen eskola-orduen kopurua eta antzinatasuna berezita ordainduko zaion ala ez biltzen dituen agiria («Ordainsariak_2526» fitxategia egoitza elektronikoan). Euskaltegi pribatu homologatuak edo autoikaskuntzarako zentroak egun osoko jarduera baina ordainsari edota eskola-ordu kopuru desberdinak dituzten irakasleak baditu, horiek guztiak zehaztuko ditu eskabidean.
c) 2025-2026 ikasturterako plana, euskaltegiak ikasturte horretan garatuko dituen jardueren aurreikuspenarekin.
d) Zerga eta Gizarte Segurantza arloko betebeharren egiaztagiriak, baldin eta erakunde eskatzaileak ez badu HABEk ofizioz egiaztatzea baimentzen.
e) Dirulaguntzen Araubidea Erregulatzeko Legearen 13. artikuluan aurreikusitako egoeretan ez egoteari buruzko erantzukizunpeko aitorpena.
3.– Bigarren eskaerarako aurkezpena.
a) Bigarren eskaera-aldiko eskabideak 2026ko ekainaren 24tik uztailaren 24ra bitartean aurkeztu beharko dira. Barnetegi iraunkorren kasuan, eskaera-epea irailaren 1era arte luzatuko da. Eskaera horiek lehen eskaerarekin batera aurkeztutako dokumentazioan oinarrituko dira.
b) Oro har, ez da dokumentazio berririk aurkeztu beharko, baldin eta HABEk espresuki beste agiri osagarriren bat eskatu ezean. Lehenengo eskaerako dokumentazioa baliagarria izango da.
c) Hala ere, nahitaezkoa izango da IV. eranskina telematikoki betetzea eta aurkeztea, eskatutako jarduera-unitate gehigarrien kopurua adierazteko. IV. eranskinean II. eranskinean esleitutako jarduera unitateen % 103tik gorako jarduera-unitateak soilik agertuko dira. Jarduera-unitate gehigarriak kalkulatzeko, kontuan hartuko dira:
– 2026ko ekainaren 30era arte burutu eta HABEk onartutako jarduera-unitateak.
– 2026ko ekainaren 1etik irailaren 30era bitartean egitea aurreikusten dituen jarduera-unitateak, horien gehieneko muga izanik 2024-2025 ikasturtean udako ikastaroetarako HABEk onartutako jarduera-unitateak.
d) Barnetegi iraunkorren kasuan, jarduera-unitate gehigarriak kalkulatzeko kontuan hartuko dira:
– 2026ko abuztuaren 31ra arte burutu eta HABEk onartutako jarduera-unitateak.
– 2026ko irailaren 1etik irailaren 30era bitartean egitea aurreikusten dituen jarduera-unitateak, horien gehieneko muga izanik 2024-2025 ikasturtean udako ikastaroetako HABEk onartutako jarduera-unitateak.
e) Jarduera-unitate gehigarriak onartzeko, baldintza bi bete beharko dira:
– HABEk onartutako jarduerak izatea.
– II. eranskinean ezarritako talde-ratioa betetzea (II. eranskinean esleitutako talde-ratioa berdindu edo handiagoa izan behar du, onartutako jarduera-unitateetan parte hartu duten ikasleen guztizko kopurua talde guztien kopuruarekin zatituz ateratzen den batez bestekoa, herri-tamainaren araberako ikasleen ponderazioa aintzat hartuta).
f) Ebazpen honen I. eranskineko 1.4 atalean ezarritakoaren arabera kalkulatuta, II. eranskinean euskaltegiari esleitutako aurrez aurreko eskola-orduen % 5 eta % 15 osatzen duten hondar-taldeak dituzten euskaltegiek ezin izango dute eskabide hau egin.
4.– Baldintzen onarpena.
Eskabidea aurkezteak esan nahi du erakunde eskatzaileak berariaz eta formalki onartzen dituela deialdi honetan ezarritako baldintzak.
4. oinarria.– Aurkeztutako eskabidearen akatsak eta hutsuneak zuzentzea.
Ikusten bada eskabidea onartzeko eskatzen den dokumentazioan zerbait falta dela edo forma-akatsak daudela, edo balorazioa egiteko aurkeztu diren dokumentuetan akatsak direla, hamar egun balioduneko epea emango zaio interesdunari akatsa zuzentzeko edo aurkeztu beharreko agiriak aurkezteko. Era berean, ohartaraziko zaio ezen, epe hori igaro eta zuzenketarik egin ez badu, ulertuko dela eskabidean atzera egin duela edo dagokion izapidea egiteko eskubidea galdu duela, eta hala jakinaraziko zaiola aurrez, ebazpen baten bidez.
Epe horretan zuzenketarik egiten ez bada, interesdunak bere eskaeran atzera egin duela ulertuko da, urriaren 1eko 39/2015 Legea, Administrazio Publikoen Administrazio Prozedura Erkidearen Legearen 68. artikuluan xedatutakoaren arabera, eta horren gaineko ebazpena emango da.
5. oinarria.– Dirulaguntzen esleipen-prozedura eta organo kudeatzailea.
1.– Dirulaguntza esleipen jarraituaren prozeduraren arabera izapidetuko da. Hau da, oinarri hauetako betekizunak zein baldintzak betetzen dituzten eskabide-egile guztiek jasoko dituzte dirulaguntzak, aurrekontu-partidako zenbatekoa agortu arte.
2.– Deialdi honetan aurreikusitako kudeaketa-lanak burutzea HABEko Kudeaketa Zerbitzuko Ekonomia eta Administrazio Unitatearen eta Ikuskatzailetzaren ardura izango da.
6. oinarria.– Dirulaguntzaren zenbatekoa.
1.– Esleipen-irizpideak.
Dirulaguntza-deialdi honek 2025-2026 ikasturtean (2025eko urria eta 2026ko iraila bitartean) euskara-ikastaroengatik euskaltegi pribatuei eta autoikaskuntzarako zentro homologatuei zuzendutako dirulaguntzen baldintzak arautzea du helburu, esleipen-irizpide hauen arabera:
a) Ikasturteko ordainsaria: deialdi honetarako egun osoko jarduera duen irakaslearen erreferentziako ordainsaria 36.892,46 eurokoa izango da.
b) Irakaslearen eskola-orduak: deialdi honetarako erreferentziazko eskola-orduak 809 eskola-ordu izango dira.
c) Ikasturteko eskola-orduaren kostu-koefizientea: deialdi honetarako erreferentziazko eskola-orduaren kostua (ordainsaria zati eskola-orduak) 45,60 eurokoa izango da.
Koefiziente hau aurreko bi parametroen arteko zatiketak (alegia, ordainsaria zati eskola-orduak) eman digu. Koefiziente honek islatzen du erreferentziazko parametroen betetze-maila, eta, horixe izango da, hain zuzen ere, ordainduko den dirulaguntzaren kopuru zehatzak kalkulatzeko erabiliko dena. Horrela atera da 2025-2026 ikasturterako erreferentziazko koefizientea.
Euskaltegi bakoitzaren koefizientea jakiteko, euskaltegiak berak eskabidearekin batera aurkeztutako «Ordainsariak_2526» taulan soldatarik txikienak dituen irakaslearen datuak izango dira kontuan. Gauzak horrela, koefizienterik txikiena duen egun osoko jardueradun irakaslearen emaitza ikasturteko koefizientearekin alderatu eta haztatuko da.
d) Jarduera-unitatea: euskaltegiek edo autoikaskuntzarako zentroek egiten dituzten ikasteredu guztiak biltzen ditu:
– Aurrez aurreko talde-orduak (1 = 1,0 jarduera-unitate),
– Jardun biko tutoretza-orduak (1 = 1,0 jarduera-unitate),
– Autoikaskuntzako matrikulak (190 orduko matrikula 1 = 20,23 jarduera-unitate), eta iraupen gutxiagoko matrikulak proportzioan doituko dira.
– Udako barnetegi egunak (1 = 0,4 jarduera-unitate) eta
– Barnetegi iraunkorretako egun osoz (1 = 0,5 jarduera-unitate), erdiz (1 = 0,2 jarduera-unitate) eta ikasleak familietan (1 = 0,1 jarduera-unitate) egindako pentsio-egunak.
Onuradun bakoitzari dirulaguntzetarako abiapuntu bezala onartuko zaizkion jarduera-unitateak 2020-2021 ikasturtetik 2023-2024 ikasturtera bere ekimenez ikasteredu guztietan HABEk onartu zizkion jardueren batez bestekoak izango dira).
2.– Kopuru-zehatzak.
2025-2026 ikasturtean dirulaguntzaren kopuru zehatza jarduera-unitateak eta doitutako laguntza-moduluen zenbatekoa biderkatuz kalkulatuko da onuradun bakoitzarentzat. Jarduera-unitateak II. eranskineko taulan datoz jasota. Jarduera-unitate bakoitzeko laguntzaren gehieneko eta gutxieneko laguntza-moduluak honakoak dira:
– Gehieneko modulua: 72,43 euro, antzinatasuna barne.
– Gehieneko modulua: 65,85 euro, antzinatasuna kanpo.
– Gutxieneko modulua: 46,65 euro.
Aipatutako laguntza-moduluak hurrengo irizpideak jarraituz doituko dira:
– Eskabidean ordainsarien taulan adierazitako datuen arabera, deialdi honetarako ezarria dagoen koefizientea (6.1. oinarriaren c) azpiatalean jasota dagoena) berdindu edo gaindituz gero, gehieneko laguntza-modulua ordainduko da. Gehieneko laguntza-modulua ezberdina da antzinatasuna soldataren barruan dagoen edo ez aintzat hartuz.
– Eskabidean ordainsarien taulan adierazitako datuen arabera, deialdi honetan 2025-2026 ikasturterako ezarria dagoen koefizientera iritsi ezean, datu errealak eta koefizientea alderatuko dira eta dagokion gehieneko laguntza-modulua ehuneko berean doituko da, betiere gutxieneko laguntza-modulua errespetatuz.
3.– Finantzaketa publikoa (Europako edo Estatuko Erakundeetatik, Eusko Jaurlaritza, Foru Aldundi edo Udaletatik edo Administrazio Publikoaren baitako beste Erakunde Autonomoetatik edo zuzenbide pribatuaren menpeko erakunde publikoetatik datorrena), gehienez, diruz lagunduko den jardunaren gastu kontuaren % 75 izango da.
7. oinarria.– Dirulaguntzarako esleipen-ebazpena.
1.– HABEko zuzendariaren Ebazpenaren bitartez erabakiko dira onuradun bakoitzari, deialdi honetako 6. oinarrian ezarritako irizpideen arabera, onartzen zaion laguntza-modulua eta, ondorioz, bakoitzari dagokion dirulaguntzaren gehieneko zenbatekoa. Esleipen-ebazpenak Administrazio-bidea agortzen du eta horren aurka, interesdunak nahi izanez gero, berraztertzeko errekurtsoa jarri ahal izango du HABEko zuzendariaren aurrean, ebazpen hau argitaratu eta biharamunetik hilabeteko epean; edo, bestela, auzi-errekurtso administratiboa aurkeztu ahal izango du Administrazioarekiko Auzietako Donostiako Epaitegian, argitaratu eta biharamunetik bi hilabeteko epean.
2.– Lehen esleipen-ebazpena 2025eko abenduaren 22a baino lehen emango da. Epe horretan organo erabakitzaileak jakinaraziko ez balu, eskabidea ez dela onartua izan ulertuko da.
3.– Izapidetze elektronikoa denez, jakinarazpena egindakotzat joko da euskaltegiak hura elektronikoki sinatzen duenean. Hala ere, hamar egun natural igaro eta jakinarazpena ireki ez bada, izapidea egindakotzat joko da, eta prozedurak bere horretan aurrera egingo du.
4.– Interesdun bakoitzari egindako ebazpenaren jakinarazpenaz gain, Euskal Herriko Agintaritzaren Aldizkarian ere argitaratuko da emandako dirulaguntzen esleipen-ebazpena.
5.– Betiere, onuradunei dirulaguntza aitortu, eta hala badagokio, ordaindu ahal izateko, nahitaezko baldintza da amaituta egotea dirulaguntzen itzulketa- edo zehapen-prozedura oro, eta baita, dagokionean, dirulaguntzak itzultzearen ondoriozko obligazioak ordainduta izatea ere, Euskadiko Autonomia Erkidegoaren Administrazio Orokorrari.
Bigarren esleipen-ebazpena 2026ko azaroan ematea aurreikusten da, eta, edonola ere, 2026ko abenduaren 22a baino lehen eman beharko da. Epe horretan organo erabakitzaileak ebazpenik emango ez balu, eskabidea ez dela onartua izan ulertuko da. Bigarren eskaera-aldiko baldintzak betetzen badira, egoki zuritutako jarduera-unitate gehigarriak hartuko dira kontuan esleipena egiteko.
8. oinarria.– Beste dirulaguntzen bateragarritasuna.
1.– Deialdi honen kontura ematen diren dirulaguntzak bateragarriak izango dira helburu bererako beste edozein entitatek eman ditzakeen laguntzekin, betiere diruz lagundutako jardueraren gehiegizko finantzaketarik gertatzen ez bada. Onuradunak konpromisoa hartzen du gainfinantzaketa ez gertatzeko, eta hori saihesteko beharrezko neurriak hartuko dituela, abenduaren 21eko 20/2023 Legeak, 9.4.h) artikuluan ezarritakoaren arabera.
2.– Gainfinantzaketa gertatzen bada, edota finantzaketa publikoetan aurreikusitako mugak gainditzen badira, murriztu egingo da dirulaguntza, dagokion neurrira doitu arte.
9. oinarria.– Dirulaguntzak ikuskatzea eta jarraitzea.
1.– HABEren Ikuskatzailetza arloko langile baimenduek ikuskaritzak egin ahal izango dituzte, euskaltegiak eta autoikaskuntzarako zentroak berauek emandako datuak egiaztatzeko helburuarekin. Horretarako, eska diezaiekete euskaltegietako arduradunei, eskolak emateko erabiltzen diren lokalen inguruko informazioa, baita jardun, ikasle, ikastalde, irakasle, gainerako langile eta material didaktikoari buruzkoa ere.
2.– Ikusketan bertan jasotako informazioa ikusketa-akta batean jasoko da, eta akta hori HABEko ikuskatzaileak eta euskaltegiaren arduradunak sinatuko dute. Ondoren, ikuskatzaileak informazio gehigarria eskatu ahal izango dio euskaltegiari, eta honek hamar laneguneko epea izango du informazio hori aurkezteko.
3.– HABEren Ikuskatzailetzak aldian-aldian egiten dituen ikusketetan jasotako informazioa euskaltegiak edo autoikaskuntzarako zentroak HABEri ematen dion informazioarekin bat ez badator, edo deialdi honetan ezarritako baldintzak betetzen ez badira, HABEko zuzendariari helaraziko dio akta, besterik ezean, aitortutako dirulaguntzei dagozkien ondorioak erabaki ditzan.
4.– Ikusketa baten ondorioz ez-betetze bat ohartuko balitz, HABEko zuzendariak behin betiko erabakia hartu baino lehen, euskaltegiaren edo autoikaskuntzarako zentroaren arduradunari ikuskatutakoaren akta helarazi beharko dio, honek 10 laneguneko epean dagozkion alegazioak egin ahal izateko.
10. oinarria.– Dirulaguntzen ordainketa.
1.– Lehen eskaerari dagokion dirulaguntza 2025eko abenduan emango den esleipen-ebazpenean zehaztuko da, eta ikasturtean zehar hiru ordainketa gauzatuko dira, ondorengo epe eta eran:
a) Lehen ordainketa (% 16): dirulaguntzen esleipen-ebazpena ematen den momentuan erabakitakoaren % 16 ordainduko da, gehienez hilabeteko epean.
b) Bigarren ordainketa (% 74): 2026ko otsailaren 20a baino lehen lehenengo ordainketa osorik zuritu eta HABEk egiaztatu ondoren ordainduko da, dirulaguntzaren ebazpenean ezarritako zenbatekoaren % 74.
c) Hirugarren ordainketa (% 10): gainerako % 10a (esleitutako dirulaguntza osoaren azken zatia) 2025-2026 ikasturte akademiko osoari dagozkion gastuen zuri-agiriak jaso ondoren ordainduko da, HABEk egiaztapenak egin eta dirulaguntzaren kitapena burutu ondoren, HABEko zuzendariak egingo duen kitapen-ebazpenaren araberakoa.
2.– Bigarren eskaera-aldian, dirulaguntzen ordainketa aparteko ebazpen baten bidez gauzatuko da. Ebazpen hori 2026ko azaroan ematea aurreikusten da, eta, edonola ere, 2026ko abenduaren 22a baino lehen. Ordainketa % 100ean egingo da, baldin eta ebazpenean onartzen diren jarduera-unitate gehigarriak behar bezala justifikatu badira, HABEk ezarritako baldintza eta irizpideei jarraituz.
3.– Dirulaguntzak ordaindu ahal izateko, onuradunak Eusko Jaurlaritzaren hirugarrenen datu-basean agertu beharko du. Alta emateko edo datuak aldatzeko, onuradunak Eusko Jaurlaritzaren hirugarrenen erregistro telematikoa erabili beharko du, helbide honetan: https://www.euskadi.eus/hirugarrenak
4.– Dirulaguntzaren ordainketa baldintzatuta egongo da, betiere, Euskal Autonomia Erkidegoko Administrazio Orokorrak edo erakunde autonomoek ezaugarri bereko beste laguntza edo dirulaguntzaren batzuk eman izana dela-eta horiek itzultzeko edo zigortzeko prozesuren bat oraindik ere izapidetzen ari bada, prozesu hori amaitzera.
11. oinarria.– Diruz lagungarriak diren gastuak.
1.– HABEren dirulaguntzen zuriketan, honako gastu hauek onartuko dira:
a) Irakasle eta irakasle ez diren langileen gastuak. Onuradunek HABEk diruz lagundutako jarduerarekin lotura duten langile guztien zerrenda aurkeztuko dute egoitza elektronikoan dagoen formularioari jarraikiz, honako hauek adierazita:
– Langile bakoitzaren izen-abizenak eta NANa;
– bakoitzari ordaindutakoa, soldata gordina eta gizarte segurantzari dagokion kopurua bereizita adieraziz;
– antzinatasuna berezita ordaindu zaion ala ez;
– izan duen jarduera-mota, eta murriztua izan bada, dagokion ehunekoa zehaztuz;
– izan duen ardura (irakasle, zuzendari, etab.);
– eman dituen eskola-orduak.
b) Lokalen alokairuak: soilik euskaltegien edo autoikaskuntzarako zentroen Erregistroan jasotako lokalen alokairuak hartuko dira kontuan. Legezko gutxienekoak (BEZ, Ogasunerako atxikipena...) betetzen dituzten agiriak soilik onartuko dira. Alokatzailea erakunde publikoa denean, bankuaren bidez luzaturiko ordainagiriak onartuko dira.
c) Barnetegi iraunkorretako pentsioetarako mantenu-gastuak eta jabari publikoko emakidei dagokien tasa.
d) Azpiegituren garbiketa-gastuak eta mantentze-lanak.
e) Gastu didaktikoak: klaseak ematearekin zuzenki lotuta dauden gastu arruntak (material didaktikoa, liburuak, dokumentazioa, etab.).
f) Irakaskuntzaren kalitatea hobetzeko helburuarekin sortutako beste edozein gastu: irakasleen formazioan (barruko zein kanpoko formazio-jarduerak), Informazio eta Komunikaziorako Teknologietan (IKT), materialgintzan eta kudeaketaren hobekuntzan.
g) Hirugarrenekin kontratatutako jardueren gastuak, baldin eta dirulaguntzaren helburuarekin zuzenean lotuta badaude eta 11.2 oinarrian ezarritako baldintzak betetzen badituzte. Kasu horietan, kontratatutako jarduera eta enpresa edo pertsona kontratatuaren inguruko informazioa aurkeztu beharko da.
h) Dirulaguntzen Lege Orokorraren 31. artikuluaren arabera diruz lagungarria izan eta diruz lagundutako jarduerarekin zuzenean lotuta dagoen beste edozein gastu.
2.– Hirugarrenekin kontratazioa eta kontratazio-prozeduraren baldintzak.
a) Onuradunak aukera izango du diruz lagundutako jarduera osoa edo haren zati bat hirugarrenekin kontratatzeko. Kontratazio hori gauzatzen bada, 20/2023 Legearen 31. artikuluan ezarritako baldintzak bete beharko dira.
b) Kontratazioak ez du onuradunaren erantzukizuna kentzen ez dirulaguntzaren helburuak betetzean, ezta jardueraren justifikazioan ere. Onuraduna izango da, betiere, dirulaguntzaren xede diren jardueren gauzatze egokiaren eta emaitzen arduradun bakarra.
c) Kontratazio-prozesuek gardentasun-, lehiakortasun- eta objektibotasun-printzipioak bermatu beharko dituzte. Aurkeztutako eskaintzen artean aukeraketa eraginkortasun- eta ekonomia-irizpideen arabera egingo da, eta eskaintza onuragarriena ez dena hautatzen bada, espresuki justifikatu beharko da memoria batean.
d) Onuradunak HABEri jakinarazi beharko dio kontratazioaren berri eta, hala eskatzen bazaio, kontratuaren kopia eta kontratazio-prozesuaren inguruko informazio osagarria aurkeztu beharko du.
e) Ezingo dira kontratatu dirulaguntzaren xede diren jardueretan parte hartzeko gaitasunik ez duten pertsona edo entitateak, ezta dirulaguntzak jasotzeko ezgaituta daudenak ere, indarrean dagoen araudiaren arabera.
12. oinarria.– Zuriketa.
Diruz lagundutako jardueraren zuriketa 2025-2026 ikasturtearen amaieran egingo da.
1.– Laguntzaren onuradunek lagundutako jarduera osoa zuritu behar dute izan dituzten sarrera eta gastu guztiak aurkeztuz eta izapide elektronikoan dagoen galeren eta irabazien formularioari jarraikiz: https://www.euskadi.eus/zerbitzuak/1045509
2.– HABEren dirulaguntzen zuriketarako, honako sarrera hauek onartuko dira:
a) Babestutako jardueren matrikulak: ikasleek edo euren ordezkari legalek edo tutoreek matrikula kontzeptuan ordaindutako kopuruak. Atal honetan ere, herri langileen ikastaroengatik HABEk edo beste herri administrazioek zein erakunde pribatuek edo enpresek ordaindutako matrikulak sartuko dira.
b) Babestutako jardueren ikas-materialak: ikasleek edo euren ordezkari legalek edo tutoreek ikas-materialengatik ordaindutako kopuruak. Atal honetan ere, herri langileen ikastaroengatik HABEk edo beste herri administrazioek zein erakunde pribatuek edo enpresek ordaindutako ikas-materialak sartuko dira.
c) Babestutako jarduerengatik erakunde pribatuetatik, enpresetatik edo beste iturrietatik jasotako beste sarrerak.
d) Deialdiaren bidez HABEtik jasotako dirulaguntza.
e) Babestutako jarduerengatik beste herri erakundeetatik jasotako dirulaguntzak.
f) Dirulaguntzen Lege Orokorraren 30. artikuluaren arabera, funts-propioekin edo beste dirulaguntza edo baliabide batzuekin lortutako sarrerak.
3.– Oinarri honetako 1. eta 2. puntuetako informazioa osatzeko, diruz lagundutako jardueraren gainerako gastu guztien zerrenda aurkeztu beharko da, egoitza elektronikoan dagoen formularioari jarraikiz.
Dirulaguntzen Araubidea Erregulatzeko Legearen 32. artikuluarekin bat etorriz, gastuak egiaztatzeko, fakturak eta froga-balio baliokidea duten bestelako agiriak aurkeztuko dira. Horiek guztiek merkataritzako trafiko juridikoan baliodunak izan behar dute edo eraginkortasun administratiboa eduki behar dute. Auditoria-txosten baten bidez eta, onuradunak entitate publikoak direnean, kontu-hartzaileak edo antzeko kargua duenak eginiko egiaztagiri baten bidez ere egiaztatu ahal izango dira gastuak.
4.– Halaber, euskaltegiak edo autoikaskuntzarako zentroak 2025-2026 ikasturteko Memoria aurkeztu beharko du.
5.– Oinarri honetan eskatutako agiriak aurkezteko azken egunak honakoak dira:
– Lehen eskaerari dagokion lehen ordainketaren zuriketa: 2026ko otsailaren 20a.
– Lehen eskaerari dagokion dirulaguntza osoarena: 2026ko urriaren 16a.
– Bigarren eskaera-aldiko dirulaguntzaren zuriketa: lehenengo eskaerari dagokion dirulaguntza osoaren zuriketaren azken eguna, 2026ko urriaren 16a.
6.– Hala ere, HABEk dirulaguntzaren kitapena egiteko beharrezkotzat joko balu, oinarri honetako 3. puntuan zehaztutako gastuen agiriak, eta batez ere, langileen gastuen nominei, Gizarte Segurantzari eta PFEZari dagozkien ordainketen agiriak, bide elektronikoa erabiliz aurkezteko eskabidea egin diezaioke edozein euskaltegiri edo autoikaskuntzako zentrori, eta eskatzen zaion unetik 10 laneguneko epea izango du eskatutakoa aurkezteko.
7.– Zuriketan egindako ez-betetzeak dirulaguntzarako eskubidea galtzea eta jasotako zenbatekoa itzultzea ekarriko du, ez-betetzeak dituen gainontzeko lege-ondorioez gain.
13. oinarria.– Esleitutako dirulaguntzaren kitapena.
1.– Jarduera-unitateen kitapena, euskaltegi pribatu eta autoikaskuntza zentro homologatuen kasuan.
Ikasturtearen amaieran, esleitutako dirulaguntzaren kitapena honela egingo da, ondoren zehazten diren irizpideei jarraikiz:
a) Lehen eskaera-aldiko onuradunen kasuan, betetze-maila % 97 eta % 103 bitartekoa bada, esleipena mantenduko da.
Talde-irakaskuntzan nahiz autoikaskuntzan, ikasturtean benetan gauzatutako jarduera-unitate kopurua, behetik nahiz goitik, II. eranskineko jarduera-unitate kopuruarekiko % 3ko gorabehera-urkilaren barruan badago, esleitutako jarduera-unitate kopurua hartuko da aintzat kitapenean. Hau da, esleitutako jarduera-unitate kopuruaren % 97 eta % 103 bitartean badago, ez da doikuntza ekonomikorik egingo, eta jatorrizko esleipena mantenduko da.
b) Lehen eskaera-aldiko onuradunen kasuan, burutze-maila % 97tik beherakoa bada.
Euskaltegiak, ikasturtearen amaieran II. eranskinean esleitutako jarduera-unitateen % 97tik beherako jarduera burutu badu, lehenik eta behin, % 97ra heldu ez diren euskaltegien galeraren batez bestekoa kalkulatuko da.
b.1.– Bataz besteko galera % 3 baino handiagoa bada, % 97tik beherako jarduera burutu duten euskaltegiei «bataz besteko galera» aplikatuko zaie, gehienez % 5eko muga ezarrita. Galeraren bataz bestekoa kalkulatzeko, % 97ra heldu ez diren euskaltegiek burutu gabe utzi dituzten jarduera-unitateen kopurua zenbatuko da (hau da, esleitutako eta benetan egindako jarduera-unitateen arteko aldea zenbatuko da). Falta izan zaizkien jarduera-unitateen batura egingo da. Batura hori jaitsiera izan duten euskaltegiek esleituta dituzten jarduera-unitate guztiekiko ehunekoa izango da batez bestekoa.
b.2.– Bataz besteko galera % 3a eta % 5a bitartekoa bada, bataz besteko galera horren barruan dauden euskaltegiei jatorrizko esleipena mantenduko zaie kitapenean. Euskaltegiak «galeren bataz bestekotik» behera burutu badu jarduera, % 5aren barruan badago ere, «galeren bataz bestekotik» beherako jarduera-unitate horiengatik epealdiko azken ordainketan murrizketa aplikatuko da. Murrizketaren zenbatekoa honela kalkulatuko da: burututako jardueraren eta «galeren batezbestekoaren» arteko aldea bider jarduera-unitateen laguntza-modulua.
b.3.– Bataz besteko galera % 5 baino handiagoa bada, eta euskaltegia esleitutako jarduera-unitateen % 95aren barruan badago, jatorrizko esleipena mantenduko zaio kitapenean eta ez zaio doikuntzarik egingo. Euskaltegiak, aldiz, esleitutakoaren % 5etik behera jardun badu, % 95era heltzeko falta zaizkion jarduera-unitateen arabera doituko zaio dirulaguntza, hurrengo kalkuluaren arabera: burututako jardueraren eta % 95era heltzeko falta den jarduera-unitate kopurua bider jarduera-unitateen laguntza-modulua biderkatuz.
c) Bigarren aldiko eskabideen kasuan, dirulaguntzaren kitapena egindako zuriketaren arabera egingo da, eta ondorioz, ordainketa, ebazpen bakar baten bidez gauzatuko da. Bigarren eskaera-aldian zuritutako jarduera-unitate kopurua IV. eranskinean euskaltegiak eskatu zen kopurua baino txikiagoa bada, kitapena eta ordainketa zuritutako jarduera-unitate horien arabera egingo dira.
13.2.– Barnetegi iraunkorren kasuan, jarduera-unitateen kitapena honela egingo da:
Ikasturtean benetan gauzatutako jarduera-unitate kopurua II. eranskinean ezarritakoaren % 97 eta % 103 bitartekoa bada, ez da doikuntza ekonomikorik egingo, eta jatorrizko esleipena mantenduko da.
Barnetegiek, egitura iraunkor eta egonaldi osoko zerbitzuek eragiten dituzten gastu finkoak direla eta, babes-irizpide osagarri bat izango dute % 97tik beherako betetze-mailen kasuan. Zehazki, barnetegiek egindako jarduera-unitateei 1.660 jarduera-unitate gehituko zaizkie kitapenerako oinarri modura, babes-neurri gisa.
Oinarri horren arabera honako kitapena egingo da:
– Oinarri modura hartutako (egindako unitateei 1.660 unitate gehituta) kopuruarekin % 97ra heltzen bada, esleipena mantenduko da.
– Galerak % 97 baino handiagoak balira, 13.1. oinarrian ezarritakoa aplikatuko zaie, hau da, b) azpiatala, % 97tik beherako burutze-mailari dagokiona.
3.– Alderdi ekonomikoen kitapena, euskaltegi, zentro homologatu eta barnetegi iraunkorrentzat.
Honela egingo da deialdi honen ikasturtearen amaieran esleitutako dirulaguntzaren kitapena: ikasturtearen amaieran behin betiko jarduera-unitateak eta zuriketaren agiriak jasoko dira, 11. oinarrian zehaztutako kontzeptuen bitartez, kitapena egiteko. HABEko zuzendariak kitapen-ebazpen bat emango du, beharrezkoa balitz laguntza-kopuruak doituz. Aipatutako doikuntza era eta hurrenkera honetan egingo da:
– Koefizientearen aplikazioa: 6. oinarrian aipatu den koefizientearen betetze-maila. Betetzen ez bada, proportzio berean doitu egingo da esleitutako dirulaguntza.
– Euskaltegi edo autoikaskuntzarako zentro bati esleitutako dirulaguntzaren zenbatekoak deialdi honetako 6.3. oinarrian ezarritako % 75eko dirulaguntza-muga gainditzen badu, esleitutako dirulaguntza ehuneko berean doitu egingo da, aipatutako muga errespetatzeko.
– Lagundutako jardueraren irabaziak galerak baino handiagoak badira, doitu egingo da esleitutako dirulaguntza aldea kenduz.
4.– Salbuespen-egoerak.
Salbuespen-egoeraren bat gertatuz gero, HABEk Ebazpen honetako baldintzak egokitu ahal izango ditu ebazpen berri baten bidez, egoera horri modu proportzionatuan eta eraginkorrean erantzuteko.
14. oinarria.– Onuradunaren betebeharrak.
Ebazpen honetan araututako dirulaguntzen erakunde onuradunek Dirulaguntzen Araubidea Erregulatzeko abenduaren 21eko 20/2023 Legearen 14. artikuluan eta Dirulaguntzen Lege Orokorraren 14. artikuluan araututako betebehar hauek izango dituzte:
1.– Emandako dirulaguntza onartzea.
2.– Jarduera aurrera eramatea edo dirulaguntza ematea bidezko egiten duen egoeran egotea.
3.– Dirulaguntza eman duen erakundearen aurrean justifikatzea emate hori eragin duten edo laguntzaz baliatzea eragin duten baldintzak betetzen direla eta jarduera bera aurrera eramango dela.
4.– Kontrol Ekonomikoko Bulegoari eta Herri-Kontuen Euskal Epaitegiari eskatzen duten informazio oro ematea, deialdi honen bitartez esleitutako dirulaguntzak kontrolatzeko duten eginkizuna betetzeko. Era berean, beste edozein administrazio, erakunde publiko edo pribatuk helburu bererako emandako dirulaguntzak, laguntzak, baliabide ekonomikoak edo bestelakoak jaso izana jakinarazi beharko zaio HABEri. Halaber, dirulaguntza ematerakoan kontuan hartutako egoera objektibo edo subjektiboan aldaketarik geratzen bada, horren berri eman beharko zaio HABEri.
5.– Aitortutako dirulaguntzaren izaera publikoari publizitate egokia ematea, abenduaren 21eko 20/2023 Legea, Dirulaguntzen araubidea erregulatzen duen 18. artikuluari jarraikiz.
Horretarako, laguntza-mota honen bidez diruz lagundutako egitasmo orok HABEk emandako babesaren berri adierazi beharko du egitasmoaren argitan kaleratutako euskarri guztietan, Eusko Jaurlaritzaren eta HABEren logotipo normalizatua eta «HABEk diruz lagundua» esaldia agerian jarriz.
6.– Dirulaguntza hauen onuradunek giza eskubideak eta pertsonen arteko bizikidetzaren balioak errespetatuko dituzte eta, ondorioz, ezin izango dituzte agerian eduki, horiei dagokienez, herritarrentzako laidogarriak izan daitezkeen, erabiltzaileen duintasuna urra dezaketen edo indarkeria iradokitzen duten ikurrak edo elementuak.
15. oinarria.– Arau-hausteak eta ez-betetzeak.
Edozein kasutan, deialdi honetako dirulaguntzen erakunde onuradunak Dirulaguntzen Araubidea Erregulatzeko abenduaren 21eko 20/2023 Legearen 36. eta 44. artikuluetan jasotako arau-hauste eta ez-betetzeen erregimenaren menpe daude.
Ez-betetze kasuetan, onuradunak jasotako diru-kopurua, bere legezko interesekin, Euskal Autonomia Erkidegoko Diruzaintza Nagusira itzuli beharko du, Dirulaguntzen Araubidea Erregulatzeko abenduaren 21eko 20/2023 Legearen 41 eta 42. artikuluekin bat etorriz.
16. oinarria.– Datuen tratamendua.
Erakunde onuradunek, dirulaguntza-deialdi honetan, HABEri bidalitako datu pertsonalak honako tratamendu-jardueretarako erabiliko dira: «Euskaltegien eta autoikaskuntzarako zentro homologatuen Erregistroaren kudeaketa» eta «Ikaslegoaren kudeaketa».
Tratamendu hau abenduaren 5eko 3/2018 Lege Organikoan eta Europako Parlamentuaren eta Kontseiluaren 2016/679 Erregelamenduan (EB) ezarritakoaren arabera egingo da, ondoren zehazten diren helburuetarako:
– HABEk euskaltegien eta autoikaskuntzarako zentro homologatuen finantzaziorako bideratzen dituen dirulaguntzen kudeaketa.
– HABEri atxikita dagoen euskaltegien eta euskararen autoikaskuntzarako zentro homologatuen Erregistroa kudeaketa.
– HABEk egingo duen euskaltegien eta autoikaskuntzarako zentro homologatuetako ikasleen kudeaketarako: ikas-prozesua, euskara-mailaren egiaztapena eta dirulaguntzaren proposamena.
HABEko zuzendaria izango da tratamenduaren administrazio-organo arduraduna.
Tratamendua beharrezkoa da legez ezarritako betebeharrak gauzatzeko eta interes publikokoa den jarduera sustatzeko.
Interesdunak bere datuak ikusteko, zuzentzeko zein ezabatzeko eskubidea izango du, baita haien tratamendua mugatzeko nahiz haren aurka egiteko, informazio gehigarrian adierazten den moduan.
Halaber, bere datuen tratamenduari buruzko informazio osagarria eskura dezake helbide honetan: http://www.habe.euskadi.eus/datu-pertsonalen-babesa-haben/s23-edukiak/eu/
17. oinarria.– Aplikagarriak diren arauak.
Ebazpen honetan aurreikusitakoaz gain, azaroaren 11ko 1/1997ko legegintzako dekretua onartzen duen Euskal Autonomia Erkidegoko Ogasun Nagusiaren antolarauei buruzko legearen testu bategina, dirulaguntzei buruzko azaroaren 17ko 38/2003 Lege orokorra eta abenduaren 21eko 20/2023 Legea, dirulaguntzen araubidea erregulatzekoa aplikatuko dira, aplikagarri diren neurrian.
I. ERANSKINA
IKASTURTEA ETA IKASTARO-MODULUAK
Helduen Euskalduntzearen Oinarrizko Curriculuma ezartzen duen Hezkuntza, Hizkuntza Politika eta Kultura sailburuaren 2015eko uztailaren 22ko Aginduaren arabera, honako hauek dira, HABEren dirulaguntzen deialdian partaide izateko, euskaltegi eta euskararen autoikaskuntzarako zentro guztiek 2025-2026 ikasturtean euskara-ikastaroak antolatzeko jarraitu beharreko irizpideak:
1.– Ikasturtea.
1.1.– Euskaltegi eta autoikaskuntzarako zentroen ikasturtea, 2025eko urriaren 1ean hasi eta 2026ko irailaren 30ean amaituko da. Betiere, helduen euskalduntzearen antolaketaren baitan hurrengo irizpideak kontuan hartuta:
1.2.– Taldeek honako gutxieneko ikasle-kopurua izan beharko dute HABEk diruz lagunduak izateko, ikastaro bakoitzaren hasieran taldeak eratzeko garaian, talde bakoitza kokatua dagoen herriaren biztanleria-kopuruaren arabera:
(Ikus .PDF)
1.3.– Barnetegi erako ikastaroek, edozein herritan antolatuta egonik ere, 10.001-25.000 biztanleko herrietako taldeekin parekotasuna izango dute.
1.4.– Herri-tamainaren arabera dagokion ikasleen gutxieneko kopurura heltzen ez diren hondar-taldeak ere dirulaguntzen xede izan litezke salbuespen gisa, euskaltegiaren jarduera osoaren arabera. Era honetako hondar-taldeek euskaltegi bakoitzari dagokion II. eranskineko jarduera-unitateen aurrez aurreko talde-orduen % 15a baino gutxiago izan behar dute. Talde horietan ikasle-kopurua dagokiena baino 1 gutxiagokoa izango da.
1.5.– Taldeei matrikulazioaren jarraipenerako aplikazio informatikoan aipatutako gutxieneko ikasle-kopurua betetzen denean hasierako itxiera eman beharko zaie (taldea eratuta geldituko da).
1.6.– Irailean zehar hasi eta urriaren amaieratik aurrera luzatzen diren ikastaroak, hurrengo ikasturtekotzat hartuko dira. Ikastaro hauen iraileko orduak dirulaguntzetan onartuak izateko baldintza hauek bete beharko dira:
a) Diruz lagunduko diren orduak gutxieneko ikasle-kopurua bete eta hasierako itxiera ematen den egunetik ikastaroaren azken egunera artekoak izango dira.
b) Iraila baino lehen hasi eta urritik aurrera luzatzen diren ikastaroak, bi ikasturtetan zatituko dira, irailaren 30era bitartekoa batean eta urriaren 1etik aurrerakoa beste ikasturtera bilduz.
1.7.– Matrikulazioaren jarraipenari dagokionez, HABEren zuzendari nagusiak ikasturtearen hasierako ebazpenaren bitartez jakinaraziko ditu urrian hasten diren ikastaroen datuak aurkezteko azken eguna, baita azarotik aurrera hasten diren ikastaroen datuak aurkezteko epeak ere.
2.– Aurrez aurreko ikasteredua.
Aurrez aurreko ikastereduaren oinarria taldea da, gutxienez irakasle baten ardurapean, ikasgela batean, aurrez aurre eta taldeko ikasle guztiekin batera ikastaroa burutzen duen talde egonkorra, hain zuzen ere.
Dirulaguntzaren esleipenean, deialdi honen I. eranskinaren 1.2 atalean araututako gutxieneko ikasle-kopuruak betetzen badira, taldearen ordu teorikoak eta kitapenean emandako orduak hartuko dira kontuan. Irakasleari taldean emandako orduak aitortuko zaizkio, eta taldean aritutako irakasle guztien orduen batuketa ez da izango talde horretan emandako orduen kopurua baino handiagoa.
Helduen Euskalduntzearen Oinarrizko Curriculumean maila bakoitzerako ezarritako erreferentziazko irakastorduen kopuruak kontuan hartuta, euskaltegiek antolatuko dituzten ikastaroek ondoren zehazten diren gutxienekoak bete beharko dituzte:
2.1.– Urritik ekainera bitarteko ikastaroak.
a) Barnetegi iraunkorretako barnetegi ikastaroak: egunean 7 irakastordu gehienez eta gutxienez 80 irakastordu osatzen dituzten ikastaroak.
b) Euskaltegietako eta barnetegi iraunkorretako kanpo ikastaroak:
– A1 mailan, gutxienez 125 irakastordu jarraian eta
– A2, B1, B2, C1 eta C2 mailetan, gutxienez 165 irakastordu jarraian.
2.2.– Udako ikastaroak, ekainetik irailera bitartekoak.
a) Euskaltegietako eta barnetegi iraunkorretako udako kanpo ikastaroak: gutxienez 80 irakastordu era jarraituan eta zatikatu gabe.
b) Euskaltegietako eta barnetegi iraunkorretako udako barnetegi ikastaroak: 2, 3 edo 4 astekoak eta egunean, gehienez, 8 irakastordu.
c) Salbuespenezko ikastaro trinkoak (B1, B2, C1 eta C2 mailetan), zenbait kolektibo edo helburu zehatzetarako direnean, maila burutzeko eta trebetasun zehatzak lantzeko helburuarekin:
c.1.– Udako aurrez aurreko ikastaro trinkoak: gutxienez 30 irakastordu, era jarraituan eta zatikatu gabe. Ikastaro hauetako ikasle guztien abiapuntua, salbuespenik gabe, lortu nahi den mailaren aurreko azpimaila izango da, taldea eratzeko gutxieneko kopurua osatu arte.
c.2.– Uda-ikastaroak barnetegian: aste beteko udako barnetegiak eta egunean gutxienez 8 irakastordu. Ikastaro hauetako ikasle guztien abiapuntua, salbuespenik gabe, lortu nahi den mailaren aurreko azpimaila izango da, taldea eratzeko gutxieneko kopurua osatu arte.
c.3.– Salbuespenezko ikastaro trinko hauek ikasturtean zehar ere antolatu ahal izango dira. Honelako ikastaroak onartzeko euskaltegiak HABEren zuzendari nagusiari dagokion eskari arrazoitua helarazi beharko dio 3 asteko aurreikuspenez, eta HABEren Ikuskatzailetzaren aldeko txostena jasotzea ezinbestekoa izango da.
c.1, c.2 eta c.3 azpiatal hauetako ikastaroek, HABEren dirulaguntzapean onartuak izateko, maila burutzeko eta trebetasun zehatzak lantzeko helburua izan behar dute.
2.3.– Maila burutzeko ikastaroak.
Hezkuntza, Hizkuntza Politika eta Kultura sailburuaren 2015eko uztailaren 22ko Aginduak ezartzen duen Helduen Euskalduntzearen Oinarrizko Curriculumaren A1, A2, B1, B2, C1 eta C2 mailak burutzeko helburu zuzena duten ikastaroek honako baldintzak bete beharko dituzte:
a) A1 maila burutzeko helburua duten ikastaroak: gutxienez 60 irakastordu era jarraituan eta zatikatu gabe; taldea eratzeko gutxieneko kopurua osatu arte, ikasle guztien abiapuntua A1A0 izango da, salbuespenik gabe.
b) A2, B1, B2, C1 eta C2 mailak burutzeko helburua duten ikastaroek: gutxienez 120 irakastordu izan beharko dituzte, era jarraituan eta zatikatu gabe; ikasle guztien abiapuntua, taldea eratzeko gutxieneko kopurua osatu arte, lortu nahi den mailaren aurreko azpimaila izango da.
2.4.– Orduen zenbaketa.
Aurreko ataletan zehaztutako aurrez aurreko ikastaro-moduluetako orduen kontaketa emandako irakastorduen araberakoa izango da, atsedenaldiak kanpo utzita.
3.– Tutorizatutako autoikaskuntza ikasteredua.
Tutorizatutako autoikaskuntza ikastereduan oinarria ikaslea da. Dirulaguntzetarako, berriz, esleipenean ikasleak egiten duen matrikula izango da oinarria eta kitapenean atal honetako 3.2 azpiatalean zehaztutako irizpideen arabera burututakoa izango da.
Autoikaskuntza burutzeko euskaltegiek edo autoikaskuntzarako zentroek Informazioaren eta Komunikazioaren Teknologiak (IKT) erabil ditzakete, eta ikaskuntza hiru ataletan banatuko da:
a) Ikasleak bakarkako lana egiteko saioak.
Atal honetan sartuko dira ikasleak bakarka egindako saioak. Halaber, euskaltegiek edo autoikaskuntzarako zentroek hala erabakiz gero, ikasleen arteko interakzioa bultzatzeko eta trebetasun zehatzak lantzeko helburuarekin taldean egindako jarduerak ere bildu ahal izango dira. Jarduera horietan parte hartzen duten ikasleei taldean emandako orduak banaka zenbatuko zaizkie. Dirulaguntzetarako kasu guztietan, bakarkako saioen orduak 3.2 azpiatalean zehaztutako irizpideen arabera hartuko dira kontuan, gehienez.
b) Mintzamena edo ikasleen arteko interakzioa lantzeko saioak.
Saio mota hauetan euskaltegiak edo autoikaskuntzarako zentroak ikasleak taldean elkartzeko saioak antolatzen saiatuko dira. Saio hauetan, ikasle bakoitzari parte hartu duen ordu-kopurua zenbatuko zaio. Irakasleari, berriz, saio hauetan ikasleekin emandako orduak aitortuko zaizkio. Dirulaguntzetarako, mintzamena edo ikasleen arteko interakzioa lantzeko saioetako orduak atal honetako 3.2 azpiatalean zehaztutako irizpideen arabera hartuko dira kontuan, gehienez.
c) Tutoretza-saioak.
Tutoretza-saioak ikasle bakoitzarekin burutzen dira. Ikasleari saio horietako orduak zenbatuko zaizkio eta irakasleari, tutoretza-saioetan ikasleekin emandako orduak. Dirulaguntzetarako, tutoretza-ordu horiek 3.2 azpiatalean ezarritako irizpideen arabera hartuko dira kontuan, gehienez.
3.1.– Ikastaro-moduluak.
Euskaltegiek eta autoikaskuntzarako zentroek antolatu ditzaketenak:
a) 190 eskola-ordu matrikula bakoitzeko, 7-9 hilabeteko iraupena izango du, bakarkako lanaren, mintza- eta tutoretza-saioetan banatuta. Ikastaroen hasiera hilabete hauetako batean izan beharko da: urria, azaroa, abendua, urtarrila, otsaila edo martxoa. Ikasle bakoitzak matrikula bakarra egin ahal izango du ikasturtean zehar.
b) 75 eskola-ordu matrikula bakoitzeko, 3 hilabeteko iraupena izango du, bakarkako lanaren, mintza- eta tutoretza-saioetan banatuta. Ikastaroen hasiera hilabete hauetako batean izan beharko da: urria, azaroa, abendua, urtarrila, otsaila, martxoa, apirila, maiatza, ekaina edo uztaila. Matrikula bakoitza 190 eskola-orduko modulu estandarraren 0,40 izango da.
c) 25 eskola-orduko matrikula bakoitza udako ikastaro berezietarako izango da. Ikastaro hauek bakarlanean, mintza- eta tutoretza-saioetan banatuko dira, uztailetik irailera bitartean, eta B1, B2, C1 eta C2 mailetan eskainiko dira, zenbait kolektibo edo helburu zehatzetarako denean. Matrikula bakoitza 190 eskola-orduko modulu estandarraren 0,13 gisa zenbatuko da.
Azpiatal honetako udako autoikaskuntzako ikastaroek, HABEren dirulaguntzapean onartuak izateko, maila burutzeko eta trebetasun zehatzak lantzeko helburua izan behar dute eta ikasleak ondoko baldintza bete behar du: ikaslearen abiapuntua, salbuespenik gabe, lortu nahi den mailaren aurreko azpimaila izango da.
d) A1 maila lortzea helburu duten ikastaroetan 120 eskola-orduko matrikulak onartuko dira. Ikastaroek gutxienez lau hilabeteko iraupena izan beharko dute. Ikastaro horiek banakako lan-saioetan, elkarrizketa-saioetan eta tutoretza-saioetan banatuta antolatuko dira. Ikastaroen hasiera-data honako hilabete hauetako batean izan beharko da: urria, azaroa, abendua, urtarrila, otsaila, martxoa, apirila, maiatza edo ekaina. Matrikula bakoitza 190 eskola-orduko modulu estandarreko 0,63 gisa zenbatuko da.
3.2.– Bestelako baldintzak.
Ikasleak bakarlanean emandako ordutzat astean 10 ordu arteko jarduna onartuko da dirulaguntzetarako. Hortaz, diruz lagun daitezkeen gehieneko orduak honako hauen batura izango da:
– ikasleak parte hartu duen mintzamena edo ikasleen arteko elkarreragina lantzeko saioak,
– tutoretza-saioak, eta
– bakarlanean emandako orduak (betiere, asteko 10 ordura arte).
Gainera, ikasle bakoitzaren jardueragatik diruz lagunduko diren 6 ordutatik batek, gutxienez, hartutako mintza ordukoa edo ikasleen arteko interakzioa lantzekoa izan beharko du. Salbuespen gisara, A1 eta A2 mailetara bitarteko jardueran diruz lagunduko diren 10 ordutatik batek, gutxienez, izan beharko du mintzakoa edo ikasleen arteko interakzioa lantzekoa.
Mintzamen-saioak edo ikasleen arteko interakzioa lantzekoak aurrez-aurre eta euskaltegian edo autoikaskuntzarako zentroan zein IKTen bidezko bideokonferentziaz egingo dira, eta gutxienez saio bakoitzean bi ikaslek parte hartu beharko dute. Kasu bietan, aurrez aurreko edo bideokonferentziaz eginiko mintza-saioak edo ikasleen arteko interakzioa lantzekoak ikastaroaren zehar indarrean egongo diren asteko egun eta ordutegi zehatzetan burutuko dira.
Tutoretza-saioetan, bakarlanean emandako 10 orduko, gehienez ere, 30 minutu lagunduko dira diruz. Tutoretza-saioak aurrez aurre zein IKT bidez (bideokonferentziaz) egingo dira.
HABEko teknikariek dirulaguntzen onuradunen plataformetarako sarbidea izango dute edozein unetan, jardueren egiaztapenerako.
Une berean hasieratik amaierara, autoikaskuntzako 40 matrikula osatzen dituzten ikasleen tutoretza oinarritzat hartuko da (astean ordubeteko mintza-saioak eta dagozkion tutoretza-saioak barne), eta horren arabera neurtuko da bakoitzaren dedikazioa.
Halaber, autoikaskuntza-ereduan, ikasle bakoitzaren jarduna kontabilizatzerakoan (ikasle/orduak), honako jarduera motak aplikatuko dira: bakarkako jarduna, mintza-saioak eta tutoretza-saioak. Eman eta gauzatu ez diren orduak ez zaizkio ikasleari emandako ordu gisa aitortuko, eta ez dira dirulaguntzan kontabilizatuko, ezta HABEren datu-basean erregistratuko.
IKT bidezko ikaskuntza-prozesuak bere osotasuna gorde dezan, trebetasunen arteko oreka gorde beharko da, 179/2003 Dekretuak bere 6. artikuluan esaten denari jarraituz, non gutxieneko bezala eskatzen baita «erabilitako sistemak aurrerapen egokia eta orekatua bermatzea trebetasun guztietan eta bakoitzean, mintzamena barne».
4.– Jardun biko ikasteredua.
Jardun biko ikastereduaren oinarria taldea da, gutxienez irakasle baten ardurapean, ikasgela batean, aurrez aurre eta taldeko ikasle guztiekin batera ikastaroari dagozkion taldeko jarduerak burutzen dituen taldea, eta horrekin batera, ikasle bakoitzak bakarka burutu behar duen jardunarekin eta ikasleen tutoretza-saioekin osatzen den ikasteredua da.
4.1.– Dirulaguntzaren esleipena.
Dirulaguntzaren esleipenerako, deialdi honen I. eranskinaren 1.2 atalean araututako gutxieneko ikasle-kopuruak betetzen badira, honako hauek hartuko dira kontuan:
– taldearen aurrez aurreko ordu teorikoak eta
– tutoretza-saioetako orduak, gehienez atal honetako 4.2.c) azpiataleko irizpidearen arabera.
Kitapenean, berriz, taldearen aurrez aurreko jardunean burututako orduak eta ikasleek burututako tutoretza-saioetako orduak hartuko dira kontuan, gehienez atal honetako 4.2.c) azpiataleko irizpidearen arabera.
Irakasleari honako hauek aitortuko zaizkio:
– batetik, taldean aurrez aurreko jardunean emandako orduak aitortuko zaizkio eta taldean aurrez aurreko jardunean aritutako irakasle guztien orduen batuketa ez da inoiz izango talde horretan emandako ordu kopurua baino handiagoa, eta
– bestetik, ikasleekin burututako tutoretza-saioetako orduak, gehienez atal honetako 4.2.c) azpiataleko irizpidearen arabera.
4.2.– Ikastaroaren egitura eta gutxieneko iraupena.
Jardun biko ikastereduaren baitan, HABEren dirulaguntzen barruan onartuak izan daitezen, ikastaro hauek, gutxienez hiru hilabeteko iraupena izan behar dute honako hiru jardun-motatan banatuta:
a) Aurrez aurreko jarduna: gutxienez, 40 eta gehienez 180 irakastordu.
b) Bakarkako jardun tutorizatua: gutxienez, aurrez aurreko jardunaren irakastorduen kopurua. Atal hau ez da diruz lagunduko.
c) Tutoretza-saioak: aurrez aurreko jardunean emandako 10 orduko, gehienez 30 minutu lagunduko dira diruz. Tutoretza-saioak aurrez aurre edo bideokonferentziaz egin ahal izango dira.
5.– Urrutiko aurrez aurreko talde-irakaskuntza.
Urrutiko aurrez aurreko talde-irakaskuntzaren oinarria taldea da, gutxienez irakasle baten ardurapean IKTen bidezko plataformak erabiliz taldeko ikasle guztiekin batera ikastaroa burutzen duen taldea, hain zuzen ere. Dirulaguntzaren esleipenean, deialdi honen I. eranskinaren 1.2 atalean araututako gutxieneko ikasle-kopuruak betez gero, taldearen ordu teorikoak eta kitapenean burututako orduak hartuko dira kontuan. Irakasleari taldean emandako orduak aitortuko zaizkio eta taldean aritutako irakasle guztien orduen batuketa gehienez taldean emandakoak izango dira.
5.1.– Ikastaro-moduluak.
Aurrez aurreko ikastereduan onartzen diren guztiak erabili ahal izango dira.
5.2.– Bestelako baldintzak.
5.2.1.– Urrutiko aurrez aurreko saioetan, ikastaro-moduluaren ordu guztiak emango dira, eta ikastaldearen jarduerak ordutegi zehatzetan eta ikasle guztiekin batera burutu beharko dira. Saio horiek, gainera, eskola-egun bakoitzean, gutxienez 40 minutuko iraupena izan beharko dute.
5.2.2.– Urrutiko aurrez aurreko saioak edozein e-learning edo b-learning plataforma erabiliz (GoToWebnar, Zoom, Jitsi, Microsoft Teams, Moodle/MoodleCloud...) egingo dira.
5.2.3.– Ebaluazioak e-learning edo b-learning plataformen bidez burutuko dira, hala nola, Google Forms, Questbase edo Socrative erabiliz.
5.2.4.– HABEko teknikariek edozein unetan plataforma horietara sarbidea izango dute, burutzen den jarduera ikusteko.
5.2.5.– Era honetan antolatuko diren ikastaldeei «70 kolektiboa» esleituko zaie, Q87 izeneko aplikazioan matrikulazioaren jarraipena egiteko.
6.– Helburu zehatzetarako ikastaro bereziak.
6.1.– AISA ikastaroak.
AISA ikastaroak Eusko Jaurlaritzako Berdintasun, Justizia eta Gizarte Politiketarako Sailarekin lankidetzan antolatutako ikastaro bereziak dira, etorkinentzako euskara hurbiltzeko prestakuntza gisa. Ikastaro hauen iraupena 60 irakastordukoa izango da.
Euskaltegiek ikastaroak hasi baino lehen bideratu beharko dute eskaria, eta ikastaroa bukatutakoan, ebaluazio-fitxa osatua helarazi beharko diote HABEri. Ikastaro hauen ikastaldeei «61 kolektiboa» jarriko zaie Q87 izeneko aplikazioan.
Jarduera behar bezala burutu dela egiaztatu ondoren, HABEk 1.862,5 euroko matrikularen osagarria ordainduko dio euskaltegiari, ikastaro bakoitzeko.
6.2.– Dendaketan eta Ostalaritza ikastaroak.
Dendaketan eta ostalaritzan espezializatutako ikastaro berezi hauek 60 irakastorduko iraupena izango dute. Euskaltegiek, ikastaroak hasi aurretik, eskaria bideratu beharko dute, eta ikastaroa amaitutakoan, ebaluazio-fitxa osatua bidali beharko diote HABEri. Ikastaro hauen ikastaldeei «63 eta 62 kolektiboa» jarriko zaie, hurrenez hurren, Q87 izeneko aplikazioan.
6.3.– Bestelako ikastaroak, euskararen sustapena eta erabileraren normalizazioa helburuarekin.
Herri-administrazioek, erakunde pribatuek eta gizarte-eragileek, euskararen sustapena eta erabileraren normalizazioa helburu izanik, Euskara indarberritzeko eta euskaldunok ahalduntzeko marko estrategikoa (Aroa), Lanhitz edo udal-mailako, erakunde pribatuen nahiz gizarte-eragileen plangintza batean sortu eta txertatutako ikastaro bereziak antolatu ahal izango dituzte. Ikastaro horien iraupena gutxienez 60 irakastordukoa izan beharko da. Ikastaro hauen ikastaldeei «81 kolektiboa» jarriko zaie, Q87 izeneko aplikazioan.
Kasu bakoitzean, eskaerarekin batera dagokion erakundeak egin edo onetsitako txostena aurkeztu beharko du euskaltegiak. Eskarian ikastaro bereziaren bitartez lau hizkuntza-trebetasunetan lortu nahi diren helburuak zehaztuko dira. Honelako ikastaroen eskariek hamar eguneko epean ezezko erantzuna jasotzen ez badute, onartuak izan direla ulertuko da.
6.4.– Gabonetako eta Aste Santuko ikastaro bereziak.
6.4.1.– Euskaltegietan, aurrez aurreko jardunean trebetasun zehatzak lantzeko Gabonetako eta Aste Santuko ikastaro bereziak antolatu ahal izango dira. Ikastaro horiek egunean 6 edo 8 irakastorduko saioak izango dituzte, eta gutxienez, 30 irakastorduko iraupena bete beharko dute.
6.4.2.– Barnetegi iraunkorretan trebetasun zehatzak lantzeko ikastaro bereziak: Gabonetako eta Aste Santuko barnetegi ikastaro bereziak antolatu ahal izango dira. Ikastaro horiek egunean 6 edo 8 irakastorduko saioak izango dituzte, eta gutxienez, 30 irakastorduko iraupena bete beharko dute.
7.– Malgutasuna.
Aurreko artikuluetan aurreikusitako ikastaroez gain, euskaltegiak edo autoikaskuntzarako zentroak Eusko Jaurlaritzaren Hizkuntza Politikarako Sailburuordetzak jarritako irizpideen arabera helduen euskalduntzearen esparruan beste ikastarorik emateko asmorik badu, eskabide arrazoitua aurkez lezake HABEren zuzendari nagusiaren aurrean ikastaroa hasi baino hamabost egun lehenago.
Zuzendaritza honek helduen euskalduntzearen sustapenari begira eta Hizkuntza Politikarako Sailburuordetzak jarritako lehentasunak kontuan hartuz ebatziko du eskariaren gainean. Erabakia ezezkoa balitz, HABEren finantzaketatik at gelditzen dela ulertuko da.
II. ERANSKINA
JARDUERA-UNITATEAK ETA TALDE-RATIOAK
2025-2026 IKASTURTERAKO
*Taula honetan ageri den talde-ratioa da onartutako jarduera-unitateetan parte hartu duten ikasleen guztizko kopurua talde guztien kopuruarekin zatituz ateratzen den batez bestekoa, herri-tamainaren araberako ikasleen ponderazioa aintzat hartuta. Bigarren eskaera-aldian eskatutako jarduera-unitateak onartzeko erabiliko den irizpidetariko bat da.