Euskararen tresnak

Lur hiztegi entziklopedikoa

Kultura eta Hizkuntza Politika Saila

Zia Ul-Hak, Muhammad

Pakistandar politikaria eta militarra (Jullundur, Punjab, 1924 - Bahawalpur-etik hurbil, 1988). Bigarren Mundu Gerran parte hartu ondoren ikasketa militarrak egin zituen Estatu Batuetan. Indiaren eta Pakistanen arteko gerran (1965) parte hartu zuen eta koronel izendatu zuten. 1976an jeneral izendaturik, 1977an estatu kolpe bat antolatu zuen. Legebiltzarra desegin, lege martziala ezarri, eta islamiar Errepublika ezarri zuen. 1978an, Pakistango lehendakaritza beretu eta islamiarrak ez beste alderdi politiko guztiak debekatu zituen. 1979an, Ali Bhutto, aurreko lehendakaria, urkarazi zuen. Gobernu militarra bermatzearren alderdi islamiar guztiei dei egin zien alderdi bakarrean batu zitezen. Ez zuen lortu eta alderdi guztiak debekatu zituen. Hegazkin istripu batean hil zen.