Bilbao Bizkaia Film Commission zerbitzu publiko eta doakoa da, eta Bilbon eta Bizkaian filmaketak laguntzea, kudeatzea eta erakartzea du helburu. 2020an egin ziren filmaketen datuak eman ditu: guztira, 122 proiektu gauzatu ziren; horietatik 32 publizitate iragarki, 23 telebista programa, 19 film labur, 12 bideoklip, 15 dokumental, 6 film luze, 4 serie eta 4 webserie.

Pandemiak zenbait proiektu bertan behera utzi eta atzeratzera behartu bazuen ere, 2020an Bilbon eta Bizkaian film luze garrantzitsuak filmatu ziren, hala nola "Interrail", Fernando García Ruizek zuzendua eta Bilbon, Getxon, Gorlizen, Plentzian, Bermeon, Etxebarrian eta Lekeition filmatua; "García y García", Ana Murugarrenen zuzendariarena, Bilboko hainbat tokitan filmatua, hala nola Irala auzoan, Indautxun, Itsasadarrean, Iberdrola Dorrean eta Bilboko Aireportuan; edo “Ilargi guztiak”, Igor Legarretak zuzendua eta Orozkon (Gorbeiako Parke Naturala), Galdamesen eta Erandion filmatua. Gainera, “El Internado" bezalako serieak grabatu dira, Amazon Primerentzat, edo EITBren ekoizpenak, hala nola "Hondar ahoak” eta “Alardea”.

Hori horrela, bulegoak pozik hartu du 2020an Bilbon eta Bizkaian filmatutako hainbat produkziok izan duten harrera ona; horien artean, Galder Gaztelu-Urrutiaren "El Hoyo" filma izanik nabarmenena.